NKHAWA ingatichitise kukhala wokwinyirira mumtima mwathu. (Miy. 12:25) Ko imwepo munkugumana na vinthu voshupa vomwe vikukuchitisani kukhala na nkhawa pa moyo wanu? Ko vinthu vimwevo vikukuchitisani mpakana kufika kusowa chochita? Peno nteno, dziwani kuti ndimwelini mwekha. Pana vinthu vizinji vomwe vikuchitisa kuti azinji ise timbakhale na nkhawa. Mwakulinganiza anango ankushupika na matenda, kuferewa na matsoka ya chilengedwe. Manje imwepo mungachite chani mukambagumana na mabvuto yatene? *

Tingachite bwino kukambirana chitsanzo cha Mpfumu Davide kuti tiwone vatingachite tikakhala na nkhawa. Iye adagumana na vinthu voshupa maninge pa moyo wake ndipo nthawe zinango angasala pang’ono kuphewa. (1 Sam. 17:34, 35; 18:10, 11) Ko Davide adachita chani kuti alimbane na nkhawa zake? Ndipo ko isepano tingapfunzire chani pa chitsanzo chake?

Davide angagumana na mabvuto yomwe yangandosanzikidzana. Mwakulinganiza, ganizani vomwe vidachitika pomwe Davide angathawa Mpfumu Sauli yemwe angafunisisa kumupha. Panthawe inango pomwe Davide na masocha yake pangabwerera kunkhondo, padafika ku muyi adawona kuti adani wenze abwera nkushoka manyumba yawo, kuwatengera vinthu, akazi na wana wawo nkuyenda nawo. Ko Davide adachita chani? ‘Davide na wanthu womwe wenze naye adayamba kulira maninge mpakana kulefuka ne kukwanisa pomwe kulira.’ Ndipo bvuto inango ni yakuti masocha yomwe angayathemba ‘yangapanga vakuti yamuphe.’ (1 Sam. 30:1-6) Apa Davide angagumana na mabvuto yatatu panthawe ibodzi. Akazi na wana wake enze pangozi, wenze na mantha kuti masocha yake yamuphe ndipo Mpfumu Sauli ingamufagafaga kuti imuphe. Ganizirani nkhawa yomwe Davide wenze nayo!

Nchani chomwe Davide adachita patsogolo pake? Iye mwakankulumize ‘adadzilimbisa mwa Yahova Mulungu wake.’ Ko Davide adachita tani vimwevi? Iye adapemphera kwa Yahova na kuganizira momwe adamuthandizira kumambuyo. (1 Sam. 17:37; Sal. 18:2, 6) Davide adawona kuti yekha angakwaniselini kugwebana na mabvuto mwaya. Ndipomwapa adakumbira Yahova kuti amupase nzeru. Padandoti Davide watambira malangizo yochokera kwa Yahova adayaphatisiratu basa mwakankulumize. Ndipo phindu yake ni yakuti, Davide na masocha yake adadalisiwa maninge na Yahova ndipo adakwanisa kutenga mabanja yawo na vinthu vomwe enze adatengerewa. (1 Sam. 30:7-9, 18, 19) Ko imwepo mwakwanisa kuwona vinthu vitatu vomwe Davide adachita? Iye adapemphera kwa Yahova kuti amuthandize, adaganizira momwe adamuthandizira kumbuyo, ndipo adaphatisa basa malangizo ya Yahova mwakankulumize. Ko mungamutewedzere tani Davide? Onani njira zitatu izi.

1. Mumbapemphere. Nthawe iliyose yomwe tingakhale na nkhawa, timbapemphere kwa Yahova kuti atithandize na kutipasa nzeru. Kuti vimwevi vikwanisike, timbamuuze Yahova vose vomwe vinkutishupa. Panango tingandopemphera mwachigwato nkumufotokozera chamumtima mobverana na momwe vinthu viliri panthawe mweyo. Nthawe iliyose yomwe tinkuyesesa kukumbira Yahova kuti atithandize, ndiye kuti tinkuthemba Yahova ninge momwe Davide adachitira. Iye adalewa kuti: ‘Yahova ni thanthwe yangu na malo yangu yachitetezo na wopereka chipulumuso kwa ine. Mulungu wangu ndiye thanthwe yangu, inepano nidzathawire kwa iye.’ (Sal. 18:2) Ko kupemphera ni kothandizadi? Mulongo munango dzina yake  Kahlia adalewa kuti: “Nikandopemphera nikhala na mtendere. Pemphero inithandiza kuganiza ninge Yahova, ndipo inithandiza pomwe kuti nimbamuthembe maninge.” Kunena shuwa, pemphero ni yamphanvu ndipo ni mphaso yochokera kwa Yahova yomwe itithandiza tikakhala na nkhawa.

2. Kumbukirani. Mukaganizira vomwe vakuchitikirani pa moyo wanu, ko mukukwanisa kukumbukira momwe Yahova adakuthandizirani pa mabvuto yomwe pamwekha mudakakwanisalini kuyapirira? Tikambaganizira momwe Yahova adatithandizira kalekale na momwe adathandizirambo atumiki anango wakalekale, tikhala na mtendere wa muntima ndipo tiyamba kumuthemba maninge. (Sal. 18:17-19) Nkulu munango Joshua adalewa kuti: “Nthawe iliyose yomwe Yahova wadawira pemphero yangu, ninemberatu. Vimwevi vinithandiza kuti nimbakumbukire vinthu vomwe nidakumbira Yahova mwakuchita kutomoleratu mpemphero na kuwona momwe adanidawirira.” Vimwevi vikuchita kuwoneseratu kuti tikamukumbira Yahova kuti atithandize pamabvuto yathu, tidzakhale na mphanvu zokwanisa kulimbana na mabvuto yathu.

3. Chitanipo kanthu. Mukanati kusayina vochita pabvuto yamunayo, yambani mwafagafaga m’Mawu ya Mulungu kuti muwone malangizo yomwe yangakuthandizeni. (Sal. 19:7, 11) Azinji achawona kuti akambafagafaga m’mabukhu yathu kuti abvese bwino vesi yomwe awerenga m’Baibolo, achaibvesa bwino ndipo achawona momwe angaiphatisire basa pa moyo wawo. Nkulu munango dzina yake Jarrod adalewa kuti: “Kufagafaga kunithandiza kugumana mpfundo zosiyanasiyana zofotokozera vesi ndipo nibvesa bwino kuti Yahova akufuna kuti nichite chani. Vinithandiza pomwe kuti nimbakhulupirire maninge vomwe ninkuwerenga ndipo nikwanisa kuviphatisa basa.” Tikambakumbira Yahova kuti atipase malangizo yochokera m’Malemba na kuyesesa kuyaphatisira basa, tidzakwanise kulimbana na nkhawa zathu.

Davide angadziwa bwino kuti ni Yahova yekha yemwe angamuthandize kulimbana na nkhawa zake. Iye angatsimikizira maninge kuti Yahova amuthandize mpakana adafika pakulewa kuti: ‘Na thandizo ya Mulungu, ningakwire chipupa. Mulungu chaiye ndiye achanipasa mphanvu.’ (Sal. 18:29, 32) Mabvuto yakatikulira yangakhale ninge chipupa chomwe tingakwaniselini kuchikwera. Koma na thandizo ya Yahova, tingakwanise kupirira bvuto iliyose yomwe ingawoneke ninge chipupa! Inde, tikambayesesa kupemphera kwa Yahova kuti atithandize, kuganizira momwe iye adatithandizira kale kumambuyo na kuphatisira basa malangizo yake, tingakhale wotsimikiza kuti adzatipase mphanvu na nzeru kuti tikwanise kulimbana na nkhawa zathu!