GINGO bê apeut ti duti tongana mbeni ye so ane na ndö ti e (aProv. 12:25). Mbeni ye asi na mo awe so asara si mo gi bê ti mo ahon ndö ni? A si na mo awe so mo bâ so mo peut ti gbu ngangu encore ape? Tongana a si na mo awe, a si na mo mo oko ape. E mingi e bâ so e fatigué, e gi bê ti e nga vundu ahon ndö ti e ndali ti araison nde nde. Na tapande, ambeni ita ayeke bâ lege ti mbeni fami ti ala so terê ti lo ason, ambeni aperdre mbeni zo so ala ye lo mingi nga ambeni ayeke bâ pasi ndali ti so mbeni ye ti ngangu tongana sese so ayengi asi na ala. Me nyen la apeut ti aidé e ti hon ndö ti agingo bê ti e? *

Tapande ti Gbia David apeut ti fa na e ye mingi na ndö ti lege so e peut ti hon ndö ti agingo bê ti e. Lo wara lani akpale mingi, na ambeni ngoi fini ti lo ayeke même lani na lê ti kuâ (1 Sam. 17:34, 35; 18:10, 11). David ahon ndö ti agingo bê ti lo lani tongana nyen? Tongana nyen la e peut ti mû tapande ti lo?

David awara lani akpale mingi na oko ngoi. Na tapande, gbu li na ndö ti mbeni ye so asi na ngoi so lo yeke kpe Gbia Saül so aye ti fâ lo. Na ngoi so David na azo ti lo akiri na yanga-da na Ziclag, ala bâ so awato anzi aye ti ala, agbi ada ti ala nga amû asewa ti ala ahon na ni. David asara ye lani tongana nyen? “David na azo ti lo atï na kota toto, ala toto ngbii ngangu ti ala ahunzi.” Vundu akiri ahon ndö ti David ndali ti so azo ni “asara tënë ti bongo lo na tênë.” (1 Sam. 30:1-6). Na oko ngoi, David awara akota kpale ota: A mû azo ti sewa ti lo ahon na ni, mbeto ti tene azo ti lo afâ lo asara lo nga Gbia Saül angbâ ti tomba peko ti lo. Imaginé vundu so adoit ti sara David lani!

Nyen la David asara na pekoni? Hio lo ‘tourné na mbage ti Jéhovah Nzapa ti lo ti tene lo mû na lo ngangu.’ Peut-être lo sara ni lani tongana nyen? Ye so David asara ayeke so lo sambela Jéhovah ti aidé lo nga lo gbu li na ndö ti fason so Jéhovah a-aidé lo ândö (1 Sam. 17:37; Ps. 18:2, 6). David abâ lani so lo doit ti gi fango lege ti Jéhovah, tongaso lo hunda Jéhovah ti hinga ye so a yeke nzoni lo sara. Na peko ti so Jéhovah afa na David ye so lo doit ti sara, hio lo sara ye alingbi na ni. A sara si Jéhovah asara tufa na ndö ti lo na azo ti lo nga ala kiri awara asewa ti ala nga na aye ti ala (1 Sam. 30:7-9, 18, 19). Eskê mo bâ aye ota so David asara? Lo sambela Jéhovah ti aidé lo, lo gbu li na ndö ti aye so Jéhovah asara na lo ândö nga lo sara ye alingbi na fango lege ti Jéhovah. Tongana nyen la e peut ti mû tapande ti David? Bâ aye ota so e peut ti sara.

1. Sambela. Na ngoi kue so e komanse ti gi bê ti e, e peut ti sambela Jéhovah ti aidé e nga ti mû na e ndara. Tongana e fa na Jéhovah agingo bê ti e kue, a peut ti sara si e bâ so e yeke nzoni. Wala e peut ti tene mbeni nduru sambela na yâ ti bê ti e tongana a yeke gï ye kue so e peut ti sara na ngoi ni so la. Lakue tongana e bâ ndo na mbage ti Jéhovah ti aidé e, e yeke fa so e sara confiance mingi na Jéhovah tongana ti so David asara lani. Lo tene: “Jéhovah ayeke tênë ti mbi so ayo na nduzu, ngangu gbagba ti mbi nga Zo so azi mbi. Nzapa ti mbi ayeke kota tênë so mbi kpe dä ti bata terê ti mbi.” (Ps. 18:2). Sambela apeut biani ti aidé zo? Mbeni ita-wali pionnier so iri ti lo ayeke Kahlia atene: “Na peko ti so mbi sambela, mbi  bâ so bê ti mbi adë. Sambela a-aidé mbi ti pensé mingi tongana Jéhovah nga ti sara confiance mingi na lo.” Biani, sambela ayeke mbeni kpengba cadeau so Jéhovah amû na e so ayeke aidé e ti hon ndö ti agingo bê ti e.

2. Gbu li ti mo. Tongana mo gbu li na ndö ti aye so asi na mo ândö, eskê mo peut ti pensé na akpale so mo gbu lani ngangu dä gï grâce na mungo maboko ti Jéhovah? Tongana e gbu li na ndö ti fason so Jéhovah amû maboko na e nga na awakua ti lo ti ândö, e yeke sara mbeto ape nga e yeke sara confiance mingi na lo (Ps. 18:17-19). Josué, mbeni ancien, atene: “Mbi sara molongo ti akiringo tënë ti Jéhovah na asambela ti mbi. A aidé mbi ti dabe ti mbi na angoi so mbi hunda Jéhovah na mbeni mbilimbili ye na lo mû na mbi tâ gi ye so mbi bezoin ni.” Biani, tongana e gbu li na ndö ti aye kue so Jéhovah asara ndali ti e, e yeke kiri ti wara ngangu ti ngbâ ti tiri na agingo bê ti e.

3. Sara ye. Tongana mbeni ye asi, kozo si e mû desizion ti sara mbeni ye, e peut ti gi fango lege so ayeke nzoni mingi na yâ ti Bible (Ps. 19:7, 11). Aita mingi abâ so, tongana ala sara recherche na ndö ti mbeni versê ala comprendre nzoni mingi tongana nyen la versê ni andu ala. Jarrod, mbeni ancien, atene: “Sarango recherche a-aidé mbi ti hinga ye mingi na ndö ti mbeni versê nga ti comprendre tënë so Jéhovah ayeke tene na mbi. Ye so a-aidé mbi biani ti mä na bê na ye so mbi diko tongaso si mbi peut ti sara ye alingbi na fango lege ti lo.” Tongana e gi fango lege ti Jéhovah na yâ ti Bible nga e sara ye alingbi na ni, a yeke duti ngangu na e ape ti hon ndö ti agingo bê ti e.

David acomprendre lani so ti hon ndö ti agingo bê ti lo, lo bezoin mungo maboko ti Jéhovah. Lo bâ lani mungo maboko ti Jéhovah na nene ni mingi. Ni la a pusu lo ti tene: “Na ngangu ti Nzapa, mbi lingbi ti huru gbagba. Tâ Nzapa la ayü na mbi ngangu tongana bongo.” (Ps. 18:29, 32). E peut ti bâ so akpale ti e ayeke tongana mbeni gbagba so e peut ti huru ni ape. Me grâce na mungo maboko ti Jéhovah, e peut ti gbu ngangu na yâ ti akota kpale kue so ayeke tongana mbeni gbagba. Biani, tongana e sambela Jéhovah ti mû maboko na e, e gbu li na ndö ti aye kue so lo sara ti aidé e ândö nga e sara ye alingbi na fango lege ti lo, e peut ti hinga na bê ti e kue so lo yeke mû na e ngangu nga na ndara so e bezoin ni ti hon ndö ti agingo bê ti e.