1-2. (a) Ise do si Eunike, jala aha do tantanganna? (b) Aha do na boi taparsiajari sian gambar sampul?

 DANG dipaboa di Bibel songon dia si Timoteus tardidi. Alai yakin do hita pasti las hian roha ni si Eunike tikki i. (Poda 23:25) Tikki tardidi si Timoteus, boi do tabayakkon bangga hian do ibana mangida anakna i tikki masuk tu aek. Di labbungna do si Lois omakna mandongani ibana. Tikki dibonompon si Timoteus, pasti las hian do rohana mangida i. Jala tikki diida ibana kaluar si Timoteus sian aek i sambil tersenyum, sappe tangis do ibana alani las ni rohana. Jadi marhasil do si Eunike on mangurupi si Timoteus makkaholongi Jahowa dohot Jesus Kristus, nang pe godang tantangan na diadopi ibana. Tantangan aha ma i?

² Dang sahaporseaon natua-tua ni si Timoteus. Bapakna halak Junani, omakna dohot oppungna halak Jahudi. (Ul. 16:1) Tikki remaja do si Timoteus gabe halak Kristen si Eunike dohot si Lois. Alai molo bapakna dang olo gabe halak Kristen. Ra nungnga cukkup umur be ibana lao mambahen keputusan. Na dia do pilliton ni si Timoteus? Mangihutton bapakna do? Manang mangihutton tradisi ni halak Jahudi na diajarhon tu ibana mulai sian na gelleng? Manang gabe halak Kristen do ibana?

3. Sesuai tu Poda 1:8, 9, songon dia do perasaan ni Jahowa mangida akka borua na mangurupi gellengna asa marale-ale tu Ibana?

³ Saonari pe, akka donganta borua naung margelleng dihaholongi do anakkonna. Diurupi nasida do anakkonna asa marale-ale tu Jahowa. Arga do di Jahowa upaya ni nasida i. (Jaha Poda 1:8, 9.) Buktina, godang do akka donganta borua na diurupi Jahowa asa marhasil mangajari anakkonna lao manomba Ibana.

4. Akka tantangan aha do na diadopi akka borua tikki mangajari gellengna?

 ⁴ Wajar do khawatir sahalak borua olo do gellengna manomba Jahowa manang na dang. Alana godang do tekanan na diadopi gellengna di portibi na dirajai Sibolis on. (1 Ptr. 5:8) Ubborat do muse situasi na diadopi akka donganta borua na so adong be suamina manang dang Saksi Jahowa suamina. Songon donganta si Christine. b Didok ibana, “Sabotulna burju do suamikku, jala holong hian do rohana tu hami. Alai dang lomo rohana molo huajarhon tu gellengnami taringot Jahowa. Saleleng martaon-taon, sai tangis do au mamikkiri i. Khawatir do au, olo do annon akka gellengkon manomba Jahowa manang na dang.”

5. Aha do na lao tabahas di artikel on?

⁵ Hamu akka dongan borua, boi do hamu marhasil songon si Eunike. Di artikel on, tabahas ma songon dia hamu maniru si Eunike mangajari anakkonna sian pakkataion dohot teladan. Tabahas ma muse songon dia cara ni Jahowa mangurupi hamu.

6. Sesuai tu 2 Timoteus 3:14, 15, songon dia do si Timoteus boi gabe halak Kristen?

⁶ Tikki gelleng dope si Timoteus, berupaya do omakna mangajarhon tu ibana “surat na badia”, songon na diattusi halak Jahudi. Tikki i, terbatas dope parbinotoan ni si Eunike, ai dang ditanda ibana dope Jesus Kristus. Alai parbinotoan na diajarhonna tu si Timoteus i mangurupi anakna i asa ummura gabe halak Kristen. Olo do si Timoteus gabe halak Kristen? Marhak do si Timoteus mambahen keputusan naeng gabe halak Kristen manang na dang. Alai berupaya do si Eunike mangurupi ibana. Gabe pos ma roha ni si Timoteus mangihutton ajaran ni Jesus. (Jaha 2 Timoteus 3:14, 15.) Tindakan ni si Eunike on sesuai do tu lapatan ni goarna, i ma “manaluhon”. Ai marhasil do ibana manaluhon akka tantanganna lao mangajari si Timoteus taringot Jahowa.

7. Songon dia do si Eunike mangurupi si Timoteus dukkon tardidi ibana?

⁷ Tikki tardidi si Timoteus, nungnga dibahen ibana keputusan na penting di ngoluna. Alai tong do khawatir si Eunike songon dia si Timoteus dukkon tardidi. Aha do na diutamahon si Timoteus di ngoluna? Mardongan do ibana annon dohot akka halak na mambahen pengaruh na so denggan tu ibana? Ditorusson si Timoteus do annon sikkolana tu Atena, jala gabe porsea tu ajaran ni akka halak na so mananda Debata? Habis do annon tikki dohot gogona ala naeng mamora? Dang boi si Eunike mambahen keputusan tu si Timoteus. Alai boi do diurupi ibana si Timoteus asa denggan mambahen keputusan. Berupaya do ibana mangurupi anakna i asa makkaholongi Jahowa jala mangargai pengorbanan na dibahen Jesus. Gabe tantangan do on tu akka natua-tua na pasanganna dang sahaporseaon. Alai natua-tua na rap manomba Jahowa pe, tong do ikkon berupaya mangurupi gellengna asa manomba Jahowa. Aha do na boi ditiru natua-tua sian si Eunike?

8. Molo Saksi Jahowa do suamimuna, aha do na porlu diulahon hamu?

⁸ Rap marsiajar Bibel ma hamu dohot gellengmuna. Hamu akka dongan borua, molo Saksi Jahowa do suamimuna  dukung hamu ma ibana lao mangajari gellengmuna, songon na dipangido Jahowa. Misalna, dukung ma pengaturan na dibahen suamimuna taringot ibadat keluarga. Hatahon ma na denggan taringot pengaturan i, jala pikkirhon ma aha na boi dibahen hamu asa dinikmati keluargamuna ibadat keluarga i. Molo direncanahon suamimuna mambahen sada proyek khusus, dukung ma ibana. Jala molo nga cukkup umur ni gellengmuna marsiajar sian bukku Mangolu Saleleng ni Lelengna, urupi ma suamimuna tikki manstudihon nasida.

9. Molo dang Saksi Jahowa suamimuna, songon dia Jahowa mangurupi hamu mangajari gellengmuna?

⁹ Adong do akka donganta borua na mamandu studi tu gellengna ala dang Saksi Jahowa suamina manang ala dang adong be suamina. Molo i do na masa tu hamu, unang pola khawatir hamu. Urupan ni Jahowa do hamu. Pakke hamu ma akka alat na diparade organisasi tikki studi dohot gellengmuna. Sukkun hamu ma muse akka natua-tua naung marpengalaman songon dia nasida mamakke akka alat i di ibadat keluarga ni nasida. c (Poda 11:14) Martangiang ma hamu tu Jahowa, jala pangido ma asa diurupi hamu mamakke sukkun-sukkun na pas lao mamboto na di bagasan roha ni gellengmuna. (Poda 20:5) Misalna sukkun-sukkun songon, ‘Aha do tantangan na diadopi ho di sikkola?’ boi do gabe dalanmuna makkata-hatai tu nasida.

10. Aha dope na boi diulahon hamu lao mangajari gellengmuna?

¹⁰ Manfaatton ma setiap kesempatan. Sering ma paboa hamu akka na denggan naung dilehon Jahowa tu hamu. (5 Mus. 6:6 7; Jes. 63:7) Porlu do on diulahon terutama molo dang leluasa hamu mangajari gellengmuna di jabu. Si Christine naung dipaboa nakkin mandok, “Dang leluasa au mangajari gellengku di jabu, jadi ikkon humanfaatton do setiap kesempatan na adong. Misalna molo mardalani hami manang lao marsolu, husempatton ma manceritahon taringot toppaan tu anakkokku. Jala molo nga cukkup umur ni gellengku, hujujui do nasida marsiajar Bibel sandiri.” Asing ni i, ikkon sai na denggan do dihatahon hamu taringot akka dongan sahaporseaon dohot organisasi ni Jahowa. Jala unang ma hatahon hamu na negatif taringot akka sintua. Molo sai na denggan do na dihatahon hamu, gabe olo ma gellengmuna mangido bantuan ni nasida.

11. Sesuai tu Jakobus 3:18, boasa ikkon berupaya hamu mambahen dame suasana di jabumuna?

¹¹ Bahen ma dame suasana di jabumuna. Jotjot ma patudu tu suamimuna dohot tu anakkonmuna na dihaholongi hamu nasida. Lambok ma hamu makkatai tu suamimuna, jala ajari ma anakkonmuna mangulahon na sarupa. Molo dibahen hamu songon i gabe dame ma suasana di jabumuna, jala ummura ma hamu mangajarhon taringot Jahowa tu gellengmuna. (Jaha Jakobus 3:18.) Taparrohahon ma jo pengalaman ni si Josep, sahalak perintis istimewa di Rumania. Tikki remaja ibana dang lomo roha ni bapakna molo marsiajar Bibel ibana, omakna, kakakna dohot adekna. Didok si Josep, “Sai berupaya do omakku mambahen dame suasana di jabunami. Molo kasar bapak, lambok do omak mangalusi. Jala molo diida  omak songon na maol hami mangoloi bapak, dibahas ibana ma rap dohot hami isi ni Epesus 6:1-3. Dung i dipaboa ibana ma tu hami akka sifat ni bapak na denggan. Jala diurupi ibana do hami mangattusi boasa ikkon huargai hami bapak. Sifat ni omak on ma na mambahen dame suasana di jabunami.”

12. Sesuai tu 2 Timoteus 1:5, aha do pengaruh ni teladan ni si Eunike tu si Timoteus?

¹² Jaha 2 Timoteus 1:5. Gabe teladan do si Eunike tu si Timoteus. Diajarhon ibana do tu si Timoteus, molo marhaporseaon hita ikkon tarida do i sian tindakanta. (Jak. 2:26) Sian teladan ni omakna, boi do diida si Timoteus massai holong rohana tu Jahowa. Takkas do diida ibana, las roha ni omakna ala melayani Jahowa. Aha do pengaruhna tu si Timoteus? Songon dipaboa si Paulus, si Timoteus pe massai togu do haporseaonna songon omakna. Boi pe songon i ala ditiru ibana do teladan ni omakna. Saonari pe, godang do donganta borua na marhasil mangurupi keluargana manomba Jahowa ‘so pola didok nasida manang aha’. (1 Ptr. 3:1, 2) Hamu pe boi do songon i. Songon dia carana?

13. Boasa ikkon diutamahon hamu hubunganmuna tu Jahowa?

¹³ Utamahon ma hubunganmuna tu Jahowa. (5 Mus. 6:5, 6) Pasti godang do pengorbanan na dibahen hamu lao mangurus gellengmuna. Godang do habis tikki, hepeng, waktu istirahatmuna, dohot na asing lao mangulahon i. Alai unang ma alani sibukna, sappe so adong be tikkimuna lao patoguhon hubunganmuna tu Jahowa. Bahen hamu ma jadwal asa boi hamu taratur martangiang secara pribadi, belajar pribadi, dohot marpungu. Molo dibahen hamu songon i, lam jonok ma hamu tu Jahowa. Jala gabe teladan ma hamu tu keluargamuna dohot tu akka dongan na asing.

14-15. Parsiajaran aha do na boi tadapot sian pengalaman ni si Lea, si Maria, dohot si John?

¹⁴ Taparrohahon ma pengalaman ni akka na poso na gabe sisomba Jahowa ala mangida teladan ni omakna. Boru ni si Christine na margoar si Lea mandok, “Dang boi hami marsiajar Bibel molo di jabu bapak. Jadi otik do na diboto hami taringot Bibel. Alai diida hami do teladan ni omak, sai ro do ibana marpungu. Gabe togu ma haporseaonnami tu Jahowa. Leleng andorang so marpungu pe hami, nga pos be rohanami on do hasittongan.”

¹⁵ Molo donganta si Maria, jotjot do dihukum bapakna nasida molo ro marpungu. Didok ibana, “Barani hian do omakkon. Tikki dakdanak au, olo do sipata mabiar au tu jolma. Alai molo huida habaranion ni omak, jala huida sai dibahen ibana Jahowa na paling penting di ngoluna, gabe boi ma au mangatasi biar ni rohakki.” Molo donganta si John, sogo do roha ni bapakna molo marsiajar Bibel nasida di jabu. Didok ibana, “Na paling berkesan di au sian omak, sai rade do ibana mengalah asa las roha ni bapak, saleleng dang maralo i tu lomo ni roha ni Jahowa.”

16. Aha do pengaruh ni teladanmuna tu dongan na asing?

¹⁶ Ingot ma, berpengaruh do tong teladanmuna i tu akka dongan na asing. Taida ma aha do pengaruh ni teladan ni si Eunike tu Apostel Paulus. Didok ibana, haporseaon naung dipatudu si Timoteus parjolo do dipatudu si Eunike.  (2 Tim. 1:5) Nandigan do diboto si Paulus na massai togu haporseaon ni si Eunike? Bisa jadi saleleng pardalanan utusan injilna na parjolo tu Listra. Disi ma parjolo sahali pajuppang si Paulus tu si Lois dohot tu si Eunike. Jala diurupi ibana do nasida gabe halak Kristen. (Ul. 14:4-18) Pikkirhon ma on: Tikki dibahen si Paulus suratna tu si Timoteus hira-hira 15 taon dukkon i, diingot ibana dope haporseaon ni si Eunike jala dibahen gabe sitiruon! Takkas ma, berkesan hian do teladan ni si Eunike i di si Paulus songon i nang di halak Kristen tikki i. Jadi hamu akka dongan borua, molo sahalakmuna do pagodang-godangkon gellengmuna manang dang Saksi Jahowa suamimuna, pos ma rohamuna gabe dipatogu do akka dongan na asing alani teladanmuna i.

17. Aha do na ikkon torus diulahon hamu molo diida hamu hira na so tertarik gellengmuna melayani Jahowa?

¹⁷ Songon dia do molo diida hamu hira na so tertarik gellengmuna melayani Jahowa? Ingot ma, porlu do godang tikki mangalatik dakdanak. Songon na dipatudu di gambar, molo disuan hamu sada bibit, porlu do godang tikki asa boi i tubu, lam balga, jala marparbue. Memang dang boi dipastihon hamu marparbue suan-suanan i. Alai molo torus disiram hamu i, gabe lam bagak ma partubuna. (Mrk. 4:26-29) Songon i ma tong, sipata khawatir do hamu dang boi diurupi hamu gellengmuna botul-botul makkaholongi Jahowa.  Jala memang ujungna ikkon nasida do na mambahen keputusan. Alai molo torus do dilatik hamu nasida, gabe lam balga ma kesempatan ni halak i boi marale-ale tu Jahowa.​—Poda 22:6.

18. Songon dia do Jahowa mangurupi gellengmuna asa jonok tu Ibana?

¹⁸ Sian najolo, godang do akka na poso na diurupi Jahowa asa jonok tu Ibana. (Ps. 22:9, 10) Jadi boi do tong diurupi Jahowa gellengmuna asa jonok tu Ibana, molo memang i pilihan ni nasida. (1 Kor. 3:6, 7) Nang pe hira na mandao nasida sian Jahowa, sai dihaholongi Jahowa do nasida. (Ps. 11:4) Tikki dipatudu nasida na lomo rohana mambahen las roha ni Jahowa, sai rade do Ibana mangurupi nasida. (Ul. 13:48; 2 Kron. 16:9) Boi do muse diurupi Jahowa hamu makkatahon na denggan di tikki na pas tu gellengmuna. (Poda 15:23) Manang boi do dipakke Ibana akka dongan di huria lao mangurupi nasida. Nang pe nga dewasa gellengmuna i, alai boi do diurupi Jahowa nasida mangingot akka na hea diajarhon hamu. (Joh. 14:26) Molo torus dilatik hamu gellengmuna sian pakkataion dohot sian teladanmuna, pasti pasu-pasuon ni Jahowa do hamu.

19. Aha do na ikkon torus diulahon hamu asa las roha ni Jahowa?

¹⁹ Toktong do dihaholongi Jahowa hamu dang soal pilihan aha na dibahen gellengmuna. Holong do rohana tu hamu ala holong rohamuna tu Ibana. Molo dang adong be suamimuna marjanji do Jahowa, Ibana ma na gabe Ama di gellengmuna jala Ibana ma na manjaga hamu. (Ps. 68:5) Anakkonmuna i do ujungna na ikkon mambahen keputusan melayani Jahowa manang na dang. Alai molo torus hamu mangandalhon Ibana jala diupayahon hamu mambahen na undenggan, pasti las do roha ni Jahowa tu hamu.