YAADDO wodaninkera lowo duha ikkitara dandiitanno. (Law. 12:25) Yaaddo lowo geeshsha qarrisse egentinohe? Yaaddo waaddeennahe ‘Xaate coyi wolqaˈyara aleenniiti’ yite egennootto? Hatto ikkiro, togoo coyi iillinohehu ate calla diˈˈikkootto. Ninke giddo batinyu maatenke miila dhiwansiisiˈnanni heeˈnoommoha, shiiˈnoommoha, kalaqamu dano gawajjitinonkeha woy wolu qarri amadinonkeha ikkara dandaanno; togoo coyi wolqa baˈneemmo gede hattono yaandeemmonna dadillineemmo gede assinonkeha ikkara dandaanno. Ikkina yaaddo qeelle saˈˈa dandiineemmo gede kaaˈlannonkeri maati? a

Moote Daawiti lawishsha xiinxalline yaaddo qeelle saˈˈate daafira lowore ronseemmo. Daawitira heeshshosi giddo lowo qarri iillinosi; iso shinasira kaˈnoonni woyiti nafa no. (1 Sam. 17:34, 35; 18:10, 11) Daawiti yaaddo qeele sainohu hiittoonniiti? Ninke isi lawishsha harunsa dandiineemmohu ma garinniiti?

Daawitira qarru aana aanaho iillinosi. Hanni isi shaasira hasanni noohu Moote Saaooliwiinni xooqanni noo yannara ikkinore laˈno. Daawitinna mannisi olu bayichinni higgu woyite, diinnansa jajjansa moortinota, minensa giirtinotanna maatensa qafadde adhite hadhinota affuti lowo geeshsha massino. Daawiti hiitto ikkiyya? Isinna mannisi, “qaale fushshiˈra hoogga geeshsha raarte [wiˈlitino].” Daawiti ammaˈnanno manni iso “shaara maˈlinota” afiti roore yaadino. (1 Sam. 30:1-6) Daawitira sasu buutote qarri aana aanaho iillinosi: Maatesi qarru giddo ubbino, mannisi shaasira hasiˈrino daafira waajjino hattono Moote Saaooli shorra diagurinosi. Daawiti mageeshshi geeshsha yaadinoro heda dandaatto!

Daawiti hakkiinni aanche maa assiyya? Isi bayichonkonni, “Maganisi Kaaliiqinni [jawaatino].” Isi tenne assinohu hiittoonniiti? Daawitira, kaaˈlannosi gede Yihowa huucciˈratenna isi konni albaanni kaaˈlinosi gara hiincate rosichi noosi. (1 Sam. 17:37; Far. 18:2, 6) Daawiti, Yihowa biddishshi hasiisannosita huwatino daafira, maa assa hasiissannosiro kulasira Yihowa huucciˈrino. Daawiti Yihowa biddishsha afiˈrihu gedensaanni, bayichonkonni loosoho kaino. Hakko daafira isonna mannasi Yihowa maassiˈrinonsa hattono maatensanna jajjansa wirro qoˈlitino. (1 Sam. 30:7-9, 18, 19) Daawiti assinoha sase coye wodanchootto? Isi kaaˈlannosi gede Yihowa huucciˈrino, Yihowa konni albaanni kaaˈlinosi gara hiincino hattono Yihowa biddishsha harunse loosoho kaino. Daawiti lawishsha harunsa dandiineemmohu hiittoonniiti? Hanni sase doogo laˈno.

1. Huuccatto assiˈri. Yaachishanno coyi iillannonke woyite kaaˈlonna hayyo afiˈrate woˈmanka woyite Yihowa huucciˈra dandiineemmo. Yaachishannonke coye baala huuccattotenni Yihowara hasaaphine duhanke shaashshiˈra dandiineemmo. Woy heeˈnoommo gari injaa hooginkero huuro fushshinummokki harancho huuccatto assiˈra dandiineemmo. Kaaˈlannonke gede Yihowa huucciˈnummo kiiro, ninkeno Daawiti gede iso addaxxineemmota leellinsheemmo; isi togo yiino: “Kaaliiqi goloˈyaati; qiishoˈyaatinna gatisaanchoˈyaati; Maganiˈya maaxameemmo godaˈyaati.” (Far. 18:2) Addinta huuccatto kaaˈlitanno? Kaaliya yinanniti suwisaancho rodoo togo yitino: “Huuccatto assiˈrummahu gedensaanni salaame afiˈreemma.  Huuccatto hedoˈya Yihowate gedeeta assiˈreemma gede kaaˈlitannoe; hattono albinni roore iso addaxxeemma.” Addanko, huuccatto yaaddo qeelle saˈˈa dandiineemmo gede kaaˈlitannonkete Yihowa qixxeessinonkete kaajja qixxaawooti.

2. Hiinci. Albi heeshshokki hedatto woyite iillinohe qarra Yihowa calla kaaˈleennahe dandiite saootto yanna qaagatto? Yihowa ninkeno ikko alba soqqamaanosi kaaˈlino gara hiincinummoro jawaante afiˈneemmo hattono albinni roore iso addaxxineemmo. (Far. 18:17-19) Jooshuwa yinanni cimeessi, togo yiino: “Yihowa dawaro qolinoe huuccatto borreessiˈre wodhoommo. Tini Yihowa bade kule huucciˈreenna hasiisannoe coye uyinoe yanna qaageemmo gede kaaˈlitinoe.” Ee, Yihowa alba assinonkere hiincineemmo woyite, iillinonkeha yaachishanno coye dandiine saˈneemmo gede kaaˈlitannonke jawaante afiˈneemmo.

3. Loosoho kai. Mitto coye assate kaˈnammora albaanni roore addaxxinanni biddishsha afiˈrate Maganu Qaale xiinxalla dandiineemmo. (Far. 19:7, 11) Batinyu roduuwi, mitto qummeeshsha seekkite xiinxallansa heeshshonsa giddo loosu aana hosiissannohu hiittoonniitiro huwattanno gede kaaˈlitinonsa. Jeeroodi yinannihu songote cimeessi togo yiino: “Seekke xiinxallaˈya qummeeshshu hedo roore huwateemmo gedenna Yihowa kulanni nooeri maatiro wodancheemmo gede kaaˈlitinoe. Tini nabbawanni noommore seekke ammaneemmo gedenna Yihowa biddishsha loosu aana hosiiseemmo gede assitannoe.” Qaalisi giddonni Yihowa biddishsha hasiˈneemmohanna konne biddishsha harunsineemmoha ikkiro, yaachishannonke coye albinni roore qeelle saˈˈa dandiineemmo.

Daawiti iillinosiha yaachishanno coye qeele saˈˈate Yihowa kaaˈlo hasiissannosita afino. Isi Yihowa kaaˈlo lowo geeshsha naadino daafira togo yiino: “Maganiˈyanni qiisho tayise eˈˈeemmo. Wolqa aannoehu  . . Kaaliiqaati.” (Far. 18:29, 32) Iillannonke qarri tayinse saˈnannikki qiisho lawe leellankera dandaanno. Ikkollana Yihowa kaaˈlonni qiishote gedee qarra baala qeelle saˈˈa dandiineemmo! Ee, kaaˈlannonke gede Yihowa huucciˈneemmoha, assinonke coye hiincineemmohanna biddishshasi harunsine loosoho kaˈneemmoha ikkiro, isi yaaddo qeelle saˈˈate kaaˈlitannonke jawaantenna hayyo aannonketa addaxxa dandiineemmo!