پریشانی اِک بھار وانگوں اے۔ (‏امثال 12:‏25‏)‏ کیہہ توانوں کدی لگیا اے کہ تُسی پریشانی دے بھار تھلے دبے ہوئے او تے ہُن تُسی اوہنوں ہور نئیں سہہ سکدے؟ جے توانوں اِنج لگدا اے تے تُسی کلّے نئیں او۔ بوہت سارے لوک فرق فرق گلاں دی وجہ توں پریشان ہو جاندے نیں تے اوہناں دی ہمت جواب دے جاندی اے۔ مثال دے طور تے کجھ لوک اپنے گھر دے کسے جی دی دیکھ‌بھال کر رہے نیں جیہڑا بوہت ای بیمار اے، شاید کجھ لوک اپنے کسے عزیز دی موت دا غم سہہ رہے نیں تے شاید کجھ نُوں کسے قدرتی آفت دا سامنا کر‌نا پیا اے۔ کیہڑی چیز پریشانی نال نبڑن چ ساڈی مدد کر سکدی اے؟‏ a

پریشانی نال نبڑن لئی داؤد دی مثال تے عمل کر کے سانوں بڑا فائدہ ہوئے گا۔داؤد نُوں بوہت ساریاں مشکلاں دا سامنا کر‌نا پیا۔کدی کدار تے اوہدی جان وی خطرے چ پے گئی۔(‏1-‏سموئیل 17:‏34، 35؛‏18:‏10، 11‏)‏ پر داؤد پریشانیاں نال کیویں نبڑیا؟تے اَسی اوہدی مثال تے کیویں عمل کر سکنے آں؟‏

کدی کدار داؤد نُوں اِک ای وقت چ کئی مشکلاں دا سامنا کر‌نا پیا۔ ذرا سوچو کہ اوس ویلے اوہدے نال کیہہ ہویا جدوں اوہ بادشاہ ساؤل کولوں اپنی جان بچان لئی بھج رہیا سی۔ جدوں داؤد تے اوہدے ساتھی صقلاج پونچے جتھے اوہناں نے پناہ لئی ہوئی سی تے اوہناں نُوں پتہ چلیا کہ دُشمناں نے اوہناں دِیاں چیزاں لٹ لئیاں نیں، اوہناں دے گھر ساڑ دِتے نیں تے اوہناں دے گھر والیاں نُوں چُک کے لے گئے نیں۔ ایہہ سب ویکھ کے داؤد تے اوہناں دے ساتھی اُچی اُچی رون لگ پئے ایتھوں تک کہ اوہناں چ رون دی طاقت نہ رہی۔ داؤد اُتے پریشانی دا اِک ہور پہاڑ اوس ویلے ڈِگیا جدوں اوہنوں پتہ چلیا کہ اوہدے اپنے ای ساتھی اوہنوں سنگسار کر‌نا چاہندے نیں۔ (‏1-‏سموئیل 30:‏1-‏6‏)‏ داؤد نُوں اِک ای وقت چ تِن مشکلاں دا سامنا ہویا۔ اوہدے گھر والیاں دی جان خطرے چ سی، اوہدے اپنے ای ساتھی اوہنوں جانوں مارنا چاہندے سن تے بادشاہ ساؤل وی ہتھ دھو کے اوہدے پچھے پیا ہویا سی۔ ذرا سوچو کہ داؤد کِنّاں زیادہ پریشان ہویا ہوئے گا۔‏

پریشانی دے ایس وقت چ داؤد نے کیہہ کیتا؟ اوہنے فوراً یہوواہ اپنے خدا چ اپنے آپ نُوں مضبوط کیتا۔ داؤد نے ایہہ کیویں کیتا ہوئے گا؟ اَسی جاننے آں کہ داؤد ہمیشاں مدد حاصل کر‌ن لئی یہوواہ اَگے فریاد کر‌دا سی تے ایس گل تے سوچ‌وچار کر‌دا سی کہ یہوواہ نے ماضی چ کیویں اوہدی مدد کیتی۔ (‏1-‏سموئیل 17:‏37؛‏ زبور 18:‏2،‏ 6‏)‏ داؤد جان دا سی کہ ایس موقعے تے وی اوہنوں یہوواہ کولوں رہنمائی منگن دی لوڑ اے۔ ایس لئی اوہنے یہوواہ دی مرضی نُوں جانن دی کوشش کیتی۔ جدوں داؤد نُوں یہوواہ کولوں ہدیت مِل گئی تے اوہنے فوری طور تے عمل کیتا۔ ایہدی وجہ توں یہوواہ نے اوہنوں تے اوہدے ساتھیاں نُوں برکت دِتی تے اِنج اوہ اپنے گھر والیاں تے اپنیاں چیزاں نُوں دُشمناں دے ہتھاں چوں چھڈا سکیا۔ (‏1-‏سموئیل 30:‏7-‏9،‏ 18، 19‏)‏ کیہہ تُسی غور کیتا کہ داؤد نے کیہڑے تِن کم کیتے؟ اوہنے مدد لئی یہوواہ کولوں دُعا کیتی، ایس گل تے سوچ‌وچار کیتا کہ ماضی چ یہوواہ نے اوہدے لئی کیہہ کجھ کیتا اے تے یہوواہ دی ہدیت تے عمل وی کیتا۔ اَسی داؤد دی مثال تے کیویں عمل کر سکنے آں؟ آؤ، ایس سلسلے چ تِن طریقیاں تے غور کر‌یئے۔‏

1.‏ یہوواہ کولوں دُعا کر‌و۔‏ ساڈے تے جدوں وی کوئی پریشانی آندی اے تے اَسی مدد تے سمجھ‌داری لئی یہوواہ کولوں دُعا کر سکنے آں۔ جدوں اَسی دل کھول کے یہوواہ نُوں اپنیاں پریشانیاں بارے دَسنے آں تے ساڈے دل دا بھار ہولا ہو جاندا اے۔ شاید اَسی ایہو جہی حالت چ آں جدے چ اَسی یہوواہ کولوں بس دل چ چھوٹی جہی دُعا کر سکنے آں۔ جدوں اَسی پریشانی چ یہوواہ کولوں مدد منگنے آں تے اَسی داؤد وانگوں یہوواہ تے بھروسا کر رہے ہنے آں جنہے کہیا:‏ یہوواہ میری چٹان، تے میرا قلعہ، تے میرا چھڈان والا اے۔ میرا خدا، میری چٹان جدے تے میں بھروسا رکھاں گا۔ (‏زبور 18:‏2‏)‏ کیہہ دُعا کر‌ن دا واقعی فائدہ ہوندا اے؟ اِک پہل‌کار بھین جدا ناں کیلی اے، اوہ کہندی اے:‏ ”‏دُعا کر‌ن دے بعد میں بوہت سکون محسوس کر‌نی آں۔ اِنج کر‌ن نال میں اپنی سوچ نُوں یہوواہ دی سوچ دے مطابق ڈھال پانی آں تے میں اوہدے تے پہلاں توں وی زیادہ بھروسا کر‌ن لگ پینی آں۔“‏ ایہدے چ کوئی شک نئیں کہ  دُعا خدا وَلّوں اِک بوہت ای ودھیا نعمت اے جیہڑی پریشانیاں نال نبڑن چ ساڈی مدد کر‌دی اے۔‏

2.‏ سوچو کہ یہوواہ نے پہلاں تواڈی مدد کیویں کیتی۔‏ جدوں تُسی اپنے ماضی بارے سوچدے او تے کیہہ توانوں کوئی ایہو جہی مشکل یاد آندی اے جنہوں تُسی صرف یہوواہ دی مدد نال ای حل کر‌ن دے قابل ہوئے سو؟ جدوں اَسی ایہدے بارے سوچنے آں کہ یہوواہ نے ماضی چ اپنے بندیاں دی مدد کیویں کیتی تے اوہنے ساڈی کیویں مدد کیتی اے تے اِنج سانوں اپنیاں پریشانیاں نال نبڑن لئی ہمت مِلدی اے تے اوہدے تے ساڈا بھروسا ودھدا اے۔ (‏زبور 18:‏17-‏19‏)‏ ذرا کلیسیا دے اِک بزرگ دی گل تے غور کر‌و جدا ناں جوشوعا اے۔ اوہ کہندا اے:‏ ”‏میرے کول تے اپنیاں اوہناں دُعاواں دی لسٹ اے جنہاں دا یہوواہ نے جواب دِتا۔ ایس طرحاں مینوں اوہ ویلا یاد رہندا اے جدوں میں کسے گل لئی یہوواہ کولوں دُعا کیتی تے اوہنے میری ایس طریقے نال مدد کیتی جدی مینوں اوس ویلے واقعی لوڑ سی۔“‏ ایہدے چ کوئی شک نئیں کہ جدوں اَسی ایس بارے سوچنے آں کہ یہوواہ نے کیہڑے کیہڑے طریقے نال ساڈی مدد کیتی اے تے سانوں اوہناں پریشانیاں نال نبڑن دی ہمت مِلدی اے جنہاں دا اَسی ہُن سامنا کر رہے آں۔‏

3.‏ یہوواہ دی ہدیت تے عمل کر‌و۔‏ ایہہ فیصلہ کر‌ن توں پہلاں کہ اَسی کسے پریشانی نال کیویں نبڑاں گے، سانوں خدا دے کلام توں رہنمائی حاصل کر‌ن دی لوڑ اے۔ (‏زبور 19:‏7،‏ 11‏)‏ بوہت سارے بھین بھراواں نے ویکھیا اے کہ جدوں اوہ کوئی خاص ایت بارے تحقیق کر‌دے نیں تے اوہ چنگی طرحاں سمجھ جاندے نیں کہ ایہہ ایت اوہناں دی صورتحال تے کیویں لاگو ہوندی اے۔ کلیسیا دا اِک بزرگ جدا ناں جیرڈ اے، کہندا اے:‏ ”‏تحقیق کر‌ن نال میں اِک ایت نُوں چنگی طرحاں سمجھ پانا واں تے ایہہ ویکھ سکنا واں کہ یہوواہ مینوں کیہہ کر‌ن لئی کہہ رہیا اے۔ اِنج کر‌ن نال اوس ایت چ لکھی گل تے میرا یقین ہور پکا ہو جاندا اے تے میں یہوواہ دی ہدیت تے عمل کر پانا واں۔“‏ جدوں اَسی یہوواہ توں رہنمائی حاصل کر‌ن لئی اوہدے پاک کلام نُوں پڑھنے آں تے ایہدے چ لکھیاں گلاں تے عمل کر‌نے آں تے اَسی پریشانیاں نال چنگی طرحاں نبڑن لئی تیار ہو جانے آں۔‏

داؤد نُوں پتہ سی کہ اوہ یہوواہ دی مدد نال ای اپنیاں پریشانیاں نال چنگی طرحاں نبڑ سکدا اے۔ اوہ یہوواہ دی مدد لئی اوہدا ایناں شکرگزار سی کہ اوہنے آکھیا:‏ اپنے خدا دی مدد نال ای‌میں کند پار کر جانا واں۔ خدا ای مینوں زور بخش دا اے۔ (‏زبور 18:‏29،‏ 32‏)‏ ہو سکدا اے کہ سانوں لگے کہ ساڈیاں پریشانیاں بوہت ای اُچی کند وانگوں نیں جنہاں نُوں پار کر‌نا ساڈے وَس چ نئیں اے۔ پر یہوواہ دی مدد نال اَسی اِنج کر سکنے آں۔ جدوں اَسی مدد لئی یہوواہ کولوں دُعا کر‌اں گے، ایہدے بارے سوچ‌وچار کر‌اں گے کہ اوہنے ساڈے لئی کیہہ کجھ کیتا اے تے اوہدیاں ہدیتاں تے عمل کر‌اں گے تے اَسی ایس گل تے پکا یقین رکھ سکاں گے کہ اوہ سانوں ہمت تے سمجھ دَوے گا تاکہ اَسی اپنیاں پریشانیاں نال چنگی طرحاں نبڑ سکئے۔‏