WORRY-WORRY fit be like heavy load for our heart. (Prov. 12:25) You don ever suffer because of worry-worry? You don ever feel like say you no go fit endure-am again? If your answer na yes, make you know say no be only you de feel like that. Many of us don tire for life. Some de face worry-worry, and some dey sad because of different-different reason. For example, some de take care of their family member wey no well. For some people, their people wey they love don die. And some other people de suffer because of things like heavy rain or breeze wey scatter their property. But wetin fit help us to cope well with worry-worry? *

We fit learn plenty things about how we fit cope with worry-worry when we think about the example of King David. E suffer plenty hard condition for e life and even face death sometimes. (1 Sam. 17:34, 35; 18:10, 11) Wetin help David cope well with worry-worry? How we fit follow e example?

David face plenty problem for the same time. For example, think about wetin happen to David when e de run from King Saul wey want try to kill-am. When David and e men come back from war, they surprise to see say their enemies don thief their property, burn their house them, and carry their family people comot. Wetin David do? Bible tell us say: “David and the men wey dey with-am start to cry loud, until they no get power to cry again.” Another thing wey really make David worry more na say, e men wey e really trust “talk say they want stone-am.” (1 Sam. 30:1-6) So, David de face three serious problems for the same time. E family dey for danger, e de fear say e men fit kill-am, and King Saul de pursue-am. Just think about the kind worry-worry wey David go don face!

Wetin be the next thing wey David do? Quick-quick, e “receive strength from Jehovah e God.” How David fit don do this one? We know say David de always pray to Jehovah for help and think about the way Jehovah don help-am before. (1 Sam. 17:37; Ps. 18:2, 6) David see say e need to find out from Jehovah wetin e go do. So e ask Jehovah wetin e suppose do. After David receive direction from Jehovah, e no waste time do-am. Because of this one, Jehovah bless David and e men, and they save their family and their property. (1 Sam. 30:7-9, 18, 19) You see the three things wey David do? E pray to Jehovah for help. E think about the ways wey Jehovah don help-am before. And e obey wetin Jehovah talk. How we fit follow David example? Make we talk about three ways.

1. Pray. Anytime wey we start to worry, we fit pray to Jehovah make e help us and give us sense to handle the problem. When we tell Jehovah about anything wey we de worry about, this one fit make our mind calm down. Or we fit pray short silent prayer, if na the only thing wey we fit do for the condition wey we dey that time. Anytime wey we beg Jehovah for help, we de show say we really trust Jehovah the way David do. E talk say: “Jehovah na my hard rock and my savior and the Person wey de protect me. My God na my  rock, the place wey I fit hide.” (Ps. 18:2) Prayer really de work? One pioneer sister wey e name na Kahlia talk say: “After I pray finish, I de get peace. Prayer de help me to think the way wey Jehovah de think and make my trust for Jehovah strong more.” True-true, prayer na wonderful gift from Jehovah wey de help us cope with worry-worry.

2. Think. When you think about the things wey don happen for your life before, you fit remember the problems wey Jehovah don help you endure? When we think about how Jehovah don help us before and even e servants for past, we go get peace of mind and we go trust Jehovah more. (Ps. 18:17-19) One elder wey e name na Joshua talk say: “Anytime wey I beg Jehovah for something and e answer me, I get the list wey I de write-am. This one don help me remember the times wey I ask Jehovah for something and e answer me just the way I need-am.” True-true, when we think about wetin Jehovah don do for us, we go get the power wey we need to continue to fight worry-worry.

3. Obey. Before we decide wetin we go do for any situation, make we check Bible to get the best advice. (Ps. 19:7, 11) Many people don find out say when they do research for one particular Bible verse, this one de help them really understand how the verse fit help them for their life. One elder wey e name na Jarrod talk say: “Research de help me learn more things about the particular Bible verse wey I de read, and help me understand the thing wey Jehovah de tell me. This one de really help me understand wetin I read so that I go fit obey wetin e talk.” When we de find the direction wey Jehovah de give us for Bible and follow-am, this one go help us get peace and joy when we de face worry-worry.

David understand say before e go fit succeed to endure worry-worry, e need help from Jehovah. E really value the support wey e de get from Jehovah sotey this one move-am to talk say: “With power from God I fit climb wall. Na the true God be the person wey de give me power.” (Ps. 18:29, 32) Problems fit be like wall wey person no go fit climb. So we fit de feel say our problem no get solution. But with the help from Jehovah we fit endure any serious problem. True-true, when we pray to Jehovah for help, we think about all the things wey e don do for us before, and obey the things wey e de tell us, we go fit dey sure say e go give us the power and the sense wey we need to cope well with worry-worry!