LE PHARIMATA daștin te aven sar iech baro bar pe amaro ilo. (Prov. 12:25) Cărde vi tut le pharimata te aves zurales perado? Sanas vroiechdata cadea de duchado că simțosardean că ci mai așilea zuralimos ande tute te jias mai dur? Dacă nachlean prin cadaia, ci san o corcoro. But anda amende arăsleam te avas perade sau duchade anda codoia că trebul te las sama pe iech jeno nasfalo andai familia sau mulea amenghe varecon drago. Aver nachle prin iech dezastro naturalo sau prin iech situația cai ci mai mechlea zuralimos ande lende, duchadea lengo ilo hai pherdea lenghi goghi. Sar daisaras te așias zurale cana nachas prin pharimata? a

Daisaras te sichioas but buchia catar o rege David. Vo nachlea prin but pharimata hai poiechdata sas-lo pașă te merel. (1 Sam. 17:34, 35; 18:10, 11) So ajutisardea le Davidos te așel zuralo andel pharimata? Sar daisaras te las-ame pala lesco exemplo?

Poiechdata, o David nachlea prin mai but pharimata ande sa codo timpo. Te gândisaras-ame so sas cana nașelas catar o rege Saul cai camelas te mudarel-les. Cana o David hai lesche manușa avile parpale co Țiclag pala iech marimos, von dine penghi sama că le dușmani ciorde lenghe buchia, dine iag lenghe chăra hai astarde sar prizonieri lenghe familien. So sas ando ilo le Davidosco cana nachlea prin cado pharimos neajucărdo? „O David hai le manușa cai sas-le leia astrade te roven zurales ji cana ci mai sas len zuralimos te roven.” Hai, sar iech pharimos ci avel niciechdata corcoro, lesche manușa ande save pachialas-pe camle „te mudaren-les barența”. (1 Sam. 30:1-6) Cadea, o David nachelas prin trin pharimata ande sea codo timpo: o rege Saul rodelas te mudarel-les, leschi familia sas-li ando pericolo hai lesche manușa camenas te mudaren-les. Chichi de calo sas o ilo le Davidosco!

So cărdea o David pala codoia? Vo sigo, „zuriardea-pe prin o Iehova, lesco Del”. Sar? Cadea sar cherelas butivar, o David manglea o ajutorii le Iehovasco ando manglimos hai andea pesche amintea cana dichlea o vast le Iehovasco ande peschi viața. (1 Sam. 17:37; Ps. 18:2, 6) Mai but, anda codoia că jianelas mișto că trebulas te rodel i îndrumarea le Devleschi, vo pușlea le Iehovas so te cherel. Pala so o Iehova sicadea lesche so te cherel, o David cărdea sigo so trebulas. Cadea că, les hai lesche manușen sas-le but miștimata hai line parpale penghe familii hai penghe buchia. (1 Sam. 30:7-9, 18, 19) Te dichas le trin buchia cai cărdea-le o David: manghlea-pe le Iehovasche anda o ajutorii, andea pesche amintea o modo sar o Iehova sas-lo pașa leste andel bărșa cai nachle hai cărdea sea so phendea lesche o Del. Mai dur, va dichaia sar daisaras vi amen te cheras cadal trin buchia cana nachas prin pharimata.

1) Mang-tu. Încă de cana astaras te simțosaras-ame perade, te mangas le Iehovastar ajutorii hai goghiaverimos. Cana mangas-ame butivar hai șioras amaro ilo angla leste, lel-pe iech baro bar pa amare ile. Tha, poiechdata sea so daisaras te cheras si te phenas andi goghi iech harno manglimos. De fiesavi data cana rodas o ajutorii le Iehovasco, sicavas că si amen sa codo pachiamos sar le Davidos: „O Iehova si mânri stânca, mânro zuralimos hai Codova cai hastravel-ma. Mânro Del si mânri stânca, leste garav-ma”. (Ps. 18:2) Chiar ajutil-ame ciaces o manglimos? Dich so phenel iech pioniera po anav Kahlia: „Pala so mangav-ma  le Iehovasche, si man pacea ando ilo. O manglimos ajutil-ma te dichav le buchia cadea sar dichel-le o Iehova. Cadea că, mânro pachiamos ande leste si sea mai zuralo”. Si ciaces, o manglimos si iech șucar daro le Devlestar, cai ajutil-ame te nachas părdal le pharimata.

2) An tuche amintea. Aven tuche andi goghi mai but pharimata părdal save daisardean te naches numai anda codoia că ajutisardea-tu o Iehova? Cana anes tuche amintea sar dichlean o vast le Iehovasco ande chi viața hai vi sar ajutisardea pesche slujitoren andal puraimata, arăsăs te pachias-tu sea mai but ande leste hai si tut o zuralimos te jias mai dur. (Ps. 18:17-19) Iech phuro de congregație po anav Joshua phenel: „Scriisardem pe iech lista le răspunsuri cai primisardem-le de fiesavi data ca mânre manglimata. Cadea, anav manghe amintea mai ușoro cana manglem iech anumime buchi le Iehovastar hai vo dea-ma exacto so trebulas manghe”. Cana anas amenghe amintea o ajutorii cai dea-les amenghe amaro Dad cerisco, neviaras amaro zuralimos caște daisaras te nachas părdal le pharimata.

3) Cher vareso. Angla so alosaras so te cheras ande iech situația, daisaras te rodas îndrumarea ando Cuvânto le Devlesco. Cade arachas le mai lașe sfaturi. (Ps. 19:7, 11) But jene dichle că dacă roden te hachiaren mai mișto iech verseto si lenghe mai ușoro te cheren so phenel-pe ande leste. Iech phuro de congregație po anav Jarrod phenel: „Cana rodav mai but buchia anda iech verseto hai sichioav sar te șioav-les ande mânri viața, hachiarav so camel o Iehova te phenel manghe. Cadea, so citisarav arăsăl ande mânro ilo hai daștiv te cherav le buchia cadea sar camel o Iehova”. Cana rodas leschi îndrumarea andi Biblia hai las-ame pala late, si amen mai but zuralimos te nachas părdal amare pharimata.

O David hachiardea că ci daștilas te nachel părdal le pharimata cai sas-les bi ca o Iehova te ajutil-les. Vo sicadea peschi recunoștința anda o vast cai dea-les lesche o Iehova hai phendea: „Le zuralimaia le Devlesco daștiv te huteav părdal iech zido. O ciacio Del huriavel-ma zuralimaia”. (Ps. 18:29, 32) Vi amen daisaras te nachas poiechdata prin zumaimata cai sile sar niște bare ziduri. Tha, anda codoia că o Iehova silo pașa amende, daisaras te nachas părdal orisavo zumaimos. Cana mangas-ame le Iehovasche te del-ame lesco vast caște ajutil-ame, cana anas amenghe amintea sea so cărdea o Iehova anda amende hai cana cheras so sicavel amenghe vo ande pesco Cuvânto, daisaras te pachias anda sea o ilo că vo va dela-ame o zuralimos hai o goghiaverimos cai trebul amenghe caște așias zurale cana nachas prin pharimata.