1-2. (a) Yuneki onongo obedo anga, dok gin ango ma oweko obedo tek bote me pwonyo wode lok i kom Jehovah ki Yecu? (b) Lok kong i kom cal ma tye i pok ngeye.

 KADI bed ni Baibul pe tito kit ma batija pa Temceo otimme kwede, pe tek tutwal me goyo i wiwa yomcwiny ma mine Yuneki obedo kwede i nino meno. (Car. 23:25) Tam kong i kom awaka ma en obedo kwede i kare ma oneno Temceo ocung i pii ma o wa i pyere. En owoto ki bwunyo kun Loi, daa Temceo, ocung cok kwede dok okwake. Yuneki oomo yweyo i cawa ma kiluto Temceo i pii. Pii otwagge ci kiwoto Temceo woko ma tye ka bwunyo matek, dok i cawa meno Yuneki ocako koko pi yomcwiny ma en onongo tye kwede. Kadi bed pe obedo yot, ento Yuneki opwonyo wode me maro Jehovah kacel ki Yecu Kricito. Ariya mene ma en oloyo i kare ma en obedo ka tute me pwonyo wode?

² Temceo odongo i gang ma lunywalle dinigi patpat. Wonne onongo Lagrik, dok mine ki daane onongo gubedo Lujudaya. (Tic 16:1) Temceo onongo nen calo tye ki mwaka apar ki wiye i kare ma Yuneki gin ki Loi gudoko Lukricitayo. Kadi bed kit meno, wonne pe odoko Lakricitayo. Dini mene ma onongo Temceo biyerone? En onongo dong dit ma romo moko tamme pire kene. Tika en onongo biyero dini pa wonne? Tika en onongo bimoko i kom pwony me dini pa Lujudaya ma kipwonye kwede i kare ma en pud tidi? Nyo mono en onongo bidoko lapwonnye pa Yecu Kricito?

3. Ma lubbe ki Carolok 1:8, 9, Jehovah neno tic ma mege gitimo me konyo lutinogi me doko lureme nining?

 ³ Mege ma Lukricitayo i kare-ni bene gimaro jo me gangigi matek. Ma pire tek loyo, gimito ni gikony lutinogi me dongo wat macok ki Jehovah. Dok Lubangawa pwoyo tutegi matek. (Kwan Carolok 1:8, 9.) Jehovah okonyo mege mapol me pwonyo lutinogi me mare ki tic pire.

4. Ariya ango ma mege gikemme kwede i kare-ni?

⁴ I kare mogo, mege gibedo ka paro ka ce lutinogi biyero me tic pi Jehovah, kit ma Temceo otimo kwede. Man tye ada pien lunyodo gingeyo lyeto ma lobo pa Catan keto i kom lutinogi. (1 Pet. 5:8) Medo i kom meno, mege mapol gitye ka yelle me pwonyo lutinogi kengi pien coggi pe nyo coggi tye ento pe gubedo luwor Jehovah. Me labolle, laminwa mo ma nyinge Christine * owaco ni: “Cwara onongo obedo wego maber ma maro lutinone, ento en onongo pe ye ni apwony lutinowa me doko Lucaden pa Jehovah. Abedo ka kok tyen mapol, kun aparo ka lutinona onongo gibiworo Jehovah.”

5. Ngo ma wabinyamo i pwony man?

⁵ Ka ibedo mego ma Lakricitayo, itwero konyo lutinoni me maro Jehovah ki tic pire, kit ma Yuneki otimo kwede. I pwony man, wabinyamo kit ma itwero lubo kwede lanene kun ipwonyo lutinoni ki lokki kacel ki gin ma itimo. Wabineno bene kit ma Jehovah bikonyi kwede.

6. Kit ma kinyuto kwede i 2 Temceo 3:14, 15, Temceo odoko Lakricitayo nining?

⁶ I kare ma Temceo onongo pud awobi matidi, mine otute matek me pwonye “coc maleng,” kit ma Lujudaya onongo giniang kwede. Ngene kene ni, ngec pa Yuneki onongo nok pien en onongo pe ngeyo lok madok i kom Yecu Kricito. Kadi bed kit meno, gin ma Temceo opwonyo ki i Ginacoya omine ngec ma okonye me doko Lakricitayo. Ento tika en onongo bidoko Lakricitayo? I kare ma en odoko awobi, Temceo onongo dong twero moko ka ce ebidoko Lakricitayo nyo pe. Labongo akalakala mo, Temceo ‘oye’ lok ada madok i kom Yecu pi kony pa mine. (Kwan 2 Temceo 3:14, 15.) Cwiny Yuneki nen calo obedo yom adada ni epwonyo wode lok i kom Jehovah kadi bed onongo pe yot! Nying Yuneki a ki i nyig lok mo ma te lokke ni “loyo.” Dok ki lok ada, en oloyo ariya mapol wek ekony Temceo me maro ki tic pi Jehovah.

7. Yuneki onongo twero konyo wode nining me medde ki dongo i nge nongo batija?

⁷ I kare ma Temceo onongo batija, en ocobo yub ma pire tek i kwone. Ento Yuneki pud obedo ka paro pi wode kadi wa i nge batijane. Wode onongo bitic ki kwone i yo ma nining? Tika en onongo bimako lirem ki jo maraco? Tika en onongo bicito ka kwan i boma me Atene ci cako ye pwony pa luryeko ma kunnu? En mono onongo bibalo cawane ki kerone macalo bulu me tic pi lonyo? Yuneki onongo pe twero moko tam pi Temceo, ento en onongo twero konye me moko tam me ryeko. I yo ma nining? En onongo twero medde ki tic matek me pwonyo wode me maro Jehovah ki nyuto pwoc pi jami ducu ma Jehovah ki Yecu gutimo pigi macalo jo me ot. Ariya ma kit meno pe tye pi lutino ma gidongo  i ot ma lunyodogi gitye i dini mapatpat keken. Kadi bed lunywal aryo ducu gitye i ada, twero bedo tek pigi me konyo lutinogi me tic pi Jehovah. Pwony ango ma lunyodo gitwero nongo ki i lanen pa Yuneki?

8. I yo ma nining ma mego twero konyo cware ma Lacaden ka en tye ka pwonyo lutinogi lok i kom Jehovah?

⁸ Kwan Baibul ki lutinoni. Lumege, ka cwari tye Lacaden pa Jehovah, ci nongo Jehovah mito ni ikonye me pwonyo lutinowu ki lok i Kome. Yo acel ma itwero timo kwede man aye ki cwako yub me Woro pi Jo me Ot. Lok maber i kom yub man, dok itam i kom gin ma itwero timone wek obed mamit. Gwok nyo itwero konyo cwari me yubo gin atima mo mamit pi worowu macalo jo me ot. Medo i kom meno, ka lutinowu mogo gidongo ma gitwero kwano buk me Bed ki Kwo Maber Nakanaka! ci itwero konyo cwari wek lutinowu pe gukeng kwangi.

9. Mego ma cware pe tye Lacaden twero nongo kony ki kwene?

⁹ Mitte ni mege mukene gukwan Baibul ki lutinogi pien ni coggi pe, nyo coggi pe gubedo Lucaden. Ka meno aye kit ma kwoni tye kwede, pe ibed ki lworo tutwal. Jehovah bikonyi. Ti ki jami ticwa me pwony ma en omiyo kun wok ki i dulle me kwan ki lutinoni. Itwero bene penyo lunywal mukene ma gitye ki ngec madwong kit ma gitiyo kwede ki jami tic magi i worogi pi jo me ot. * (Car. 11:14) Jehovah bene twero konyi me lok ki lutinoni. Leg bote wek okonyi me ngeyo lapeny ma itwero tic kwede me golo gin ma tye i tamgi ki cwinygi. (Car. 20:5) Lapeny mo mayot calo ‘Pekoni madit loyo ki i cukul obedo ngo?’ twero cako boko lok ma bikonyi me pwonyo jami mapol.

10. Gin ango mukene ma iromo timone me konyo lutinoni me pwonyo lok i kom Jehovah?

¹⁰ Yeny yo mapatpat me pwonyo lutinoni lok i kom Jehovah. Lok i kom Jehovah ki jami mabeco mapol ma en otimo piri. (Nwo. 6:6, 7; Ic. 63:7) Man pire tek adada, tutwalle ka pe itwero kwan ki lutinoni ki gang. Christine, ma kiloko i kome con-ni owaco ni: “Onongo atye ki kare manok adada me lok ki lutinona i kom Jehovah, pi meno onongo atiyo ki kare mo keken ma onen. Onongo wacito ka rwene ki lutinona nyo wadonyo i yeya mo matidi ci wakwang wa i dye pii ka ma watwero lok iye i kom cwec pa Jehovah ki jami mukene ma twero konyogi me doko lurem Jehovah. I kare ma lutinona gudongo manok, acuko cwinygi me kwano Baibul pigi kengi.” Medo i kom meno, lok maber i kom dul pa Jehovah ki dok i kom omege ki lumege. Pe ilok marac i kom luelda. Gin ma iloko i kom luelda bimoko ka ce lutinoni gibilok kwedgi ka gimito kony.

11. Ma lubbe ki Yakobo 3:18, pingo pire tek me tic matek me kelo kuc i paciwa?

¹¹ Gwok kuc i paconi. Kare ducu nyut ki cwari kacel ki lutinoni ni imarogi. Ka itye ka lok i kom cwari, lok ki mwolo dok ki woro, dok ipwony lutinoni bene me timo kit meno. Ka itimo meno, ibiweko bedo yot pi lutinoni me pwonyo lok i kom Jehovah. (Kwan Yakobo 3:18.) Nen kong labol pa Jozsef, ma tiyo macalo painia keken i lobo Romania. I kare ma en pud  tidi, wonne oyelle matek me gengo en, mine, omine ki lumegine ki tic pi Jehovah. Jozsef owaco ni: “Mamana otute matek me kelo kuc i pacowa. Ka babana odoko ger marac, ci mamana onongo mwolle dok nyutte kica adada. Ka mamana oneno ni wan lutino watye ka nongo tek me nyuto woro kacel ki bedo luwiny bot babawa, ci en onongo kwano kwedwa Jo Epeco 6:1-3. I nge meno, en onongo tittiwa kit mabeco ma babawa tye kwede kun konyowa me niang pingo omyero wamare. Meno okonyowa me bedo ki kuc i pacowa.”

12. Ma lubbe ki 2 Temceo 1:5, lanen pa Yuneki ogudo Temceo nining?

¹² Kwan 2 Temceo 1:5. Yuneki oweko lanen maber pi Temceo. En nen calo opwonyo Temceo ni ka watye ki niye, ci omyero wanyut i ticwa. (Yak. 2:26) Labongo akalakala mo, Temceo onongo twero neno ni mar pi Jehovah aye tugo cwiny mine me tic pire. Temceo nen calo oneno ni tic pi Jehovah okelo ki mine yomcwiny. Lanen maber pa Yuneki ogudo Temceo nining? Lakwena Paulo otito ni Temceo onongo tye ki niye matek calo mine. Temceo pe onongo niye man i yo me tango. En onongo oneno labol pa mine ci omoko tamme me lubone. I yo acel-lu, mege mapol i kare-ni gukonyo jo me odigi me tic pi Jehovah kun “pe giloko lok mo ki doggi.” (1 Pet. 3:1, 2) In bene itwero timo meno. I yo ma nining?

13. Pingo omyero mege guwek watgi ki Jehovah obed gin ma pire tek loyo?

¹³ Wek watti ki Jehovah obed gin ma pire tek loyo. (Nwo. 6:5, 6) Calo mege mapol, in bene ijalle i yo mapol. Ijalo cawani, cente, nino, ki jami mukene wek imi jami me kom ma mitte pi lutinoni. Ento pe myero ilung wi tutwal i cobo jami magi ma weko ijalo watti ki Jehovah woko. Kwany kare me lega, kwano Baibul piri keni, ki bedo tye i cokke ducu. Ka itimo meno, ci watti ki Jehovah bijing bedo matek dok ibiweko lanen maber pi jo me otti kacel ki jo mukene.

14-15. Gin ango ma ipwonyo ki i labol pa Leanne, Maria, ki João?

¹⁴ Kong wanenu labol pa lutino mogo ma gupwonnye me maro ki geno Jehovah ki i neno labol pa megigi. Laminwa Leanne, ma obedo latin kayo pa Christine owaco ni: “Onongo pe watwero kwano Baibul ka babawa tye gang. Ento mamawa onongo kare ducu cito i cokke. Kadi bed onongo watye ki ngec manok i kom Baibul, lanene okonyowa me dongo niye matek. Waniang woko ni Lucaden pa Jehovah gipwonyo ada mwaki mapol ma peya wacako cito i cokke.”

¹⁵ Laminwa Maria, ma onongo wonne i kine mukene yetogi dok goyogi pi cito i cokke, owaco ni: “Mamana tye i kin lumege ma cwinygi tek loyo ma angeyo. I kare ma onongo pud atidi, onongo akwero timo jami mogo pien alworo gin ma dano biwacone. Ento neno tekcwiny pa mamana ki kit ma en oketo Jehovah mukwongo i kwone okonya me loyo lworo man.” Omego João, ma wonne onongo pe ye ni gunyam lok mo keken i kom Jehovah nyo Baibul ki gang, owaco ni: “Nen calo gin ma okonya loyo obedo ni Mamana onongo tye atera me jalo jami ducu me yomo cwiny babana, mapat ki marre pi Jehovah.”

16. Lanen maber pa mege twero gudo jo mukene nining?

 ¹⁶ Wun mege, wiwu myero opo ni lanenwu gudo jo mukene. I yo ma nining? Nen kong kit ma lanen pa Yuneki ogudo kwede lakwena Paulo. En ocoyo ni niye pa Temceo ma goba pe iye-ni “okwongo bedo bot . . . Yuneki.” (2 Tem. 1:5) Awene ma Paulo oneno kwede niye pa Yuneki pi tyen mukwongo? Man nen calo otimme i wotte mukwongo macalo lamiconari i kare ma en orwatte ki Loi ki Yuneki i boma me Licitra, dok nen calo en okonyogi me doko Lukricitayo. (Tic 14:4-18) Tam kong: I kare ma Paulo ocoyo waraga bot Temceo mwaki 15 i ngeye, wiye onongo pud po i kom niye ma Yuneki onyuto dok otiyo kwede macalo labol ma myero me aluba! Nen ka maleng ni, labolle ocuko cwiny lakwena Paulo ki Lukricitayo mukene ma onongo gikwo i kare meno. Ka itye ka gwoko lutinoni keni nyo cwari pe obedo Lacaden, bed ki gen ni lanenni me niye cuko cwiny jo mukene.

17. Ngo ma myero itim ka nen calo latinni pe mito tic pi Jehovah kadi bed itute matek me pwonye?

¹⁷ Ento ket kong ni latinni pe tye ka jolo tuteni me pwonye ki lok ada. Wi myero opo ni pwonyo latin tero kare. Kit ma kinyuto kwede i cal-li, ka ipito kodi, i kare mogo itwero bedo ka paro ka ce kodi man bitwi ci nyako nyige. Kadi bed pe itwero moko ka ce ginapita man binyako  nyige, pud imedde ki onyo pii i tere wek obed ki kare me dongo maber. (Mar. 4:26-29) I yo acel-lu, mege i kare mukene gitwero paro ka ce tutegi me konyo lutinogi me maro Jehovah binyako nyige. Pe itwero doro tam ma lutinoni gimoko. Ento ka imedde ki timo jami ducu ma itwero me pwonyogi, ci ibimiyogi kare maber loyo me dongo i yo me cwiny.—Car. 22:6.

18. Jehovah twero konyo lutinoni nining me dongo i yo me cwiny?

¹⁸ Nicakke i kare macon, Jehovah okonyo jo matino mapol ata me doko lureme. (Jab. 22:9, 10) En bene twero konyo lutinoni me dongo i yo me cwiny ka meno aye mitigi. (1 Kor. 3:6, 7) Kadi bed lutinoni pe gitye ka woro Jehovah ki cwinygi ducu, en bimedde ki marogi. (Jab. 11:4) Ka gunyuto lanyut mo keken ma moko ni gimito tic pi Jehovah, en bibedo atera me konyogi me doko lureme. (Tic 13:48; 2 Tekwaro 16:9) En twero konyi me waco gin ma lutinoni mito winyone kikome dok i cawa mupore. (Car. 15:23) Nyo en romo tugo cwiny omego nyo lamego mo i kacokke me nyuto mar pi latinni. Kadi bed lutinoni dong gudongo woko, Jehovah twero poyo wigi i kom gin mo ma ipwonyogi i kare ma gitino. (Jon 14:26) Ka imedde ki pwonyo lutinoni ki lokki kacel ki lanenni maber, ci Jehovah bigoyo laane i komi.

19. Pingo itwero bedo ki gen ni itye ki cwak pa Jehovah?

¹⁹ Mar pa Jehovah piri pe jenge i kom tam ma lutinoni gimoko. En marri pien in imare. Ka in lamego ma itye ka yelle me gwoko lutinoni keni, Jehovah ocikke ni ebibedo Won lutinoni ki Lagwokwu. (Jab. 68:5) Pe itwero doro ka lutinoni gibiyero me tic pi Jehovah nyo pe. Ento ka imedde ki jenge i kom kony ma Jehovah miyo kun itiyo matek, ci ibinongo cwakke.