ANSIEDAD unguica ushashcatami llaquichita ushan (Prov. 12:25). ¿Nachu huaquinbica chai unguihuan padecipashcangui? Huaquinbica chai unguihuanga imatapash ñana rurai ushanshnami sintiripashcanchi. Ashtacacunami shina sintiripashcanchi. Huaquinbica familiamanda pipash huañujpi o shuj shuj llaquicunata charimandami ninanda sufrishpa ansiedad unguihuan padecipashcanchi. Pero ansiedad unguita controlachunga ¿imata ayudanga? a

Rey Davidpa ejemplomi cai ansiedad unguita controlachun ayudaita ushan. Davidca ashtaca shinlli llaquicunatami charirca. Paica huañunamandapashmi salvarirca (1 Sam. 17:34, 35; 18:10, 11). Rey Davidca ansiedad unguitaca ¿imashinata controlai usharca? Rey Davidpa ejemplotaca ¿imashinata cati ushapanchi?

Davidca llaquicunataca cati catimi charirca. Por ejemplo paica, rey Saúl ama huañuchichunmi pacajuna tucurca. Shuj punllaca David paipa soldadocunahuan shuj guerramanda tigramushpaca, contra soldadocuna paicunapa huasicunata rupachishpa, paicunapa charishca cosascunata, familiacunatapash apashpa rishcatami tupagrirca. Chaita ricushpaca rey Davidca paipa soldadocunandi ninanda llaquirishpami, fuerzapash illaj quidangacaman huacashca ninmi. Shinapirami Davidhuan ali llevarijcunapash llaquicunamanda Davidta culpashpa rumihuan huañuchinata parlarinajushca carca (1 Sam. 30:1-6). Davidca chai ratopillatami quimsa llaquicunahuan chimbapurana tucurca. Paipa familiaca llaquipimi carca. Shinallata pai confiashca gentecunapash, rey Saulpashmi paitaca huañuchingapaj munarca. Shinaca cashna llaquicunahuan cashpaca Rey Davidca ninanda preocupado, llaqui llaquimi sintirijushcanga.

Shina sintirijushpaca Davidca Jehovapa ayudatami mascarca. Davidca Jehová Diosta mañashpa paipa ayudata mañana costumbreta, Jehová Dios ayudashcapi pensarina costumbretami charirca (1 Sam. 17:37; Sal. 18:2, 6). Davidca Jehovapa ayudata minishtishcata cuenta japishpami Jehová Diospa ayudata mascarca. Jehová ima nishcata yachashpaca uchallami rurarca. Shina rurashcamandami Davidca paipa familiata, paipa charishca cosascunatapash recuperai usharca (1 Sam. 30:7-9, 18, 19). Shinaca Davidca cai ansiedad unguita mishangapaca ¿ima quimsa cosascunatata rurarca? Callaripica, Jehová Diostami paita ayudachun mañarca. Catipica, Jehová Dios paita pundacunapi imashina ayudashcapi pensarirca. Chai jipaca, Jehová Dios imata rurachun mandashcatami rurarca. Shinaca ñucanchicunaca ¿imashinata Davidpa ejemplota catita ushapanchi? Quimsa yuyaicunata ricupashunchi.

1. Jehová Diosta mañana. Ansiedadhuan sufrijushpaca Jehová Diostami ayudahuai nishpa mañana capanchi. Jehová Diosta mañashpa ñucanchi imashna sintirishcata tucuita villashpaca tranquilomi sintiripashun. Huaquin situaciongunapi normalmente Jehovata na mañai ushashpapash, shungu ucupillapash ñapash mañanallami capanchi. Jehová Diosta mañashpami David cuenda Jehovapi confiashcata ricuchinchi. Davidca: “Mandaj Diosca, ñucapaca jatun Rumishnami. Shinlli jatun huasishna ñucata pacaj, ñucata cacharichijmi” nircami (Sal. 18:2). Jehovata mañanaca ¿ciertopachachu ayudan? Kahlia shuti precursora paniguca: “Jehovata mañashpaca tranquilami sintirini. Jehová  Dios imashna pensajtapash pensachunmi ayudahuan. Shinami Jehovapi ashtahuan confiai ushani” ninmi. Jehovata mañanaca shuj jatun bendicionmi can. Jehovata mañanaca ñucanchicuna ama yapa ansiedadhuan sintirichun, tranquilo sintirichunmi ayudaita ushan.

2. Jehová Dios imashina ayudashcapi pensaripashunchi. Jehová ñucanchita pundacunapi imashina ayudashcapi pensarina, shinallata paita punda sirvijcunata Jehová imashina ayudashcapi pensarinami, ñucanchicuna paipi ashtahuan confiachun, ashtahuan tranquilo sintirichun ayudaita ushan (Sal. 18:17-19). Joshua shuti anciano huauquiguca: “Ñucaca Jehová Dios ñucata imacunapilla ayudashcataca anotashpami charini. Shinami ñuca imata minishtijushcatapacha Jehová Diosta mañajpi, Jehová chaipipacha ayudahuashcata yari ushani” nircami. Shinaca Jehová Dios ñucanchita imashina ayudashcapi pensarinami, ñucanchicuna ansiedad unguihuan cashpapash shinlli tucushpa ñaupaman catichun ayudanga.

3. Jehová munashcashna rurapashunchi. Shuj situacionbi imata ruranata nara decidishpallatami Bibliapa consejocunata ricuna capanchi (Sal. 19:7, 11). Ashtacacunaca Bibliamanda shuj textoguta ashtahuan aliguta investiganami aliguta intindichun, chai consejocunata imashna ñucanchi causaipi pactachinata cuenta urmachunbash ayudan ninmi. Jarrod shuti shuj anciano huauquiguca: “Investiganami, chai versiculomanda imatapacha nijushcata ashtahuan intindichun ayudahuashca. Shinami Jehová imatapacha ningapaj munashcata intindishpa, chai shimicuna shunguman chayajpi ñucapa causaipi pactachina munaita charini” ninmi. Shinaca Jehovapa ayudata mascashpa, Bibliapi nishcacunata pactachishpaca, ñucanchicunaca ansiedad unguita charishpapash aguantashpa catita ushapashunmi.

Davidca ansiedad unguita mishai ushangapaca, Jehovapa ayudata minishtishcataca alimi yacharca. Davidca Jehová ayudashcamanda agradicishpami: “Ñuca Taita Dioshuanga jatun pircacunatapash urmachishpa yalishallami. Taita Diosmi, chumbilichinshna ushaita cuhuan” nirca (Sal. 18:29, 32). Shinaca llaquicunaca shuj jatun jatun pircashnami caita ushan. Shinapash Jehovapa ayudahuanga mishaita ushapanchimi. Jehová Diosta mañashpa, Jehová imacunapilla ñucanchita ayudashcapi pensarishpa, Jehová munashcashna imatapash rurangapaj esforzarishpaca ansiedad unguipi aguantashpa catichun, Jehová ayudanataca seguromi sintirishun.