KUKATAAZIKANA kulakonzya kupa kuti moyo wamuntu utyompwe. (Tus. 12:25) Ulikuswaanana aazintu zipa kuti ukataazikane na? Ubonaanga tuchikonzyi na kulisimya kuzintu eezyo? Kuti kakuli boobo, tawuli aawulikke pe. Bantu biingi balikuswaanana aazintu zikonzya kubamana manguzu. Muchikozyano, bamwi balikulangania babbululu babo bachiswa, bamwi bakafwidwa aababbululu alubo bamwi bakaswaanana aamapenzi aalichitikila. Pesi niinzi zikonzya kutugwasya kuti tulisimye kubuyumu-yumu mbutuswaananaabo? *

Chikozyano chaMwaami Davida chilakonzya kutugwasya kuti tulisimye kubuyumu-yumu mbutuswaananaabo. Davida wakaswaanana aabuyumu-yumu bwiingi mubuumi bwakwe alubo aali chimwi chiindi, wakali kuyanda kujayigwa. (1 Sam. 17:34, 35; 18:10, 11) Niinzi nzyaakachita Davida kuti alisimye? Alubo ngatulachitobelezya biyeni chikozyano chakwe?

Davida wakaswaanana aamapenzi miingi aachiindi chimwi. Muchikozyano, atubone zyakachitika chiindi Davida naakali kuchija Mwaami Sawulu. Chiindi Davida abaalumi mbaakalaabo nibakaboola kuzwa kunkondo, bakakataazikana loko nkaambo bakajana kuti basinkondonyina bakali babba zintu zyabo, bakawumpa myuunzi yabo akubweza mpuli zyabo mpawo bakazitola mubuzike. Davida wakachita biyeni? “Davida abaalumi mbaakali limwi bakatalika koongolola kulila, mane limwi nguzu zyabo zyakulila zyakamana.” Alubo Davida wakazookataazikana loko akaambo kakuti baalumi mbaakalaabo “bakali kuyanda kumupwaya mabwe.” (1 Sam. 30:1-6) Aachiindi eechi, Davida wakaswaanana aamapenzi aatatu aachiindi chimwi: Mpuli yakwe yakali mubuyumu-yumu, wakali kuyoowa kuti baalumi mbaakalaabo balakonzya kumujeya alubo Mwaami Sawulu wakachili kumwaandilila. Yeeyela kuti Davida wakali kumvwa biyeni chiindi naakali kuswaanana aamapenzi aaya.

Davida wakazoochitaanzi? Wakafwambaana ‘kuliyumya munguzu zya Jehova Leza wakwe.’ Wakazichita biyeni? Davida wakakomba kuli Jehova kamukumbila kuti amugwasye alubo wakayeeyesesya atala ambaakamugwasya chiindi. (1 Sam. 17:37; Int. 18:2, 6) Davida wakabona kakuyandikana kuti akumbile Jehova kuti amubuzye zyakuchita. Nkinkaako, Davida wakabuzya makani kuli Jehova. Davida naakabuzigwa zyakuchita aJehova, wakafwambaana kubweza ntaamu. Eezi zyakapa kuti Davida abaalumi mbaakalaabo balongezegwe alubo bakakonzya kunununa mpuli zyabo akubweza zintu zyabo. (1 Sam. 30:7-9, 18, 19) Wazibona na zintu zitatu nzyaakachita Davida? Wakakomba kuli Jehova kamukumbila kuti amugwasye. Wakayeeyesesya atala ambaakagwasigwa aaJehova chiindi. Wakachita kweendelana ambaakali wabuzigwa aJehova. Ngatulamutobelezya biyeni Davida? Atubone nzila zitatu.

1. Komba. Chiindi choonse nitulimvwa katukataazikene, tulakonzya kukomba kuli Jehova katumukumbila kuti atugwasye akuti atupe busongo. Nkombyo ilakonzya kutugwasya kuti tulimvwe kabotu nkaambo ngatwabuzya Jehova zintu zyoonse zili kutukataazya. Tulakonzya kukomba nkombyo mfwiifwi naakuti kukombela mumoyo kuti kakuli nzizyo nzitukonzya kuchita aachiindi eecho. Chiindi choonse nitukumbila Jehova kuti atugwasye, ngatuli kutondeezya kuti tulamusyoma mbuli mbaakali kuchita Davida chiindi naakaamba kuti: “Jehova ngomwala wangu, mampangala aangu alimwi ngonguwe  uundivwuna. Leza wangu nindomba yangu, oomo mondiyubila.” (Int. 18:2) Nkombyo ilagwasya na choonzyo? Umwi muchizi uupayona uutegwa Kahlia wakaamba kuti: “Chiindi nindamana kukomba, ngatandichikataazikene pe. Nkombyo indigwasya kuti ndibe aamaboneno aaJehova alubo ipa kuti ndimusyome loko.” Kwaamba choonzyo, nkombyo nchipo chizwa kuli Jehova chitugwasya kuti tulisimye chiindi nitukataazikene.

2. Yeeyesesya atala aJehova mbaakakugwasya chiindi. Kuti wayeeya atala abuyumu-yumu mbwakaswaananaabo chiindi, uchiyeeyede na Jehova mbaakakugwasya kuti ulisimye kubuyumu-yumu oobo? Kuti twayeeyesesya atala aJehova mbaakatugwasya ambaakagwasya bakombi bakwe chiindi, zilapa kuti tulisimye akuti tumusyome loko. (Int. 18:17-19) Umwi mwaalu uutegwa Joshua wakaamba kuti: “Ndichiziyeeyede nkombyo zyangu nzyaakasandula Jehova. Aali chimwi chiindi, ndakakomba kuli Jehova kandimukumbila kuti andipe chimwi chintu nchindakali kuyanda mpawo wakandigwasya kuti ndichijane chintu eecho.” Nkinkaako, kuti twayeeyesesya atala aJehova mbaakatugwasya, zilapa kuti tulisimye chiindi nitukataazikene.

3. Chita kweendelana amalayilile aaJehova. Katutanasala zyakuchita kuti twaswaanana aachimwi chiimo, tweelede kuyanduulisisya muJwi lyaLeza kuti tubone malayilile aakonzya kutugwasya. (Int. 19:7, 11) Bamwi bakabona kuti, kuti bayanduulisisya atala ayimwi vesi, kulabawubila kuti babone mbiikonzya kubagwasya mubuumi bwabo. Umwi mwaalu uutegwa Jarrod wakaamba kuti: “Kuyanduulisisya kundigwasya kuti ndiiye zyiingi kuzwa muvesi eeyo akuti ndimvwisisisye zintu nzyalikundibuzya Jehova. Kuchita oobo kupa kuti vesi eeyo indisike aamoyo kuchitila kuti ndichite kweendelana anzyandibuzya Jehova.” Tulakonzya kulisimya kubuyumu-yumu mbutuswaana kuti twayanduulisisya muJwi lyaLeza kuti tubone malayilile aakonzya kutugwasya akuchita kweendelana amalayilile aayo.

Davida wakabona kuti wakeelede kugwasigwa aaJehova kuchitila kuti akonzye kulisimya. Wakali kuzilumba zintu Jehova nzyaakali kumuchitila. Eezi nzizyo zyakapa kuti aambe kuti: “Kwiinda munguzu zya Leza ndilakonzya kutanta bwaanda. Leza mwini-mwini ngonguwe uundipa nguzu.” (Int. 18:29, 32) Tulakonzya kubonaanga mapenzi ngituswaananaawo mayumu loko zyakuti tatukonzyi pe kulisimya kuli ngawo. Pesi kuti twagwasigwa aaJehova, tulakonzya kulisimya kumapenzi woonse. Kuti twakomba kuli Jehova katumukumbila kuti atugwasye, twayeeyesesya atala ambaakatugwasya chiindi alubo kuti twachita kweendelana anzyatubuzya kuti tuchite, tulaba aachoonzyo chakuti ulatupa manguzu abusongo kuchitila kuti tulisimye chiindi nitukataazikene.