SEBEPI o brige, e manušese šaj te ovel but pharo ko vilo (Posl. 12:25). Da li osetinđan kobor tano pharo ked isi tut but bare brige? Da li isi tut odobor problemija so sa alo tuće đi o nak? Ako tano ađahar, na hijan kokri. But amendar tane umorna, zabrinime hem depresivna sebepi o razna buća. Na primer, disave amendar brininena pe nekastar koj tano nabormo, našalđe nekas kas manglje ja patinena sose doživinđe disave prirodna katastrofe. Ama, so šaj te pomožini amenđe te aćhova bahtale hem te ovel amen mir iako isi amen brige? *

Ando kralj David šaj but te sikljova sar te istrajina ked isi amen brige. Ov nakhlja but pharipa ko životi hem nekobor putija hari falinđa te merel (1. Sam. 17:34, 35; 18:10, 11). Ama, so pomožinđa e Davidese ked hine le brige hem sar šaj amen te ova sar oleste?

O David hine le but problemija kotar jekhvar. Razmislin so ulo ked našlja kotar kralj Saul kova manglja te mudari le. Ked o David hem olese manuša irinđe pe ando maribe, on dikhlje so olenge dušmanija lelje lendar sa so hine len, tharđe olenge ćhera hem legarđe olenge porodicen ko zarobljeništvo. Sar o David reagujinđa? „O David hem o manuša kola hine oleja runđe ko glaso hem ađahar runđe sa đi na našalđe pi snaga“. Uzo odova so e Davidese hine but pharo, olese manuša „phenđe so ka forden bara upro leste“ (1. Sam. 30:1-6). O David kotar jekhvar hine le trin bare problemija: Olesi porodica hine ki opasnost, darandilo so olese manuša ka mudaren le hem o kralj Saul manglja te mudari le. Zamislin samo kobor hine pharo e Davidese!

So o David ćerđa? Ov odmah „ohrabrinđa pe sose uzdajinđa pe ko Jehova, po Devel.“ Sar ćerđa odova? Ked god hine ko problemija, o David molinđa e Jehova te pomožini lese hem razmislinđa sar o Jehova angleder pomožinđa lese (1. Sam. 17:37; Ps. 18:2, 6). O David đanđa so valjani te rodel savet ando Jehova. Odolese, ov pućlja e Jehova so te ćerel. Ked o Jehova phenđa lese so te ćerel, o David odmah ćerđa odova. Odolese, o Jehova blagoslovinđa ole hem olese manušen hem on irinđe pe porodicen hem sa so hine len (1. Sam. 30:7-9, 18, 19). Da li zapazinđan kola trin buća o David ćerđa? Ov molinđa e Jehova te pomožini lese, razmislinđa sar o Jehova pomožinđa lese angleder hem ćerđa odova so o Jehova phenđa lese. Sar šaj tu te ove sar o David? Akana ka dikha trin buća.

1. Molin tut. Svako puti ked isi amen brige, šaj te molina e Jehova te pomožini amen hem te del amen mudrost. Polokho ka ovel amenđe te akhara amaro pharipe ako molinaja amen hem vaćeraja e Jehovase sa so mučini amen. Ja ki disavi situacija, šaj kratko ano amende te molina amen e Jehovase. Svako puti ked molinaja amen e Jehovase, amen mothovaja isto pouzdanje savo hine le o David kova phenđa: „O Jehova tano mi stena, mi tvrđava hem okova kova spasini man. O Devel tano mi stena, koro  leste garavava man“ (Ps. 18:2). Da li i molitva ćaće šaj te pomožini amen? Jekh pionirka koja vićini pe Kalia, phenela: „Pali molitva isi man mir ko vilo. I molitva pomožini man ko buća te dikhav ađahar sar so o Jehova dikhela hem te ovel man pana pobaro poverenje upro leste.“ Ćaće, i molitva tani jekh poklon ando Jehova kova pomožini amen te ikljova ko krajo amare problemencar.

2. Razmislin. Da li setineja tut sar o Jehova pomožinđa tuće te istrajine ko disave kušnje? Ked razmislinaja odolestar sar o Jehova pomožinđa amenđe hem pe slugenđe ko purano vreme, odova dela amen snaga hem amaro poverenje upro leste ovela pana pobaro (Ps. 18:17-19). Jekh starešina kova vićini pe Džošua, phenela: „Uvek pisinava sar o Jehova odgovorini ko me molitve. Odova pomožini man te setinav man ko vreme ked diso rodinđum ando Jehova hem ov dinđa man baš odova so valjanđa maje.“ Ked razmislinaja sar o Jehova angleder pomožinđa amenđe, odova dela amen snaga te ikljova ko krajo amare problemencar.

3. Ćer diso. Angleder te ana disavi odluka, amen valjani ko Devleso Lafi te roda savet (Ps. 19:7, 11). Ked istražinena disavo stih, but phralja hem phenja pošukar haljona sar odova stih šaj te primeninen ko po životi. Jekh starešina kova vićini pe Džared, phenela: „Ked istražinava disavo stih, pošukar haljovava le hem haljovava so o Jehova mangela te phenel maje. Tegani odova khuvela maje hor ko vilo hem podstaknini man te ićerav man ko odova so sikljovava.“ Ked rodaja savet kotar Jehova ando oleso Lafi hem ked ićeraja amen ko odova so sikljiljam, odova ka pomožini amenđe te ovel amen mir hem te aćhova bahtale iako isi amen brige.

Te šaj te ikljol ko krajo pe problemencar, o David haljilo so valjani lese e Jehovasi pomoć. Odobor hine zahvalno asi Jehovasi pomoć so phenđa: „Ked pomožini man mo Devel hem ko zidine šaj te ukljav. O pravo Devel dela man but bari snaga“ (Ps. 18:29, 32). Podijekh puti, amare problemija tane sar o zido ko kova našti te uklja. Ama, uzi Jehovasi pomoć, šaj te istrajina ko svako problemi. Ked molinaja e Jehova te pomožini amen, ked razmislinaja odolestar sar pomožinđa amen angleder hem ked ćeraja odova so phenela, šaj te ova uverime so ka del amen snaga hem mudrost te šaj te ikljova ko krajo amare problemencar.