ORA napa tuuxa ansiedad nabé runinani laa (Prov. 12:25). ¿Ñee huayuni sentirluʼ zacá la? Zándaca nuu biaje riníʼ íqueluʼ maʼ qué gápaluʼ stipa, peru cadi lii si rizaacaluʼ zacá. Stale de laanu cayápanu tuuxa binni ni huará, guti tuuxa familia stinu, cayacananu pur bizaaca xiixa desastre natural o maʼ gudídinu lu xiixa guendanagana ni gulee gana laanu ne ni bisidxaga laanu. ¿Xi zacané laanu guni controlarnu ansiedad gápanu yaʼ? *

Zanda gacané ejemplu stiʼ rey David laanu guni controlarnu ansiedad gápanu. Purtiʼ gudíʼdibe lu stale guendanagana, dede bixooñebe para cadi guuticabe laabe (1 Sam. 17:34, 35; 18:10, 11). ¿Xi biʼniʼ David para biʼniʼ controlar ansiedad gupa yaʼ? ¿Ximodo zanda chinándanu ejemplu stibe?

Bidxaagalú David stale guendanagana. Guidúʼyanu xi bizaaca dxi canaguxooñebe de rey Saúl purtiʼ nuu guuti laabe. Ne dxi biguetaʼ David ne ca soldadu stiʼ ra lídxicaʼ ndaaniʼ guidxi Ziclag, biiyacabe gulaʼnaʼ ca enemigu stícabe ca cosa risaca nápacabe, bizaaquicaʼ lídxicabe ne zinecaʼ familia stícabe. ¿Xi biʼniʼ David yaʼ? Relatu que ná: «Guizáʼ biinaʼ David ne ca soldadu stiʼ. Biinacabe dede ra birá stipa stícabe». Ne cadi ngue si, ca hombre ni nápabe confianza que guniʼcaʼ zuchacaʼ guié laabe (1 Sam. 30:1-6). Ngue runi chonna guendanagana ngue cadxaagalú David, nuu familia stibe lu peligru, ca hombre ni nápabe confianza que guníʼ zuuticaʼ laabe ne canazananda rey Saúl laabe para guuti laabe. ¿Ñee riníʼ íqueluʼ pabiáʼ guyuu David xizaa la?

¿Xi bíʼnibe yaʼ? Nagueendaca «biyúbibe Jehová Dios stibe para gudii stipa laabe». ¿Ximodo bíʼnibe ni yaʼ? Gupa David costumbre guni orar para guinabaʼ gacané Jehová laa ne laaca biʼniʼ meditarbe ximodo huayacané Jehová laabe (1 Sam. 17:37; Sal. 18:2, 6). Laaca bidii David cuenta caquiiñeʼ ganna xi ná Jehová. Ngue runi gunabadiidxabe Dios xi caquiiñeʼ gúnibe. Ne bíʼnibe ni gudxi Jehová laabe. Pur ngue la? guluu ndaayaʼ Jehová David ne ca soldadu stiʼ, biguetaʼ familia sticaʼ ne ca cosa ni biníticaʼ (1 Sam. 30:7-9, 18, 19). ¿Bidiiluʼ cuenta xi chonna cosa biʼniʼ David la? Biʼniʼ orarbe Jehová para guinábabe laa gacané laabe, biʼniʼ meditarbe xi guiráʼ huayuni Jehová para gacané laabe dxiqué ne bíʼnibe ni gudxi Jehová laabe. ¿Ximodo zanda chinándanu ejemplu stiʼ David yaʼ? Guidúʼyanu chonna modo zanda gúninu ni.

1. Guni orarnu. Ora guzulú guni sentirnu ansiedad, zanda guni orarnu Jehová para guinábanu laa gacané laanu gánnanu xi gúninu. Pa guni orarnu Jehová xadxí ne gábinu laa xi naguu xizaa laanu, zatadxí ladxidoʼno. Peru pa qué zanda la? dede ndaaniʼ ladxidoʼno zanda gúninu ti oración nachucu. Cada biaje guinábanu Jehová gacané laanu, cusihuínninu nápanu confianza laabe cásica David. Laabe guniʼbe: «Jehová nga ti guié naroʼbaʼ para naa, ti lugar nadipaʼ para naa, ni rulá naa. Dios stinneʼ nga ti guié  para naa, ra ruyubeʼ guilaʼyaʼ» (Sal. 18:2). ¿Dxandíʼ racané oración laanu la? Sicaríʼ guníʼ ti precursora ni láʼ Kahlia: «Despué de guneʼ orar runeʼ sentir ratadxí ladxiduáʼ. Racané oración naa guiníʼ iqueʼ casi riníʼ ique Jehová ne gapaʼ jma confianza laabe». Ti regalu stiʼ Jehová nga oración ne racaneni laanu cadi guniná peʼ ansiedad laanu.

2. Guni meditarnu. ¿Ñee rietenaláʼdxiluʼ ximodo gucané Jehová lii guni huantarluʼ xiixa guendanagana gúpaluʼ la? Ora riníʼ íquenu ximodo gucané Jehová ca xpinni dxiqué ne ximodo racanebe laanu, rápanu jma confianza laabe ne ratadxí ladxidoʼno (Sal. 18:17-19). Sicaríʼ guníʼ ti ancianu láʼ Joshua: «Maʼ bineʼ ti lista de ca oración stinneʼ ni huacabi Jehová. Zacá zanda guietenaladxeʼ xi gunabaʼ laabe ne ximodo gucanebe naa». Ora guiníʼ íquenu guiráʼ ni maʼ biʼniʼ Jehová pur laanu, rudiini stipa laanu para ganda gudxíʼlunu ansiedad nápanu.

3. Gúninu xiixa. Ante quixhe íquenu gúninu xiixa, galán guidúʼyanu xi ná Biblia, purtiʼ laasini neni conseju galán ni zacané laanu (Sal. 19:7, 11). Stale tu laa maʼ bidii cuenta, ora runi investigar ti versículo ni zeeda lu Biblia, jma riene ximodo zanda guni ni lu xquendanabani. Ti ancianu ni láʼ Jarrod, guníʼ: «Ora runeʼ investigar, racané ni naa guieneʼ chaahueʼ ti versículo. Zacá rieneʼ xi nuu Jehová gabi naa, rindá ca stiidxabe ndaaniʼ ladxiduáʼ ne runeʼ stipa guneʼ ni riuuláʼdxibe». Ora ruyúbinu gacané Jehová laanu lu Biblia ne rinándanu ca mandamientu stiʼ, jma riuʼnu listu para gudxíʼlunu ansiedad.

Gunna David caquiiñeʼ gacané Jehová laa para ganda guni controlar ansiedad stiʼ. Ne guizáʼ bidiibe xquixe peʼ Dios pur gucané laabe, ngue runi guniʼbe: «Pur poder stiʼ Dios zanda quibaʼ ti muru». Ne laaca bizeetebe Dios ni dxandíʼ nga rudii stipa laabe (Sal. 18:29, 32). Zándaca guiníʼ íquenu zeeda gaca ca problema stinu casi muru ni rucueeza laanu, peru zanda gacané Jehová laanu tídinu ca ni. Pa guni orarnu Jehová para gacané laanu, guni meditarnu xi guiráʼ maʼ bíʼnibe pur laanu ne gúninu ni racaláʼdxibe, zudiibe stipa laanu ne zaguixhedxibe xquendabiaaninu para ganda guni controlarnu ansiedad stinu.