САГЫШСЫРАЛДАР кижиниң чүрээн шагзырадыр (У. ч. 12:25). Кажан-бир чаза хилинчектенип, дүвүрээн силер бе? Ийе, болза, чааскаан эвес силер. Аарып турар төрелин ажаап-карактап чоруур, чоок кижизин чидирип алган азы бойдус халаптарындан когараан улус аравыста бар чадавас. Шынап-ла, угаан-бодалывыска, сагыш-сеткиливиске, кадыкшылывыска хора чедирип турар байдалдар эңмежок. Сагышсыралдарга болгаш дүвүрээзиннерге алыспазынга биске чүү дузалаар? a

Аңаа хамаарыштыр Давид хаанның чижээнден хөй чүвеге өөренип ап болур бис. Ооң чуртталгазы аар-бергелер болгаш дүвүрелдер-биле долган турган. Безин ол чаңгыс удаа эвес өлүр часкан (1 Хаан. 17:34, 35; 18:10, 11). Дүвүрээзиннерге бастырбазынга Давидке чүү дузалаан? Ооң чижээ биске чүзү-биле ажыктыгыл?

Чамдыкта Давид бергелерге улай-улай таваржып турган. Чижээ, ону өлүрер дээн Саул хаандан чаштынып тургаш, ооң чүү чүвеге таварышканын сактып кээлиңер. Давид дайынчылары-биле чанып кээрге, амаликтер ооң бүгү эт-хөреңгизин хавыргаш, бажыңнарын өрттедипкеш, кадайларын болгаш ажы-төлүн тудуп аппарган болган. Давид болгаш ооң улузу муңгараанындан «ал шаан төндүр ыглажып-сыктажып алганнар». Ынчалза-даа хай-халаптар ооң-биле төнмээн: Давидтиң дайынчылары, шынчы эштери, ону даш-биле согар деп барган (1 Хаан. 30:1—7). Ынчап кээрге, Давидче хары угда үш айыыл-халап диргелип келген: өг-бүлези айыылга таварышкан, эш-өөрү ону өлүрер деп барган, Саул хаан ону истеп сүрүп турган. Шынап-ла, Давидке шыдажыр аргажок берге турган!

«Давид берге байдалга келген. […] Ынчалза-даа Давид Дээрги-Чаяакчы Бурганынга бүзүрели-биле быжыгланып турган». Давид чүнү кылган? Ол чаңчыккан аайы-биле Иеговадан дузаны дилээн. Оон ыңай Бурган ону эрткен үелерде канчаар деткип турганын ол үргүлчү сактып, бодап чораан (1 Хаан. 17:37; Ыд. ыр. 17:3, 7). Оон ыңай Бурганның удуртулгазын дилээри чугула деп, Давид билип турган. Ынчангаш ол Иеговадан чүнү канчаарын айтырган. А кажан Ол харыылаптарга, Давид шак ынчаар кылган. Түңнелинде Бурган аңаа болгаш ооң улузунга өг-бүлелерин хостап, эт-хөреңгизин эгидип алырынга дузалаан (1 Хаан. 30:7—9, 18, 19). Давид кандыг үш базымны кылган, эскердиңер бе? Ол дузаны дилеп мөргээн, Иегованың ооң мурнунда аңаа канчаар дузалаанын сактып келген, оон Бурганның айтыышкыннарын ажыглаан. Бис база шак ынчаар кылып болур бис. Ам ону тодаргай сайгарыптаалыңар.

1. Мөргүңер. Дүвүрелдер хөме ап кээр үелерде Иеговадан дузаны болгаш мерген угаанны дилеңер. Сеткил-чүрээңерде бар шупту чүвени бирден-бирээ чокка Аңаа тө каап бериңер. Ынчан сагышсыралдарның аар чүгүнден хосталып алыр силер. Үр мөргүүр үеңер чок болза, оода каш борбак сөстен Иеговага чугаалаңар. Давид мынча деп ырлап турган: «Дээрги-Чаяакчы — мээң быжыг шивээм, хоргадалым, камгалалым. Мээң Бурганым — чалым-хаям» (Ыд. ыр. 17:3). Иеговадан дузаны дилеп тургаш, Аңаа долузу-биле ынанып турарыңарны көргүзүп турар силер. Ынчалза-даа мөргүл ылап-ла дузалап болур бе? Калия деп эгелекчи угбавыс  мынча деп чугаалаан: «Иегова-биле чугаалашкан соонда сеткилим оожургай бээр чорду. Мөргүлдүң ачызында мен бодалдарымны Иегованың бодалдары-биле дүүштүргеш, Аңаа оон-даа артык идегеп эгелээр чордум». Ынчап кээрге, мөргүл дүвүрелдерни оожургадырынга дузалаар эмге дөмей. Ону биске Иегова Боду бижип берген.

2. Сактып келиңер. Эрткен чуртталгаңарны сактып келиңер. Кандыг бергелерни Бурганның ачызында ажып эртип шыдаан силер? Иегова бисти база эрткен үеде бараалгакчыларын канчаар деткип чораанын бодап чоруур болзувусса, Ооң деткимчезинге черле чигзинмес бис (Ыд. ыр. 17:18—20). Джошуа деп хуралдың удуртукчузу мынча дээн: «Бурганның харыылап каан мөргүлдерин бижип ап чоруур мен. Ынчаар кылып тургаш, мөргүлдеримге Иегованың канчаар тода харыылап чораанын утпас чордум». Шынап-ла, Иегованың биске канчаар дузалап турганын сактып чоруур болзувусса, дүвүрээзиннер-биле тулчур күштүг боор бис.

3. Ажыглаңар. Стресстиг байдалга бир дугаарында Бурганның Сөзүнче кичээнгейни салыңар. Чүгле ында ёзулуг бүзүрелдиг удуртулга бар болгай (Ыд. ыр. 18:8, 12). Хөй акы-угбаларның саналы-биле алырга, Библиядан кандыг-бир шүлүктү ажыглаар дизе, баштай ону эки шинчилээр болза эки. Джаррод дээр удуртукчу акывыс мынча деп тайылбырлаан: «Мен кандыг-бир библейжи шүлүктү шинчилеп эгелээримге, ооң утказы аңгы-аңгы талалардан ажыттынып кээр. Ынчалдыр Иегованың меңээ чүнү чугаалаксап турарын тода билип алыр чордум. Ол билиглер мээң чүрээмге таңмаланып артып каарга, Бурганның айтыышкыннарын күүседири меңээ белен апаар чорду». Библиядан Иегованың удуртулгазын дилеп, ону сагыыр болзувусса, дүвүрелдерге удур демиселге бүрүнү-биле чепсегленген боор бис.

Сагышсыралдарга алыспас дизе, Бурганның дузазы херек деп, Давид эки билип турган. Ол Иегованың деткимчези дээш өөрүп четтиргенин мынчаар илереткен: «Бурганым ачызында шивээлер ханаларын ажа халыыр мен. Бурган күш-шыдалды мээң шыңганнарымга сиңирип... турар» (Ыд. ыр. 17:30, 33). Бергелер бистиң мурнувуска ханалар дег туруп болур. Ынчалза-даа Иегова бистиң-биле болганда, оларның шуптузун ажа халып шыдаар бис. Ынчангаш Иеговадан дузаны дилеп мөргүүлүңер. Ооң биске чүнү кылганын сактып чоруулуңар. Ол ышкаш айтыышкыннарын сагыылыңар. Бо делегейде дүвүрээзиннер бар-даа болза, Иегова биске күштү болгаш мерген угаанны берип турар. Ооң ачызында өөрүшкүлүг артып, сагыш-сеткиливиске амыр-тайбыңны миннир бис!