NOANTRI sofrimo tanto quando restemo ansiosi. (Pro. 12:25) Te te ghè belche sentio massa ansioso che te ghè pensà che no te sarissi bon de dàrghene fora? Arquanti de noantri se sente strachi, ansiosi e desanimadi. Par esémpio, arquanti i ga de tender de una persona dela fameia che la ze malada, altri i ga perso qualchedun nela morte e fursi altri i ga infrontà desgràssie dela naturesa. Alora, cossa che pol giutarne a dàrghene fora cola ansietà? a

Noantri podemo imparar come dàrghene fora cola ansietà quando studiemo el esémpio del rè Davi parché el ga infrontà tante brute dificoltà. (1 Sam. 17:34, 35; 18:10, 11) Cossa ga giutà Davi a dàrghene fora cola ansietà? E come podemo far compagno a lu?

Come Davi l’è stà bon de dàrghene fora cola ansietà? Varda quel che ga sucedesto con lu. Davi l’era drio scampar via del rè Saul parché lu el volea coparlo. Dopo, quando Davi e i so òmini i ze tornadi casa de una guera, i ze restadi spaventadi parché i so nemighi i ghe gavea ciavà le so robe, brusà le so case e portà via le so fameie. Come che Davi el se ga sentio? Davi e i so òmini i ga piandesto tanto fin no gaver gnanca pi forsa. Dopo, Davi el ga anca savesto che i òmini che lu el se fidea tanto i volea coparlo a sassade. (1 Sam. 30:1-6) Alora, Davi l’era drio infrontar tre dificoltà insieme: I so nemighi i gavea portà via la so fameia, i òmini che lu el se fidea i volea coparlo e ghe tochea scampar via de Saul. Sicuro che Davi l’è restà tanto ansioso!

Cossa che Davi el ga fato? Suito lu l’è ndato in serca dela forsa del so Dio, Geovà. Davi sempre el preghea a Geovà par domandarghe aiuto e el pensea sora tute le volte che lu lo gavea belche giutà. (1 Sam. 17:37; Sal. 18:2, 6) Davi el ga domandà el aiuto de Geovà e quando el ga capio cossa che el gavea de far, el ga obedio. Cossita, Geovà el ga giutà Davi e i so òmini, e lori i ze stati boni de ciapar indrio le so robe e de liberar le so fameie. (1 Sam. 30:7-9, 18, 19) Gheto visto le tre robe che Davi el ga fato? Lu el ga pregà a Geovà par domandarghe aiuto, el ga pensà sora tute le volte che lu lo gavea belche giutà, e lo ga obedio. Come che te pol far come Davi?

1. Prega. Sempre che se sentimo ansiosi podemo pregar a Geovà e domandar el so aiuto e la so sabedoria. Sicuro che el ndarà giutarne tanto se preghemo a lu e ghe parlemo tuto quel che semo drio infrontar. Ma se no semo boni de far cossita, podemo far una orassion pi pìcola. Se sempre domandemo el aiuto de Geovà, mostremo che se fidemo in lu come Davi. Lu el ga dito: “Geovà l’è la me ròcia, la me fortalessa e quel che el me salva. El me Dio l’è come una ròcia, mi vao in serca de protession in lu.” (Sal. 18:2) Varda un esémpio che mostra che pregar a Dio pol giutarne tanto. Una pioniera che la ga nome Kahlia la ga  dito: “Dopo che prego, mi me sento pi tranquila, son pi bona de pensar come Geovà e me fido de pi in lu.” Alora, pregar l’è un presente de Geovà che ne giuta a dàrghene fora cola ansietà.

2. Pensa in come Geovà el te ga belche giutà. Sito bon de ricordarte de quando Geovà el te ga giutà a infrontar una dificoltà? Quando pensemo sora come Geovà el ga giutà i so servi nel passà e come el ne ga belche giutà, restemo pi tranquili e se fidemo de pi in lu. (Sal. 18:17-19) Un ansiano de nome Joshua el ga dito: “Mi proo pensar in tute le volte che Geovà el ga rispondesto ale me orassion. Ricordarme de questo me giuta a veder che, quando go domandà el so aiuto, lu el me ga dato pròpio quel che gavea de bisogno.” Sicuro che quando pensemo sora tute le volte che Geovà el ne ga belche giutà, restemo pi forti par dàrghene fora coi pensieri che i ne fà restar ansiosi.

3. Fà quel che te ghè imparà. Quando ghemo de dessider una roba, ghemo de studiar la Bìblia par saver cossa che Geovà el pensa. (Sal. 19:7, 11) Tanti i dise che l’è pi fàcile meter in pràtica un consìlio dela Bìblia quando i lo capisse ben. Un ansiano de nome Jarrod el ga dito: “Quando mi stùdio un versìcolo dela Bìblia, son bon de capirlo meio e saver quel che Geovà el vol insegnarme. Cossita mi resto cada volta pi sicuro de quel che go imparà e son bon de meterlo in pràtica.” Quando studiemo la Bìblia e femo quel che ghemo imparà, semo pi boni de dàrghene fora cola ansietà.

Davi el savea che sol el saria bon de dàrghene fora cola ansietà se el gavesse el aiuto de Geovà. Davi el dea tanto valor a tuto quel che Geovà el fea par lu. Par quela che lu el ga dito che Geovà el ghe dea tuta la forsa che el gavea de bisogno e che, col so aiuto, lu l’era bon de ndar su par una muràlia. (Sal. 18:29, 32) Pol esser che i nostri problemi i sìpia come muràlie. Ma col aiuto de Geovà, semo boni de infrontar tuti i problemi. Come ghemo visto, ghemo de pregar a Geovà par domandarghe aiuto, pensarghe sora in come el ne ga belche giutà, e far quel che el ne dise. Se femo queste robe, podemo esser sicuri che Geovà el ndarà darne la forsa e la sabedoria par dàrghene fora cola ansietà!