1-2. (a) Lekel Enis e akoz i ti difisil pour li ansenny son garson konsernan Zeova ek Zezi? (b) Ki nou kapab dir lo sa portre lo kouvertir?

 MENM si Labib pa koz lo batenm Timote, ou kapab mazinen ki Enis manman Timote ti kontan sa zour. (Prov. 23:25) Imazin ki mannyer Enis ti vreman fyer ler i ti get Timote pe debout dan delo. I fer en sourir anmezir ki Lois, granmanman Timote, i may li. I vreman kontan ler i vwar Timote koul anba delo. Ler Timote i sorti anba delo, i annan en gran sourir lo son figir. Enis i sitan kontan ki i plere. Menm si i ti difisil, Enis in kapab ansenny Timote pour kontan Zeova ek Zezi Kri. Ki difikilte Enis in fer fas avek pour ansenny son garson?

² Papa ek manman Timote pa ti dan menm larelizyon. Papa Timote ti en Grek e son manman ek granmanman ti Zwif. (Akt 16:1) I tre probab ki Timote ti en adolesan ler Enis ek Lois ti vin Kretyen me son papa pa ti vin Kretyen. Ki Timote ti pou fer? I ti annan laz pour fer son prop desizyon. Eski i ti pou fer parey son papa? Eski i ti pou kontinyen swiv bann tradisyon Zwif ki i ti’n aprann ler i ti ankor ptipti? Ouswa eski i ti pou vin en disip Zezi Kri?

3. Dapre Proverb 1:8, 9, ki mannyer Zeova i vwar sa travay ki bann manman i fer pour ed zot zanfan vin son zanmi?

³ Pareyman ozordi, bann manman i kontan zot fanmir. Zot vreman anvi ed zot zanfan pour devlop en lanmitye pros avek Zeova e Zeova i apresye zot zefor. (Lir Proverb 1:8, 9.) Zeova in ed en kantite manman pour ansenny zot zanfan pour kontan li e servi li.

4. Ki problenm bann manman i fer fas avek ozordi?

 ⁴ Parfwa en manman i kapab mazinen si son zanfan pou swazir pour servi Zeova parey Timote. Zot konnen ki kantite presyon zot zanfan pe fer fas avek dan sa lemonn ki pe ganny dirize par Satan. (1 Pyer 5:8) Osi, i annan en kantite manman tousel ki bezwen fer grandi zot zanfan dan laverite. Ouswa i annan lezot ki zot msye pa servi Zeova. Tousala i difisil pour bann manman. Par egzanp, en ser ki apel Christine b i dir: “Mon msye i en bon papa e i kontan nou fanmir. Me i pa ti oule ki mon elve nou zanfan pour vin Temwen Zeova. Dan bann lannen ki’n pase, mon’n plere plizyer fwa ler mon’n mazinen si mon bann zanfan pou servi Zeova en zour.”

5. Ki nou pou vwar dan sa lartik?

⁵ Si ou en manman, ou kapab ed ou zanfan pour kontan Zeova e servi li parey Enis ti fer. Dan sa lartik, nou pou vwar ki mannyer ou kapab swiv son legzanp e ansenny ou zanfan par sa ki ou dir e sa ki ou fer. Nou pou osi vwar ki mannyer Zeova pou ed ou.

6. Dapre 2 Timote 3:14, 15, akoz Timote ti vin en Kretyen?

⁶ Ler Timote ti ankor zanfan, son manman ti fer son mye pour ansenny li “lekritir sen” parey bann Zwif ti’n aprann sa letan. Byensir Enis pa ti konn bokou keksoz parski i pa ti konn nanryen lo Zezi Kri. Kantmenm sa, sa ki Timote ti aprann dan Lekritir ti ase pour ed li pour swazir pour vin en Kretyen. Me eski i ti pou fer sa? Timote ti annan sa drwa pour swazir si i pou vin en Kretyen oubyen non. San dout en rezon ki Timote ti “ganny persyade pour krwar” laverite lo Zezi, i akoz bann zefor ki son manman ti fer. (Lir 2 Timote 3:14, 15.) I enteresan pour note ki non Enis i sorti dan en mo ki vedir “ranport laviktwar” e Enis ti fer sanmenm parski i ti’n ranport laviktwar oubyen sirmont bann difikilte pour li kapab ansenny Timote pour kontan Zeova e servi li. Enis ti bezwen kontan ki i ti’n kapab ansenny son garson lo Zeova menm si i ti difisil.

7. Ki mannyer Enis ti kapab ed son garson pour kontinyen vin en pli bon Kretyen apre ki i ti’n batize?

⁷ Ler Timote ti batize, i ti atenn en lobzektif enportan dan son lavi. Me kantmenm sa, son manman ti ankor per pour li. Petet son manman ti mazinen ki Timote ti pou fer avek son lavi. Eski i ti pou pas letan avek bann dimoun ki pou annan en move lenfliyans lo li? Eski i ti pou al lekol dan lavil Atenn e aksepte lansennyman bann filozof? Eski i ti pou gaspiy son letan, lenerzi ek lazenes pour travay dir pour vin ris? Enis pa ti kapab fer bann desizyon pour Timote me i ti pou kapab ed Timote fer bann desizyon ki saz. Ki mannyer i ti pou kapab fer sa? Enis ti kapab kontinyen travay dir pour ed son garson pour kontinyen kontan Zeova e pour rekonesan pour tou sa ki Zeova ek Zezi in fer pour zot. Pa zis bann paran ki zot konzwen pa servi Zeova ki vwar li difisil pour ed zot zanfan kontan Zeova. Menm ler tou le de paran pe servi Zeova, i kapab difisil pour zot ed zot zanfan pour servi Zeova. Ki bann paran i kapab aprann avek legzanp Enis?

8. Ki mannyer en ser i kapab ed son msye pour ansenny zot zanfan konsernan Zeova?

 ⁸ Etidye Labib avek ou zanfan. Ser Kretyen, si ou’n marye e ou msye pe servi Zeova, Zeova i anvi ki ou ed ou msye ansenny ou zanfan konsernan li. En fason ki ou kapab fer sa, i ler ou siport sa laranzman pour fer Ladorasyon Fanmir tou le semenn. Koz an byen lo sa laranzman e reflesir lo sa ki ou kapab fer pour ki Ladorasyon Fanmir i en moman ki agreab e gou. Petet ou kapab ed ou msye pour plàn en aktivite spesyal pour fer pandan Ladorasyon Fanmir. An plis, si ou zanfan i ase gran pour fer letid dan sa liv Viv ere pour touzour!, petet ou kapab travay ansanm avek ou msye pour li kapab fer sa letid.

9. Kote en manman ki son msye pa pe servi Zeova i kapab ganny led?

⁹ Serten manman i bezwen fer letid Labib avek zot zanfan parski zot en manman tousel ouswa zot msye pa servi Zeova. Si ou dan en sityasyon koumsa, pa bezwen trakas tro bokou, Zeova pou ed ou. Servi bann piblikasyon ek video ki Son lorganizasyon i donnen pour etidye avek ou zanfan. Petet ou kapab demann bann paran ki’n fer zot zanfan grandi dan laverite ki mannyer pour servi sa bann piblikasyon ek video. c (Prov. 11:14) Ou kapab priy Zeova e demann li pour ed ou servi bann bon kestyon pour ou kapab konnen ki ou zanfan pe mazinen e ki mannyer i pe santi. (Prov. 20:5) Par egzanp, ou kapab demann li, ‘Kwa ki pli difisil pour ou kot lekol?’ Sa i kapab konmans en konversasyon ki pou ed ou konn plis lo sa ki pe arive avek ou zanfan.

10. Ki en lot keksoz ou kapab fer pour ed ou zanfan aprann konsernan Zeova?

¹⁰ Rod loportinite pour ansenny ou zanfan lo Zeova. Koz lo Zeova ek bann bon keksoz ki i’n fer pour ou. (Det. 6:6, 7; Iza. 63:7) Sa i sirtou enportan si ou pa kapab fer letid Labib avek ou zanfan regilyerman kot lakour. Christine ki’n ganny mansyonnen pli boner i dir: “Mon ti napa bokou loportinite pour koz lo Zeova alor mon ti sezi nenport moman ki nou ti annan. Nou ti al marse ouswa fer letour dan canoe pour koz lo kreasyon ek bann keksoz ki pou ed zot vin zanmi Zeova. Ler mon zanfan ti ase gran, mon ti ankouraz zot pour etidye Labib lo zot menm.” Ou kapab osi dir bann bon keksoz konsernan lorganizasyon Zeova e lo bann frer ek ser. Pa kritik bann ansyen. Sa ki ou dir lo bann ansyen, i kapab ed ou zanfan deside si i pou al kot bann ansyen ler i bezwen led.

11. Dapre Zak 3:18, akoz i enportan pour promot lape kot lakour?

¹¹ Promot lape kot lakour. Montre ou msye ek ou zanfan ki ou kontan zot. Koz lo ou msye dan en bon fason e ki demontre respe. Ansenny ou zanfan pour fer parey. Ler ou fer sa, sa i kapab fer li pli fasil pour ou zanfan aprann konsernan Zeova. (Lir Zak 3:18.) Annou vwar legzanp Jozsef, ki en pionye spesyal Laroumani. Ler i ti pe grandi son papa ti fer li difisil pour li, son manman ek son bann frer ek ser servi Zeova. Jozsef i dir: “Mon manman ti fer en kantite zefor pour fer ki i annan lape dan lakour. Pli  mon papa ti fer brit, pli mon manman ti demontre labonte anver li. Ler mon manman ti vwar ki i ti difisil pour nou demontre respe pour nou papa e pour obei li, i ti koz avek nou lo Efezyen 6:1-3. Apre i ti koz lo bann zoli kalite ki papa ti annan e i ti ed nou konpran akoz nou devret apresye li. Sa ti fer ki i ti annan lape dan nou fanmir.”

12. Dapre 2 Timote 1:5, ki lefe legzanp Enis ti annan lo Timote?

¹² Lir 2 Timote 1:5. Enis ti en bon legzanp pour Timote. San dout, i ti ansenny Timote ki nou montre ki nou annan lafwa par nou aksyon. (Zak 2:26) Nou kapab asire ki Timote ti vwar ki son manman ti vreman kontan Zeova. Timote ti osi kapab vwar lazwa ki son manman ti annan akoz i ti pe servi Zeova. Ki lefe legzanp Enis ti annan lo Timote? Zapot Pol ti dir ki Timote ti annan en lafwa for parey son manman. Sa pa ti par azar. Timote ti’n vwar bon legzanp son manman e i ti deside pour swiv son legzanp. Pareyman, en kantite manman in reisi ed zot fanmir pour servi Zeova. Zot in fer sa “san ki zot dir nanryen.” (1 Pyer 3:1, 2) Ki mannyer ou kapab fer parey?

13. Akoz en manman i devret fer son lanmitye avek Zeova vin sa keksoz pli enportan dan son lavi?

¹³ Fer ou lanmitye avek Zeova sa keksoz pli enportan dan ou lavi. (Det. 6:5, 6) Parey laplipar manman, ou fer en kantite sakrifis. Ou sakrifye letan, larzan ek lezot keksoz pour pran swen avek ou zanfan. Ou osi mank sonmey pour fer sa. Me ou pa devret zanmen tro bizi pe pran swen avek ou zanfan ki ou napa letan pour ranforsi ou lanmitye avek Zeova. Fer letan pour priye, pour fer letid Labib personnel, pour prepare pour renyon e pour asiste renyon regilyerman. Ler ou fer sa, ou pou ranforsi ou lanmitye avek Zeova e ou pou vin en bon legzanp pour ou fanmir e osi pour lezot.

14-15. Ki ou aprann avek legzanp Leanne, Maria ek João?

¹⁴ Annou vwar detrwa legzanp lo bann zenn ki’n aprann pour kontan Zeova e annan konfyans dan li ler zot in vwar legzanp zot manman. Leanne, fiy Christine, i dir: “Nou pa ti kapab fer letid Labib ler nou papa ti dan lakour. Me manman ti toultan asiste bann renyon. Menm si nou pa ti konn bokou lo Labib, sa ki i ti fer ti ed nou pour annan en lafwa for. Nou ti konnen ki sa i laverite bokou letan avan ki nou ti asiste renyon.”

¹⁵ En lot legzanp i Maria. Parfwa papa Maria ti pini zot ler zot ti al renyon. Maria i dir: “Mon manman i sa ser pli kouraze ki mon konnen. Ler mon ti ankor ptipti, parfwa mon pa ti anvi fer serten keksoz parski mon ti per sa ki dimoun ti pou dir. Me ler mon ti vwar ki kantite kouraz mon manman ti annan e ki mannyer i ti toultan met Zeova premye dan son lavi, sa ti ed mwan pour sirmont lafreyer pour zonm.” João, ki son papa ti anpes son fanmir koz lo Zeova ek Labib kot lakour, i dir: “Sa ki ti ankouraz mwan plis i lefet ki menm si mon manman ti pare pour sakrifye tou keksoz pour fer plezir mon papa, i pa ti sakrifye son lanmour pour Zeova.”

16. Ki lefe legzanp en manman i kapab annan lo lezot?

¹⁶ Si ou en manman, rapel ki ou legzanp i annan en lefe lo lezot. Ki mannyer sa?  Annou vwar ki mannyer legzanp Enis ti annan en lefe lo zapot Pol. Zapot Pol ti dir ki sa lafwa ki Timote ti annan ti parey sa lafwa senser ki Enis ti annan. (2 Tim. 1:5) Kan ki zapot Pol ti vwar legzanp Enis pour premye fwa? I tre probab ki pandan son premye vwayaz misyonner, i ti zwenn Lois ek Enis dan lavil Lis e i kapab ki i ti ed zot pour vin Kretyen. (Akt 14:4-18) Zis mazin sa: Ler Pol ti ekri Timote apepre 15 an pli tar, i ti ankor mazin lafwa ki Enis ti’n demontre e i ti dir ki Enis i en legzanp ki nou devret swiv. I kler ki legzanp Enis ti’n ankouraz Pol en kantite e i tre probab ki i ti’n osi ankouraz lezot Kretyen dan premye syek. Si ou en manman tousel ki pe fer grandi ou zanfan ouswa ou msye pa pe servi Zeova, ou kapab asire ki ou bon legzanp i ankouraz lezot.

17. Ki ou devret fer si i paret ki ou zanfan pa anvi servi Zeova menm si ou pe fer bokou zefor pour ansenny li?

¹⁷ Ki ou pou fer si i paret ki ou zanfan pa anvi servi Zeova menm si ou pe fer bokou zefor pour ansenny li? Rapel ki i pran letan pour ansenny en zanfan. Parey nou vwar dan portre, parfwa ler nou plant en lagrenn, nou kapab mazinen si sa plant pou grandi pour li raport fri. Menm si ou pa konnen ki pou arive, ou kontinyen aroz li pour donn li sa ki i bezwen pour grandi. (Mark 4:26-29) Pareyman, parfwa en manman i kapab mazinen si son zefor pe vreman ed  son zanfan pour kontan Zeova. Ou pa kapab fer desizyon pour ou zanfan me si ou kontinyen fer tou sa ki ou kapab pour ansenny zot, ou pou pe donn zot sa ki zot bezwen pour vin zanmi Zeova.​—Prov. 22:6.

18. Ki mannyer Zeova i kapab ed ou zanfan pour vin son zanmi?

¹⁸ Depi dan letan Labib, Zeova in ed en kantite zenn pour vin son zanmi. (Ps. 22:9, 10) I osi kapab ed ou zanfan pour vin son zanmi, si sanmenm ki zot anvi. (1 Kor. 3:6, 7) Menm ler ou zanfan i kit Zeova, Zeova pou kontinyen obzerv li. (Ps. 11:4) Ler zot montre en pti siny ki zot anvi fer plezir Zeova, Zeova pou pare pour ed zot vin son zanmi. (Akt 13:48; 2 Kron. 16:9) I kapab ed ou pour dir ou zanfan sa bon keksoz dan sa moman ki ou zanfan i bezwen tande. (Prov. 15:23) Ouswa i kapab motiv en frer oubyen en ser dan kongregasyon pour demontre lentere dan ou zanfan. Menm apre ki ou zanfan in vin adilt, Zeova i kapab fer li mazin en keksoz ki ou’n ansenny li. (Zan 14:26) Ler ou kontinyen ansenny ou zanfan par sa ki ou dir e sa ki ou fer, Zeova pou beni ou.

19. Akoz ou kapab asire ki ou annan laprouvasyon Zeova?

¹⁹ Lanmour ki Zeova i annan pour ou pa depan lo bann desizyon ki ou zanfan i fer. Zeova i kontan ou akoz ou kontan li. Si ou en paran tousel, Zeova i promet ki i pou vin en Papa pour ou zanfan e i pou protez ou. (Ps. 68:5) Ou pa kapab deside pour ou zanfan. Li ki bezwen deside si i pou servi Zeova oubyen non. Me si ou kontinyen depan lo Zeova pour ganny led e ou fer ou mye, ou pou ganny laprouvasyon Zeova.