OKURHANYA kurhalusire olugero ko kuyorha nka muzigo muzirho rhuhêsire omu murhima. (Mig. 12:25) K’okola olibusire enyanya z’okurhanya kurhalusire olugero omu kalamo kawe? K’okola ociyumvirhe oku orhakacihash’ilembera ezola ntanya? Akaba ntyo, arhali wene wahikirwe n’akanga ka ntyo. Banji ba muli rhwe nkaba bahikire aha balanga omulwala, aha bafîrwa n’omuzigirwa wabo, aha bahikirwa n’obuhanya, erhi kulwisa kanga kalebe kabarhamize bwenene omubiri, obwenge, n’ekandalala. Cikone gurhi rhwakahimamwo okurhanya kurhalusire olugero? *

Omu kuganirira olwiganyo lwa Mwami Daudi rhwanaciyigiriza binji okubiyerekire oku rhwakahimamwo okurhanya kurhalusire olugero. Ahikirwe na mazibu manji omu kalamo kage, ciru hali n’amango ali hofi h’okufâ. (1 Sam. 17:34, 35; 18:10, 11) Bici byarhabire Daudi ahime okurhanya kurhalusire olugero? Gurhi rhwakayigamwo olwiganyo lwage?

Daudi ahikirwe na mazibu manji caligumiza. Rhuganirire kwa lwiganyo kanga kaguma kamuhikiraga erhi ali alibirha ly’ayaka Mwami Saulu walonzagya okumuniga. Erhi Daudi n’abambali barhenga okw’ivita, baciyumva kubi bwenene erhi babona oku abashombanyi babo bahêsire ebirugu byabo byoshi, badulisire enyumpa zabo muliro, banahêsire emilala yabo mpira. Gurhi Daudi ajijire? “Daudi haguma n’engabo yage bagwira omulenge, balaka balakula kuhika bahwerwa n’emisi y’okulaka.” Akandi kantu kayushwire amalumwa ga Daudi kuli kubona oku abo bambali al’ilangalire ‘bahiga mpu bakola bamuyirha.’ (1 Sam. 30:1-6) Ago mango Daudi alwisa mazibu asharhu madârhi caligumiza: Omulala gwage gwali omu mazibu, al’iyobohire oku abambali bamuniga, na Mwami Saulu acikag’imulongereza ly’amuniga. Orhanye gurhi Daudi aciyumvirhe!

Bici Daudi ajijire enyuma z’aho? Ho n’aho “ashubiyumva omurhima gw’oburhwali muli Nyamubaho, Nyamuzinda wage.” Gurhi Daudi ajijiremwo ntyo? Rhumanyire oku akag’ishenga Yehova ly’amurhabala, anakag’irhanya gurhi amurhabire omu mango gageraga. (1 Sam. 17:37; Enna. 18:2, 6) Daudi abona obulagirire bw’okulonza obulongozi bwa Yehova, na ntyo adosa Yehova ebi al’ishinganine ajire. Erhi Daudi ayus’ihâbwa obulongozi bwa Yehova, abukolesa ho n’aho, n’oko kwarhuma ye n’abambali bagishwa bananarhesa emilala yabo, n’ebirugu byabo. (1 Sam. 30:7-9, 18, 19) K’obwine bintu bisharhu Daudi ajijire? Ashenga Yehova oburhabale, arhanya gurhi Yehova amurhabalaga mango mîra, ananajira kushimbana n’obulongozi bwa Yehova. Gurhi rhwakayigamwo olwiganyo lwa Daudi? Rhuganirire njira isharhu rhwakaluyigamwo.

1. Oshenge. Ngasi mango erhi rhwakarhondera okurhanya kurhalusire olugero, rhwanasalira lyo rhuhûna Yehova oburhabale n’obwenge. Isala lyanarhurhabala rhuciyumve bwinja erhi rhwakabwira Yehova ngasi kantu koshi karhuli omu murhima. Erhi kandi rhwanajira isala lyofofi buzira kukûla izu erhi akaba ntyo kw’akanga rhulimo kahûnyire. Ngasi mango erhi rhuhûna Yehova oburhabale rhunayerekane oku rhumulangalire nk’oku Daudi ajiraga. Aderha ntya: “Nyamuzinda w’ibuye ncîfulika mwo, we lwakiro lwani we na mulikûza wani. We Nnâmahanga wani, we lwala ncîfulika mwo.”  (Enna. 18:2, Mashi Bible) Ka kobinali isala linarhabale? Mwali wirhu muguma oba painiya ohamagalwa Kahlia adesire ntya: “Nanyumve omurhûla enyuma z’okusalira. Isala linantabale mbe n’entanya ziri nk’eza Yehova, n’okumulangalira bwenene.” Kobinali isala eba ngalo erhenga emwa Yehova erhurhabala rhuhime okurhanya kurhalusire olugero.

2. Orhanye. Erhi orhanya okubiyerekire ebyagezire omu kalamo kawe, k’onakengere mazibu malebe orhakahashir’ilembera buzira burhabale bwa Yehova? Erhi rhurhanya gurhi Yehova arhurhabire na gurhi arhabire abakozi bage ba mango mîra rhunabe n’omurhûla gw’ekandalala n’okuba n’obulangalire bunji muli ye. (Enna. 18:17-19) Mugula muguma ohamagalwa Joshua adesire ntya: “Njira eliste y’amasala Yehova anshuzizeko. Oko kunantabale nkengere amango nahûnaga kantu kalebe ananakampa.” Kobinali, erhi rhurhanya gurhi Yehova arhujirire omu mango gageraga, rhunabe n’emisi mihyahya y’okuhima okurhanya kurhalusire olugero.

3. Ojire kushimbana n’obulongozi. Embere rhuhige ebi rhwajira omu kanga kalebe, rhushinganine rhujire obusagasi omu Kanwa ka Nnâmahanga, lyo rhubona obulongozi bushinganine. (Enna. 19:7, 11) Bantu banji banabone oku, erhi bajira obusagasi okubiyerekire lwandiko lulebe, banahugûkwe bwinja gurhi bakalukolesa omu kalamo kabo. Mugula muguma ohamagalwa Jarrod ahugwîre ntya: “Okujira obusagasi kunantabale nciyigirize binji okubiyerekire lwandiko lulebe n’okuhugûkwa ebi Yehova ali ambwira. Oko kunantabale nyemere ebi ndi nasoma na ntyo nanajira kushimbana n’obulongozi bwage.” Erhi rhulonza obulongozi bwa Yehova omu Mandiko n’okubukulikira, rhunabe n’obuhashe bw’okulwisa okurhanya kurhalusire olugero.

Daudi al’ihugûsirwe oku al’ilagirire oku burhabale bwa Yehova ly’ahima okurhanya kurhalusire olugero. Al’ishagalukire oburhabale bwa Yehova bwenene, n’oko kwamushumya aderha ntya: “Nnâmahanga wani we mpa oku nashembuka [erhi kuhama] enkûta. Nnâmahanga ye mpa emisi.” (Enna. 18:29, 32, Mashi Bible) Hali amango rhwakaciyumva oku amazibu girhu gali madârhi bwenene n’oku garhakacihwa, rhurhakanacihasha okugalembera. Cikone kugerera oburhabale bwa Yehova rhwanahash’ihama erhi kulembera ngasi mazibu goshi gali nka lukûta! Kobinali, erhi rhwakashenga Yehova oburhabale, rhukarhanya kw’ebi amakarhujirira, n’okujira kushimbana n’obulongozi bwage, rhwanayemera n’obwalagale oku arhuha emisi n’obwenge rhulagirireko lyo rhuhima okurhanya kurhalusire olugero!