PWUNOD laud kak wia mehkot katoutou. (Lep. Pad. 12:25) Mie pak ke lelohng pwunod laud nan omw mour? Mie pak me ke pehm me ke solahr kak dadaur pahn kapwunod? Ma ei, kaidehn kowe kelehpw. Me tohto rehtail kin uhdahn pwangada, pwunodada, oh mworuskihla soangen kahrepe tohto. Karasepe, ekei kitail kin apwalih atail peneinei me soumwahu, ekei kitail kin mie me kitail poakohng mehla, oh ekei kitail kin lelohng kahpwal kan duwehte melimel de rerrer en sahpw ape. Ahpw dahme kak sewese kitail en dadaurete pahn kapwunod kan? *

Kitail kak sukuhlki soahng tohto ong ia duwen atail en dadaur pahn kapwunod kan sang ni atail tehkpene mehn kahlemeng en Nanmwarki Depit. E lelohng kahpwal tohto nan eh mour, oh pil ekei pak e kin kereniong mehla. (1 Sam. 17:34, 35; 18:10, 11) Dahme sewese Depit en dadaurete pahn eh kapwunod kan? Ia duwen atail kak alasang eh mehn kahlemeng?

Depit lelohng kahpwal kei erein ahnsou tehieu. Karasepe, medewehla kahpwal ehu me pwarada nindoken eh tangatangasang Nanmwarki Sohl, me men kemehla ih. Ni Depit oh nah ohl ako ar pwurasang ni mahwen ehu, irail diarada me arail imwintihti ko pirapahsangehr arail kepwe kan, isikala imwarail ko, oh wahsang arail peneinei ko. Dahme Depit wia? “Depit oh nah sounpei ko ahpw tapihada sengiseng oh sohte tokedi lao re ngirala.” Patehng met, nein Depit sounpei ko me e kin koapworopworki, “koasoakoasoaneier re en katehki takai.” (1 Sam. 30:1-6) Eri Depit ahneki kahpwal laud siluh erein ahnsou tehieu: Eh peneineio mihla nan keper, e masak nah ohl ako de kemehla ih, oh Nanmwarki Sohl pwakipwakihete. Eri Depit uhdahn ahneki pwunod laud!

Dahme Depit wia mwuhr? E mwadangete sohpeiong Siohwa oh Siohwa “ketin kakehlahda nan kapehde.” Ia duwen Depit eh wia met? Kitail ese me Depit kin kalapw kapakap ong Siohwa oh peki sawas oh kin medemedewe ia duwen Siohwa eh ketin sewese ih mahso. (1 Sam. 17:37; Mel. 18:2, 6) Depit ese me e anahne peki Siohwa en ketin padahkihong ih dahme e anahne wia, eri e peki Siohwa en ketin kaweid ih. Mwurin Depit eh alehdi kaweid sang rehn Siohwa, e mwadangete kapwaiada. Imwilahn met, Siohwa ketin kapaiahda ih oh nah ohl ako oh re kapitala arail peneinei ko oh kapwurehda arail kepwe ko. (1 Sam. 30:7-9, 18, 19) Ke tehk soahng siluh ko me Depit wia? E kapakap ong Siohwa oh peki sawas, medemedewe duwen Siohwa eh ketin sewese ih mahso, oh kapwaiada sapwellimen Siohwa kaweid. Ia duwen atail kak alasang Depit? Medewehla ahl siluh pwukat.

1. Kapakap. Ahnsou koaros me kitail pwunodada, kitail kak peki sawas oh erpit sang Siohwa. E kak ketin sewese kitail en nsenamwahula ni atail padahkihong ih soahng koaros me kin kapwunode kitail. De kitail kak kapakap ni mwotomwot oh ni ngihl tikitik ma ih soangen kapakapo me konehng atail irairo. Ahnsou koaros me kitail kin peki Siohwa sawas, kitail kin kasalehda me kitail likih ih, duwehte me Depit wia, me koasoia: “KAUN-O me silepei; ih me kelepei kehlail. Ei Koht me silepei, I kin nekinek mwahu pahn kupwure.” (Mel. 18:2) Ia duwe, kapakap kin uhdahn sawas? Pioneer men me adaneki Kahlia koasoia: “Mwurin ei kin kapakap, I kin meleileidi. Kapakap kin sewese  ie en ahneki sapwellimen Siohwa madamadau, oh pil kalaudehla ei likih ih.” Ei mehlel, kapakap iei kisakis ehu sang Siohwa me uhdahn kehlail me kak sewese kitail en dadaur pahn kapwunod kan.

2. Medemedewe. Ni omw medewehla dahme wiawihong uhk mahso, ke kak medewehla kahpwal kan me ke kak powehdi pwehki sapwellimen Siohwa sawas? Ni atail kin medemedewe ia duwen Siohwa eh ketin sewese kitail oh pil sapwellime ladu kan mahso, met kin kalaudehla atail meleilei oh atail likih Siohwa. (Mel. 18:17-19) Elder men me adaneki Joshua koasoia: “I kin ntingihedi ei kapakap kan me pasapengla. Met sewese ie en tamanda ahnsou kan me I peki rehn Siohwa soahng ehu me I uhdahn anahne oh e ketin sapengala.” Ei, ni atail kin medewehla dahme Siohwa ketin wiadahr ong kitail, kitail kin kehlailda oh dadaurete pahn atail kapwunod kan.

3. Kapwaiada. Mwohn atail pilada dahme kitail pahn wiahiong irair ehu, kitail kak rapahki kaweid me keieu mwahu nan Mahsen en Koht. (Mel. 19:7, 11) Me tohto diarada me ni arail kin wia roporop duwen iren Paipel ehu, irail kin wehwehkihla mwahu ia duwen ireo eh kadoadoahk nan arail mour. Emen elder me adaneki Jarrod koasoia: “Ei wia roporop kin sewese ie kalaudehla ei esehla iren Paipel ehu oh wehwehki dahme Siohwa kin ketin mahmahsaniong ie. Met sewese ie en uhdahn kamehlele dahme I wadek oh kak kapwaiada sapwellime kaweid.” Ni atail kin rapahki kaweid sang nan Paipel oh kapwaiada, met pahn sewese kitail en ahneki meleilei oh peren ni ahnsou me kitail kin pwunodada.

Pwehn dadaurete pahn eh kahpwal kan, Depit ese me e anahne sawas sang rehn Siohwa. E uhdahn kalahnganki sapwellimen Siohwa sawas me kahrehda e koasoia: “Komw . . . ketikihong ie manaman pwe I en kak powehdi arail kelen mahwen kan. Ih Kohto me kin ketin kakehlaiehda.” (Mel. 18:29, 32) Ele kitail kin medewe me atail kapwunod kan rasehng kehl ehu me kitail sohte kak dauredi de powehdi. Ahpw pwehki sapwellimen Siohwa sawas, kitail kak uhdahn powehdi kahpwal laud koaros! Ei mehlel, ni atail kin kapakap oh peki sawas sang rehn Siohwa, medemedewe soahng koaros me e ketin sewesekin kitail, oh kapwaiada sapwellime kaweid, kitail kak uhdahn kamehlele me e pahn ketikihong kitail kehl oh erpit me kitail anahne pwehn dadaurete pahn atail kapwunod kan!