SHIGHE u ishima i lu nyian se yô, vanger ka a yuhwa se je i zua ga. (Anz. 12:25) I gbe nahan ishima nyian we je u ure vee? Shighe ugen ishima ka i nyian we je u hingir tenge tengee? Aluer ka nahan yô, ka we tseegh ga. Se mbagen kpishi se hingir mbanengen sha mbagenev mba ve fetyô u eren kwagh iyol ve ga yô. Gayô alaghga ma or wase nan saa ku, gayô zegeuraahumbe shin mngerem ma saren avenge kua ambaakaa la na yô, se mba yan ican kpishi. Gayô, alaghga se nyôr ken ma zayol u a ne ishima i lu nyian se je se kande shin se ure yô. Kpa ka nyi ia wase se ve se ure ga? *

Aluer se time sha ikyav i Tor Davidi yô, se hen akaa kpishi a shighe u ishima i lu nyian se kpa, aa wase se se ure ga yô. Davidi yange tagher a mbamzeyol kpishi ken uma na. Ashighe agen yange a tagher ishigh a ku je kpaa. (1 Sam. 17:34, 35; 18:10, 11) Er Davidi tagher a akaa a nyian un ishima nahan kpa, ka nyi yange i wase un ve ure ga? Se dondo ikyav na la nena?

Davidi yange tagher a mbamzeyol kpishi hen shighe môm. Ikyav i tesen yô, nenge ase mbamzeyol mba yange ve ta sha Davidi shighe u lu yevese Tor Saulu u lu keren un a ku la. Davidi za hide ityav vea ior nav, mba va nyer hen ijiir ve, hen Shikelagi yô, ve nenge kwagh u mbaihyomov vev er a ve je huan ve iyol. I ii ve akaa, shi i nande ve uya, shi i kura icombor ve cii i yem a mi. Nahan Davidi er nena? “Davidi kua ior mba ve lu a na imôngo ve ger mliam, zan zan ve kera lu a agee iyol a shi vaan ga.” Kwagh ugen u seer nan Davidi ishimanyian yô, ior mba ve lu a na imôngo, mba na ve jighjigh la “lu ôron ér vea ta un awen.” (1 Sam. 30:1-6) Sha nahan yô, Davidi tagher a mbamzeyol mba vesen utar hen shighe môm: tsombor na tagher ishigh a ku, shi un iyol na kpa ior nav ver ashe ikyôr a na doo ga, shi Tor Saulu kpa lu keren un a ku her. Hen ase er yange ishima ia nyian Davidi hen shighe ne yô.

Davidi yange er nena? Fese je “Davidi taver ishima na ken Ter Aôndo na.” Davidi yange fatyô u eren kwagh ne nena? Se fa er Davidi yange a er msen hen Yehova ér a wase un, shi a umbur igbenda i Yehova a vande wasen un kpaa yô. (1 Sam. 17:37; Ps. 18:2, 6) Davidi yange nenge ér gba u una pine Yehova a tese un kwagh u una er yô. Nahan a pine Yehova kwagh u a nenge ér doo u a er la. Yehova tesen Davidi kwagh u una er yô, Davidi maa kar a kar er kwagh shon. Kwagh ne na yô, Yehova wase Davidi a ior nav cii, ve za hide a icombor ve, kua akaa a ve a i va ii i yem a mi la. (1 Sam. 30:7-9, 18, 19) U nenge a akaa atar a Davidi er la kpa? Davidi er msen hen Yehova ér a wase un, shi hen sha igbenda i Yehova vande wasen un yô, shi dondo kwaghwan u Yehova. Se dondo ikyav i Davidi ne nena? Se dondo sha igbenda itiar.

1. Er msen hen Yehova. Hanma shighe u ishima i lu nyian se cii yô, se fatyô u eren msen hen Yehova ser a wase se, shi a na se kwaghfan. Aluer se tôô shighe se er msen hen Yehova, se pase un er i lu se ken ishima la cica cii yô, ishima ia pever se. Aluer ka zayol u hen ashighe kpuaa tseegh yô, se er msen tiônôô shin ishima tseegh kpa, a wase se. Hanma shighe u se er msen hen Yehova ser a wase se yô, kwagh la ka a tese ér se mba suur sha a na, er Davidi nahan. Davidi yange kaa ér: “TER  ka vande wam man garutya wam, man Oryiman wam kpaa, ka Aôndo wam, vande wam u taver, ka sha a Na me suur ye.” (Ps. 18:2) Msen wasen se mimi je kpa? Anmgbian u kwase ugen u a lu pania yô, iti na ér Kahlia, a kaa ér: “Ka mea er msen yô, ishima i pever mo. Msen ka a wasem m hingir u henen kwagh er Yehova nahan, shi seer suur sha a na.” Sha kpôô yô, msen ka iyua i injaa i Yehova a ne, i ka i wase se shighe u ishima i lu nyian se ve se kera ure ga yô.

2. Hen sha igbenda i Yehova a vande wasen we la. Shighe u u lu henen sha akaa a a vande eren we yô, u fatyô u umbur mbamzeyol mba yange u wa ishima a mi sha iwasen i Yehova la kpa? Aluer se hen sha igbenda i Yehova a vande wasen se, man er yange wase mbacivir un sha ashighe a ken ijime la yô, se zua a ishimataver, shi se hemba suur sha a na cii. (Ps. 18:17-19) Ortamen ugen iti na ér Joshua, a kaa ér: “M nger akaa a Yehova a vande eren sha mbamsen av yô. Kwagh ne ka a wasem u umbur ashighe a yange mea er msen hen Yehova sha ma kwagh jighilii ve, a er kwagh shon vough er i sarem la yô.” Sha mimi yô, ka sea hen sha igbenda i Yehova a vande wasen se la yô, se seer zuan a agee shighe u ishima i lu nyian se yô, nahan se kera ure ga.

3. Dondo kwaghwan u Yehova. Cii ve se tsua kwagh u se er sha ma zayol u se tagher a mi yô, se fatyô u keren kwaghwan u una hemba wasen se la cii ken Mkaanem ma Aôndo. (Ps. 19:7, 11) Ior kpishi nenge ér ka vea ker u seer kaven kwagh u ma ivur Bibilo i ôr yô, ve hemba kaven er kwagh u i ôr la a zua sha mlu ve yô. Ortamen ugen iti na ér Jarrod, a kaa ér: “Ka mea ker u seer kaven kwagh u ma ivur Bibilo i ôr yô, m hemba kaven kwagh u Yehova a lu ôron mo la wang. Kwagh ne ka a wasem m hemba nan jighjigh a kwagh u m ôr la cii, shi m dondo kwaghwan shon kpaa.” Aluer se ker kwaghwan u Yehova ken Bibilo shi se dondo kwaghwan shon shighe u ishima i lu nyian se yô, se zua a bem shi a saan se iyol, nahan se ure ga.

Shighe u ishima lu nyian Davidi la, yange fa je ér gba u una suur sha iwasen i Yehova ve a saan un iyol ye. Yange wuese Yehova kpishi er a wase un yô, a kaa ér: “Ka sha agee a Aôndo wam je m tsugh gilgar m aver ye. Ka Aôndo u A wem agee iyol la.” (Ps. 18:29, 32) Shighe ugen a lu se inja er mbamzeyol asev gande se agee, shin se fatyô u wan ishima a mi ga nahan. Kpa sha iwasen i Yehova yô, se fatyô u wan ishima a mbamzeyol mba vesen je kpaa! Sha mimi yô, aluer se er msen hen Yehova ser a wase se shighe u ishima i lu nyian se la, shi se hen sha igbenda i a vande wasen se, shi se dondo kwaghwan na yô, ka keng una na se agee kua kwaghfan u una wase se se ure ga yô.