NO MAPAGPAGA o aburido tayo lan maong, ambelbelat so liknaan tayo. (Pro. 12:25) Asalim lay nan-aburidon maong, amay agmo la amtay gawaen mo tan ngalngali ka la ombigay? No asalim la, pulyanan mo ta agmo bukbukor. Say arum ed sikatayo et nan-asikasoy mansasakit ya kapamilya, inateyan na inad-aro, naapektoan na kalamidad, tan dinmalan ed arum ni ran situasyon ya makapakapuy tan makapa-depress. Antoy gawaen mo no ontay situasyon mo? *

Makaaral tayo ed si Arin David. Asali to met so nan-aburidon maong ta dakel so subok ya dinalan to, tan aminpiga ni ingen ya nipeligroy bilay to. (1 Sam. 17:34, 35; 18:10, 11) Panon ton asarag iratan? Tan panon tayon naalig so alimbawa to no wala ray pakakaaburidoan tayo?

Wala ray inkagawa ya nambabansag so problema nen David. Say sakey et nen sikatoy ontatakas ta labay ya pateyen nen Arin Saul. Kasabi nen David tan saray bataan to ed syudad na Ziklag, abigbigla ra ta anengneng dan apoolan iray tolda ya panaayaman da, atakew iray kayarian da, tan anggapo lad man iray pamilya ra! Lapud saman, “inmakis a maksil si David tan saray totoo to, anggad anggapo lay kasil dan onakis.” Say akaaru-arum ni ed problema nen David, pantotongtongan na saray bataan to ya “sikatoy tupaken da.” (1 Sam. 30:1-6) Walay taloran balbaleg ya problema nen David: Agto amta no anto lay agawa ed pamilya to, sikatoy labay ya pateyen na saray bataan to, tan tutugisen nin siansia nen Arin Saul. No sika seguro man, ompan agmo la amtay gawaen mo!

Si David ey, antoy ginawa to? “Pinabiskeg nen David so sarili to diad panamegley nen Jehova a Dios to.” Panon to ’tan ya ginawa ey? Kada no walay problema to, apasalan to lay manpikasi ed si Jehova tan lanang ton iisipen no panon lan tinulongan nen Jehova nensaman. (1 Sam. 17:37; Sal. 18:2, 6) Kanian diad samay inkagawa ed Ziklag, inamta nen David no antoy labay nen Jehova ya gawaen to. Nen naawat nen David so instruksion nen Jehova, sikatoy kinmiwas ya tampol. Kanian benendisyonan ira nen Jehova tan abawi da iray pamilya da, pati saramay tinatakew na saray tulisan. (1 Sam. 30:7-9, 18, 19) Apansin mo no anto may talora ya ginawa nen David? Sikatoy nampikasi pian kerewen so tulong nen Jehova, nandalepdep tan inisip to no panon lan tinulongan nen Jehova nensaman, tan kinmiwas ya tampol nen naawat toy instruksion nen Jehova. Panon mon naalig si David? Niay talora met ya gawaen mo.

1. Manpikasi. No nalilikas mo ya nanaaburido ka la, manpikasi kan tampol ed si Jehova. Kerew moy tulong tan karunongan to, tan ibagam ed sikato so amin ya naliliknam. Pero wala met iray pagkakataon ya antikey labat so naipikasim tan diad isip mo labat. Kada no kerewen tayoy tulong nen Jehova, ipapanengneng tayod sikato ya baleg so tiwala tayod sikato, ya singa si David nen imbaga ton: “Si Jehova so baleg a batok tan say panag-amotan ko tan samay mangililiktar ed siak. Say Dios ko so batok a pansasalimbengan ko.” (Sal. 18:2) Talaga kasin walay nitulong na pikakasi? Oniay imbaga na sakey ya payunir, si Sister Kahlia: “Kayarik ya manpikasi, onkakalma ak. Makakatulong so pampipikasik pian naalig koy  panagnonot nen Aman Jehova, tan lalon ombibiskeg so tiwalak ed sikato.” On, regalo nen Jehova ed sikatayo so pikakasi, tan baleg so nitulong to ’tan pian makainawa tayo no wala ray pakakaaburidoan tayo.

2. Mandalepdep. Isip mo no panon ka lan tinulongan nen Jehova. Kasin wala la ray dinalan mon subok ya alikliknam so tulong nen Jehova? No isipen mo iratan ya agawad bilay mo tan no panon met ya tinulongan nen Jehova iray lingkor to nensaman, ombiskeg so liknaan mo ta antam ya agka paulyanan nen Jehova. (Sal. 18:17-19) “Ililistak iray pikakasik ya inebatan nen Aman Jehova,” so inkuan nen Joshua, ya sakey ya elder. “Ipapanonot na satan ed siak iray agawad bilay ko ya inter nen Jehova iray kerew kod sikato.” On, no isipen tayo no panon itayo lan tinulongan nen Aman Jehova, walay biskeg tayon labanan iray pakakaaburidoan tayo.

3. Kiwas kan tampol. No walay problemam tan kaukolan moy mandesisyon, anap mo ray prinsipyo ed Biblia ya makatulong ed sika. (Sal. 19:7, 11) No walay nalmom ya teksto ya makatulong, i-research mon maong pian antam no panon mon iyaplika. Oniay imbaga nen Jarrod ya sakey ya elder: “No manri-research ak, nanengneng koy amin ya anggulo na sakey ya teksto. Mas natatalosan ko no antoy labay nen Jehova ya gawaen ko. Ontatagos itan ed pusok kanian napapakiwas ak ya unoren so panangigiya to.” No amtaen tayo ray prinsipyo ed Biblia tan unoren tayoy Jehova, ondeen so nonot tayo tan onkepa so panaaburido tayo kanian mas makapandesisyon tayoy duga.

Amta nen David ya pian nasarag to ray pakakaaburidoan to, kaukolan toy tulong nen Jehova. Sikatoy misalsalamat ya maong ed suporta nen Aman Jehova kanian nibaga ton: “Diad pakayari na Dios et nakalab koy padir. . . . Say tuan Dios et kakawesan to ak na biskeg.” (Sal. 18:29, 32) Ompan say pakanengneng tayo ed saray problema tayo et singa ra ataragey ya padir. Pero diad pakayari nen Jehova, nakalab tayo iratan! On, no manpikasi tayod si Jehova, no mandalepdep tayo tan isipen tayo no panon to tayo lan tinulongan, tan no onkiwas tayon tampol base ed panlabayan to, ikdan to tayoy biskeg tan karunongan pian nasarag tayo ray kapagaan tayo!