SAHALA amy enta mavesatsy andesintsika am-pontsika ao ty fiasan-doha. (Ohab. 12:25) Fa nisy fotoa va iha niasa loha marè, le manaly fa tsy zakanao raha iny? Tsy iha avao ro fa nitratsini-zay. Maro amintsika ro mahatiaro vozaky biby, miasa loha, sady kivy. Anisani-mety hahavy ani-zay, ohatsy, ty fikarakarà fianakavia marary, ty fahafatesani-longo, na ty loza sankarazany. Fe ino ty hanampy antsika hahavita hiatriky ani-ze raha mampiasa loha antsika? a

Niatriky raha sarotsy maro Davida Mpanjaka. Nisy fotoa aza ie fa ho nimaty mihintsy. (1 Sam. 17:34, 35; 18:10, 11) Tsy maintsy niasa loha zany ie. Akory ty nahavitany niaritsy ani-raha zay? Ino ty azontsika atao mba hanahafa azy? Hahay raha maro tsika lafa mandiniky ty fomba niatrehany ani-raha nahazo azy rey.

Niatriky raha sarotsy sankarazany Davida, amin’io tamy fotoa raiky avao ty nisehoani-raha iaby reo. Ta ho namono azy, ohatsy, Saoly Mpanjaka, le tsy maintsy nilay ie. Mba eritsereto ty raha nahazo azy tamy zay. Tsy zay avao fa lafa nimpoly tamy toby nisy an-drozy ta Ziklaga tao koa Davida noho lahilahy niaraky taminy rey, le tsy nisy raha nitratsin-drozy tao satria nangalarini-fahavalon-drozy rey ty hananan-drozy, noroan’olo rey ty tranon-drozy sady nandesin’olo rey babo ty valy amin’anan-drozy. Nanao akory Davida tamy zay? “Nirohaky ty tany Davida noho olo niaraky taminy rey, ka lafa tsy nana hery hitania sasy rozy vo nieny.” Vomaiky nikivy Davida satria “nifampiresaky” lahilahy niaraky taminy rey hoe “hitora-bato azy.” (1 Sam. 30:1-6) Tanatini-fotoa raiky avao ty niaviani-problemo telo reto tamy Davida: Niazon-doza ty fianakaviany, ta hamono azy lahilahy niaraky taminy rey, sady nania azy mbaombao Saoly Mpanjaka. Azo antoky fa tena niasa loha biby Davida!

Ino ty nataoni-Davida? Avy le “niantehitsy tamy Jehovah Ndranahariny” ie mba hahazoany hery. Akory ty nanaovany ani-zay? Matetiky Davida ro nivavaky tamy Jehovah mba hanampy azy. Fe tsy zay avao, nieritseretiny koa ty fomba nanampeani-Jehovah azy taloha tany. (1 Sam. 17:37; Sal. 18:2, 6) Hitani-Davida hoe tokony hangataky ty tari-dalani-Jehovah ie, farany ie nanontany ani-Jehovah hoe ino ty tokony hataony. Avy le nanao raha Davida lafa nahazo toromariky baka amy Jehovah. Ino ty vokany? Nitahini-Jehovah ie noho lahilahy niaraky taminy rey ka afaky nanavotsy ty fianakavian-drozy noho nangalaky ani-hananan-drozy rey. (1 Sam. 30:7-9, 18, 19) Ambinao va hoe ino raha telo nataoni-Davida rey? Nivavaky tamy Jehovah ie mba hanampy azy, nieritseritsy ty fomba nanampeani-Jehovah azy taloha tany ie, sady nanao raha mifanaraky amy ty toromariky nameani-Jehovah. Akory ty hanahafantsika ani-Davida? Retoa misy fomba telo.

1. Mivavaha. Azontsika atao ty mangataky fanampea noho fahendrea amy Jehovah saky misy raha mampiasa loha antsika. Hihamaivaiva tsika lafa mivavaky noho mampiboraky aminy ze raha iaby am-pontsika ao. Afaky manao vavaky boribory noho tsy misy feo koa tsika arakaraky ty raha iainantsika. Asehontsika hoe matoky ani-Jehovah tsika saky mangataky fanampea aminy, ka sahala mivola manahaky ani-Davida hoe: “Jehovah ro harambatoko noho lakorobe fiarova ho ahy sady Mpanavotsy ahy. Ndranahariko iny ro vatolampiko. Aminy ao ro ialofako.” (Sal. 18:2) Tena misy heriny vatany va ty vavaky? Hoy Kahlia, ranabavy mpisava  lala: “Lasa milamin-tsay aho lafa baka nivavaky. Manampy ahy hitovy hevitsy amy Jehovah ty vavaky, sady manampy ahy hatòky azy marè.” Fanomeza tena soa baka amy Jehovah vatany ty vavaky, ka manampy antsika hahavita hiatriky ze raha mampiasa loha antsika.

2. Mametsevetsea. Fa nisy raha sarotsy nahazo anao va taloha tany? Hitanao va hoe tsy ho nivitanao ty niatriky ani-raha iny laha tsy nanampy anao Jehovah? Lafa tsika mametsivetsy ty fomba nanampeani-Jehovah antsika noho ty mpanompony hafa taloha tany, le lasa mihamahazo hery sady vomaiky matoky azy. (Sal. 18:17-19) Zao ty nivolanini-anti-panahy mana anara Joshua zay: “Nataoko lista ty fomba namaleani-Jehovah ty vavaky nataoko. Nisy fotoa, ohatsy, aho nangataky raha voafaritsy soa tamy Jehovah, le nameany ahy raha nilàko iny. Nanampy ahy hahatiaro ani-fotoa rey lista amiko ao iny.” Laha mametsivetsy ty raha fa nataoni-Jehovah ho antsika taloha tany zany tsika, le hahazo hery ndraiky ka hahavita hialy amy raha mampiasa loha antsika rey.

3. Manaova raha. Afaky mila tari-dala amy Safà-Ndranahary ao tse tsika alohani-hanapahantsika hevitsy hoe ino ty hatao amy raha mahazo antsika iny. (Sal. 19:7, 11) Maro ty mahita fa lafa manao fikaroha mikasiky andinin-teny raiky amy Soratsy Masy ao rozy, le lasa hain-drozy soa ty fomba anoriha ani-andininy iny amy fiainan-drozy. Hoy anti-panahy mana anara Jarrod zay: “Lafa zaho manao fikaroha, le lasa maro biby ty raha haiko mikasiky andinin-teny raiky dinihiko iny sady azoko soa ty raha teani-Jehovah hovolany amiko. Lasa atokisako iaby raha vakiko iny ka manjary manao raha mifanaraky amy tari-dalani-Jehovah aho.” Laha mila noho manoriky ty tari-dalani-Jehovah amy Baiboly ao tsika, le ho haintsika ty hiatriky ty raha mampiasa loha antsika.

Nieky Davida fa tsy ho nivitany ty niatriky ani-raha nampiasa loha azy rey laha tsy nanampy azy Jehovah. Tena nankasitraky ty fanampeani-Jehovah ie ka nivola hoe: “Ty heri-Ndranahary ro mahavy ahy mahavita manganiky lakorobe. Azy Ndranahary marina iny ro mampisiky hery ahy.” (Sal. 18:29, 32) Mety hanahaky rindribe io koa ty fahitantsika ty raha mahazo antsika. Mety hahatsapa tsika hoe sarotsy loatsy raha iny ka tsy ho voavaha mihintsy na tsy ho vita ty hiatriky azy. Fe manampy Jehovah ka afaky miaritsy avao tsika ndre ino ino ty raha sarotsy mahazo antsika! Afaky matoky tsika fa hanome hery noho fahendrea antsika ie lafa tsika mangataky fanampea aminy amy vavaky, mametsivetsy ty fomba nanampeany antsika, noho manao raha mifanaraky amy ty tari-dalany. Ho vitantsika amy zay ty hiatriky ty raha mampiasa loha antsika!