ALAPA yarpachacushgaga lasaj guepita aprishganomi taricushun (Prov. 12:25). ¿Imaylapis chayno taricushcanquichu? ¿Öraga ‘manana puedënachu’ nishgayquirächu? ‘Aumi’ niptiquega, manami gamlachu chaypa pasanqui. Lapanchimi gueshyapäcushcanchi, wanupacushcanchi, ima desgraciapis pasamashcanchi; y chayraycur alapa laquicuyman chayashcanchi y calpaynajpis ricacushcanchi. ¿Imata rurashwan alapa yarpachacuycarla mana caycänapaj? a

Rey Davidpita yachacurga yanapämäshun yarpachacuycarla mana caycänapaj. Payga imaycacunaparämi pasashga, cawayninpis peligrucho caycash (1 Sam. 17:34, 35; 18:10, 11). ¿Imata pay rurargan? ¿Y noganchipis paynola imata rurashwan?

Davidga achca laquesacunapa pasargan. Juc cuticho Saulpis wanuchinanpaj gaticachargan. Chay tiempucho David soldaduncunawan peliashganpita cutimur tarergan imano chiquejnincuna tiyashgan marcata chipyaypa rupachishganta, imaycancunatapis y ayluncunatapis preso apacärergan. ¿Imanotaj David ricacurgan? Biblia nin: “Davidqa yanapaqninkunawan iktsushqanyaq waqapäkurqan”. Manami chaylachu, soldaduncunapis “Davidta saqmayta munapäkurqan” (1 Sam. 30: 1-6). Chauraga jinalancho Davidga quimsa problemacunapa pasaycargan; ayluncuna peligrucho caycargan, soldaduncuna wanuchiyta munargan, rey Saulpis wanuchinanpaj gaticachaycargan. Chayga alapa sasachi cargan.

Chaymi Davidga jinan hora Jehovapa yanapacuyninta ashergan. Payga imaypis Jehovata mañacoj y unaycho imano yanapashganman yarpachacoj (1 Sam. 17:37; Sal. 18:2, 6). Jinamanpis chay hora David Jehovata mañacurgan tapupänanpaj imata rurananpäpis. Y Jehová nishganta rurargan. Chayno rurashganpitami chiquejnincunata maquinpita ayluncunata y imaycancunata cutichimunanpaj yanapargan. ¿Tantiacushcanqui David imatataj rurargan? Jehovata mañacurgan, yarpachacurgan yanapashganman y Jehová nishganman jina rurargan. ¿Noganchipis Davidno imata rurashwan?

1. Mañacushun. Alapa yarpachacuyta galaycurga Jehovata mañacushun yanapämänanchipaj. Shongunchita mashtapaycur lapanta wilapaptinchega ancashlami ricacushun y shongulanchichopis Paytaga mañacushwanmi. Chayta rurarga Davidnomi cayno nishun: “TAYTA DIOSQA tsapämaqnï qaqami kaykan. Pakakunä y salvamaqnïmi kaykan” (Sal. 18:2). ¿Diosta mañacuptinchega yanapämashwanchuraj? Aumi. Precursorano yanapacoj paninchi Kahlia cayno nin: “Jehovata mañacuycurga jaucala ricacö. Pay yarpashganmanna yarpayta galaycö y yäracurcö”.  Mañacuyga Jehovapa regalunmi, yanapämanchi yarpachacuycarla mana caycänapaj.

2. Yarpachacushun Jehová yanapämashganchiman. Problemanchicuna captin imano Jehová yanapämashganchiman yarpar y unaycho siervuncunata imano yanapashganman yarpachacurga yanapämäshun ima captinpis jaucala y Jehovalaman yäracuycarla cawacunanchipaj (Sal. 18:17-19). Yanapacoj hermanunchi Joshua cayno nin: “Juc listata chararä mañacushgäta Jehová imano contestamashgancunapita. Chaynopa mana gonganäpaj Jehová necesitashgäcunata gomashganpita”. Jehová yanapämashganchicunaman yarparga calpatapis charashunmi yarpachacuycarla mana caycänapaj.

3. Jehová nimashganchicunata rurashun. Imatapis manaraj rurar Bibliacho consejucunata ashishun (Sal. 19:7, 11). Waquintaga Bibliacho versiculucuna shumaj tantiacushganmi yanapargan cawaynincho ali cajta rurananpaj. Jarrod jutiyoj ancianumi cayno nin: “Juc versiculuta shumaj yachacurcuptega tantiämi Jehová ima nimashganta ruranäpaj, shongömanpis chayanmi y imatapis pay munashganno rurä”. Bibliacho Jehovapa consejuncunata ashir y chay consejuncunata cäsucurga, yanapämäshun yarpachacuycarla mana caycänapaj.

Davidga yäracurgan Jehovapa yanapacuyninwan alapa yarpachacuycunata vencinanpaj. Chaymi David nergan Jehovapa yanapacuyninwanrämi “marka murällan altu kaptinpis achpaypami yaykushaq”. Caytapis nergan: “Tayta Dios kikinmi kalpatapis qoman” (Sal. 18:29, 32). Öraga nishwanchi ‘problemäga juc jatun murallanomi’ nir, pero Jehovapa yanapacuyninwanga imayca problemacunatapis vencishunmi. Yanapacuyninta mañacuptinchi, imano yanapämashganchicunaman yarpachacur y Jehová munashganno imatapis rurarga, payga valurtami gomäshun y ali cajta yarpänapäpis yanapämäshun.