1-2. (a) Hoo da-mi Yoonis, ahn weh mi mek it haad fi mek shee teech ih son bowt Jehoava ahn Jeezas? (b) Koment pahn di picha pahn di kova.

 EEVN doa di Baibl noh taak bowt Timoti baptizm, ih noh haad fi imajin how hapi ih ma mi hapi da day. (Prov. 23:25) Jos imajin how prowd Yoonis mi feel az ih mi-di wach Timoti di stan op eena di waata. Shee praabli mi-di smail az Lois, Timoti grani, hog ahn, an dehn si Timoti di geh baptaiz. Imajin how Yoonis mi feel wen ih si Timoti gaahn dong eena di waata ahn kom op bak wid wahn big smail pan ih fays. Yoonis mosi mi krai anaal bikaaz ih mi soh hapi. Eevn doa ih neva eezi fi Yoonis, shee mi stil geh fi teech ih son fi lov Jehoava ahn fi hihn Son, Jeezas Krais. Wat da sohn chalenj weh shee mi fays az ih mi-di teech ih son?

² Timoti mi groa op wid payrents weh neva bilangz tu di saym rilijan. Fi hihn pa da-mi Greek, an ih ma an ih grani da-mi Joo. (Aks 16:1) Timoti da-mi praabli wahn teenayja wen Yoonis ahn Lois mi ton Kristyan. Bot ih pa neva geh fi bee wahn Kristyan. Wich rilijan yu tink Timoti mi wahn chooz? Timoti mi praabli oal inof fi mek ih oan disizhan. Yu tink ih mi wahn chooz di rilijan weh ih pa mi bilangz  tu? Yu tink hihn mi wahn kantinyu fala di Jooish chradishan dehn weh ih mi laan fahn wen ih da-mi wahn lee bwai? Er yu tink ih mi wahn bee wahn disaipl a Jeezas Krais?

3. Akaadn tu Proverbs 1:8, 9, how Jehoava feel bowt di werk weh wahn ma du fi help ih chiljren fi bee Jehoava fren?

³ Jos laik Yoonis, wahn Kristyan ma lov ih famili. Moa dan eniting els, shee waahn help ih chiljren fi ga wahn kloas frenship wid Jehoava. Ahn wi Gaad reeli apreeshiayt ih haad werk. (Reed Proverbs 1:8, 9.) Wahn lata ma don geh help fahn Jehoava fi teech dehn chiljren fi lov ahn serv Hihn.

4. Wat da sohn chalenj weh sohn ma fays tudeh?

⁴ Ih nachral fi mek sohn ma wanda sohntaim if, laik Timoti, dehn chiljren wahn chooz fi serv Jehoava. Payrents noa dat dehn chiljren deh anda wahn lata presha eena Saytan werl. (1 Peet. 5:8) Pahn tap a dat, wahn lata ma ga di chalenj fi rayz dehn chiljren widowt wahn hozban er wid wahn hozban weh noh serv Jehoava. Fi egzampl, wahn sista weh naym Christine * seh: “Mai hozban da wahn gud pa an ih lov wi famili, bot hihn neva waahn Ah rayz wi chiljren az Jehoava Witnisiz. Ai mi krai wahn lat an Ah mi wanda if mi chiljren wuda eva serv Jehoava.”

5. Weh wi wahn diskos eena dis aatikl?

⁵ If yoo da wahn Kristyan ma, yoo ku help yu chiljren fi lov ahn serv Jehoava jos laik Yoonis. Eena dis aatikl, wi wahn diskos how yu ku kapi fi shee egzampl ahn teech yu chiljren bai weh yu seh ahn weh yu du. Wi wahn aalso geh fi si how Jehoava wahn help yu du dat.

6. Bays pahn 2 Timoti 3:14, 15, how Timoti mi geh fi bee wahn Kristyan?

⁶ Wen Timoti da-mi wahn lee bwai, ih ma mi du ih bes fi teech ahn “di hoali raitin dehn” bays pahn how di Jooz mi andastan dehn. Af koars, shee neva noa wahn lat bowt di Skripchaz bikaaz ih neva noa notn bowt Jeezas Krais. Bot stil, weh Timoti mi laan fahn di Skripchaz da-mi weh ih mi need fi noa soh dat ih kuda mi geh fi bee wahn Kristyan. Bot yu tink dat da weh hihn mi wahn du? Az wahn yong man, Timoti mi ga di rait fi chooz weda ih mi wahn geh fi bee wahn Kristyan. Fi shoar, Timoti mi staat tu bileev eena di chroot bowt Jeezas bikaaz ih ma mi help ahn. (Reed 2 Timoti 3:14, 15.) Yoonis mi reeli hapi dat ih geh fi teech ih son bowt Jehoava eevn doa ih mi reeli haad. Yoonis naym kohn fahn wahn werd weh meenz “kanka,” ahn shee mi reeli liv op tu ih naym bikaaz shee mi kanka evri chalenj fi help Timoti fi lov ahn serv Jehoava.

7. How Yoonis kuda mi help ih son fi kantinyu bee wahn beta Kristyan eevn afta hihn mi geh baptaiz?

⁷ Wen Timoti mi geh baptaiz, hihn mi reech wahn impoatant goal eena ih laif. Bot eevn afta ih geh baptaiz, Yoonis mi stil wori bowt ih son. Yoonis praabli mi-di wori bowt how ih son mi wahn liv di res a ih laif, if ih mi wahn ga frenz weh da bad kompni, if ih mi gwehn da skool da Atenz ahn staat tu bileev di faals teechinz weh dehn teech deh, er if ih mi wahn ways ih taim an enerji wail ih yong jos fi geh rich. Yoonis kudn mek disizhanz fi Timoti, bot shee kuda mi help ahn mek waiz disizhanz. How? Shee kuda mi kantinyu  werk haad fi teech ih son fi lov Jehoava wahn lat ahn fi bee tankful fi evriting weh Jehoava ahn Jeezas mi du fi dehn az wahn famili. Dehn ga sohn Kristyan ma er pa weh marid tu sohnbadi weh noh serv Jehoava, bot dehn da noh di onli wanz weh fain it haad fi teech dehn chiljren fi lov Jehoava. Eevn wen wahn ma ahn pa di serv Jehoava tugeda, dehn ku stil fain it haad fi help dehn chiljren laan fi serv Jehoava tu. Weh payrents ku laan fahn Yoonis egzampl?

8. If wahn sista ga wahn hozban weh di serv Jehoava, how shee ku help hihn wen hihn di teech dehn chiljren bowt Jehoava?

⁸ Help yu chiljren fi laan fahn di Baibl. Sistaz, if unu hozban da wan a Jehoava Witnisiz, Jehoava waahn unu help hihn teech unu chiljren bowt Hihn. Wan way yu ku du dis da wen yu sopoat yu hozban eena famili wership. Seh pazitiv tingz bowt famili wership, ahn tink bowt weh yu ku du fi mek evribadi injai it. Maybi yu ku help yu hozban plan wahn speshal famili wership proajek. An if yu chiljren oal inof fi benifit fahn di Injai Laif Fareva! buk, maybi yu ku help yu hozban set op wahn lee persnal Baibl stodi wid dehn.

9. If wahn sista ga wahn hozban weh da noh wan a Jehoava Witnisiz, wehpaat shee ku geh help?

⁹ Wahn lata ma haftu tek di leed ahn stodi di Baibl wid dehn chiljren, eeda bikaaz dehn noh ga wahn hozban er bikaaz dehn hozban da noh wan a Jehoava Witnisiz. If yoo deh eena da sichuwayshan, noh wori, Jehoava wahn help yu. Jehoava gi yu wahn lata toolz weh ku help yu chiljren. Yooz dehndeh toolz wen yu di teech yu chiljren bowt hihn. Yu ku aalso aks payrents weh ga lata ekspeeryens bowt how dehn yooz dehndeh toolz fi famili wership. * (Prov. 11:14) Jehoava ku aalso help yu taak tu yu chiljren. Pray tu Jehoava fi help yu aks di rait kweschanz fi fain owt weh yu chiljren reeli tink ahn how dehn reeli feel. (Prov. 20:5) Yu ku aks dehn wahn kweschan laik, ‘Weh yu fain haad fi deel wid da skool?ʼ Wahn lee kweschan laik dat ku help yu staat wahn kanvasayshan wid yu chiljren ahn yu ku laan wahn lat bowt dehn.

10. Wat els yu ku du fi help yu chiljren laan bowt Jehoava?

¹⁰ Fain difrent wayz fi teech yu chiljren bowt Jehoava. Taak bowt Jehoava ahn bowt aala di gud tingz weh hihn don du fi yu. (Deut. 6:6, 7; Isa. 63:7) Dis impoatant fi du, espeshali if yu kyaahn stodi regyula wid yu chiljren wen yu deh hoam. Christine, weh wi menshan erliya, seh: “Ih mi haad fi mek Ah fain wahn apachooniti fi taak tu mi chiljren bowt Jehoava. Bot weneva wahn apachooniti kom op, Ah wuda tek advantij a it. Wi wuda tek wahn lee waak er wi wuda goh eena wahn doari ahn jos taak bowt aala Jehoava wandaful kriyayshan an ada tingz weh wuda help dehn fi bee Jehoava fren. Wen mi chiljren mi geh oal inof, Ah mi inkorij dehn fi stodi di Baibl pahn dehn oan.” Pahn tap a dat, seh pazitiv tingz bowt Jehoava aaganaizayshan ahn bowt yu bradaz ahn sistaz. Noh taak bad bowt di eldaz. Weh yu seh bowt dehn ku help yu chiljren disaid if dehn wahn goh tu di eldaz fi help wen dehn need it.

11. Akaadn tu Jaymz 3:18, wai ih impoatant fi mek yu ga pees eena yu famili?

¹¹ Werk haad fi ga pees eena yu famili.  Aalwayz shoa yu hozban ahn yu chiljren dat yu lov dehn. Taak bowt yu hozban eena wahn kain way weh shoa dat yu rispek ahn, an chrayn yu chiljren fi du di sayhn ting. Wen yu du dat, ih mek yu ga pees eena yu famili an ih eeziya fi mek yu chiljren laan bowt Jehoava. (Reed Jaymz 3:18.) Tink bowt Jozsef egzampl. Hihn di serv az wahn speshal painyaa da Romania. Wail hihn mi-di groa op, ih pa mi mek it haad fi mek hihn, ih ma, an ih breda ahn sista dehn serv Jehoava. Jozsef seh: “Mai ma mi werk reeli haad fi mek wi ga pees eena di famili. Eevn doa mi pa mi chreet shee bad, mai ma mi aalwayz chreet hihn eena wahn kain way. Weneva shee mi riyalaiz dat ih mi haad fi mek wi rispek ahn lisn tu wi pa, shee wuda taak tu wi bowt weh Ifeezhanz 6:1-3 seh. Den shee wuda taak tu wi bowt wi pa gud kwalitiz an ih wuda help wi fi andastan wai wi shuda lov hihn. Dat mi help wi famili fi ga pees.”

12. Akaadn tu 2 Timoti 1:5, how Yoonis egzampl mi help Timoti?

¹² Reed 2 Timoti 1:5. Yoonis mi set wahn gud egzampl fi Timoti. Shee mosi mi teech ahn dat wen yu ga chroo fayt, yu shoa it bai di tingz weh yu du. (Jay. 2:26) Fi shoar Timoti mi si dat di gud tingz weh ih ma mi du mi bays pahn fi shee lov fi Jehoava.Ahn hihn mi aalso noatis dat shee mi hapi az ih mi-di serv Jehoava. How Yoonis egzampl mi help Timoti? Di apasl Paal mi seh dat Timoti mi ga schrang fayt laik ih ma. Ahn dat neva hapm bai chaans. Timoti mi si ih ma gud egzampl, ahn hihn mi disaid fi kapi fi shee egzampl. Sayhn way tudeh, “widowt haftu seh wahn werd,” wahn lata ma help dehn famili fi serv Jehoava. (1 Peet. 3:1, 2) How yoo ku du di sayhn ting?

13. Wai wahn ma shuda mek shoar dat ih rilayshanship wid Jehoava da di moas impoatant ting eena ih laif?

¹³ Mek shoar dat yu rilayshanship wid Jehoava da di moas impoatant ting eena yu laif. (Deut. 6:5, 6) Laik moas ma, yoo mek wahn lata sakrifais. Yu giv op lata taim, moni, sleep an ada tingz fi tek kayr a di fizikal needz a yu chiljren. Bot yu shuda neva geh soh bizi di tek kayr a dehndeh needz dat yu noh ga taim fi schrentn yu rilayshanship wid Jehoava. Mek shoar yu aalwayz mek taim fi pray, stodi di Baibl, ahn goh da meetinz. Wen yu du dat, yu rilayshanship wid Jehoava wahn geh schranga ahn yu wahn set wahn gud egzampl fi yu famili ahn fi adaz.

14-15. Weh yu ku laan fahn Leanne, Maria, ahn Marco?

¹⁴ Mek wi kansida di egzampl a sohn yong peepl weh mi laan fi lov Jehoava ahn chros eena hihn bikaaz a dehn ma egzampl. Christine daata weh naym Leanne seh: “Wi kudn stodi di Baibl wen wi pa mi deh hoam. Bot mai ma neva mis di meetin dehn. Eevn doa wi neva noa wahn lat bowt weh di Baibl seh, fi shee egzampl mi help wi ga schrang fayt. Wi mi noa dat dis da di chroot lang bifoa wi mi eevn gaahn da wahn meetin.”

¹⁵ Sohntaim Maria pa wuda ponish dehn bikaaz dehn wuda goh da meetin. Maria seh: “Mai ma ga lata korij. Wen Ai da-mi wahn lee gyal, Ah neva waahn du wahn lata tingz bikaaz Ah mi frayd fi weh ada peepl wuda seh. Bot wen Ah mi si humoch korij mai ma gat ahn how shee mi  aalwayz put fayt eena Jehoava, dat mi help mi fi noh bee frayd fi taak bowt Jehoava.” Marco pa neva waahn mek ih famili taak bowt Jehoava er di Baibl eena di hows. Hihn seh: “Weh mi reeli inkorij mi da dat mi ma mi redi fi giv op evriting fi pleez mi pa, bot wan ting weh shee neva giv op da-mi ih lov fi Jehoava.”

16. How wahn ma gud egzampl ku help adaz?

¹⁶ Unu weh da ma, memba dat unu gud egzampl ku help adaz. How? Mek wi si how Yoonis egzampl mi help di apasl Paal. Hihn mi seh dat Timoti mi ga schrang fayt ‘jos laik ih ma Yoonis.ʼ (2 Tim. 1:5) Da wen Paal mi geh fi si dat Yoonis mi ga schrang fayt? Da mi praabli wen ih meet Lois ahn Yoonis joorin ih fers mishineri chrip da Lischra. Ahn hihn mi praabli help dehn fi staat serv Jehoava. (Aks 14:4-18) Tink bowt dis: Wen Paal mi rait tu Timoti bowt 15 yaaz layta, hihn mi stil memba how Yoonis mi ga schrang fayt. Ahn hihn mi yooz fi shee egzampl fi help ada Kristyanz! Ih klyaa fi si dat fi shee egzampl mi inkorij di apasl Paal an ada Kristyanz weh mi liv rong da taim. If yoo di rayz yu chiljren bai yuself, er if yu marid tu sohnbadi weh noh serv Jehoava, memba dat yu faytful egzampl ku schrentn an inkorij adaz weh deh rong yu.

17. Weh yu ku du if ih luk laik yu chiljren noh waahn serv Jehoava eevn if yu don werk haad fi chrayn dehn?

¹⁷ Wat if ih luk laik yu chiljren noh waahn serv Jehoava eevn doa yu don werk haad fi chrayn dehn? Memba dat ih  tek taim fi chrayn chiljren. Laik weh yu si eena di picha, wen yu plaant wahn seed, yu mait wanda if ih wahn eva groa intu wahn plaant weh bayr froot. Eevn doa yu noh shoar if di plaant wahn groa ahn bayr froot, yu wahn kantinyu waata it soh dat yu ku giv it di bes chaans fi groa. (Maak 4:26-29) Sayhn way soh, az wahn ma, yu mait wanda if aala di werk weh yu di du reeli wahn help yu chiljren fi lov Jehoava. Yu kyaahn kanchroal di disizhanz weh yu chiljren mek, bot if yu kantinyu du evriting weh yu kud fi chrayn dehn, yu wahn di gi dehn di bes apachooniti fi bee Jehoava fren.—Prov. 22:6.

18. How Jehoava ku help yu chiljren fi bee fi hihn fren?

¹⁸ Fahn way bak eena Baibl taimz, Jehoava mi aalwayz help yong peepl fi bee fi hihn fren. (Ps. 22:9, 10) Hihn ku aalso help yu chiljren fi bee ih fren if dat da weh dehn waahnt. (1 Kor. 3:6, 7) Eevn if yu chiljren noh serv Jehoava wid aala dehn haat, Jehoava wahn kantinyu lov dehn. (Ps. 11:4) If dehn shoa eni sain dat dehn ga di “rait haat kandishan,” hihn wahn deh rait deh fi help dehn bee fi hihn fren. (Aks 13:48; 2 Chron. 16:9) Hihn wahn help yu fi seh di rait ting, rait wen dehn need fi hyaa it. (Prov. 15:23) Er hihn mait moov wahn lovin brada er sista eena di kangrigayshan fi shoa dat dehn kay bowt dehn. Eevn wen dehn groa op, Jehoava wahn help dehn memba sohnting weh yu mi teech dehn eena di paas. (Jan 14:26) Wen yu kantinyu fi chrayn yu chiljren bai weh yu seh ahn weh yu du, Jehoava wahn bles yu.

19. Wai yu ku bee shoar dat Jehoava hapi wid yoo?

¹⁹ Jehoava lov fi yoo noh bays pahn di disizhanz weh yu chiljren mek. Hihn lov yu bikaaz yoo lov hihn. If yoo di rayz yu chiljren widowt wahn hozban, Jehoava pramis fi protek yu ahn fi bee yu chiljren Pa. (Ps. 68:5) Yu kyaahn kanchroal weda er nat yu chiljren wahn chooz fi serv Jehoava. Bot if yu kantinyu du yu bes ahn pen pahn Jehoava fi help, yu wahn mek hihn hapi.