GU GARADZEGA gu ngu vbisisa monyo. (Mav. 12:25) Ina wa gu emisana ni gu garadzega? Ina wa gu dzipwa gu khatshi kha wu na nga si kodza gu timiseya khu tepo nyo laphe? Abari kharato, u mwalo wenga. Nya vangi gwathu va ngu dzipwa na va gu garadzega ni gu vbeledwa khu litsako khu sighelo nya gu hambanehambane. Khu giyeyedzo, vambe va ngu khathaleya givbango nya ndranga gi dwalago, vambe va fedwe khu muthu va mu golago nigu vambe va ngu tshaniseka khu kotani nya dzimhango nya tumbunuku. Ganiolu, ginani gi nga hi phasago gu timiseya gu garadzega? *

Hi nga hevbula nya singi maningano ni gu emisana ni gu garadzega khu gu wona giyeyedzo gya Pfhumu Dhavhidhe. Uye tshanganide ni sigaradzo nyo garadze womini gwaye, nigu womi waye dzimbe dzitepo wu di gu romo mhangoni. (1 Sam. 17:34, 35; 18:10, 11) Ginani gi phasidego Dhavhidhe gu timiseya tepo a nga ba a garadzega? Hi nga pimedzeya kharini giyeyedzo gyaye?

Dhavhidhe emisananide ni sigaradzo nya singi khu tepo yayimweyo. Khu giyeyedzo, dundrugeya khesi a emisanidego naso tepo a nga ba a tutuma khu gu ba Pfhumu Sawule a vbweta gu mu songa. Tepo uye ni vama vaye va nga wuya khu nyimbitunu va ta mana gu valala vawe va bide silo sawe, va vbisa dzinyumba dzawe ni gu dzega dzindranga dzawe va dzi gira dzikumbi, ginani Dhavhidhe a giridego? “Dhavhidhe gumogo ni vathu a nga bani nari navo, va di khusa lito va lila kala va vbeledwa khu tshivba nya gulile.” Nigu Dhavhidhe a di gu garadzega ngudzu kholu vama vaye a nga ba a va tumba va nga ba va vbweta “gu mu pfara khu siwindri.” (1 Sam. 30:1-6) Dhavhidhe emisanide gambe ni sigaradzo nya sikhongolo khu tepo yayimweyo. Ndranga yaye yi di gu romo mhangoni, nigu vama vaye va di gu vbweta gu mu songa, khu tepo yoyo Pfhumu Sawule a di ngo mu landriseya gasi gu mu songa. Nga dundrugeya edzi Dhavhidhe a garadzegidego khidzo!

Ginani a nga gira Dhavhidhe khu gu landreya? Uye a di dzegeya “gu vbweta giphaso gya Jehovha Nungungulu waye.” Dhavhidhe giride kharini isoso? Hi ngu dziti gu khethu Dhavhidhe gombede ga Jehovha a vbweta giphaso gyaye ni gu bwe a mu phasa gu dundruga edzi a mu phasidego khidzo gale. (1 Sam. 17:37; Ndzi. 18:2, 6) Dhavhidhe a di gu dziti gu khuye a di yede gu wudzisa Jehovha gasi guti esi uye a nga ba a yede gu gira, khu kharato uye a di wudzisa Jehovha esi uye a nga ba a yede gu gira. Hwane nya gu ba Dhavhidhe a hakhide gileletelo gya Jehovha, uye a di dzegeya gu gi landrisa. Kha nga handro wakone, uye ni vama vaye va kategisidwe khu Jehovha nigu avo va bweledzedwe dzindranga dzawe ni silo sawe satshavbo. (1 Sam. 30:7-9, 18, 19) U si tugude silo siraru esi Dhavhidhe a giridego? Uye a di gombeya ga Jehovha a lomba giphaso gyaye, a dundrugeya edzi Jehovha a mu phasidego khidzo gale, a bwe a engisa gileletelo gya Jehovha. Hi nga mu pimedzeya kharini Dhavhidhe? Wona silo sesi sa siraru.

1. Nombelo. Ni yevbini tepo hi garadzegago hi nga lomba giphaso ga Jehovha ni guti. Isoso si na hi phasa gu dziphwa gwadi tepo hi mu embelago ni gevbini gi hi garadzago. Mwendro hi nga gira nombelo khu monyoni a bari gu giemo gyathu gya gu hi dzumeleya basi gu gira isoso. Tepo yatshavbo hi lombago giphaso ga Jehovha ha gu yeyedza gu khethu hi ngu mu tumba nga Dhavhidhe,  uye a nga khuye: “Pfhumu Nungungulu, givhikelo gyangu, likhokhola langu, mudzegisi wangu; nyi ngu thavela gwaye.” (Ndzi. 18:2) Ina kamo nombelo wu ngu phasa? Ndriyathu moyo nya nyamayi nyo pwani khu Kahlia a gu ganeya gu khuye: “Hwane nya gu ba nyi gombede nya gu dzipwa na nyi gu rude. Nombelo wu ngu nyi phasa gu wona silo nga edzi Jehovha a si wonago khidzo nyi bwe nyi mu tumba.” Nombelo giningwa gitago khiyo ga Jehovha gi hi phasago gu pala gu garadzega.

2. Dundrugeya. Wa gu khedza edzi womi wago wu nga ba wu romo khidzo gale, ina u ngu kodza gu wona edzi u padego khidzo sigaradzo khu gu phaswa khu Jehovha? Tepo hi dundrugeyago khedzi Jehovha a hi phasidego khidzo gale ni edzi a phasidego khidzo sithumi saye gale, ethu ha gu engedzeya gu mu tumba. (Ndzi. 18:17-19) Lidhota limwedo nyo pwani khu Joshua lari khilo: “Nyi na ni sasamedzo nya milombelo yangu. Esi sa gu nyi phasa gu dundruga dzitepo nyi nga lomba Jehovha silo nya gu kongome a bwe a nyi hlamula.” Ha gu dundruga khesi Jehovha a hi giredego gale hi na mana tshivba nya gu emisane ni gu garadzega gwathu.

3. Gira gilogyo. Na hi si hungi esi hi na girago ga giemo nyo khaguri, hi nga gevisisa umo nya Lito la Nungungulu gasi hi mana sileletelo. (Ndzi. 19:7, 11) Nya vangi va gu ganeya gu khavo gu gevesisa livhesi nyo khaguri si ngu va phasa gu pwisisa edzi livhesi li nga va phasago khidzo womini gwawe. Lidhota limwedo nyo pwani khu Jarrod lari khilo: “Gu gira wugevesisi, si ngu nyi phasa guti nya singi khu levhesi nyi bwe nyi pwisisa esi Jehovha a nyi embeyago. Esi sa gu nyi phasa gu khodwa avba nya esi nyi lerigo nyi bwe nyi si thumisa.” Ha gu vbweta gileletelo gya Jehovha omu nya Milowo hi bwe hi gi landrisa, si na hi vbevbugeya gu mana gurula ni gu tsaka tepo hi garadzegago.

Dhavhidhe a di gu pwisisa gu khuye gasi gu emisana gwadi ni gu garadzega a di gu vbweta giphaso gya Jehovha. Uye tsakide ngudzu khu giphaso gya Jehovha nyo bwe a ganeya gu khuye: “Khu tshivba ya Nungungulu wangu, nyi ngu ndraga mabhiyo. Uye khuye Nungungulu a nyi ambagisago tshivba.” (Ndzi. 18:29, 32) Ethu adzina hi nga dzipwa gu khatshi sigaradzo sathu sikhongolo ngudzu nyo bwe si garadza gu si lulamisa ni gu si timiseya. Ganiolu, khu gu phaswa khu Jehovha hi na si kodza gu si timiseya. Ha gu gombeya ga Jehovha hi lomba giphaso, hi dundrugeya khu satshavbo a hi giredego hi bwe hi landrisa sileletelo saye, hi na tumba gu khethu a na hi ninga tshivba ni guti hi gu vbwetago gasi hi emisana ni gu garadzega.