1-2. (a) Ise kin Enike, ras kai tentangen si adapina selaku sekalak pernanden? (b) Komentarilah gambar sampul.

 AMIN PE la lit ijelasken bas Pustaka kerna Timotius sanga ia iperidiken, tapi banci sibayangken uga riahna ukur mamakna, Enike, paksa si e. (Kua. 23:25) Banci sibayangken, tatap Enike Timotius si sangana cinder i lau guna iperidiken. Bangga kel ia. Cirem ia janah Lois, nini Timotius, cinder i deherna. Tahan Enike kesahna sanga Timotius imasukken ku lau. Sanga Timotius ndarat arah lau nari, cirem kel Enike janah mulai ia tangis ban riahna ukurna. Enggo berhasil Enike ngajari anakna guna engkelengi Jahwe ras Jesus Kristus amin pe iadapina tentangen. Kai saja tentangen si adapi Enike seh ngasa anakna iperidiken?

² Orang tua Timotius beda agamana. Bapakna kalak Junani janah mamakna ras ninina kalak Jahudi. (Perb. 16:1) Banci saja Timotius enggo remaja sanga Enike ras Lois jadi kalak Kristen. Tapi bapakna la nggit jadi kalak Kristen. Agama si apai nge si ipilih Timotius? Banci saja Timotius enggo cukup umur guna erban keputusen. Agama bapakna nge si ipilihna? Ikutkenna nge kebiasan kalak Jahudi si enggo pelajarina mulai kitik-kitikna nari? Ntah nggit ia jadi pengikut Jesus Kristus?

3. Menurut Kuan-kuanen 1:8, 9, uga nge perukuren Jahwe ngidah usaha pernanden bas nampati anakna gelah jadi teman Dibata?

³ Pernanden si lit bas runggun pe keleng atena keluargana. Isampatina atena anak-anakna gelah rembak ras Jahwe, janah e me si pentingna akap kalak e. Iergai Dibatata kel si ilakoken kalak e. (Baca Kuan-kuanen 1:8, 9.) Perban isampati Jahwe, enggo enterem pernanden  si berhasil ngajari anakna guna engkelengi ras nembah Jahwe.

4. Kai saja tentangen si iadapi pernanden gundari?

⁴ Wajar nge adi mon-mon sekalak pernanden kuatir ia, ilayani anakna nge pagi Jahwe bagi Timotius ntah lang. Itehna ka maka mbue kel tentangen si adapi anak-anakna arah doni si ikuasai Setan enda. (1 Pet. 5:8) Selain si e, enterem pernanden si ngadapi tentangen bas mpebelin anak-anakna perban la lit dilakina, ntah pe perban dilakina la ngelayani Jahwe. Contohna eme turang seninata si gelarna Christine. b Bagenda nina, “Dilakiku mehuli man anakna janah keleng atena keluargana. Tapi la iberena kupebelin anak-anak kami gelah banci jadi Saksi Jahwe. Piga-piga tahun dekahna, rusur aku tangis, kuatir aku banci ntah lang sembah anakku pagi Jahwe.”

5. Kai kari sibahas bas artikel enda?

⁵ Kam pernanden, banci sampatindu anak-anakndu gelah engkelengi Jahwe ras ngelayani Ia, bali bagi si ilakoken Enike. Bas artikel enda, sibahas kari uga kam banci ngusih Enike bas ngajari anakndu arah ranan ras perbahanenndu. Sibahas ka kari uga Jahwe nampati kam.

6. Bagi si itulis bas 2 Timotius 3:14, 15, kai si erban Timotius banci jadi kalak Kristen?

⁶ Sanga Timotius kitik denga, iajari mamakna ia kerna “Kitap si Badia,” sesuai ras kai si enggo iteh kalak Jahudi. Memang, pemeteh mamakna sitik denga perban la tehna kerna Jesus Kristus. Tapi kai si ipelajari Timotius arah Kitap si Badia banci nampati ia jadi kalak Kristen. Jadi kalak Kristen nge dungna Timotius? Timotius ngenca si banci erban keputusen e. Dungna tek Timotius man kebenaren kerna Jesus, pasti lit ka nge penampat mamakna i je. (Baca 2 Timotius 3:14, 15.) Meriah kel ukur Enike perban banci ajarina anakna kerna Jahwe amin pe lit tentangen. Enike nggeluh sesuai ras gelarna si ibuat arah kata si ertina “si naluken.” Cocok kel gelarna e perban berhasil ia naluken tentangen sanga nampati Timotius jadi kalak Kristen.

7. Uga cara Enike nampati anakna terus maju secara rohani kenca iperidiken?

⁷ Sanga Timotius iperidiken, enggo ibanna sada keputusen si penting bas geluhna. Amin pe ia enggo iperidiken, tapi lit denga si ikuatirken Enike. Banci saja tersungkun-sungkun ia, ‘Uga nge pagi cara Timotius ndalani geluhna? Erteman nge pagi ia ras kalak si la mehuli? Sekolah nge pagi ia ku Aten janah dungna tek ia nandangi ajaren si salah si lit i je? Igunakenna nge pagi waktuna, gegehna, ras masa mudana guna erdahin gelah banci bayak?’ Memang la banci Enike si erban keputusen man Timotius, tapi banci sampatina Timotius guna erban keputusen si mehuli. Uga carana? Banci terus ia kerja keras guna nampati anakna engkelengi Jahwe ras ngergai kerina si enggo ilakoken Jahwe ras Jesus man keluargana. Tentangen si bage labo saja iadapi orang tua si sekalak ngenca ia ngelayani Jahwe. Orang tua si duana ngelayani Jahwe pe mesera nge akapna nampati anakna gelah tetap setia ngelayani Jahwe. Kai si banci ipelajari orang tua arah usihen Enike?

8. Uga pernanden banci nampati dilakina ngajari anakna kerna Jahwe?

 ⁸ Ajarkenlah Pustaka man anakndu. Adi dilakindu Saksi Jahwe, ate Jahwe sampatindu min dilakindu e ngajari anak kena kerna Jahwe. Salah sada si banci ilakokenndu eme dukunglah lalap Ibadah Keluarga kena. Ula pandangindu ibadah keluarga kena janah ukurilah kai si banci lakokenndu gelah meriah akap kena ngelakoken ibadah keluarga. Banci ka sampatindu dilakindu erban proyek si khusus guna erlajar Pustaka. Selain si e, adi anakndu enggo cukup umur erlajar make buku Ermeriah Ukur Seh Rasa Lalap!, banci ka sampatindu dilakindu nikapken kai si iperluken.

9. Adi lit pernanden si dilakina la Saksi Jahwe, penampat kai si banci idatna guna ngajari anakna?

⁹ Lit pernanden si lanai lit dilakina ntah pe dilakina la Saksi Jahwe. Emaka arus ia si ngajari anakna kerna Pustaka. Adi bage keadanndu, ula kam kuatirsa, pasti sampati Jahwe kam. Pakelah alat-alat pengajaren si enggo isikapken organisasi Jahwe guna ngajari anak-anakndu. Banci ka sungkunndu orang tua si erpengalamen si lit bas runggun kerna uga cara kalak e nggunaken alat-alat pengajaren sanga ibadah keluarga. c (Kua. 11:14) Banci ka kam ertoto man Jahwe gelah sampatiNa kam nggunaken penungkunen si cocok guna meteh kai si ukuri anakndu ras uga perasanna. (Kua. 20:5) Banci sungkunndu ia, ‘Masalah kai nge kapndu si mberatna bas sekolahndu, Nakku?’ Sada penungkunen e banci erban reh buena si tehndu kerna anakndu.

10. Kai cara si deban si banci lakokenndu bas nampati anakndu erlajar kerna Jahwe?

¹⁰ Daramilah cara si deban guna ngajari anakndu kerna Jahwe. Rusurlah cakapken man anakndu kerna Jahwe ras kerina si mehuli si enggo ilakokenNa man bandu. (Ul. 6:6, 7; Jes. 63:7) Enda penting terlebih adi la banci ratur ajarindu anakndu kerna Pustaka i rumah. Bagenda nina Christine si ituriken ndai, “La mbue kesempatenku ngajari anakku kerna Jahwe. Emaka kugunaken tiap lit kesempaten. Erdalan kami ras-ras ntah pe naik perahu ku tengah danau guna ncakapken kerna ciptan Jahwe si luar biasa bage pe kerna kai si banci nampati kalak e gelah rembak ras Jahwe. Sanga anakku enggo reh galangna, kusuruh kalak e erlajar Pustaka secara pribadi.” Selain si e, cakapkenlah kai si mehuli kerna organisasi Jahwe bage pe kerna turang seninandu. Ula pandangindu pertua-pertua. Alu bage, sanga anak-anakndu perlu penampat, nggit kalak e njumpai pertua-pertua.

11. Bagi si ikataken bas Jakup 3:18, engkai maka perlu erban dame bas rumah?

¹¹ Usahakenlah erban dame bas rumah. Rusurlah buktiken kekelengenndu man dilakindu ras anak-anakndu. Sanga ceritakenndu kerna dilakindu, banlah teridah maka ergaindu ia janah ajarilah anak-anakndu gelah kalak e pe bage. Adi lakokenndu e, dame me bas rumahndu ras reh nukahna akap anakndu erlajar kerna Jahwe. (Baca Jakup 3:18.) Cuba perdiateken pengalamen Josef si ngelayani jadi perintis istimewa bas Romania. Sanga kitik denga ia, nentang kel bapakna.  Emaka mesera akap Josef, mamakna, kakakna, ras duana adekna guna ngelayani Jahwe. Bagenda nina Josef, “Usahaken mamak kel erban dame bas rumah. Amin pe la mehuli perbahanen bapak, tapi mamak tetap mehuli man bana. Sanga idah mamak mesera kap kami ngergai bapak ras patuh man bana, bahasna Epesus 6:1-3 ras kami. Kenca si e, ceritakenna kerna sipat-sipat bapak si mehuli gelah reh kelengna ate kami bapak ras ergai kami ia. Bage me si rusur ilakoken mamak gelah dame bas rumah kami.”

12. Bagi si ikataken bas 2 Timotius 1:5, kai pengaruh usihen Enike man anakna Timotius?

¹² Baca 2 Timotius 1:5. Enike eme usihen si mehuli man Timotius. Ajarina Timotius maka kiniteken situhu-tuhu teridah arah perbahanen. (Jak. 2:26) Arah perbahanen Enike, pasti idah Timotius maka keleng ate mamakna Jahwe. Pasti idahna ka maka ngelayani Jahwe erban meriah ukur mamakna. Kai pengaruh usihen mamakna man Timotius? Bagi si ikataken Paulus, kiniteken Timotius paguh bali bagi mamakna. Kinitekenna e pasti labo rempet paguh. Enda perban idahna kai si ilakoken mamakna janah nggit ia ngusihsa. Bage ka pe gundari, enterem pernanden si berhasil nampati keluargana nembah Jahwe amin pe ‘la kalak e ngerana sitik pe.’ (1 Pet. 3:1, 2) Kam pe banci bage. Uga carana?

13. Engkai maka arus utamaken pernanden hubungenna ras Jahwe?

¹³ Banlah hubungenndu ras Jahwe jadi si pentingna bas geluhndu. (Ul. 6:5, 6) Bali bagi si biasa ilakoken pernanden, enggo melala pengorbanen si ibanndu. Korbankenndu waktundu, senndu, perpedemndu, bage pe si debanna guna ngurus anakndu. Tapi ula min perban sibuksa kam, korbankenndu hubungenndu ras Jahwe. Raturlah kam ertoto, erlajar Pustaka, bage pe perpulungen. Alu bage, reh paguhna hubungenndu ras Jahwe janah banndu usihen man keluargandu bage pe man kalak si deban.

14-15. Pelajaren kai si banci sidat arah pengalamen Lea, Maria, ras Jovan?

¹⁴ Melala anak muda si engkelengi Jahwe ras tek man baNa perban usihna mamakna. Salah sada contohna eme Lea, anak Christine. Bagenda nina, “La kami banci erlajar Pustaka adi i rumah bapak. Amin pe bage, mamak reh lalap ku perpulungen. Emaka, amin pe labo melala si teh kami kerna Pustaka, perbahanen mamak erban paguh kiniteken kami. Lenga pe kami reh ku perpulungen, enggo teh kami maka si ajarken Saksi Jahwe e kebenaren.”

¹⁵ Contoh si debanna eme Maria. Mbarenda, mon-mon ihukum bapakna keluarga kalak e adi reh kalak e ku perpulungen. Nina Maria, “Adi kuakap, mamakku me salah sada diberu si perpangna. Sanga aku kitik denga, mon-mon la aku nggit ngelakoken sada hal perban mbiar aku uga kari ning kalak. Tapi perban kuidah mamakku pang, janah lalap banna Jahwe si pentingna bas geluhna, dungna lanai aku mbiarsa man kalak.” Jovan pe pernah itentang bapakna. Mbarenda ilarang bapakna keluarga kalak e mbahas kerna Jahwe bage pe Pustaka i rumah. Bagenda nina Jovan, “Si kenana kel kuakap ku pusuhku eme sanga kuidah maka kai pe ilakoken mamakku  gelah meriah ukur bapakku, adi e la ngorbanken kekelengenna man Jahwe.”

16. Kai pengaruh usihen pernanden man kalak si deban?

¹⁶ Kam pernanden, ingetlah maka usihenndu lit pengaruhna man kalak si deban. Engkai maka bage? Cuba ukuri pengaruh usihen Enike man Rasul Paulus. Ikataken Paulus maka kiniteken Timotius si la munapik ‘tangtangna lit bas mamakna Enike.’ (2 Tim. 1:5) Ndigan nge tangtangna idah Paulus kiniteken Enike? Banci saja bas perdalanen utusen injilna si pertama. Banci saja paksa si e me jumpa ia ras Lois bage pe Enike i Listera janah sampatina kalak e jadi kalak Kristen. (Perb. 14:4-18) Cuba siukuri: Kira-kira 15 tahun kenca si e, itulis Paulus surat man Timotius janah inget Paulus denga perbahanen Enike si dem kiniteken. Banna ka Enike jadi contoh si man usihen. Jelas me, usihen Enike tuhu-tuhu mpegegehi Rasul Paulus bage pe kalak Kristen paksa si e. Adi sisada kam mpebelin anakndu, ntah pe teman geluhndu la saksi Jahwe, teklah kam maka usihenndu pe banci mpegegehi ras ngiahken kalak si lit i sekelilingndu.

17. Kai si perlu ingetndu adi anakndu tempa-tempa la nggit ngelayani Jahwe amin pe enggo usahakenndu ngajari ia?

¹⁷ Uga adi anakndu tempa-tempa la nggit ngelayani Jahwe amin pe enggo usahakenndu ngajarisa? Ingetlah maka  ngajari anak-anak perlu waktu. Bagi si lit bas gambar, sanga suanndu sada benih, banci saja mon-mon kuatir kam banci ntah lang kari benih e erbuah. Amin pe la lit jaminenna benih e pasti erbuah, tetap siramndu gelah mejile perturahna. (Mrk. 4:26-29) Bage ka pe, selaku pernanden, banci saja kuatir kam berhasil nge kari kam ngajari anakndu engkelengi Jahwe ntah lang. Memang labo kam si nentuken keputusen anakndu. Tapi adi terus usahakenndu asa ngasupndu ngajari kalak e, reh belinna kesempaten kalak e jadi teman Jahwe.​—Kua. 22:6.

18. Uga Jahwe nampati anakndu gelah banci jadi umatNa?

¹⁸ Mulai bas jaman Pustaka nari, enggo enterem kalak si nguda denga si isampati Jahwe jadi temanNa. (Ms. 22:9, 10) Anakndu pe pasti isampatiNa jadi temanNa, adi nggit kalak e. (1 Kor. 3:6, 7) Amin pe tempa-tempa la bulat ukur anakndu ngelayani Jahwe, tetap keleng ate Jahwe man kalak e. (Ms. 11:4) Adi lit sitik saja pe teridah ‘pusuh ras perbahanen kalak e ngaloken kebenaren,’ nggit Jahwe nampati kalak e jadi temanNa. (Perb. 13:48; 2 Kro. 16:9) Kam pe banci isampati Jahwe ngataken kai si cocok pas bas waktu sanga perlu kel anakndu megi si e. (Kua. 15:23) Ntah, banci saja iahken Jahwe sekalak turang senina bas runggun mperdiateken ras nampati anak-anakndu. Enggo pe anakndu dewasa, banci sampati Jahwe gelah inget kalak e kai si ajarkenndu mbarenda. (Joh. 14:26) Adi terus usahakenndu ngajari anakndu arah ranan ras perbahanen, pasti kam ipasu-pasu Jahwe.

19. Engkai banci kam tek maka meriah ukur Jahwe ngidah kam?

¹⁹ La soal kai keputusen anakndu, kekelengen Jahwe man bandu labo pernah berubah. Keleng ate Jahwe kam perban keleng atendu Ia. Adi sisada kam mpebelin anakndu, erjanji Jahwe jadi Bapak man anakndu ras jadi Si Ngelindungi kam. (Ms. 68:5) Memang labo banci ipaksandu anakndu erban keputusen si tepat. Tapi, adi lalap andalkenndu penampat Jahwe janah lakokenndu si mehulina, meriah ukur Jahwe ngidah kam.