1-2. (a) Yunike akaba ari oha kandi shi ni biha bizibu ebi yabugine nk’omuzire? (b) Gamba aha kishushani c’aha kishembeso.

 N’OBU Bibuli etari kugamba aha kubatizibwa kwa Timoteyo, nitubasa kutekateka aha ku nyina Yunike yashemerirwe ahari eryo izoba. (Emi 23:​25) Tekateka oku yabire ashemerirwe ari kureba Timoteyo ayemerire omu mizi. Akaba ashemerirwe obu Loyisi nyinenkuru wa Timoteyo yabire amuri aha rubaju amukwasire aha mabega. Yunike akisya omutima ku yarebire Timoteyo ari kuruga omu mizi. Ahabw’okushemererwa kwingi akatandika kurira amarira g’okushemererwa. N’obu cagumire Yunike kwegesa mutabani weye ebiri kukwata ahari Yehova n’Omwana weye Yesu Kristo, akabihikaho. Ni biha bizibu ebi yayehanganire omu kwegesa omwana weye?

² Timoteyo akakurira omu ka erimu enyikiriza ezitari kushushana. Ishe akaba ari Omugurika kandi nyina na nyinenkuru bakaba bari Abayudaya. (Byak 16:​1) Timoteyo nabasa kuba yabire acari omwana obu Yunike na Loyisi babire Abakristo. Konka ishe akaba atari Omukristo. Mbwenu shi ni enki eki Timoteyo yabire arije kusharamu? Akaba akuzire ari kubasa kweshariramu. Mbehi akaba arije kusharamu edini y’ishe owabire atari Omukristo? Mbehi akaba arije kuguma ari kukuratiza emigenzo y’Abayudaya eyi yabire ayegesibwe acari omwana? Ninga akaba arije kuba Omukristo?

3. Tukuratize ebiri omu Migani 1:​8, 9, ni bata oku Yehova ari kureba amani agu abakazi bari kutaho ngu bakwase abana babo kumukunda?

³ Abakazi b’Abakristo b’omuri obu bwire na bo nibakunda amaka gabo. Nibenda kukwasa abana babo kugira obunywani  burungi na Yehova. Kandi Ruhanga nareba amani agu bari kutaho nk’ag’omuhendo. (Shoma omu Migani 1:​8, 9.) Yehova akakwasa abazire b’abakazi bingi omu kuyamba abana babo kwikiriza amazima.

4. Ni biha bizibu ebi abazire b’abakazi bari kukira kubugana omuri obu bwire?

⁴ Ni ebishangirwe abazire b’abakazi kwebuza yaba abana babo barije kukorera Yehova nk’oku Timoteyo yakikozire. Abazire nibamanya ebizibu ebi abana babo bari kubugana omuri egi nsi ya Sitane. (1 Pet 5:​8) Nambwenu nikigumira abakazi kurera abana babo bari bonka ninga shi bari n’abashija abatari kuramya Yehova. Ecokureberaho: Omunyanyazi ori kwetwa Christine b akagamba ati: “Omushija wange ni murungi kandi natukunda, konka tari kunyikiriza ngu nkwase abana bitu babe Abahamya ba Yehova. Ninkunda kwebuza yaba abana bitu barije kuramya Yehova, rero ndira.”

5. Ni enki eki twaza kushwijuma omuri eki kicweka?

⁵ Waba ori omuzire w’Omukristo, nobasa kukwasa abana bawe kukunda Yehova, nka Yunike. Omuri eki kicweka, twaza kushwijuma oku ori kubasa kutoreza ecokureberaho ca Yunike omu bi ori kugamba n’omu bi ori kukora. Nambwenu twaza kureba oku Yehova arije kukukwasa kukikora.

6. Nk’oku biri kugambwa omuri 2 Timoteyo 3:​14, 15, ni bata oku Timoteyo yabire Omukristo?

⁶ Obu Timoteyo yabire acari omwana, nyina akakora cona eki ari kubasa ngu amwegese “ebyahandikirwe ebiri kwera.” Konka, nyina akaba atari kumanya byingi ahakuba akaba atari kumanya ebiri kukwata ahari Yesu Kristo. Konka nabwe ebi Timoteyo yayegire omu Byahandikirwe bikaba nibimumara kugira ngu abe Omukristo. Konka shi akaba arije kuba we? Akaba arije kweshariramu kuba Omukristo. Hatariho okubanganisa, Timoteyo “akamanyira kimwe” ebiri kukwata ahari Yesu ahakuba nyina yatireho amani ngu abimwegese. (Shoma omuri 2 Timoteyo 3:​14, 15.) Mazima Yunike akashemererwa munonga ahabw’okukwasa omwana weye kumanya ebiri kukwata ahari Yehova n’obu cabire kimugumire. Yunike akakora ebiri kubugana n’izina ryeye eriri kuruga omu kigambo ekiri kumanyisa ngu, “okusingura.”

7. Ni bata oku Yunike yabire ari kubasa kukwasa omwana weye kutunguka na bwanyima y’okubatizibwa?

⁷ N’obu Timoteyo yabire yakora ensharamu y’omugasho y’okubatizibwa, Yunike akaguma ayemerize omutima ahabweye. Ni bata oku omwana weye yabire arije kukoresa amagara geye? Mbehi akaba arije kwekwatanisa n’abanywani babi? Mbehi akaba arije kwegera omuri Atene, rero ayikiriza enyegesa z’abapagani abari kwegesa filozofiya? Mbehi akaba arije kumara amani geye, obwire bweye n’obunyeto bweye ari kurondesa obutungi? Yunike akaba atari kubasa kukorera Timoteyo ensharamu, konka akaba ari kubasa kumukwasa. Bata shi? Akaba ari kubasa kutamu amani kugira ngu akwase omwana weye kukunda Yehova n’okwereka ku nibasima ahabw’ebi Yehova na Yesu babakorire. Amaka agarimu amadini agatari kushushana ti go gonka agari kubugana ebizibu. N’obu abazire bona bakuba bari Abakristo, nikibasa kubagumira kuhika abana babo aha mutima kugira ngu bije kuba abahereza ba Yehova b’abesigwa. Mbwenu shi ni enki eki abazire bari kubasa kwegera aha cokureberaho ca Yunike?

8. Ni bata oku abazire b’abakazi bari kubasa kukwasa abashija babo kufa aha bana babo omu by’omwika?

 ⁸ Guma oyegere hamwe Bibuli n’abana bawe. Imwe banyanyazi mwe, yaba abashija banyu bari Abakristo, Yehova nayenda ngu mubakwase omu kufa aha bana banyu omu by’omwika. Oburyo bumwe obu ori kubasa kukikoramu ni okushagika entebekanisa y’okuramya kw’eka. Guma ogambe aha birungi ebiri omu kuramya kw’eka kandi otekateke eki ori kubasa kukora kugira ngu bibanurire. Nobasa n’okukwasa omushija wawe omu kutebekanisa ebi murayegeho omu kuramya kw’eka. Nambwenu yaba bamwe omu bana bawe bakuzire bari kubasa kugasirwa omu kweyegesa ekitabo Shemerererwa amagara ebiro byona!, nobasa kukwasa omushija wawe omu kubaha obuyambi obu bari kwetenga.

9. Ni nkahe ahu omukazi oyine omushija otari Omuhamya ari kubasa kwiha obuyambi?

⁹ Abakazi abamwe ni bo abari kutwara obujunanizibwa bw’okwegesa abana babo Bibuli ahakuba bari bonka ninga shi abashija babo batari Abahamya ba Yehova. Caba ni ko kiri omu ka yawe, otayerarikirira munonga. Yehova nayija kukukwasa. Yega n’abana bawe okoresize ebikoreso by’okwegesezamu Bibuli ebi Yehova yatuhire birabire omu kitongore ceye. Caba kiri kubasika, nobasa kubuza abazire abamanyirire oku ori kubasa kukoresa ebyo bikoreso omu kuramya kw’eka. c (Emi 11:​14) Nambwenu Yehova nabasa kukukwasa kumanya oku ori kubasa kuganira n’abana bawe. Ogume omushabe kugira ngu akukwase kumanya ebiri omu mutima gw’abana bawe. (Emi 20:​5) Nobasa kukoresa ekibuzo corobi nk’ekiri kugira ngu: ‘Ni kiha kizibu eki muri kukira kubugana ah’ishomero?’ Ekibuzo nk’eco nikikukwasa kuganira na bo.

10. Ni buha buryo obundi obu ori kubasa kukwasamu abana bawe kwega ebiri kukwata ahari Yehova?

¹⁰ Ronda oburyo obutari kushushana bw’okwegesa abana bawe ebiri kukwata ahari Yehova. Gamba ebiri kukwata ahari Yehova n’aha birungi byingi ebi yakukorire. (Bir 6:​6, 7; Isa 63:​7) Eco ni kikuru munonga waba otari kubasa kwegesa abana bawe burijo omu ka. Christine, owu tugambireho akagira ati: “Okubona obwire bw’okuganira n’abana bange aha bintu by’omwika kikaba kitorobi, obwe rero nkaba ninkoresa buri kagisha kona aku nabona. Tukaba nitugenda hamwe ninga shi tuza omu bwato tuza aha nyanja kugira ngu tuganire aha byahangirwe bya Yehova n’aha bindi bintu byingi by’omwika. Abana bange ku bakuzire, nkabahiga ngu beyegese Bibuli bari bonka.” Nambwenu ogume ogambe ge ahari benetata na banyanyazi n’aha kitongore ca Yehova. Oyerinde kugamba kubi aha bazehe b’ekibina. Ebi ori kugamba aha bazehe nibibasa kukwasa abana bawe kubaronderaho obuyambi obu bari kwetenga.

11. Tukuratize ebiri omuri Yakobo 3:​18, ahabw’enki tushemerire kuretaho obusinge omu ka?

¹¹ Retaho obusinge omu ka. Burijo yereka omushija wawe n’abana bawe ku nobakunda. Guma ogambe n’omushija wawe omu muringo gw’ekitinisa kandi omanyize n’abana bawe babe ni co bakora. Ku orakikore, nikija korobera abana bawe kwega ebiri kukwata ahari Yehova. (Shoma omuri Yakobo 3:​18.) Tekateka aha cokureberaho ca Jozsef, omupayoniya w’omutano omuri Romaniya. Obu yabire acari muto, ishe akaba nabazibira  iwe, nyina n’abu ari kuzarwa na bo kuhereza Yehova. Jozsef akagamba ati: “Mama akaba nagezaho kureta obusinge omu ka. Oku tata yabire nakizaho kuba ensharizi ni ko mama yabire nakizaho kutwaza ge. Ku yabire nareba kitugumire korobera tata n’okumuha ekitinisa akaba natushomera ebiri omu Befeso 6:​1-3. Bwanyima akaba natugambira emitwarize mirungi ya tata, rero atushobororera enshonga tushemerire kumuha ekitinisa. Eco kikatuma omu ka yitu habamu obisinge.”

12. Tukuratize ebiri omuri 2 Timoteyo 1:​5, ecokureberaho ca Yunike kikakwata kita ahari Timoteyo?

¹² Shoma omuri 2 Timoteyo 1:​5. Yunike akateraho Timoteyo ecokureberaho kirungi. (Yak 2:​26) Hatariho okubanganisa, Timoteyo akaba nareba ku ebikorwa bya nyina byabire biri kwereka rukundo eyi ari kukunda Yehova. Timoteyo akaba nareba ku nyina yabire natunga okushemererwa omu kuhereza Yehova. Ecokureberaho ca Yunike kikakwata kita ahari Timoteyo? Entumwa Pawulo akagamba ku Timoteyo yabire ayine okwikiriza nk’okwa nyina. Eco tikirafire kubaho. Timoteyo aketegereza ebi nyina ari kukora rero yamutoreza. Ni co kimwe n’omuri obu bwire, abazire bingi b’abakazi bakakwasa ab’omu maka gabo kuhereza Yehova “hatine ekigambo cona eki babagambire.” (1 Pet 3:​1, 2) N’iwe nobasa kukikora. Bata shi?

13. Ahabw’enki omukazi ashemerire kuta obunywani obu ayine na Yehova omu mwanya g’okubanza?

¹³ Ta obunywani bwawe na Yehova omu mwanya g’okubanza. (Bir 6:​5, 6) Nk’abakazi bingi, n’iwe noyeferereza ebintu byingi. Noyeferereza obwire bwawe, esente, itiro n’ebindi bintu kugira ngu ohe abana bawe ebi bari kwetenga by’om. Konka toshemerire kuhugira omuri ebyo bintu ngu kitume wabura obwire bw’okufa aha bunywani obu oyine na Yehova. Yetereho obwire bw’okushaba, okweyegesa Bibuli n’okuza omu nterane. Ku orakikore basyoya, noyija kugumya obunywani bwawe na Yehova kandi otereho ab’eka yawe n’abandi ecokureberaho kirungi.

14-15. Ni enki eki wayegera aha cokureberaho ca Leanne, Maria, na João?

¹⁴ Reba ebyokureberaho bimwe by’abacari bato abakunzire Yehova n’okumwesiga ahabw’okwetegereza ecokureberaho ca ba nyina. Muhara wa Christine ori kwetwa Leanne akagamba ati: “Tukaba tutari kubasa kwega Bibuli tata yaba ari omu ka. Konka mama akaba atari kubasa kubura kuza omu nterane. N’obu twabire tutari kumanya byingi ahari Bibuli, ebikorwa byeye bikatukwasa kugira okwikiriza kugumire. Tukaba nitumanya ku ebi yabire natwegesa ari go mazima n’obu twabire tutakatandikire kuza omu nterane.”

¹⁵ Maria, owu ishe yabire nabatera ahabw’okuza omu nterane, akagamba ati: “Mama ni we omukazi w’emanzi owu ndi kumanya omu bakazi bona. Obu nabire ncari omwana hine obu nabire nindeka kukora ebintu ahabw’okutina ebi abandi baragambe. Konka ku nabire nindeba oku mama ari emanzi n’oku yabire nata Yehova omu mwanya g’okubanza kikankwasa kusingura okutina abantu.” João, owu ishe yabazibire kugamba ebiri kukwata ahari Yehova bari omu ka akagira ati: “Ecanshemize ni oku mama yabire nabasa kuhayo buri kintu cona ngu ashemeze tata oyihireho rukundo eyi ayine na Yehova.”

16. Ecokureberaho c’abazire b’abakazi nikikwata kita aha bandi?

¹⁶ Imwe bakazi mwe, mugume mwijuke ku ecokureberaho canyu kiri kukwata aha bandi. Bata shi? Tekateka oku ecokureberaho  ca Yunike cakwasire aha ntumwa Pawulo. Akaba namanya ku okwikiriza kwa Timoteyo okutine oburyarya ‘kwabandize omuri Yunike.’ (2 Tim 1:​5) Ni ryari obu Pawulo yabandize kureba okwikiriza kwa Yunike? Nihabasa kuba habire hari omu rugendo rweye rw’okubanza rw’obumishonari obu yabugine Loyisi na Yunike omuri Lusitura, kandi nihabasa kuba ari bwo yabakwasize kuba Abakristo. (Byak 14:​4-​18) Kitekatekeho: Obu Pawulo yahandikire Timoteyo hahwireho emyaka nka 15, akaba acayijuka ebikorwa bya Yunike by’okwikiriza kandi akamugambaho ku ari ecokureberaho kirungi c’okutoreza! Oku kiri kurebeka, ecokureberaho ca Yunike kikahiga entumwa munonga n’abandi Bakristo bingi b’omu kinyigana c’okubanza. Ku orabe ori kurera abana bawe wenka ninga shi omushija wawe atari kuhereza Yehova, guma oyesiga ku ecokureberaho cawe kiri kugumya abari kukureba.

17. Ni enki eki ori kubasa kukora omwana wawe yaba atari kuhurira ebi ori kumwegesa?

¹⁷ Mbwenu shi omwana wawe ku yakuba atari kuhurira ebi ori kumwegesa? Yijuka ku okwegesa omwana kiri kutwara obwire. Nk’oku kiri kwerekwa omu kishushani, wabyara embibo hine obu ori kwebuza yaba erije kukura ngu erugemu ebijuma. N’obu ori kuba otari kumanya ebirije kurugamu, noguma ori kugishucera amizi kugira ngu eyere. (Mak 4:​26-​29) Ni co kimwe, omuzire w’omukazi hine obu ari kubasa kwebuza yaba ari kuhika aha mutima gw’abana beye. Ti iwe ori  kusharamu oku abana barakwate ebi ori kubegesa. Konka wakora cona eki ori kubasa okabegesa, nobaha omugisha g’okukura omu by’omwika.—⁠Emi 22:​6.

18. Ni bata oku Yehova ari kubasa kukwasa abana bawe kukura omu by’omwika?

¹⁸ Kwiha omu bwire bwa kare, Yehova akakwasa abacari bato bingi kuba banywani beye. (Zab 22:​9, 10) Nabasa n’okukwasa abana bawe kukura omu by’omwika yaba ari co bari kwenda. (1 Kor 3:​6, 7) N’obu abana bawe bakuba batari kuhereza Yehova n’omutima gwabo gona, nagumizamu kubakunda. (Zab 11:​4) Ku bari kwereka akamanyiso akari kwereka ku bari kwenda kushemeza Yehova, naba ayetegwire kubakwasa. (Byak 13:​48; 2 Bus 16:​9) Nabasa kukukwasa kugamba ekintu kirungi kandi omu bwire burungi obu abana bawe bari kwetenga kukihurira. (Emi 15:​23) Ninga shi nabasa kukoresa mwenetata ninga omunyanyazi w’omu kibina abakwasa. N’obu abana bawe bakukura, Yehova nabasa kubijusya ekintu eki wabegesize bacari bato. (Yoh 14:​26) Wagumizamu kwegesa abana bawe omu bi ori kugamba n’omu bi ori kukora, Yehova nayija kukuha emigisha.

19. Ni enki ekiri kubasa kukuhamiza ku Yehova ari kukusima?

¹⁹ Yehova tari kukukunda ahabw’ensharamu ezi abana bawe bari kukora. Nakukunda ahakuba n’iwe nomukunda. Waba ori kurera abana bawe wenka, ogume oyijuke ku Yehova ari kukuraganisa ku arije kuba Ishe w’abana bawe kandi Omurinzi wabo. (Zab 68:​5) Ti iwe ori kushariramu abana bawe kuhereza Yehova ninga kutamuhereza. Konka ku oragumizemu kwesiga obuyambi bwa Yehova kandi okakora cona eki ori kubasa, Yehova nayija kukusima.