BOOKOHEDI sa dë kuma wan gaan hebi soni a wan sëmbë hati (Nöng. 12:25). Bookohedi bi mbei i tja fuka wan daka u? I bi fii kuma ja bi sa tjëën möön u? Wë woto sëmbë ta fii sö tu. Sömëni fuu ko abi bookohedi u sömëni soni hedi. Kandë so fuu musu ta sölugu wan sëmbë fuu di ko dë ku suwaki, nasö kandë wan sëmbë fuu ko lasi libi. Nasö kandë so fuu ta tja fuka u di gaan ventu, nasö gaan wata bi ko poi soni fuu. Wë nöö andi sa heepi u fuu hoi dou te u abi bookohedi? a

Te u luku di woto u Könu Dafiti, nöö u sa lei sömëni soni u di fasi fa u sa hoi dou te u abi bookohedi. Sömëni hogi soni bi miti ën nëën libi, nöö so juu soni bi miti ën ka a bi sa lasi hën libi (1 Sam. 17:34, 35; 18:10, 11). Andi bi heepi Dafiti faa hoi dou di a bi abi bookohedi? Unfa u sa djeesi ën?

Dafiti bi ta tja sömëni fuka a di seei ten. Pakisei andi bi miti ën di a bi ta fusi da Könu Saulosu, u di Saulosu bi kë kii ën. Di Dafiti ku dee sodati fëën bi toona ko a wosu baka wan feti, hën de si taa dee felantima u de bi fufuu dee soni u de, de bi tjuma dee wosu u de, söseei de bi kisi dee sëmbë u de tja go. Andi Dafiti bi du? Wë „Dafiti ku dee sodati fëën bi bai këë, de këë te de wei”. Ma boiti di dë, dee bookohedi u Dafiti bi ko möön hia, u di dee sodati fëën bi taki taa de o kii ën (1 Sam. 30:1-6). Dafiti bi ko abi dii gaan bookohedi a di seei ten: A bi musu go suku dee sëmbë fëën, dee sodati fëën bi kë kii ën, söseei Könu Saulosu bi ta suku ën u kii. Dafiti bi musu u ta booko hën hedi gaanfa seei!

Andi Dafiti du baka di dë? Wantewante a „go suku heepi a Jehovah, di Gadu fëën”. Unfa a du di soni aki? Dafiti bi abi di guwenti u begi Jehovah u hakisi ën faa heepi ën, söseei a bi lo’ u pakisei unfa Jehovah bi heepi ën a dee ten dee pasa (1 Sam. 17:37; Ps. 18:2, 6). Dafiti bi sabi taa a bi dë fanöudu faa hakisi Jehovah andi a musu du. Fëën mbei a bi hakisi Jehovah andi a musu du. Baka di Jehovah lei ën andi a musu du, hën a hopo du ën wantewante. Te u kaba fëën, Jehovah bi mbei hën ku dee sodati fëën feni gaan bunu, u di de bi toona feni dee sëmbë u de, ku dee woto soni u de baka (1 Sam. 30:7-9, 18, 19). I buta pakisei a dee dii soni di Dafiti bi du ö? A bi begi hakisi Jehovah faa heepi ën, a bi toona pakisei dee soni dee Jehovah bi du dëën, söseei a bi du andi Jehovah bi piki ën faa du. Unfa u sa djeesi Dafiti? Boo buta pakisei a dii fasi fa u sa du ën.

1. Begi. Hiniwan ten te u ta bigi fii kuma bookohedi ta möön u, nöö u sa begi Jehovah faa heepi u, söseei u sa hakisi ën faa da u köni. U sa ko ta fii möön bunu te u ta konda hii dee soni dee ta toobi u tuu dëën. Nasö u sa begi kölö sö a u hati, ee wa sa begi longi a di pisiten dë. Hiniwan ten te u ta hakisi Jehovah faa heepi u, nöö u ta lei taa u ta futoou ën leti kumafa Dafiti bi ta futoou ën. A bi taki taa: „Jehovah da di gaan sitonu u mi, söseei hën da di tjubi kamian u mi. Hën ta puu mi a fuka. Di Gadu u mi da  mi sitonu kuun. Nëën mi ta kule go tjubi” (Ps. 18:2). Begi ta heepi tuutuu ö? Wan sisa de ta kai Kahlia di ta du di pioniliwooko, bi taki taa: „Te mi ta begi te mi kaba, nöö mi ta fii bunu seei. Begi ta heepi mi u mi ko ta si soni kumafa Jehovah ta si soni, söseei a ta heepi mi u mi möön futoou ën.” Begi da wan gaan kado di Jehovah da u. A ta heepi u tuutuu fuu libi ku dee bookohedi fuu.

2. Toona pakisei. Te i ta toona pakisei dee soni dee bi miti i, nöö i sa mëni unfa Jehovah bi heepi i fii hoi dou di fuka bi miti i ö? Te u ta toona pakisei unfa Jehovah bi heepi u a di ten di pasa, söseei fa a bi heepi dee dinima fëën na awooten, nöö u ta möön dë bööböö, söseei u ta möön futoou Jehovah (Ps. 18:17-19). Wan gaanwomi de ta kai Joshua, bi taki taa: „Mi sikifi dee begi u mi di Gadu bi piki, buta a wan kamian. Di soni dë ta heepi mi u ma fëëkëtë di ten di mi bi hakisi Jehovah wan soni, nöö a bi da mi di soni di mi bi abi fanöudu.” Te u ta pakisei unfa Jehovah bi heepi u a di ten di pasa, nöö u ta feni di taanga di u abi fanöudu fuu hoi dou te u abi bookohedi.

3. Du wan soni. U sa suku köni a di Wöutu u Gadu ufö u du wan soni (Ps. 19:7, 11). Sömëni sëmbë ta taki taa te de öndösuku wan tëkisi, nöö de ta möön fusutan unfa de sa wooko ku ën. Wan gaanwomi de ta kai Jarrod, bi taki taa: „Te mi ta öndösuku soni, nöö a ta heepi mi u mi fusutan wan tëkisi möön bunu, söseei a ta heepi mi u mi fusutan andi Jehovah ta lei mi. Di soni aki ta heepi mi u mi biibi dee soni dee mi ta lesi, nöö a sö wan fasi mi sa du dee soni di Jehovah ta lei mi.” Te u ta suku heepi a Jehovah ku di Wöutu fëën, söseei te u ta du andi a taki, nöö an o taanga da u sö möön fuu dë waiwai, hii fa u abi bookohedi.

Dafiti bi fusutan taa Jehovah nöö bi sa heepi ën faa hoi dou te a abi bookohedi. A bi tei di heepi di Jehovah bi heepi ën u bigi sö tee taa a taki: „Di Gadu u mi hën ta mbei mi sa subi wan peni. Leti kuma wan angula di dë taitai a mi mindi, sö nöö di tuutuu Gadu ta da mi kaakiti” (Ps. 18:29, 32). Kandë u ta fii kuma dee bookohedi fuu hia sö tee taa wa sa hoi dou, nasö taa de an o kaba wan daka. Ma Jehovah sa heepi u fuu hoi dou aluwasi un pei fuka ta miti u. Te u ta begi Jehovah ta suku heepi nëën, te u ta toona pakisei dee soni dee a bi du da u, söseei te u ta du andi a piki u, nöö u sa dë seiki taa a o da u di taanga, ku di köni di u abi fanöudu fuu hoi dou te u abi bookohedi!