OKIYANO nkoka ndjala etengo odjito w’ekekete efula l’oloko wɔso. (Woo. 12:25) Ɔngɛnake ndjolo l’okiyano ɔmɔtshi lá lowiko lɔko? Ombóyawoká etengo opokoka nkfulumeyɛ lonkina? Ntsha oyɛwɔ nde nghɔsɔ, mbɔ koko opalekɔ nghɔmɛlɛ. Efula l’anteyi kɛso walama ɛkɔnyi, wambóvusɛ onto ɔmɔtshi wɔkɔpawɔ efula, wambópómana la ndjolo yeyɛ má nkete djetongamisá, kana wapomana l’ekakasano enkina wekoka ndaalɛmbɛ lá demba edjinge lá yimba. Ko kɛkɔnge kekoka ntokotshɛ́ djɛ ndongela ekiyano? *

Iso nkoka ndjeka akambo efula lá kɛnɛ kelendana la wopo wɔ ndongela ekiyano má nshishima ndjɔmbɔmba kɛ Nkfumi Davidɛ. Nde apomanaka l’ekakasano wɛ wolo efula lá lowiko lɔnde, edjinge lá mbamba imɔtshi nde ahandaki kaanga nyɔyi. (1 Sa. 17:34, 35; 18:10, 11) Wopo wɔkɔnge Davidɛ ndalongela ekiyano lá wopo wɔ wɔlɔ? Wopo wɔkɔnge wokokaso nkilika ndjɔmbɔmba kɛnde?

Davidɛ apomanakí l’ekakasano efula lá mbala kɛmɔ. Ndjɔmbɔmba, kokanela kɛnɛ k’okomelisá winá wɔ ndotalotaka Nkfumi Sawolo kanga lohonaki ndooyaka. Winá wɔ Davidɛ nya anto wande iyakalɔ má mbandji, iwɔ watanaka djɛ antonyi wawingelaka m’ɔkɔngɔ wɔwɔ ko wasandjaka nkete djɛwɔ, watshumbaka amvulu yɛwɔ la watɔlaka ankfumbo yɛwɔ tá lokando. Davidɛ ndananghe mo? ‘Davidɛ nya anto wayalisa esanga lande walelaka la djoyi djɛ wolo tii wolo wɔ ndela lonkina womboshila.’ Koko okiyano wɔ Davidɛ wolekaka mfula ladjikɛnde ampame yɛnde yɛ ndoyawɛkɛka tewɔ ‘watepelaka djɛ ndoovuta awanga.’ (1 Sa. 30:1-6) Winá wɔsɔ Davidɛ ambopomana l’akambo asato wa nkekete lá mbala kɛmɔ: Nkfumbo kɛnde walekɔ lá mbalaka, nde ayalaki la wɔma mande ampame yeyalisá esanga lande wakɔpa ndooyaka, la lonkina Nkfumi Sawolo atokilika. Kokanela efula k’okiyano keyalisa la Davidɛ!

Davidɛ ndananghe masɔ nge? Mbala kɛkɔ kɛmɔ nde ‘awaka lokembo m’okotshɔ wɔ Yehova Ndjambe kɛnde.’ Davidɛ ndakoke nangha nghɔsɔ ngetemo? Davidɛ alɔmbaka Yehova djɛ nde ndookotshɛ la akanelaka lá wopo wɔ ndookótshɛká l’etsho wemboheta. (1 Sa. 17:37; Yee. 18:2, 6) Davidɛ ɛnaka djonyi djɛ mpona ɛlɔndjɛlɔ kɛ Yehova ko nde opolaka Yehova kɛnɛ k’oyɛnde ladjɛ nangha. M’ɔkɔngɔ wɔ Davidɛ mba ɛlɔndjɛlɔ kɛ Yehova nde ananghaka akambo ipa la ntshatshimba. Eposelo weyalisa nde, nde nya ampame yɛnde yɛsɔ watshɔkwamaka me Yehova ko watshungolaka ankfumbo yɛwɔ la nkete djɛwɔ. (1 Sa. 30:7-9, 18, 19) Ombokota akambo asato wa Davidɛ ndananghe? Nde alɔmbaka Yehova okotshɔ, akanelaka lá wopo wɔ Yehova ndonanghelaka akambo l’etsho wemboheta, la akilikaka ɛlɔndjɛlɔ kɛ Yehova. Wopo wɔkɔnge w’okokaso ndjokola Davidɛ? Tokoshishima topo tosato.

1. Lɔmba. Winá onkfumɔ woyalaso l’okiyano, iso nkoka ndɔmba Yehova djɛ ntokotshɛ la ntɔpɛyɛ balo. Winá wodjipolaso oloko wɔso djɛ ndoshimela kenkfumɔ ketokiyanyɛ, iso nkoka ndawoka wɔlɔ. Kana iso nkoka nangha dɔmbɛlɔ dj’itenyi kana djɛ wimimi, ntsha kɛsɔ ndeke oyɛso la mbamba kɛ nangha lá winá la l’edjena k’oyɛso. Winá enkfumɔ wɔ songohonaka okotshɔ me Yehova, tɔngɛnyɛ ente iso ndawɛkɛka tende etengo Davidɛ kanga lotepelisá ante: ‘Yehova ndeke ve djɛmi, edjena kɛmi kɛ wolo kɛ djiisa edjinge Ombiki wɔmi. Ndjambe kɛmi ndeke ve djɛmi, lende ndeke  oyawisakami.’ (Yee. 18:2) Lɔlɔmbɔ nkoka nsɔsɔlɔ ntokotshɛ? Nkaana kɛmɔtshi kɛ yat’ekalo ketawɔ Kahlia ntepelaka ante: “M’ɔkɔngɔ wɔ ndɔmba, lemi mbaka vu. Lɔlɔmbɔ nkotshɛka lemi djɛ ndjokanyɛ tokanyi tɔmi la tɔ Yehova, la djɛ nkembɛ djawo djɛmi tende.” Lá nsɔsɔlɔ, lɔlɔmbɔ alekɔ opapɛyɛ wɔ wɔlɔ wɔ me Yehova wotokotshɛ djɛ ndongela ekiyano.

2. Kanela. Winá wokanelɛ akambo wapomanisa lawɛ lá lowiko lɔko, opavungɔ ehemba ɛmɔtshi wɛ ngayale l’akoka wa nkfulumeyɛ ngo ladjikɛnde Yehova akokotshɛka? Winá wokanelaso lá wopo wɔ Yehova ndatokotshɛ́ kana wɔ ndakotshɛ́ enkambi wɛnde wɛ l’etsho wɛ ntondo, iso nkembɛka la mfudjɛka djawo djɛso tende. (Yee. 18:17-19) Ikokolo imɔthi yetawɔ Joshua ntepelaka ante: “Lambonanghá listɛ lɔ alɔmbɛlɔ wa mawa nsakiso. Kɛsɔ nkotshɛka lemi djɛ mvungɔka mbala yɛ malɔmbɛ Yehova nkambo mɔtshi djɛ djonyi, la ndampɛyɛ ngo kɛnɛ kɛ mayalaka la djonyi.” Ee, winá wokanelaso lá kɛnɛ kɛ Yehova ndombotonanghelá, iso mbaka wolo woyɛso la djonyi wɔ nana la tokanyi totokiyanyɛ.

3. Nangha nkambo mɔtshi. Lá ntondo k’iso ndɔsa nkano djɛ nangha nkambo mɔtshi, iso ladjɛ nangha ehonelo l’Otepela wɔ Ndjambe djɛ mba ɛlɔndjɛlɔ keleka wɔlɔ. (Yee. 19:7, 11) Efula k’anto wɛnaka ambɔ winá wonanghawɔ ehonelo lá vɛrse mɔtshi lá yopo yetshikitanyi, iwɔ nsipisoyɛka wɔlɔwɔlɔ wopo wɔ vɛrse djɛkɔ olendanawɔ la lowiko lɔwɔ. Ikokolo imɔtshi yetawɔ Jarrod atepelaka ante: “Nangha ehonelo nkotshɛka lemi djɛ mba elakanyelo efula má vɛrse mɔ, la djɛ nsipisoyɛ kɛnɛ kɛ Yehova onshimelande. Looka lɔsɔ nkotshɛká lemi djɛ ndjawola nsɔsɔlɔ kɛnɛ kowalami djɛ lemi nkilika ɛlɔndjɛlɔ kɛnde.” Winá wohonaso ɛlɔndjɛlɔ kɛ Yehova m’Afunelo la w’okilikaso ɛlɔndjɛlɔ kɛkɔ, iso mbaka kenkfumɔ k’oyɛso la djonyi djɛ ndongela ekiyano.

Davidɛ asipisoyɛka ante djɛ ndongela ekiyano lá wopo wɔ wɔlɔ, nde ayalaka la djonyi dj’okotshɔ wɔ Yehova. Nde ayalaki la djedjɛ dj’efula t’okotshɔ wɔ Yehova ko kɛsɔ k’otshindaka djɛ ntepela ante: ‘Má nkfulu kɛ Ndjambe lemi nkoka mpanda l’epele. Ndjambe kɛ nsɔsɔlɔ ndɔtshɛka lemi wolo.’ (Yee. 18:29, 32) Iso nkoka ndawoka etengo ekakasano wɛso welekɔ wolo efula ko topangokoka nkfulumeyɛ. Koko m’okotshɔ wɔ Yehova, iso nkoka nkfulumeyɛ ekakasano enkfumɔ, kaanga wɛ wolo efula! Ee, winá wɔlɔmbaso djɛ mba okotshɔ wɔ Yehova, wokanelaso lá kenkfumɔ kɛ ndombotonanghelá, la wonanghaso nkambo mɔtshi djɛ nkilika ɛlɔndjɛlɔ kɛnde, iso nkoka ndjala l’eshikikelo ente nde angɔtɔpɛyɛ wolo la balo dj’oyɛso la djonyi djɛ ndongela ekiyano lá wopo wɔ wɔlɔ!