1-2. (1) ?Yunis hem i hu, mo wanem i mekem i had long hem blong i tijim boe blong hem blong i lavem Jehova mo Jisas? (2) Tokbaot pija long fran pej.

 NATING se Baebol i no tokbaot taem ya we Timoti i baptaes, be yumi save pijarem se long taem ya, mama blong Timoti, Yunis, i mas glad tumas. (Prov. 23:25) Traem tingbaot, maet hem i praod tumas taem hem i luk we Timoti i stanap insaed long wota. Hem i smael, mo bubu woman blong Timoti, Loes, i stanap klosap long hem mo i holem hem. Yunis i putum han blong hem long jes blong hem mo i pulum win sloslo taem Timoti i draon long wota. Taem Timoti i kamaot long wota hem i smael bigwan, mo mama blong hem i stat blong krae from we hem i glad tumas. Nating se i no isi, be Yunis i tijim boe blong hem blong i lavem Jehova mo Pikinini blong hem, Jisas Kraes. ?Wanem sam hadtaem we Yunis i winim taem hem i stap traem blong tijim boe blong hem?

² Perens blong Timoti i no gat sem relijen. Papa blong hem i wan man Gris, mo mama mo bubu woman blong hem tufala i woman Jiu. (Wok 16:1) I luk olsem se Timoti i wan yangfala taem Yunis mo Loes i kam Kristin. Be papa blong hem i no kam wan Kristin. ?Bambae Timoti i jusum weswan relijen? Hem i naf finis blong mekem prapa desisen blong hem. ?Bambae hem i jusum relijen blong papa blong hem? ?Bambae hem i folem kastom blong ol man Jiu we hem i lanem taem hem i smol? ?O bambae hem i kam wan disaepol blong Jisas Kraes?

3. Folem Ol Proveb 1:8, 9, ?wanem tingting blong Jehova long wok we ol mama oli mekem blong halpem pikinini blong i frengud wetem hem?

³ Ol Kristin mama tede tu oli lavem famle blong olgeta. Oli traehad blong halpem pikinini blong olgeta blong i lavem Jehova.  Mo Jehova i tinghae long traehad blong olgeta. (Ridim Ol Proveb 1:8, 9.) Jehova i halpem plante mama blong oli tijim ol pikinini blong olgeta blong oli lavem hem mo mekem wok blong hem.

4. ?Wanem ol hadtaem we ol mama oli stap fesem tede?

⁴ I nomol we samtaem wan mama i tingbaot sipos pikinini blong hem bambae i mekem wok blong Jehova olsem Timoti o nogat. Ol perens oli save se ol pikinini blong olgeta oli fesem plante had samting long wol ya blong Setan. (1 Pita 5:8) Mo tu, plante mama oli faenem i had blong tijim pikinini blong olgeta from we oli no gat hasban, o hasban blong olgeta i no stap long trutok. Eksampol, wan sista nem blong hem Christine b i talem se: “Hasban blong mi i wan gudfala man mo i lukaot gud long famle, be hem i no wantem se mi tijim ol pikinini blong mitufala blong oli kam ol Witnes blong Jehova. Long ol yia we i pas, mi krae plante mo mi stap tingbaot sipos ol pikinini blong mi bambae oli wosipim Jehova o nogat.”

5. ?Bambae yumi tokbaot wanem long stadi ya?

⁵ Sipos yu yu wan Kristin mama, yu save halpem pikinini blong yu blong i lavem Jehova mo i mekem wok blong hem, olsem we Yunis i mekem. Long stadi ya, bambae yumi tokbaot olsem wanem yu save folem eksampol blong Yunis mo tijim pikinini blong yu tru long samting we yu talem mo mekem. Mo tu bambae yumi luk olsem wanem Jehova i save halpem yu.

6. Folem 2 Timoti 3:14, 15, ?olsem wanem Timoti i kam wan Kristin?

⁶ Taem Timoti i wan smol boe, mama blong hem i mekem bes blong hem blong tijim hem long ol “tabu tok blong Baebol” we ol man Jiu oli kasemsave long hem. I tru we save blong mama blong hem i smol from we hem i no save nating Jisas Kraes. Be yet hem i tijim Timoti long samting we hem i nidim blong save, blong halpem hem blong i kam wan Kristin. ?Olsem wanem? ?Timoti i kam wan Kristin? Timoti i save jusum sipos hem i wantem kam wan Kristin o nogat. I sua se Timoti i save trutok long saed blong Jisas mo i “bilif long olgeta se oli tru,” from we mama blong hem tu i traehad blong tijim hem. (Ridim 2 Timoti 3:14, 15.) Yunis i glad tumas se hem i tijim Timoti blong i save Jehova nating se i no isi. Nem ya Yunis i kamaot long wan tok we i minim “winim,” mo hemia nao samting we Yunis i mekem. Hem i winim ol hadtaem we hem i fesem blong i save tijim Timoti blong i lavem Jehova mo i mekem wok blong hem.

7. ?Olsem wanem Yunis i halpem Timoti blong i gohed gud afta we hem i baptaes?

⁷ Taem Timoti i baptaes, hem i kasem wan impoten mak long laef blong hem, be Yunis i wari yet from hem. ?Boe blong hem bambae i mekem wanem long ful laef blong hem? ?Bambae hem i joen wetem ol man we oli save spolem ol gudfala fasin blong hem? ?Bambae hem i go skul long Atens mo akseptem tijim blong ol hiten man? ?Bambae hem i westem taem, paoa, mo yang taem blong hem blong kam rij? Yunis i no save mekem ol desisen blong Timoti, be yet hem i save halpem Timoti blong i mekem ol waes desisen. ?Olsem wanem blong mekem? Hem i gohed blong tijim Timoti blong i lavem Jehova mo glad long evri samting we Jehova mo Jisas i mekem long olgeta. I no ol perens nomo we hasban o waef blong olgeta i no stap long trutok, we oli stap fesem hadtaem blong tijim ol pikinini blong olgeta blong lavem Jehova. Iven ol perens we hasban o waef blong olgeta i stap trutok oli faenem i had tu blong mekem  samting ya. ?Ol perens oli save lanem wanem long eksampol blong Yunis?

8. ?Olsem wanem wan mama i save halpem hasban blong hem we i stap long trutok blong tijim ol pikinini long saed blong Jehova?

⁸ Stadi Baebol wetem ol pikinini blong yu. Ol sista, sipos hasban blong yufala i stap long trutok, Jehova i wantem se yufala i halpem hem blong tijim ol pikinini blong yufala long saed blong spirit. Wan rod blong mekem olsem, hemia taem yu gohed blong sapotem gud plan blong famle wosip. Talem ol gudfala samting long saed blong famle wosip, mo tingbaot samting we yu save mekem blong halpem evriwan blong oli glad long taem ya. Maet yu save halpem hasban blong yu blong i mekem plan blong wan Baebol stadi projek. Mo tu, sipos yu luk se buk ya !Enjoem Laef olwe! bambae i givhan long sam pikinini blong yu, i gud yu wok wetem hasban blong yu blong stadi wetem olgeta long buk ya.

9. ?Wan mama we hasban blong hem i no stap long trutok i save mekem wanem blong tijim pikinini blong hem?

⁹ Sam mama oli mas tekem lid blong stadi Baebol wetem pikinini blong olgeta maet from we oli no gat hasban, o hasban blong olgeta i no stap trutok. Sipos hemia nao situesen blong famle blong yu, yu no mas wari tumas. Jehova bambae i halpem yu. Yusum gud ol tul we oganaesesen i givim blong stadi wetem pikinini blong yu. Yu save askem ol perens we oli gat ekspiriens blong oli tokbaot olsem wanem oli yusum ol tul ya taem oli mekem famle wosip. c (Prov. 11:14) Mo tu, yu save prea long Jehova mo askem hem blong i halpem yu blong askem ol kwestin we i stret, blong faenemaot ol tingting mo filing blong pikinini blong yu. (Prov. 20:5) Wan simpol kwestin olsem, ‘?Wanem wan bigfala traem we yu fesem long skul?’ i save statem wan storian we bambae i halpem yu blong faenemaot plante samting.

10. ?Yu save mekem wanem moa blong halpem pikinini blong i lanem samting long saed blong Jehova?

¹⁰ Lukaot ol defren rod blong tijim pikinini blong yu long saed blong Jehova. Tokbaot Jehova mo ol gudfala samting we hem i bin mekem long yu. (Dut. 6:6, 7; Aes. 63:7) I impoten blong mekem samting ya speseli sipos yu no save stadi oltaem wetem pikinini blong yu long haos. Christine we yumi tokbaot hem finis i talem se: “From we mi gat smol janis nomo blong tokbaot Jehova long ol pikinini blong mi, mi yusum gud evri janis we mi gat blong tokbaot Jehova long olgeta. Samtaem mifala i go wokbaot o pul long kenu i go longwe long so blong tokbaot ol naesfala kriesen blong Jehova, mo ol samting we i save halpem olgeta blong oli kam fren blong Jehova. Taem oli kam bigwan, mi enkarejem olgeta blong stadi Baebol olgeta wan.” Mo tu, i gud yu tokbaot ol gudfala samting long saed blong oganaesesen blong Jehova mo ol brata sista. Yu no mas tok nogud long saed blong ol elda, from sipos yu mekem olsem, bambae i had blong ol pikinini oli go luk ol elda taem oli nidim help.

11. Folem Jemes 3:18, ?from wanem i impoten blong holemtaet pis long haos?

¹¹ Holemtaet pis long haos. Gohed blong soemaot long hasban mo ol pikinini blong yu se yu lavem olgeta. Soem respek mo kaen fasin taem yu tokbaot hasban blong yu, mo trenem ol pikinini blong oli mekem sem mak. Taem yu mekem olsem, bambae i isi moa blong ol pikinini oli lanem samting long saed blong Jehova. (Ridim Jemes 3:18.) Tingbaot eksampol blong Jozsef we i mekem wok blong spesel paenia long Romania. Taem hem i gruap, papa blong hem i mekem i strong long hem, long mama blong hem mo ol brata  mo sista blong hem blong oli no mekem wok blong Jehova. Jozsef i talem se: “Mama blong mi i traehad blong mekem se i gat pis long haos. Taem papa blong mi i mekem i strong moa, mama blong mi i gohed blong soem kaen fasin. Taem hem i luk se i had blong mifala i respektem mo obei long papa blong mifala, hem i tokbaot Efesas 6:1-3 wetem mifala. Biaen hem i tokbaot ol gudfala fasin blong papa mo i halpem mifala blong luk from wanem mifala i mas glad long hem. Mo hemia i halpem famle blong mifala blong i gat pis.”

12. Folem 2 Timoti 1:5, ?olsem wanem eksampol blong Yunis i halpem Timoti?

¹² Ridim 2 Timoti 1:5. Yunis i soem gudfala eksampol long Timoti. I sua se hem i tijim Timoti se taem yumi gat trufala bilif, yumi soemaot samting ya long ol aksen blong yumi. (Jem. 2:26) Timoti i luksave se aksen blong mama blong hem i pruvum se hem i gat bigfala lav long Jehova. Mo tu hem i luksave se taem mama blong hem i mekem wok blong Jehova, hem i kasem trufala glad. ?Eksampol blong Yunis i givhan olsem wanem long Timoti? Aposol Pol i talem se Timoti i gat sem fasin blong bilif olsem mama blong hem. Yes, hemia from we Timoti i luk gudfala eksampol blong mama blong hem mo i folem. Long sem fasin, tede plante mama oli halpem famle blong olgeta blong oli wosipim Jehova, “nomata se oli no talem wan samting.” (1 Pita 3:1, 2) Yu tu yu save mekem sem mak. ?Olsem wanem blong mekem?

13. ?From wanem wan mama i mas putum frensip blong hem wetem Jehova fasples?

¹³ Putum frensip blong yu wetem Jehova fasples. (Dut. 6:5, 6) Olsem plante narafala mama, yu yu mekem plante sakrefaes. Yu yusum taem, mane mo ol narafala samting blong lukaot long nid blong pikinini blong yu long saed blong bodi, mo samtaem yu no slip gud long naet. Be i nogud yu bisi tumas long ol samting ya, nao yu no gat taem blong mekem frensip blong yu wetem Jehova i kam strong moa. Gohed blong makemaot taem blong prea yu wan, stadi Baebol, mo go long ol miting. Taem yu mekem olsem, bambae yu kam klosap moa long Jehova mo yu soem gudfala eksampol long famle blong yu mo long ol narafala.

14-15. ?Yu yu lanem wanem long eksampol blong Leanne, Maria, mo João?

¹⁴ Traem luk eksampol blong sam yangfala we oli lanem blong lavem mo trastem Jehova, taem oli luk eksampol blong mama blong olgeta. Leanne we i bigfala gel blong Christine, i talem se: “Mifala i no save stadi Baebol taem papa i stap long haos. Be oltaem mama i go long ol miting. Nating se mifala i no gat plante save long Baebol, be ol samting we mama i mekem i halpem mifala blong gat strong bilif. Fastaem mifala i neva go long ol miting, be mifala i save se ol Witnes blong Jehova oli tijim trutok.”

¹⁵ Maria, we samtaem papa blong olgeta i stap panisim olgeta taem oli go long miting, i talem se: “Mama i wan sista we i gat strong tingting. Taem mi pikinini, samtaem mi fraet blong mekem sam samting from mi fraet long samting we ol narafala bambae oli talem. Be taem mi luk we mama i gat strong tingting mo oltaem i putum Jehova fasples, hemia i halpem mi blong mi winim fasin ya blong fraet long man.” João, we papa blong hem i blokem olgeta blong no tokbaot Jehova o Baebol long haos, i talem se: “Samting we i leftemap tingting blong mi, hemia se mama i neva lego lav we hem i gat long Jehova, nating se hem i rere blong lego eni nara samting blong mekem papa i glad.”

16. ?Olsem wanem eksampol blong wan mama i save gat paoa long ol narafala?

 ¹⁶ Ol mama, tingbaot se eksampol blong yufala i save gat paoa long ol narafala. ?Olsem wanem? Tingbaot olsem wanem eksampol blong Yunis i givhan long aposol Pol. Hem i luksave se bilif blong Timoti we i no giaman, i ‘folem fasin blong bilif blong Yunis.’ (2 Tim. 1:5) ?Wetaem Pol i stat blong makem bilif blong Yunis? I luk olsem se hemia long faswan misinari trip blong hem, taem hem i mitim Yunis mo Loes long Listra, mo maet hem i halpem olgeta blong oli kam ol Kristin. (Wok 14:4-18) Traem tingbaot, 15 yia biaen, taem Pol i raetem Leta long Timoti, hem i gohed yet blong tingbaot bilif blong Yunis mo i tokbaot hem olsem wan eksampol blong folem. I klia se eksampol blong hem i rili leftemap tingting blong Pol mo ol narafala Kristin we oli laef long taem ya. Sipos yu yu wan mama we yu no gat hasban o hasban blong yu i no stap long trutok, yu mas tingbaot se gudfala eksampol blong yu i save givhan long ol narafala blong oli kam strong long saed blong spirit mo wosipim Jehova.

17. ?Yu mas mekem wanem sipos pikinini blong yu i no wantem folem ol samting we yu tijim long hem?

¹⁷ ?Olsem wanem sipos pikinini blong yu i no folem ol samting we yu tijim long hem? Yu mas tingbaot se i tekem taem blong trenem wan pikinini. Olsem we pija i soem, taem yu planem wan sid maet samtaem yu stap tingbaot se bambae i gru mo karem kakae o nogat. Nating sipos yu no sua se bambae i karem kakae  o no, be yu gohed blong wotarem blong mekem se tri ya i save gru gud. (Mak 4:26-29) Long sem fasin, maet samtaem wan mama i save gat tingting se traehad we hem i mekem bambae i halpem pikinini blong i lavem Jehova o nogat. Yu no save kontrolem ol desisen blong pikinini blong yu. Be sipos yu gohed blong mekem bes blong yu blong trenem olgeta, yu stap givim janis long olgeta blong oli kam fren blong Jehova.—Prov. 22:6.

18. ?Olsem wanem Jehova i save halpem pikinini blong yu blong i kam fren blong hem?

¹⁸ Stat longtaem bifo kam kasem tede, Jehova i halpem plante yangfala blong oli kam fren blong hem. (Sam 22:9, 10) Mo hem i save halpem ol pikinini blong yu tu blong oli fren wetem hem, sipos olgeta oli wantem. (1 Kor. 3:6, 7) Sipos ol pikinini blong yu oli no mekem wok blong Jehova wetem fulhat blong olgeta, be Jehova bambae i gohed blong lavem olgeta. (Sam 11:4) Taem oli soem se oli wantem mekem Jehova i glad, bambae hem i rere blong halpem olgeta blong oli kam fren blong hem. (Wok 13:48; 2 Kron. 16:9) Mo maet bambae hem i halpem yu blong talem ol toktok we ol pikinini blong yu oli nidim blong harem long stret taem. (Prov. 15:23) O maet hem i yusum wan brata o sista long kongregesen blong soem intres long olgeta. Nating sipos ol pikinini blong yu oli kam bigman finis, Jehova i save mekem oli tingbaot bakegen ol samting we yu tijim olgeta long hem bifo. (Jon 14:26) Taem yu gohed blong trenem pikinini blong yu tru long samting we yu talem mo mekem, Jehova bambae i blesem yu.

19. ?From wanem yu save sua se Jehova i glad long yu?

¹⁹ Lav we Jehova i gat long yu i no dipen long ol desisen we ol pikinini blong yu oli mekem. Hem i lavem yu from we yu yu lavem hem. Sipos yu yu wan singel mama, Jehova i promes se bambae hem i stap olsem Papa blong ol pikinini blong yu mo bambae hem i protektem yu. (Sam 68:5) Yu no save kontrolem ol pikinini blong yu se bambae oli wosipim Jehova o nogat. Be sipos yu gohed blong trastem Jehova mo yu mekem bes blong yu, Jehova bambae i glad long yu.