1-2. (a) Kinsa si Eunice, ug unsang mga kalisdanan ang iyang giatubang ingong inahan? (b) Komentohi ang hulagway sa atubangan sa magasin.

 WALA hisgoti sa Bibliya ang pagbawtismo kang Timoteo, pero dili lisod imadyinon ang kalipay nga gibati sa iyang mama nga si Eunice nianang adlawa. (Prov. 23:25) Imadyina siya nga proud kaayo samtang nagtindog si Timoteo sa tubig nga tagahawak. Nagpahiyom siya samtang migunit niya si Loida nga lola ni Timoteo. Miginhawag lawom si Eunice dihang si Timoteo gituslob sa tubig. Pagtunga ni Timoteo nga dako kaayog pahiyom, ang iyang mama nakahilak sa kalipay. Bisag dili sayon, natudloan ni Eunice si Timoteo nga higugmaon si Jehova ug ang Iyang Anak, si Jesu-Kristo. Unsang mga kalisdanan ang iyang naatubang dihang iyang ginatudloan ang iyang anak?

² Ang ginikanan ni Timoteo dili parehas ug relihiyon. Ang iyang papa Grego, ug ang iyang mama ug lola mga Hudiyo. (Buh. 16:1) Tingali, tin-edyer pa si Timoteo dihang nahimong Kristohanon si Eunice ug Loida. Pero ang iyang papa wala mahimong Kristohanon. Unsa nga relihiyon ang pilion ni Timoteo? Tingali naa na siya sa saktong edad nga mohimog desisyon. Pilion ba niya ang relihiyon sa iyang papa? Sundon ba niya ang tradisyon sa mga Hudiyo nga gitudlo kaniya sa bata pa siya? O pilion ba niya nga mahimong tinun-an ni Jesu-Kristo?

3. Base sa Proverbio 1:8, 9, unsay hunahuna ni Jehova sa paningkamot sa mga inahan nga tabangan ang ilang mga anak nga masuod kaniya?

³ Karon, gimahal pod sa Kristohanong mga inahan ang ilang pamilya. Gusto gyod nilang tabangan ang ilang mga  anak nga masuod kang Jehova. Ug gipabilhan pag-ayo sa atong Diyos ang ilang paningkamot. (Basaha ang Proverbio 1:8, 9.) Daghang inahan ang gitabangan ni Jehova sa pagtudlo sa ilang mga anak nga dawaton ang kamatuoran.

4. Unsang mga kalisdanan ang giatubang karon sa mga inahan?

⁴ Natural lang nga usahay ang inahan maghunahuna kon ang iyang anak moalagad ba kang Jehova, parehas kang Timoteo. Nahibalo man god ang mga ginikanan kon giunsa pagpresyur sa kalibotan ni Satanas ang ilang mga anak. (1 Ped. 5:8) Dugang pa, daghang inahan ang nalisdan sa pagpadako sa ilang mga anak kay wala silay bana o kaha ang ilang bana dili alagad ni Jehova. Pananglitan, ang sister nga si Christine * nag-ingon: “Ang akong bana maayong amahan, ug palangga mi niya. Pero dili niya gusto nga tudloan nako ang among mga anak ug mahimo silang Saksi ni Jehova. Pila ka tuig ko nga nagsigeg hilak kay wala ko kabalo kon unsaon sila pagtabang nga makaalagad kang Jehova.”

5. Unsay atong hisgotan niining artikuloha?

⁵ Kon Kristohanon ka nga inahan, puwede kang molampos, parehas kang Eunice. Niining artikuloha, atong hisgotan kon unsaon nimo pagsundog ang iyang ehemplo aron matudloan nimo ang imong mga anak pinaagi sa pulong ug buhat. Hisgotan pod nato kon unsaon ka pagtabang ni Jehova.

6. Base sa 2 Timoteo 3:14, 15, sa unsang paagi nahimong Kristohanon si Timoteo?

⁶ Sa bata pa si Timoteo, ang iyang mama naningkamot pag-ayo nga matudloan siya sa “balaang mga sinulat,” sumala sa pagkasabot niini sa mga Hudiyo. Siyempre, limitado rag kahibalo si Eunice kay wala pa siyay nahibaloan bahin kang Jesu-Kristo. Bisan pa ana, ang nakat-onan ni Timoteo sa Kasulatan makatabang niya nga mahimong Kristohanon. Pero modesisyon kaha siya nga mahimong Kristohanon? Ingong batan-on, naa na siyay kagawasan nga mohimo ana nga desisyon. Si Timoteo ‘nakombinsir nga motuo’ sa kamatuoran bahin kang Jesus, ug segurado nga ang usa sa mga rason mao ang paningkamot ni Eunice. (Basaha ang 2 Timoteo 3:14, 15.) Nalipay gyod si Eunice kay nadaog niya ang mga kalisdanan sa pagtudlo sa iyang anak bahin kang Jehova! Bagay gyod kang Eunice ang iyang ngalan nga nagkahulogang “pagdaog.”

7. Unsa kahay padayong gihimo ni Eunice human mabawtismohi si Timoteo?

⁷ Importante kaayo ang pagpabawtismo ni Timoteo, pero naa pay laing gikabalak-an si Eunice. Unsaon man paggamit ni Timoteo ang iyang kinabuhi? Makigsuod ba siya sa mga tawo nga dili maayong impluwensiya? Moeskuwela ba siya sa Atenas ug dawaton ang mga pagtulon-an sa paganong mga magtutudlo didto? Sayangan ba niya ang iyang panahon, kusog, ug pagkabatan-on ug maningkamot nga madato? Si Eunice dili makadesisyon para kang Timoteo, pero puwede niya siyang tabangan. Unsaon man? Padayon niyang paningkamotan nga masilsil kang Timoteo ang lawom nga gugma kang Jehova ug ang pagpabili kang Jesu-Kristo. Dili lang mga ginikanan nga parehas ni Eunice ug kahimtang ang nalisdan sa pagpadako sa ilang mga anak. Bisag parehas nga Saksi ang ginikanan, dili gihapon sayon ang pagtabang sa mga anak nga mahimong alagad ni Jehova. Unsay makat-onan sa mga ginikanan kang Eunice?

8. Unsaon pagtabang sa inahan ang iyang Saksing bana aron maatiman ang espirituwal nga panginahanglan sa ilang mga anak?

 ⁸ Tudloi ang imong anak bahin sa Bibliya. Mga sister, kon Saksi ang inyong bana, gusto ni Jehova nga motabang mo sa pag-atiman sa espirituwal nga panginahanglan sa inyong mga anak. Ang usa ka paagi nga mahimo ninyo ni mao ang regular nga pagsuporta sa Pamilyahanong Pagsimba. Pagsultig positibo bahin sa maong kahikayan ug paghunahunag mga paagi nga mahimo ning makalingaw ug makapalipay. Tingali makatabang ka sa imong bana sa pagplanog espesyal nga Bible study project o activity. Dugang pa, kon naa moy mga anak nga puwede nang estadihan sa librong Mabuhi Ka Hangtod sa Hangtod! suportahi ang imong bana sa paghimo ani.

9. Kinsa ug unsa ang makatabang sa mga inahan nga dili Saksi ug bana?

⁹ Ang ubang inahan maoy nanguna sa pagtudlo sa ilang mga anak bahin sa Bibliya, tingali tungod kay wala silay bana o kaha dili Saksi ang ilang bana. Kon mao nay imong kahimtang, ayaw kaayo kabalaka. Tabangan ka ni Jehova. Gamita ang nindot kaayong mga publikasyon ug video nga iyang gitagana pinaagi sa organisasyon aron matudloan ang imong mga anak. Puwede kang mangayog ideya sa eksperyensiyadong mga ginikanan kon unsaon ni paggamit sa Pamilyahanong Pagsimba. * (Prov. 11:14) Tabangan pod ka ni Jehova sa pagpakig-estorya sa imong mga anak. Hangyoa siya nga tabangan kang mahibaloan kon unsay naa sa ilang hunahuna ug kasingkasing. (Prov. 20:5) Ang simpleng pangutana parehas sa ‘Unsay nalisdan nimo sa eskuwelahan?’ makatabang nga daghan kag mahibaloan bahin sa imong anak.

10. Unsa pay imong mahimo aron matabangan ang imong mga anak nga makakat-on bahin kang Jehova?

¹⁰ Pangitag lainlaing paagi aron matudloan ang imong mga anak bahin kang Jehova. Estoryahi sila bahin kang Jehova ug sa daghang maayong mga butang nga iyang gihimo para ninyo. (Deut. 6:6, 7; Isa. 63:7) Importante ni ilabina kon dili mo maka-study nga regular diha sa balay. Si Christine, nga gihisgotan ganina, miingon: “Panagsa ra kaayo ming magkaestorya bahin sa espirituwal nga mga butang, maong kon magkaestorya mi, ako gyod ning pahimuslan. Maglakawlakaw mi o magbangka aron mag-estorya bahin sa nindot nga kalalangan ni Jehova ug sa daghang espirituwal nga mga butang. Dihang dakodako na ang akong mga anak, gidasig nako sila nga maningkamot nga tun-an ang Bibliya.” Pagsulti pod ug positibo bahin sa mga igsoon ug sa organisasyon ni Jehova. Ayawg sawaya ang mga ansiyano. Ang imong isulti bahin kanila dakog epekto kon moduol ba sa mga ansiyano ang imong mga anak dihang magkinahanglan silag tabang.

11. Base sa Santiago 3:18, nganong importante nga maningkamot ta nga magmalinawon ang atong pamilya?

¹¹ Paningkamot nga magmalinawon ang inyong pamilya. Sultihi pirme ang imong bana ug mga anak nga gimahal nimo sila. Dihang maghisgot ka bahin sa imong bana, ipakita nga buotan ug matinahoron ka niya, ug bansaya ang imong mga anak nga himoon pod nâ. Pinaagi ana, magmalinawon ang inyong pamilya ug mas sayon para sa imong mga anak nga makakat-on bahin kang Jehova. (Basaha ang Santiago 3:18.) Konsideraha si Jozsef, nga espesyal payunir sa Romania. Sa bata pa siya, ang ilang pamilya gilisodlisod pag-ayo sa ilang  papa sa pag-alagad kang Jehova. Si Jozsef miingon: “Naningkamot gyod si Mama nga magmalinawon ang among pamilya. Kon unsa ka isog si Papa, mao pod ka buotan si Mama. Dihang mamatikdan niya nga maglisod na mig tahod ug sunod kang Papa, iya ming pahinumdoman sa Efeso 6:1-3. Dayon estoryahan mi niya sa maayong mga kinaiya ni Papa ug pasabton mi kon nganong angay namo siyang panggaon. Gihimo niya ni sa daghang higayon, maong mokalma ang situwasyon.”

12. Base sa 2 Timoteo 1:5, unsay epekto kang Timoteo sa maayong ehemplo ni Eunice?

¹² Basaha ang 2 Timoteo 1:5. Si Eunice nagpakitag maayong ehemplo kang Timoteo. Seguradong gitudloan niya si Timoteo nga ang tinuod nga pagtuo makita sa buhat. (Sant. 2:26) Nakita gyod ni Timoteo sa binuhatan sa iyang mama nga gihigugma niya pag-ayo si Jehova. Ug seguradong nakita ni Timoteo nga ang pag-alagad kang Jehova nakapalipay sa iyang mama. Unsay epekto niini kang Timoteo? Si apostol Pablo miingon nga si Timoteo lig-og pagtuo parehas sa iyang mama. Dili to basta nahitabo ra. Nakita ni Timoteo ang maayong ehemplo sa iyang mama ug nadasig siya nga sundogon ni. Karon pod, nakabig nga “walay pulong” sa daghang inahan ang ilang pamilya. (1 Ped. 3:1, 2) Mahimo pod nâ nimo. Unsaon man?

13. Nganong angay nga himoong prayoridad sa inahan ang iyang relasyon kang Jehova?

¹³ Himoang prayoridad ang imong relasyon kang Jehova. (Deut. 6:5, 6) Parehas sa kadaghanang inahan, daghan kag gisakripisyo. Gisakripisyo nimo ang imong panahon, kuwarta, pahulay, ug uban pa aron maatiman ang imong mga anak. Pero ayaw gyod tugoti nga tungod ani, masakripisyo ang imong relasyon kang Jehova. Paggahin ug panahon aron regular kang makaampo, makahimog personal nga pagtuon sa Bibliya, ug makatambong sa tigom. Pinaagi ani, molig-on ka sa espirituwal ug makahatag kag maayong ehemplo sa imong pamilya ug sa uban.

14-15. Unsay imong makat-onan kang Leanne, Maria, ug João?

¹⁴ Konsideraha ang giingon sa mga batan-on nga nakakat-on sa paghigugma ug pagsalig kang Jehova tungod sa ehemplo sa ilang inahan. Ang anak ni Christine nga si Leanne miingon: “Dili mi maka-Bible study kon naa si Papa. Pero si Mama dili gyod mo-absent sa tigom. Ang iyang ehemplo ug lig-ong pagtuo dakog natabang namo bisag gamay ra mig nahibaloan sa Bibliya. Milabay pa ang panahon ayha mi nakatambong ug tigom, pero kombinsido na mi nga mao to ang kamatuoran.”

¹⁵ Si Maria ug ang ilang pamilya silotan usahay sa ilang papa kon motambong silag tigom. Pero siya miingon: “Bilib kaayo ko sa kaisog ni Mama. Sa bata pa ko, usahay dili ko mohimo sa usa ka butang kay mahadlok ko sa isulti sa uban. Pero ang kaisog ni Mama ug ang iyang pag-una pirme kang Jehova nakatabang nako nga madaog ang akong kahadlok sa tawo.” Si João ug ang ilang pamilya gidid-an sa ilang papa nga mag-estoryag espirituwal nga mga butang diha sa ilang balay. Siya miingon: “Nadasig kaayo ko kang Mama kay andam niyang himoon ang tanan para malipay si Papa, gawas lang gyod sa pagbiya kang Jehova.”

16. Sa unsang paagi ang ehemplo sa inahan makaapektar sa uban?

¹⁶ Mga inahan, hinumdomi nga ang inyong ehemplo makaapektar sa uban. Sa unsang paagi? Konsideraha ang epekto sa ehemplo ni Eunice kang apostol Pablo. Si Pablo  misulat nga ang walay pagpakaaron-ingnong pagtuo ni Timoteo ‘una niyang nakita kang Eunice.’ (2 Tim. 1:5) Kanus-a unang nakita ni Pablo ang pagtuo ni Eunice? Tingali nailaila niya si Loida ug Eunice sa Listra sa iyang unang biyahe ingong misyonaryo, ug tingali siyay nagtabang nila nga mahimong Kristohanon. (Buh. 14:4-18) Hunahunaa ra: Dihang gisulatan ni Pablo si Timoteo​—mga 15 ka tuig sa ulahi—​nahinumdoman gihapon ni Pablo ang mga buhat ni Eunice nga nagpakita sa iyang pagtuo, ug gihisgotan niya si Eunice ingong ehemplo nga angayng sundogon! Klaro nga ang iyang ehemplo nakadasig pag-ayo kang Pablo ug tingali sa daghang Kristohanon atong panahona. Kon wala kay bana o kaha dili Saksi ang imong bana, unya nagpadako kag mga anak, makasalig ka nga ang imong maayong ehemplo makapalig-on ug makapadasig sa uban.

17. Unsay angay nimong himoon kon ang imong paningkamot morag way epekto sa imong anak?

¹⁷ Komosta man kon ang imong mga paningkamot morag way epekto sa imong anak? Hinumdomi nga ang pagbansay sa anak nagkinahanglag panahon. Sumala sa makita sa hulagway, dihang magtanom kag binhi, usahay maghunahuna ka kon motubo ba ni ug mamunga. Bisag wala ka kahibalo kon unsa unyay resulta, padayon nimo ning bisbisan aron mas dakog purohan nga motubo ni. (Mar. 4:26-29) Sa susama, ingong inahan, tingali maghunahuna ka usahay kon ang imong ginatudlo nakaabot ba gyod sa kasingkasing  sa imong mga anak. Dili nimo kontrolado kon unsa unyay ilang desisyon. Pero kon padayon kang maningkamot sa pagbansay nila, mas dakog purohan nga motubo sila sa espirituwal.​—Prov. 22:6.

18. Unsaon pagtabang ni Jehova ang imong mga anak nga mohamtong sa espirituwal?

¹⁸ Sukad pa sa kapanahonan sa Bibliya, si Jehova daghan nag natabangan nga mga bata ug batan-on nga masuod niya. (Sal. 22:9, 10) Kaya pod niyang tabangan ang imong mga anak nga mohamtong sa espirituwal kon gusto nila. (1 Cor. 3:6, 7) Bisag morag motipas ang imong mga anak, padayon silang higugmaon ug bantayan ni Jehova. (Sal. 11:4) Dihang magpakita silag bisan gamayng ilhanan nga gusto nilang moalagad kang Jehova, naa siya aron motabang nila. (Buh. 13:48; 2 Cron. 16:9) Tabangan tingali ka niya nga isulti ang hustong mga pulong sa hustong panahon—dihang kinahanglan ning madungog sa imong mga anak. (Prov. 15:23) O tingali palihokon niya ang buotang brader o sister sa kongregasyon aron hatagan silag espesyal nga atensiyon. Bisan dihang dagko na ang imong mga anak, ipahinumdom tingali ni Jehova kanila ang imong gitudlo sa bata pa sila. (Juan 14:26) Kon padayon nimong bansayon ang imong mga anak sa pulong ug buhat, gihatagan nimo si Jehova ug daghang rason nga panalanginan ka.

19. Nganong makaseguro ka nga si Jehova nalipay nimo?

¹⁹ Ang gugma ni Jehova nimo wala magdepende sa desisyon sa imong mga anak. Gimahal ka niya kay gimahal nimo siya. Kon nag-inusara kang ginikanan, si Jehova nagsaad nga siya ang mahimong Amahan sa imong mga anak ug ang Tigpanalipod nimo. (Sal. 68:5) Dili nimo kontrolado kon ang imong mga anak moalagad ba kang Jehova o dili. Pero kon padayon kang mosalig sa tabang ni Jehova ug himoon nimo ang imong maarangan, si Jehova malipay nimo.