ESAKALALO li pondola oku honguisa utima wetu. (Olo 12:25) Anga hẽ wa liyakele ale locitangi cesakalalo komuenyo wove? Anga hẽ wa liyeva okuti ku tẽla vali oku pandikisa kesakalalo liaco? Nda oco, ku kasi lika wove. Valua pokati ketu, tua siata oku kuata asakalalo omo liovina vialua via siata oku pita ndeci: Oku fisa umue tu sole, oku lipita locilunga cimue, ale ocitangi cikuavo ci tu honguisa. Pole, nye ci tu kuatisa oku pandikisa kasakalalo aco? *

Tu pondola oku lilongisila calua poku konomuisa ulandu wa Soma Daviti ndomo tu pandikisa poku liyaka lasakalalo. Eye wa liyaka lovitangi vialua komuenyo waye, toke muẽle wa kala kohele yoku fa. (1Sa 17:34, 35; 18:10, 11) Nye ca kuatisa Daviti oku pandikisa kasakalalo? Tu setukula ndati ongangu yaye?

Daviti wa liyaka lovitangi vialua vonjanja yimosi. Konomuisa eci ca pita laye poku tila Soma Saulu una wa yonguile oku u ponda. Eci Daviti kumue lolohoka viaye va tiuka kuyaki, ovo va yeva esumuo lialua eci va sanga okuti ovanyãli vavo va punda ovina viavo, va timĩha olonjo viavo kuenda va ambata apata avo kumandekua. Daviti wa liyeva ndati? “Daviti kumue lalume va kala laye va fetika oku lila lolukandi toke eci ka va kuatele vali ongusu yoku lila.” Handi vali, Daviti weya oku sumua vali calua momo, alume a kolelele “va yonguile oku u sasõla lovawe.” (1Sa 30:1-6) Daviti wa kala oku liyaka lovitangi vitatu vinene ndevi: Epata liaye lia kala kohele, eye wa kala lusumba omo okuti alume va kala laye va yonguile oku u ponda kuenda Soma Saulu wa kala oku u sandiliya. Sokolola esakalalo Daviti a yeva!

Nye Daviti a linga noke? Lonjanga yalua, “wa sanga elembeleko ku Yehova Suku yaye.” Eye wa ci linga ndati? Daviti wa likutilila ku Yehova oku pinga ekuatiso loku sokolola ndomo Yehova o kuatisile ale kosimbu. (1Sa 17:37; Os 18:2, 6) Daviti wa limbuka esilivilo lioku kuama onumbi ya Yehova kuenje, wa pula ku Yehova eci a sukilile oku linga. Noke Yehova wo sapuila eci a sukilile oku linga, kuenje wa ci linga. Onima yeyililako yeyi yokuti, eye kumue lalume va kala laye, Yehova wa va sumũlũisa kuenda va tẽla oku popela apata avo kuenda ovina viavo. (1Sa 30:7-9, 18, 19) Wa limbuka hẽ ovina vitatu Daviti a linga? Eye wa likutilila oku pinga ku Yehova ekuatiso, wa sokolola ndomo Yehova o kuatisa kosimbu kuenda wa kapako onumbi Yehova a ecele kokuaye. Tu setukula ndati Daviti? Konomuisa olonjila vitatu.

1. Likutilila. Olonjanja viosi eci tu kuata asakalalo, tu sukila oku likutilila ku Yehova oku pinga ekuatiso kuenda olondunge. Tu ka liyeva ciwa eci tu sapuila kokuaye ovina vi tu sakalaisa. Ale, tu pondola oku linga ohutililo yimue ya teta onimbu hayo yi lingiwa vutima, nda okuti oco ekalo lietu li ecelela. Olonjanja viosi tu pinga ekuatiso ku Yehova, tu lekisa okuti, tua kolela kokuaye ndeci Daviti a linga eci a popia hati: “Yehova eye esenje liange kuenda ociteyuilo cange haeye Una o ndi yovola. Suku yange eye ohanda yange muna ndi sanga ocitililo.” (Os 18:2) Anga hẽ ohutililo yi kuatisa? Manji umue ukundi wotembo yosi o tukuiwa Kahlia, wa popia hati: “Noke yoku likutilila, ndi kuata ombembua. Oku likutilila ci ñuatisa oku kuata ovisimĩlo ndevi via Yehova kuenda ekolelo  liange kokuaye li livokiya.” Ocili okuti, ohutililo ombanjaile yimue Yehova a tu ĩha oco tu pandikise kasakalalo.

2. Sokolola. Eci o vanja konyima kovina via lipita komuenyo wove, o pondola hẽ oku sokolola kovitangi wa tẽla oku yula omo liekuatiso lia Yehova? Eci tu sokolola konjila ndomo Yehova a kuatisa afendeli vaye kosimbu, tu pondola oku kuata ongusu kuenda ekolelo lietu kokuaye li livokiya. (Os 18:17-19) Ukulu umue wekongelo o tukuiwa Joshua, wa popia hati: “Nda soneha ulala umue wolohutililo via tambuluiwa. Owo u ndi kuatisa oku ivaluka otembo nda pinga cimue ku Yehova kuenje eye wa nyĩha eci nda sukilile.” Ocili, eci tu sokolola ovina Yehova a siata oku tu lingila, tu kuata ongusu yoku pandikisa kasakalalo.

3. Kapako onumbi. Osimbu ka tua nõlele onjila tu kuama kocitangi cimue, tu sukila oku sandiliya onumbi yimue Vondaka ya Suku, yi pondola oku tu songuila. (Os 19:7, 11) Valua va limbuka okuti eci va linga akonomuiso atiamẽla kocisonehua cimue, va tẽla oku kuata elomboloko ndomo ocinimbu caco ci kapiwako komuenyo wavo. Ukulu umue wekongelo o tukuiwa Jarrod, wa popia hati: “Oku linga akonomuiso, ca ndi kuatisa oku mola atosi osi ndi pondola oku lilongisa kocinimbu cimue kuenda oku kuata elomboloko lieci Yehova a yongola oku ndi sapuila. Eci ci vetiya utima wange oco ndi linge ovina ndomo ci likuata lonumbi yaco.” Eci tu sanda onumbi ya Yehova vovisonehua loku kuama onumbi yaco, tu ka tẽla oku pandikisa kasakalalo.

Daviti wa limbuka okuti, oco a litunde ciwa koku yula asakalalo, wa sukilile ekuatiso lia Yehova. Eye wa enda oku sanjukila calua ekuatiso lia Yehova kuenje wa vetiyiwa oku soneha hati: “Lunene wa Suku, ndi pondola oku londa kocimbaka cimue. Suku yocili eye una o ndi pamisa.” (Os 18:29, 32) Pamue tu sima okuti, ovitangi vietu via tĩla calua kuenda ka vi tava oku vi potolola loku pandikisa lavio. Pole, lekuatiso lia Yehova, tu pondola oku pandikisa kovitangi viosi ndaño okuti vinene! Ocili, eci tu likutilila ku Yehova oku pinga ekuatiso, oku sokolola kovina viosi a tu lingila ale kuenda oku kapako olonumbi viaye, tu pondola oku kolela okuti eye, o ka tu ĩha ongusu kuenda olondunge tu sukila oco tu tẽle oku pandikisa kasakalalo!