KA AKATEIAA te tu taitaia i to tatou ngakau. (Mase. 12:25) Kua tupu ainei te reira kia koe? Kua manako ainei koe e kare e rauka ia koe i te akakoromaki i te reira? Kare ko koe ua te na roto ra i teia turanga. Kua tupu te taitaia ki te au tangata e manganui. Ei akaraanga, te akono nei tetai pae i to ratou ngutuare tangata tei tuia e te maki, kua mate tetai o to ratou akaperepere, me kore kua tupu tetai tumatetenga natura i to ratou ngai. Inara, eaa te ka tauturu ia tatou kia akakoromaki i te tu taitaia? a

E maata ta tatou ka apii mai mei te Ariki ko Davida no te akakoromaki i te tu taitaia. Kua na roto ana aia i te au turanga ngatā i tona oraanga, e i tetai au taime kua inangaro tetai ke i te tamate iaia. (1 Samu. 17:34, 35; 18:10, 11) Akapeea a Davida i te akakoromakianga i te tu taitaia? Akapeea tatou me aru i tona akaraanga?

E maata te au manamanata tei tupu kia Davida i te taime okotai. Ei akaraanga, kua tupu tetai manamanata i te tuatau e oro ra aia mei te Ariki kino ko Saula. Te oki mai anga a Davida e tona pupu vaeau mei te tamaki, kua kite mai ratou e kua keiaia ta ratou apinga, kua tutungiia to ratou are ki te aʼi, e kua apainaia to ratou ngutuare tangata. Eaa ta Davida i rave? “Kua akateitei akerā Davida e te au tangata ki ona ra i to ratou reo, kua aue iora, e kare atura o ratou maroiroi kia aue.” Kua maata atu to Davida manamanata, no te mea “kua tuatua oki te au tangata e, e peî iaia ki te toka.” (1 Samu. 30:1-6) E toru a Davida manamanata kino tikai tei tupu i te taime okotai: Kua apainaia tona ngutuare tangata, kua inangaro tona pupu vaeau i te tamate iaia, e te arumaki maira te Ariki ko Saula iaia. E akamanako ana i te taitaia maata ta Davida e na roto ra!

Eaa ta Davida i rave? “Kua akamaroiroi rā Davida iaia uaorai i tona ra Atua ia Iehova.” Akapeea aia i te rave anga i teia? E mea mātau na Davida kia pure kia Iehova no te tauturu e kia akamanako akapeea te Atua i te tauturuanga iaia. (1 Samu. 17:37; Sala. 18:2, 6) E oti, kua kimi a Davida i te aratakianga a Iehova, no reira kua pure a Davida kia Iehova eaa tana ka rave. Te raukaanga mai te aratakianga a Iehova, kua aru viviki aia i te reira. Tei tupu, kua akameitaki a Iehova iaia e tona pupu vaeau e kua akaokiia mai to ratou ngutuare tangata e ta ratou au apinga. (1 Samu. 30:7-9, 18, 19) Te kite ra koe i te au mea e toru ta Davida i rave? Kua pure aia kia Iehova no te tauturu, kua akamaara aia akapeea a Iehova i te tauturuanga iaia i mua ana, e kua rave i ta Iehova i tuatua mai. Akapeea tatou me aru i te akaraanga o Davida? Akamanako ana e toru ravenga.

1. Pure. Me tupu te taitaia, e pure kia Iehova no te tauturu e te kite pakari. Ka maru mai to tatou ngakau me akakite i to tatou au manamanata kiaia. Me kore, ka rauka ia tatou i te pure muteki ua. Me kimi tatou i te tauturu a Iehova, te akaari ra tatou i te irinaki mei ia Davida rai, tei tuatua:  “Ko Iehova taku mato, e taku punanga, e toku nei ora; toku Atua, toku mato, koia taku ka irinaki atu.” (Sala. 18:2) Ka tauturu ainei te pure ia tatou? Karanga te tuaine ko Kahlia: “Me pure au, ka rauka mai te manako ’au. Ka tauturu te pure iaku kia aru i to Iehova aerenga manako e ka ketaketa atu toku irinaki ki roto iaia.” E apinga aroa te pure no ko mai ia Iehova te ka tauturu ia tatou kia akakoromaki i te taitaia.

2. Akamaara. Me akamanako koe i toou oraanga, ka maara ainei ia koe i te au taime kua tauturu a Iehova ia koe kia akakoromaki i te manamanata? Me akamaara tatou akapeea a Iehova i te tauturuanga ia tatou e tona au tavini i taito, ka irinaki maata atu tatou iaia. (Sala. 18:17-19) Karanga te tangata pakari ko Joshua: “E tata ana au i te au taime kua pauia mai taku pure. Kua tauturu teia iaku kia akamaara i te au taime kua oronga mai a Iehova i te tauturu taku e anoano ra.” Ae, me akamanako tatou i ta Iehova i rave no tatou i mua ana, ka akamaroiroi te reira ia tatou kia akakoromaki i te au turanga taitaia.

3. Rave. I mua ake tatou ka rave ei i tetai ikianga, ka kimi tatou i te aratakianga i roto i te Pipiria. (Sala. 19:7, 11) Kua kite mai tetai pae e me kimi oonu ratou i tetai irava, ka mārama ratou akapeea me taangaanga i te reira. Karanga te tangata pakari ko Jarrod: “Me kimi oonu au i tetai irava, ka mārama au i ta te reira e apii maira, e ta Iehova e anoano ra iaku kia rave. Tauturu tikai teia iaku kia irinaki e kia aru i tana aratakianga.” No reira, me kimi tatou i ta Iehova aratakianga i roto i te Pipiria e te aru i te reira, ka rauka ia tatou i te akakoromaki i te tu taitaia.

Kua mārama a Davida e ka anoanoia ta Iehova tauturu kia akakoromaki i te taitaia. Kua akaperepere aia i ta Iehova tauturu e kua karanga: “Ia koe rai i mama atu ei au na roto i te takanava toa ra; e kua taea te patu e au i taku Atua. Ko te Atua i tatua mai iaku ki te maroiroi, e kua akariro i toku nei arataa ei mea apa kore.” (Sala. 18:29, 32) Penei ka manako tatou e kare e rauka i te akakoromaki i to tatou manamanata. Inara, ma te tauturu a Iehova, ka rauka ia tatou! Ae, me pure tatou kia Iehova no te tauturu, me akamaara i tana i rave no tatou, e me rave i tana e anoano ra, ka papu ia tatou e ka oronga mai aia i te maroiroi e te pakari kia akakoromaki i te tu taitaia!