O LE popole e pei o se avega mamafa i o tatou loto. (Faata. 12:25) Po ua e tofo i mafatiaga mamafatū ona o le popole? Po ua oo iā te oe lagona ua lē mafai ona e onosaia na popolega, ma ua leai se faamoemoe? Pe afai o le tulaga lenā, e lē na o i tatou o loo tupu ai lenā mea. O le toʻatele o i tatou, o loo tausia se tasi ua maʻi o le aiga, faavauvau ona o sē pele ua maliu, tofo i se mala faalenatura pe fesagaʻia nisi faafitauli, ma ua aafia ai lo tatou itu faaletino, le mafaufau ma faalogona. Ae o le ā e fesoasoani iā i tatou e taulau ai i le fesagaʻia o le popole? a

E tele mea e tatou te aʻoaʻoina mai i le faaaʻoaʻoga a le tupu o Tavita i le auala e fesagaʻia ai popolega. E tele faigatā na ia fesagaʻia i lona olaga. O nisi taimi na toetoe lava a uma ai lona ola. (1 Samu. 17:34, 35; 18:10, 11) Na faapefea ona taulau Tavita i le fesagaʻia o popolega? E faapefea ona tatou faaaʻoaʻo i lana faaaʻoaʻoga?

Na fesagaʻia e Tavita le tele o faafitauli i le taimi e tasi. Seʻi manatu i le mea na tupu ina ua fesolasolataʻi Tavita a o taumafai le tupu o Saulo e fasioti o ia. Ina ua foʻi mai Tavita ma ona tagata mai i le tupu o Filisitia, na faateʻia i latou ina ua taunuu atu i le nofoaga na faamautū ai ua gaoi e le fili a latou meatotino, susunu o latou fale ma ave faapagota o latou aiga. O ā lagona na oo iā Tavita? “Ona fetagisi leotetele lea o Tavita ma tagata uma sa iā te ia seʻia oo lava ina latou lē toe mafaia.” Na atili mafatia Tavita ina ua “faapea ane le nuu e fetogi iā te ia i maa.” (1 Samu. 30:1-6) E tolu faafitauli ogaoga na fesagaʻia e Tavita i le taimi e tasi: Na lamatia le ola o lona aiga, na fefe ina neʻi fasiotia o ia e ona tagata ma o loo tulituliloa pea o ia e le tupu o Saulo. Seʻi mafaufau i faalogona popole tele o Tavita!

O le ā na faia e Tavita? Na vave lava ʻona faamalosia e Tavita lona loto e ala i le fesoasoani a Ieova lona Atua.’ Na faapefea ona faia e Tavita lenā mea? E masani ona tatalo Tavita iā Ieova, ma mafaufau i auala na fesoasoani ai Ieova iā te ia i le taimi ua teʻa. (1 Samu. 17:37; Sala. 18:2, 6) Na iloa e Tavita e tatau ona ia saʻili le taʻitaʻiga a Ieova. O lea na fesili atu ai iā Ieova i le mea e ao ona fai. Na vave lava ona gaoioi Tavita ina ua uma ona faatonuina o ia e Ieova. O le iʻuga na faamanuia e Ieova Tavita ma ona tagata ma na latou faasaoina o latou aiga ma toe maua a latou meafaitino. (1 Samu. 30:7-9, 18, 19) Pe na e mātauina gaoioiga e tolu na faia e Tavita? Na tatalo iā Ieova mo se fesoasoani, mafaufau i auala na fesoasoani ai Ieova iā te ia i taimi ua teʻa, ma gaoioi e tusa ma le taʻitaʻiga a Ieova. E faapefea ona tatou faaaʻoaʻo iā Tavita? Seʻi mātau auala nei e tolu.

1. Tatalo. O so o se taimi lava e tatou te lagonaina ai le popole, e mafai ona tatou tatalo mo le fesoasoani ma le atamai o Ieova. E tatou te maua le filemu o le mafaufau ma le loto, e ala i le sasaa atu pea iā Ieova o mea uma o loo tatou popole ai. E mafai foʻi ona tatou faia ni tatalo pupuu lē leoa, pe afai e na o le pau lenā o le mea e mafai ona tatou faia e tusa ai ma o tatou tulaga i lenā taimi. O taimi uma e tatou saʻili ai iā Ieova mo le fesoasoani ua tatou faaleo atu le mautinoa o Tavita lea na faapea mai: “O Ieova o loʻu papa, o loʻu ʻolo malosi, ma o Lē e saunia se mea ou te sao ai. O loʻu Atua o loʻu papa lea. Ou te sulufaʻi  atu iā te ia.” (Sala. 18:2) Pe e aogā moni lava le tatalo? Na faapea mai se tuafafine paeonia e igoa iā Kahlia: “Ou te lagona le filemu pe a uma ona ou tatalo. E fesoasoani le tatalo iā te aʻu ina ia faafetaui ai oʻu manatu i manatu o Ieova ma matuā faamalosia ai loʻu maufaatuatuaina o ia.” Ioe o le tatalo o se meaalofa mai iā Ieova, e faamalosia ai i tatou ina ia fesagaʻia popolega o le olaga.

2. Mafaufau. Pe a toe tepa i tua, pe mafai ona e mafaufau i luʻi o le olaga na mafai ona e onosaia ona o le fesoasoani a Ieova? Pe a mafaufau i le auala na faamalosia ai e Ieova i tatou ma ana auauna i le taimi ua mavae, e faamalosia ai foʻi i tatou ma faateleina ai lo tatou mautinoa iā te ia. (Sala. 18:17-19) Na faapea mai se uso e igoa iā Joshua, “Ou te faia se lisi o aʻu tatalo na tali e Ieova. Ua fesoasoani lenā mea e manatua ai taimi na ou tatalo ai iā Ieova mo se mea patino, ma na ia aumaia le mea tonu lava na ou manaʻomia.” Ioe pe a mafaufau i mea ua faia e Ieova mo i tatou, o le a faafouina ai lo tatou malosi e fesagaʻia ai popolega.

3. Gaoioi. A o tatou leʻi faia se filifiliga i le mea e fai pe a iai se mea e tupu, e mafai ona tatou suʻesuʻe i le Afioga a le Atua mo le taʻitaʻiga e sili ona maufaatuatuaina. (Sala. 19:7, 11) E toʻatele ua iloa pe a fai ni saʻiliʻiliga i se mau patino, e latou te malamalama ai i le auala e faatatau ai lenā mau. Ua faamatala mai e se toeaina e igoa iā Jarrod: “O le faia o ni saʻiliʻiliga, e fesoasoani ou te iloa ai vala uma o se mau ma malamalama ai i mea o loo taʻuina mai e Ieova iā te aʻu. Na fesoasoani lenā ou te talitonu atoatoa ai i mea o loo oʻu faitauina ma gaoioi ai e tusa ma lana taʻitaʻiga.” Pe a saʻili i le Tusi Paia mo le taʻitaʻiga a Ieova ma mulimuli i lenā taʻitaʻiga, ua saunia lelei ai i tatou e fesagaʻia popolega.

Na malamalama Tavita, e tatou te manaʻomia le fesoasoani a Ieova ina ia taulau ai i le fesagaʻia o popolega. Na matuā talisapaia e Tavita le lagolagosua a Ieova ma uunaʻia ai o ia e faapea atu: “O loʻu Atua foʻi ua mafai ai ona ou aʻea le pā. O le Atua moni o Ia e na te fusia aʻu i le malosi.” (Sala. 18:29, 32) Atonu e tatou te lagona, e pei o tatou faafitauli o se pā e lē mafai ona aʻea. Peitaʻi o le fesoasoani a Ieova e mafai ai ona tatou aʻea so o se pā o faafitauli! Ioe, pe a tatou tatalo mo le fesoasoani a Ieova, mafaufau i mea uma ua ia faia mo i tatou ma gaoioi e tusa ma lana taʻitaʻiga, e tatou te mautinoa o le a ia foaʻi mai le malosi ma le atamai e manaʻomia ina ia taulau ai i le fesagaʻia o popolega!