MAYINDU ma kiunda malenda ba buka kizitu tuidi mu ntima. (Zinga. 12:25) Ngie mana viokila mu mambu ma kuvanga kukuazuka? Ngie mana yindula ti wulendi bue nunga ko kuvanga mambu mu kibila ki kiunda kingolo widi? Boti buawu, wisi ko ngie veka. Bawombo mu befu tumana viokila mu mambu ma kiunda, ḿba mu kibila ki lufua lu mutu tunzolanga, bivuka voti mambu mankaka manyikuna mabanza mitu. Vayi mbi bilenda kusadisa kununga mambu ma kukuazula? *

Tulenda longuka mawombu matedi kukuazuka bo tumfiongunina kinongo ki Ntinu Davidi. Nandi wuviokiokila mu mambu mawombo maphasi mu luzingu luandi ayi khumbu zinkaka luzingu luandi luaba banga va kingela. (1 Samu. 17:34, 35; 18:10, 11) Mbi bisadisa Davidi kununga kiunda kingolo kaba? Buidi tulenda landikinina kifuani kiandi?

Davidi wuviokila mu mambu mawombo maphasi mu khumbu yimueka. Dedi, yindula buidi kabela bo kaba tina Ntinu Sauli. Bo Davidi ayi masodi mandi bavutuka mu mvita, bawu baba mu kiunda kingolo kibila zimbeni ziawu banata biuma biawu, bavika zinzo ziawu ayi banata makanda mawu. Mbi Davidi kavanga? “Davidi ayi masodi mandi batona kutenduka kudila, nati bayiza vonga kudila.” Ayi kiunda ki Davidi kibuelama bo masodi mandi “baba tomba kumviva mamanya.” (1 Samu. 30:1-6) Mu thangu ayoyo Davidi waba viokila mu mambu matatu maphasi mu khumbu yimueka: Luzingu lu dikanda diandi luba va kingela, nandi kasa zaba ko boti masodi mandi bankuiza mvonda ayi Ntinu Sauli mvandi waba tomba kumvonda. Yindulabu buidi Davidi kaba kuazukila mu thangu beni!

Mbi Davidi kavanga? Mu nsualu nandi wutomba “khindusulu kuidi Yave Nzambi’andi.” Buidi kavangila mawu? Mu kusambila ayi kuyindula buidi Yave kansadisila mu mambu kaviokila kumbusa. (1 Samu. 17:37; Minku. 18:2, 6) Davidi wuvisa nkinza wu kutomba zithuadusulu zi Yave. Diawu kadindila Abiatali mfumu yi zinganga nzambi katuala efode, muingi kazaba mbi kafueti vanga. Bosi nandi wutambula zithuadusulu zi Yave ayi mu nsualu wulandakana ziawu. Mu kibila akiokio, Davidi ayi masodi mandi batambula lusakumu lu Yave, banunga kukula makanda mawu ayi biuma biawu. (1 Samu. 30:7-9, 18, 19) Benunga kumona mambu matatu Davidi kavanga? Nandi wusambila kuidi Yave muingi kansadisa, wuyindula buidi Yave kansadisila kumbusa ayi wuvanga mambu maba tombulu. Buidi tulenda landikinina zithuadusulu zi Yave? Mona ziphila zitatu.

1. Sambila. Bo tunkuazuka, tulenda sambila kuidi Yave muingi ka tusadisa ayi ka tuvana nduenga. Kuzabikisa mambu ma tukuazula kuidi Yave ma tusadisanga kuba bavumbama. Mvandi bo tundinda lusalusu lu Yave, tummonisanga ti tumfiatilanga mu Yave dedi Davidi, bo katuba: “Yave nandi dimanya diama, kisuamunu kiama ayi mvukisi’ama. Nzambi’ama nandi dimanya diama, kuidi nandi yinsuaminanga; Nandi widi nkaku’ama, mvukisi’ama wu lulendu, kisuamunu kiama kingolo.”( Minku. 18:2) Bukiedika  ti kusambila kulenda ku tusadisa? Yaya Kahlia widi ntuami ntuala wutuba: “Bo yinsambila yimbakanga ndembama. Kusambila ku kutsadisanga kuzaba mayindu ma Nzambi, kusadila mambu yinlonguka ayi lufiatu luama mu nandi lumbuelamanga.” Mvandi, nsambu widi nkhailu wu Yave wu tusadisanga kubika kuazuka beni.

2. Yindula. Bo wuntala kumbusa, wulenda yindula mambu Yave kamana kusadisa kununga? Bo tunyindula mambu Yave kamana tusadisa kununga, tumbakanga mangolo muingi kununga mambu tumviokila mu luzingu. (Minku. 18:17-19) Yaya Joshua widi nkulutu wu kimvuka wutuba: “ Minu yinsonikanga mimvutu mioso mi minsambu miama. Ayi mawu ma kutsadisanga kutebuka moyo buidi Yave kama tambudila minsambu miama.” Bikiedika, bo tunyindula phila Yave kamana tusadisila, tumbakanga mangolo ma kununga mabanza ma kiunda kingolo.

3. Vanga mambu mantombulu. Ava kubaka makani ma kuvanga dioso diambu, tomba zithuadusulu zi Yave. (Minku. 19:7, 11) Bawombo babakula ti bo bamfiongunina matangu mantubila mambu bamviokila, bawu banluta bakanga ndandu mu mawu. Nkulutu mueka wu kimvuka bantedilanga Jarrod wutuba: “Kufiongunina lutangu lu Kibibila ma kutsadisanga kuvisa mamoso matedi lutangu beni ayi kuzaba mbi Yave kantomba yivanga. Mawu manyikunanga mabanza mama ayi ma kutsadisanga kusadila zithuadusulu beni.” Bo tuntomba zithuadusulu zi Yave mu kusadila Kibibila ayi kulandakana ziawu, tumbanga bakubama muingi kununga mabanza ma kiunda.

Davidi wuvisa ti muingi kununga mambu maba kunkuazula, vaba tombulu lusalu lu Yave. Nandi waba tondanga beni mu lusalusu lu Yave, diawu katubila: “Mu lusalusu luaku yilenda maka bibaka bi luphangu luzangama. Nzambi yikiedika nandi wu kuphananga mangolo.” (Minku. 18:29, 32) Khumbu zinkaka tulenda mona ti tulendi nunga ko mabanza ma kiunda, vayi mu lusalusu lu Yave tulenda nunga. Bukiedika, bo tuntomba lusalusu lu Yave mu nzila nsambu, kunyindula mu phila kama tusadisila kumbusa ayi bo tumvanga mambu mantombulu, tulenda ba lufiatu ti Yave wunkuiza tuvana mangolo mantombulu ayi nduenga muingi kununga mambu ma tukuazula!