ẸNWAN sa dia kerẹ oghwa ọhọhọhọ vwẹ udu rẹ avwanre. (Isẹ 12:25) Wo hirharoku ọdjarhe ro nẹ obuko rẹ ẹnwan cha jovwore? Wo no nẹ wo rhe che se chirakon rọyen ọfa-a? Ọ da dia ọtiọyen, kọyen ọ dia owẹ ọvo yehẹ ẹdia yena-a. Kerẹ udje, evo vwẹ usun rẹ avwanre vwẹrote ohwo rẹ orua rayen ọvo rọ muọga, ohwo rẹ ayen vwo ẹguọnọ kpahen ghwu va ihwo evo abọ re, evo hirharokuẹ ebẹnbẹn rẹ oghwọrọ ri kpregede soro. Ẹkẹvuọvo, die yen sa chọn avwanre uko vwo yerin ghene ẹnwan? *

E se yono kpahen obo re se vwo yerin ghene ẹnwan siẹrẹ a da fuẹrẹn udje rẹ Ovie Devid. O hirharoku ebẹnbẹn buebun vwẹ akpeyeren rọyen, ọ tobọ hirharoku ughwu dede vwẹ ọkievo. (1 Sam. 17:34, 35; 18:10, 11) Mavọ yen Devid se vwo yerin ghene ẹnwan? Mavọ yen a sa vwọ vwẹrokere udje rọyen?

Devid hirharoku edavwini buebun ẹsiẹvo. Kerẹ udje, roro kpahen obo re phiare rọ vwọ djẹ, ọke Ovie Sọl vwọ guọnọ hwe. Devid vẹ usun rọyen vwo rhivwin rhe Ziklag, ayen da mrẹ nẹ ivwighrẹn rayen rhere, ayen cho ekuakua rayen, torhẹ iwevwin rayen ji mu ihwo rẹ orua rayen reyọ kerẹ eviẹn. Die yen Devid ruru? “Etiyin Devid vẹ ihwo re vẹ ọye gba herọ da teye ugoroviẹ, ayen da viẹ bẹsiẹ rẹ oma vwo ro ayen.” Vwọba ọdjarhe nana, ihwo re vẹ ọyen gba herọ je jiroro “tanẹ ayen che phio.” (1 Sam. 30:1-6) Enẹna, ebẹnbẹn erha kiriguo kọyen Devid hirharokuẹ na: Orua rọyen hẹ ẹdia rẹ imuoshọ, oshọ muo nẹ ihwo re vẹ ọyen gba herọ guọnọ hwe, vwẹ ọke yena vuọvo na, Ovie Sọl je guọnọ hwe. Gba vwẹ ẹwẹn roro oborẹ ẹnwan che mu Devid rọ te vwẹ ọke yena.

Die yen Devid ruru? Ugege yena, “fiki rẹ Ọrovwohwo Ọghẹnẹ rọye udu rẹ Devid da gan.” Mavọ yen Devid se vwo ru ọnana? Kirobo ro ruẹ jovwo, Devid nẹrhovwo rhe Jihova vwọ yare ukẹcha rọyen ji roro kpahen oborẹ Jihova vwọ chọn uko vwẹ ọke rọ wanre. (1 Sam. 17:37; Une 18:2, 6) Devid mrẹrẹ kirobo ri fori rọ vwọ nọ mie Jihova, ọtiọyena, ọ da nokpẹn rẹ odjekẹ mie Jihova kpahen obo ro che ru. Rọ vwọ nọ mie Jihova nu, o de ru nene oborẹ Jihova vuẹrẹ ugugege yena. Ukuotọ rọyen, Jihova de bruba vwọ kẹ ayen, ayen mu ihwo rẹ orua rayen kugbe ekuakua rayen reyọ mie ihwo na. (1 Sam. 30:7-9, 18, 19) Wọ jokaphiyọ erọnvwọn erha rẹ Devid ruru na? Ọ nẹrhovwo rhe Jihova vwọ yare ukẹcha, o kperan rẹ oborẹ Jihova ru kẹ wan jovwore, ọ da reyọ odjekẹ rẹ Jihova vwọ kẹ vwo ruiruo. Mavọ yen a sa vwọ vwẹrokere Devid? Roro kpahen Idjerhe erha re se vwo ru ọtiọyen.

1. Nẹrhovwo. Kọke kọke rẹ avwanrẹ da ro ẹnwan, a sa nẹrhovwo rhe Jihova nẹ ọ chọn avwanre uko je kẹ avwanre aghwanre. Ẹnwan na se kpotọ siẹrẹ e de muomaphiyọ ẹrhovwo je vuẹ Jihova obo ri kpokpo avwanre eje. Yẹrẹ a sa nẹrhovwo phiyọ evun kprẹn ọ da dianẹ ọyen obo re se ru vwẹ ẹdia tiọyena. Kọke kọke a da vwẹroso Jihova nẹ ọ cha chọn avwanre uko, kerẹ Devid, jẹ a tanẹ, “Ọrovwohwo na oragha mẹ, kugbe egbe mẹ, kugbe osivwi mẹ, Ọghẹnẹ mẹ, oragha mẹ, evun wẹn me da djahe.” (Une 18:2) Ẹrhovwo  ghene wian? Oniọvo aye ọvo rọ ga kerẹ ọkobaro ọkieje re se Kahlia da ta: “Me da nẹrhovwo nu, ẹwẹn mẹ ko te otọ. Ẹrhovwo vwẹ ukẹcha kẹ vwẹ vwo vwo ọkpọ rẹ iroro ri Jihova, kọ je nẹrhẹ ẹroẹvwọsuọ ri mi vwo kpahọn ganphiyọ.” Vwọrẹ uyota, ẹrhovwo ọyen okẹ vẹ ẹgba rẹ Jihova vwọ kẹ avwanre nẹ ọ chọn avwanre uko vwo yerin ghene ẹnwan.

2. Kperan. Wo de kperan rẹ erọnvwọn sansan re phia vwẹ akpeyeren wẹn re, wo se roro kanre edavwini sansan ru wo se phikparobọ fikirẹ ukẹcha ri Jihova? Avwanre de se kperan rẹ oborẹ Jihova chọn avwanre vẹ idibo rọyen rẹ ọke rẹ awanre uko, ẹwẹn rẹ avwanre ko che rhi te otọ, kẹ avwanre ji che vwo imuẹro rọ ghwotọphiyọ kpahen Jihova. (Une 18:17-19) Ọkpako ọvo re se Joshua da ta: “O vwo asan rẹ mi si ẹrhovwo mẹ rẹ Jihova kpahenphiyọ re phiyọ. Ọnana chọn vwẹ uko vwọ karophiyọ ọke re me vwọ yare Jihova vwẹ ẹrhovwo vwọ kẹ emuọvo kiriguo ọ da ghene vwẹ obo re me guọnọre na vwọ kẹ vwẹ.” Vwọrẹ uyota, e de kperan rẹ oborẹ Jihova ru kẹ avwanre vwẹ obuko re, ọ cha chọn avwanre uko vwo yerin ghene ẹnwan.

3. Vwo ruiruo. Tavwen e ki brorhiẹn rẹ obo re ru, a sa guọnọ odjekẹ ra sa vwẹroso rọhẹ Baibol na. (Une 19:7, 11) Ihwo buebun rhe mrẹvughe re nẹ ayen de ru ehiahiẹ kpahen ẹkpo ri Baibol ọvo kiriguo, kẹ ayen vwo ẹruọ rẹ ẹkpo yena je riẹn oborẹ ayen sa vwọ reyọ vwo ruiruo vwẹ akpeyeren. Ọkpako ọvo re se Jarrod da ta: “E vwo ruẹ ehiahiẹ chọn vwẹ uko vwọ riẹn ẹbẹre sansan rẹ ẹkpo ri Baibol ọvo je riẹn oborẹ Jihova guọnọ vuẹ vwẹ vwẹ ẹkpo yena. Ọnana chọn vwẹ uko vwo vwo imuẹro kpahen obo rehẹ etiyin na rere mi se vwo ru nene odjekẹ rọhẹ etiyin na.” A da guọnọ odjekẹ ri Jihova vwẹ Baibol na ji ru nene, avwanre ke sa dia ihwo ri se yerin ghene ẹnwan.

Devid nabọ vwo ẹruọ rọyen nẹ ọyen ki se phi ẹnwan kparobọ, ọyen guọnọ ukẹcha ri Jihova. O vwo ọdavwaro kpahen ukẹcha ri Jihova mamọ te asan rọ da ta: “Vwẹ oma rẹ Ọghẹnẹ mi se pho wan igbẹhẹ. Ọghẹnẹ . . . vwẹ ogangan rhuo vwe.” (Une 18:29, 32) E se no nẹ ebẹnbẹn rẹ avwanre ganre mamọ te ẹdia rẹ e che se chirakon raye-en. Ẹkẹvuọvo, womarẹ ukẹcha ri Jihova e se phi ayen kparobọ! E, wọ da nẹrhovwo vwọ yare ukẹcha ri Jihova, kperan rẹ obo ro ru kẹ wẹ re, ji vwẹ odjekẹ rọyen vwo ruiruo, o se mu avwanre ẹro nẹ ọ cha kẹ avwanre ẹgba kugbe aghwanre ra guọnọre e se vwo yerin ghene ẹnwan rẹ avwanre.