1, 2. (1) ¿Kʼaibasi Eunicera akʉza kʼãrẽ bedʼea zroma ũdusi? (2) Jara ũrĩbira yi poto nããrabemata.

 DAIZEZE Bedʼeade eda jara ẽ mina Timoteo buru kʼoeda ʉ̃rʉ dayirãbara krĩchaseabʉ Eunice kʼãrẽaba sobiasita maʉ̃ ewaridera (Prov. 23:25). Krĩchara naʉ̃ta, Eunicebara akʉnʉmʉ yi wũãwũã Timoteo buru kʼoeda wãta, maʉ̃ena Timoteo payõdra Loidaba iyita bʉrayi, maʉ̃ena Timoteora doeda joa edadayi iyi buru kʼoebidaita. Eunicera maʉ̃ akʉkʼãrãpe sobiaba jẽgayi. Euniceitara zareabasimina yi wũãwũã jaradiaita Jeowa kãgaita akʉza Jesuta iyara bia osi mawũã jõma bia wãsi, mamina, ¿kʼãrẽ bedʼea zromata ũdusi Eunicebara?

² Timoteo yibarirãra religion awuara erpanasi, yi zezera griegobasi akʉza yi papata yi payõdraʉ̃me judiarabasi (Hech. 16:1). Mawũẽra Timoteora kʉrabasibaibara yi papa Eunice akʉza yi payõdra Loida Jesu kʼaidubemarabasidera, mamina yi zezera Jesu kʼaidubema bakĩrã ẽ basi. Mawũẽra, ¿saʉ̃ religionta jidaibarabasi Timoteobara? Timoteora arabiabasibaibara iya kʼawua jidaita, mawũẽra, ¿yi zezeba religion jidadade wãibasika? mawũã ẽ bʉrʉ ¿Euniceba Loidaʉ̃meba religon jidadade wãibasika?

3. Proverbios 1:8, 9de jarabʉdera, ¿sãwũã akʉbʉ Jeowabara yi papara zarea obʉra yi wũãwũãraʼa iyi ʉ̃rʉ jaradiaita?

³ Yi papa Jeowa ode panʉrabara abarika Eunicede kĩrãkʼa kãga yi mebẽrãra, adewara mejãcha zarea opanʉ yi wũãwũãraba kãgadamarẽã Jeowata akʉza naʉ̃ta Jeowabara bia akʉbʉ (akʉra Proverbios 1:8, 9). Jeowabara mejãcha kʼareba zebʉrʉ yi paparãra yi wũãwũãra jaradiadamarẽã iya zokʼabʉde odaita.

4. ¿Kʼãrẽ bedʼea zroma erpanʉ idi ewadera yi paparãra?

 ⁴ Edaʉde ʉ̃kʉrʉ yi papara Jeowa ode panʉrãra krĩcha opanʉ kʼawua ẽ baera, ãyi wũãwũãrãra Timoteo kĩrãkʼa Daizeze ode bʼaita. Ãya akʉpanʉ baera Diarubara warrarãra naʉ̃ drʉadebemata obikĩrãbʉta (1 Ped. 5:8). Maʉ̃ awuara ʉ̃kʉrʉ yi papara yi wũãwũãta dobaʉba dapʉẽpanʉ mawũã ẽ bʉrʉ yi kimara Jeowa ʉ̃rʉ Kʼawuabipanʉrã ẽ. Bari jaraita, mebẽã Cristinaba * jarabʉ: «Mʉ̃ kimara zeze biabasi akʉza kima biabasi, mamina iya jipa kãga ẽ basi mʉ̃ wũãwũãrãra Jeowa ʉ̃rʉ Kʼawuabipanʉrã bamarẽã. Mʉ̃ra maʉ̃ kʼarea mejãcha jẽgabasi, kʼawua ẽ basi baera mʉ̃ wũãwũãraba ewari abaʉde mejãcha kãga zeita Jeowara».

5. ¿Kʼãrẽta akʉdai naʉ̃ artikulodera?

⁵ Bʉta papabʉrʉ akʉza Jeowa ode bʉbʉrʉ bʉ wũãwũãra jaradiaseabʉ Jeowa kãgamarẽã akʉza iya zokʼabʉde omarẽã, Euniceba oda kĩrãkʼa. Naʉ̃ artikulode kʼawuayi bʉa sãwũã Eunicede kĩrãkʼa oseabʉta bʉ wũãwũãra jaradiabʉrʉde bʉa obʉdeba akʉza bʉa jarabʉdeba, adewara akʉdayi bʉra sãwũã Jeowaba kʼarebaseabʉta.

6. 2 Timoteo 3:14, 15de jarabʉdebara, ¿kʼãrẽba kʼarebasi Timoteora kristiano bʼaita?

⁶ Timoteo wĩña yiruedaʉba yi papa Euniceba jaradiasi Daizeze ʉ̃rʉ iya Dazieze ʉ̃rʉ mejãcha kʼawua ẽ basimina. Mamina Timoteobara iya kʼawua jidaibarabasi kristiano bʼaita mawũã ẽ bʉrʉ kristiano ba ẽãta. Euniceba zarea obasi Timoteoʼa Daizeze ʉ̃rʉ jaradiaita, naʉ̃ba kʼarebasi iyi kristiano bʼaita (akʉra 2 Timoteo 3:14, 15). Euniceitara zarebasimina, iyira zarea osi Timoteoʼa jaradiaita Daizeze ʉ̃rʉ maʉ̃ kʼarea sobiabasi. Eunice trʉ̃bara jarakĩrãbʉ pae ẽ bʼaita, mawũẽra iyi trʉ̃ba jarabʉ kĩrãkʼa, Eunicera pae ẽ basi yi wũãwũã jaradiaita Jeowa kãgamarẽã.

7. Timoteo buru kʼoeda tẽã, ¿Eunicebara sãwũã kʼarebaseabasi iyi audre Daizeze ode kʼẽrẽpa bamarẽã?

⁷ Timoteo buru kʼoeira biode yibiabasi, mawũãsidu yi papa Eunicera krĩchaobasi. Iya biode krĩchabasi baera, ¿Timoteo sãwũã bʼaita? ¿Timoteobara jʉrʉi kʼawuaita neũdukʼawua zeri ẽãta? ¿Atenasʼeda estudia wãika mawũã ĩjãita mama jaradiapanʉta? ¿Timoteobara iyi ewarita zokʼaika akʉza iyi zareata mejãcha trajakʼãrãpe nebia ũduya? Eunicebara naʉ̃ra Timoteobarira kʼawua krĩchabe ẽ basi, mamina iyara kʼarebaseabasi, ¿sãwũã? Jaradiaseabasi Jeowa mejãcha kãgamarẽã, adewara biga diamarẽã Jeowaʼa akʉza Jesuʼa ãya yi mebẽrã kʼarea nekʼãrẽ bio ozebʉrʉ baera. Yibarirara Jeowa ode dobapanʉraitara edaʉde zare ãyi wũãwũãra soidu jʉ̃ẽita mawũã Jeowata kãgadamarẽã mamina yibarira Jeowa ode panʉraitabida edaʉde zareabʉ yi wũãwũãra kʼarebaita Daizeze Jeowa ode bʼaita mawũẽra, ¿kʼãrẽta kʼawuaseapanʉ yibarirabara Eunice yizadebara?

8. ¿Sãwũã kʼarebaseabʉ mebẽã wẽrãbara yi kima Jeowa odebʉra yi wũãwũã kʼareba Jeowa ʉ̃rʉ jaradiaita?

⁸ Bʉyi wũãwũãrabawaraʉba kʼawuara Daizeze Bedʼeata. Mebẽã wẽrãra bʉ kimata Jeowa ode bʉbʉrʉ Jeowabara kãgabʉ bʉabida kʼarebamarẽã mayi wũãwũãra Jeowadebemata kʼareba jaradiamarẽã. ¿Sãwũã? Kʼarebaseabʉ zarea  obʉde eda kʼarebaita semanaza mayi mebẽrãbawara ãba yi jʉrebʉta Jeowa ʉ̃rʉ kʼawuaita, adewara ibia bedʼeara semanaza mebẽrãbawara ãba yi jʉrepanʉ ʉ̃rʉ akʉza krĩchara kʼãrẽta oita maʉ̃ ewaride mebẽrãbawara sobia bʼaita. Adewara bʉa kʼarebaseabʉ bʉ kimara kʼareba krĩchaita kʼãrẽta odaita semanaza bʉ mebẽrãbawara ãba zebʉdade Jeowa ʉ̃rʉ kʼawuaita, mawũã ẽ bʉrʉ bʉ kimaba bʉ wũãwũã jaradianʉmʉbʉrʉ libro Bʉra ewari jõmaʉ̃nẽ sobia baseabʉ, bʉ wũãwũã jaradianʉmʉ ewaride bʉa kʼarebaseabʉ bʉ kimara eda kʼareba jaradiaita.

9. Mebẽã wẽrã yi kima Jeowa odebʉ ẽ bara, ¿sama ũduseabʉ kʼareba yi wũãwũã jaradiaita?

⁹ Ʉ̃kʉrʉ mebẽrã wẽrãrabara ãyi wũãwũã Daizeze Bedʼea jaradiapanʉ, ʉ̃kʉrʉra kima neẽ baera mawũã ẽ bʉrʉ ãyi kimata Daizeze odebʉ ẽ baera, bʉta mawũã obʉbʉrʉ krĩcha orãra Jeowaba kʼarebayi. Bʉa zokʼaseabʉ Jeowaba iyi organizasioneba nekʼãrẽ bio diabʉ kʼãrẽta bʉ wũãwũã jaradiaita, bʉa kʼawua ẽ bʉrʉ sãwũã zokʼaita bʉa widiseabʉ yi wũãwũãra barabʉra ãyara sãwũã zokʼapanʉta ãyi mebẽrãbawaraʉba Jeowa ʉ̃rʉ kʼawuabʉdade * (Prov. 11:14). Adewara Jeowabara kʼarebaseabʉ bʉ wũãwũãʉ̃me bia bedʼeaita, bʉa Jeowaʼa widiseabʉ kʼarebamarẽã sãwũã bedʼeaita akʉza kʼãrẽta jaraita, mawũã bʉa kʼawuayi bʉ wũãwũãba kʼãrẽta krĩchabʉta akʉza sãwũã sentibʉta (Prov. 20:5). Bʉa widiseabʉ bʉ wũãwũãraʼa: «¿Bʉra sãwũã wã kolegiodera?, ¿saʉ̃ta audre zare bʉita?» Mawũã widibʉba kʼarebaseabʉ iyiʉ̃me bedʼea jʉ̃drʉita.

10. ¿Sãwũã kʼarebaseabʉ bʉ wũãwũãra Jeowa kʼawa bʼaita?

¹⁰ Jʉrʉra sãwũã bʉ wũãwũãra nebio jaradiaita Jeowa ʉ̃rʉ. Bedʼeata Jeowa ʉ̃rʉ jara ũrĩbira, iya bʉ kʼarea kʼãrẽ nebia ozebʉrʉta (Deut. 6:6, 7; Is. 63:7). Naʉ̃ba biode kʼarebayi bʉa bʉ deda Daizeze Bedʼea ʉ̃rʉ jaradiabe ẽ bʉrʉ bʉ wũãwũã bʉa kãgabʉ kĩrãkʼa. Cristina, dayirãba nãã bedʼeadaba naʉ̃ta jarabʉ: «Mʉ̃ara mʉ̃ wũãwũã Daizeze Bedʼea ʉ̃rʉ mʉ̃ deda jaradiabe ẽ baera maʉ̃ba mʉ̃yi wãsimae jaradiabʉ, daita ode wãbʉrʉ, mawũã ẽ bʉrʉ ewari erpanʉbʉrʉ jãbada wãita, mʉ̃a biode jaradiabʉ Jeowaba sãwũã nekʼãrẽ biʼia parãna ʉ̃rʉ. Maʉ̃ tẽã mʉ̃ wũãwũãra arabiabidade mʉ̃a ãya jarasi ãyikʉzaʉba krĩchamarẽã Daizeze Bedʼea kʼawuaita». Yibiabayi bia bedʼeaita Jeowa organizasion ʉ̃rʉ akʉza mebẽrã ʉ̃rʉ, imitia bedʼearãra zõrãrã kongregasionebema ʉ̃rʉ, bʉta ãyi ʉ̃rʉ ibia bedʼeabʉbʉrʉ naʉ̃ba kʼarebayi bʉ wũãwũãraba kʼareba nesidabʉrʉde zõrãrã jʉrʉita.

11. Santiago 3:18de jarabʉdebara, ¿kʼãrẽa yibia deda aduʼapanaita?

¹¹ Nekʼãrẽ jõma ora deda aduʼapanaita. Bʉ kimata akʉza bʉ wũãwũãra kãgabʉta ũdubira. Bʉ kima ibiade bedʼeara akʉza iyi wawiabʉta ũdubira adewara kʼarebara bʉ wũãwũãrabida abarika akʉdamarẽã, bʉa mawũã obʉbʉrʉ bʉa kʼarebaseabʉ bʉ deda aduʼapanaita akʉza kʼarebaseabʉ bʉ wũãwũãrabida kʼawuamarẽã Jeowa ʉ̃rʉ (akʉra Santiago 3:18). Akʉdaya mebẽã Jozsef yizata, iyira yi nãã edebari 130 ora diabari Rumaniane. Wũãwũã zakebasiedara iyita,  yi papaita akʉza yi mebẽrãitara zarebasi Daizeze ʉ̃rʉ kʼawuaita yi zeze kʼarea. Jozsefʼba jarabʉ: «Mʉ̃ papara nekʼãrẽ jõma obasi deda ibiade aduʼapanaita. Mʉ̃ zeze audre imitia bedʼeabasidera mʉ̃ papara audre eda ibia bedʼeabasi. Mʉ̃ papaba akʉbaside daita zareabʉta mʉ̃ zezeʼa wawia ũdubidaita iyara daibawara lebasi Efesios 6:1-3 bayeda aramaʉ̃ne mʉ̃ papabara daiʼa jara ũrĩbibasi dai zezeba iyi sode kʼãrẽ nebia erbʉta akʉza kʼãrẽa daibara wawia ũdubibarata. Mawũã iya kʼarebabasi deda aduʼapanaita».

12. 2 Timoteo 1:5de jarabʉbara, ¿sãwũã kʼarebasi Eunice yizaba Timoteora?

¹² (Akʉra 2 Timoteo 1:5). Eunicebara yiza biata diasi yi wũãwũã Timoteoʼara, iya jaradiasi wãrĩnu ĩjãbʉ ũdubira ũdubibarata daya obʉdeba (Sant. 2:26). Timoteobara kʼawuabasi yi papabara obʉta Jeowaba zokʼabʉra Jeowata kãgabʉ baera, adewara Timoteobara kʼawuabasi iya Jeowaba zokʼabʉta ora naʉ̃ba sobiabita yi papara. ¿Sãwũã kʼarebasi Timoteora Euneci yizabara? Pabloba jarasi Timoteobara yi papade kĩrãkʼa zare ĩjãbasita. Timoteobara bari ĩjã ẽ basi iya ũdusi yi papaba obʉta akʉza yi papade kĩrãkʼa okĩrãsi iyabida. Idi ewadera yi paparabara ãya obʉdeba kʼarebabʉ yi wũãwũãrãra Daizeze ode bʼaita (1 Ped. 3:1, 2). ¿Bʉa sãwũã ãyide kĩrãkʼa oseabʉ?

13. ¿Kʼãrẽa yi paparaitara Jeowa neũdukʼawua bʼaira audre yibia baibara?

¹³ Bʉitara audre yibia baibara Jeowa neũdukʼawua bʼaita (Deut. 6:5, 6). Yi papabara yi wũãwũãra bia akʉita ewari diabʉ, iyi plata jõma diabʉ, iyi zarea jõma diabʉ, mawũã yi wũãwũãraba nesidabʉ diaita. Mamina mawũã nekʼãrẽ mejãcha oibaramina ewari jʉrʉibara Daizezedebema oita, ewari jʉrʉibara Daizeze Jeowa yiwidʼita, Daizeze Bedeʼa dobaʉba kʼawuaita akʉza ãba yi jʉrebarima wãi nãã estudiaibara. Mawũã opanʉbʉrʉ audre Jeowa neũdukʼawuabayi adewara yiza biabayi yi mebẽrãita akʉza awuru ẽbẽraita.

14, 15. ¿Bʉara kʼãrẽta kʼawuaseabʉ Leanne, María akʉza João yizadebara?

¹⁴ Akʉdadrʉ ʉ̃kʉrʉ yiza warraranebemata, sãwũã yi papa yiza kʼarea Jeowa kãga zeda ʉ̃rʉ. Bari jaraita, Cristian kaʉ, yi trʉ̃ Leanne naʉ̃ta jarabʉ: «Mʉ̃ zeze dedabasidera daibara Daizeze Bedʼea ʉ̃rʉ kʼawuabe ẽ basi, mamina dai papara kʼẽrẽpabasi akʉza ãba yi jʉrebarima semanaza wãbasi. Daiba Daizeze ʉ̃rʉ bia kʼawuada ẽ basimina dai papa yizaba kʼarebasi daiba zarea ĩjã erbaita. Adewara kʼawuapanasi naʉ̃ta religion wãrĩnuarata».

¹⁵ María zezebara kãga ẽ basi iyita akʉza yi mebẽrãta ãba yi jʉrebarima wãmarẽã. Maríaba jarabʉ: «Mʉ̃ papara jipa zowaĩnĩgʉabʉ. Mʉ̃ wikakiruedara mʉ̃ara okĩrã ẽ basi ʉ̃kʉrʉ nekʼãrẽ Daizezedebemara perabasi baera ʉ̃kʉrʉ ẽbẽraba kʼãrẽta jarai kʼarea, mamina mʉ̃a akʉbasi mʉ̃ papabara nããra bʉebasita Jeowade oita. Naʉ̃ba kʼarebasi mʉ̃ra pera ẽ bʼaita wuabema ẽbẽraba jarai kʼarea. Kõbe João zezeba jarasi dedara jipa bedʼeada ẽ marẽã Daizeze ʉ̃rʉra. Joãoba jarabʉ: «Naʉ̃ta mʉ̃ soidu jʉ̃ẽsi, mʉ̃ papabara nekʼãrẽ jõma idubʉseabasi mʉ̃ zezeba jarabʉra, mamina Jeowa kãgabʉra idubʉ ẽ baibasi».

16. ¿Yi paparaba yiza bia diabʉbara sãwũã kʼarebabʉ ẽbẽrarã ãyi kʼawabʉra?

 ¹⁶ Bʉ yizaba kʼarebabʉ wuabemarata. Akʉdadrʉ sãwũã Eunice yizaba kʼarebasita Pablora. Pablobara jarasi Timoteobara zarea ĩjã erbʉta Eunicede kĩrãkʼa osi baera (2 Tim. 1:5). ¿Sãwũã kʼawuabasi Pablobara Euniceba ĩjã erbʉta? Pablo pʉwʉrʉ Listraeda wãside ũdukʼawuasibaibara Euniceta akʉza yi papa Loidata, mawũẽra Pabloba kʼarebasibaibara ãyi kristiana bʼaita (Hch. 14:4-18). Krĩchara naʉ̃ta, Pabloba Timoteo karta bʉdiabʉeside 15 poaga berabarida tẽã Pablobara kĩrãbesi Euniceba kʼãrẽaba ĩjãbadata, adewara iya naʉ̃ yizata zokʼasi dayirãbida Eunicede kĩrãkʼa oseapanʉta jaradiaita. Eunice yizabara biode kʼarebasi Pablora adewara kʼarebasibaibara wuabema kristianora iyi ewaridebadasida. Bʉa dapʉebʉbʉrʉ bʉ wũãwũãta yi zeze neẽã mawũa ẽ bʉrʉ bʉ kimata Daizeze odebʉ ẽ bʉrʉ, wãrĩnu ĩjãra bʉ yizaba kʼarebaita ẽbẽrãra bʉ kʼawuabʉta.

17. ¿Kʼãrẽta oseabʉ bʉ zarea obʉmina wũãwũã jaradiaita iya ũrĩkĩrã ẽ bʉrʉ?

¹⁷ Bʉ wũãwũãba bʉa jarabʉta ũrĩ ẽ bʉrʉ kĩrãbera wũãwũã dapʉeira nesidabʉta ewarita. Potode ũdubibʉ kĩrãkʼa ne u waribʉ ʉ̃rʉ daya ne ubʉrʉdera krĩchabʉ maʉ̃ ne ura waripe akʉza neta diaita. Bʉa maʉ̃ wari kʼawuaita kʼawua ẽ mina bʉa akʉbʉ akʉza bania ewariza diabʉ iyi bia warimarẽã (Mar. 4:26-29). Abarika yi papaba krĩchaseabʉ yi wũãwũã iya nekʼãrẽ jõma jaradiabʉra iyi arabiachubidadera,  ¿iya ũrĩta mawũã ẽ bʉrʉ ũrĩ ẽ baika? Bʉara kʼawua krĩcha be ẽ bʉ wũãwũãrabarira, mamina bʉta zarea obʉbʉrʉ bʉ wũãwũãra nebia jaradiaita naʉ̃ba kʼarebayi ãyisida audre Jeowa neũdukʼawua bʼaita (Prov. 22:6).

18. ¿Sãwũã kʼarebaseabʉ Jeowabara bʉ warrarãra iyi neũdukʼawua bamarẽã?

¹⁸ Dããraba Jeowaba kʼareba zebʉrʉta warrarãra iyi neũdukʼawua bamarẽã (Sal. 22:9, 10). Adewara Jeowabara kʼarebaseabʉ mara wũãwũãrãra Jeowa ode kʼẽrẽpapanamarẽã aya kãgapanʉbʉrʉ (1 Cor. 3:6, 7). Ãyi Jeowa ode bakĩrã ẽ bʉsida, Jeowabara kãgade akʉyi (Sal. 11:4). Akʉza ãya wiña Jeowa ʉ̃rʉ kʼawuakĩrãpanʉnera aramaʉ̃ta Jeowaba kʼarebayi (Hech. 13:48; 2 Crón. 16:9). Adewara Jeowabara kʼarebayi bʉa jaramarẽã bʉ warraraba ũrĩkĩrabʉta (Prov. 15:23). Mawũã ẽ bʉrʉ Jeowabara zokʼaseabʉ mebẽrã kongregasionebemata ãyita kʼarebamarẽã, ãyi arabiabidade Jeowabara jẽda kĩrãbebiseabʉ maraba nebia jaradiadata (Juan 14:26). Bʉ wũãwũã jaradiabara bʉa obʉdeba akʉza bʉa jarabʉdeba, mawũã opanʉbʉrʉ Jeowaba nebiata diayi.

19. ¿Bʉara sãwũã kʼawuabʉ Jeowaba bʉra kãgabʉta?

¹⁹ Jeowabara bʉra kãgabʉ ẽ bʉ wũãwũãraba obʉ kʼarea, awuarabʉrʉ bʉa iyita kãgabʉ baera bʉta kãgabʉ. Bʉa bʉ wũãwũãta dobaʉba dapʉebʉbʉrʉ Jeowara bʉ wũãwũãita yi zeze kĩrãkʼa bayi akʉza bʉta akʉyi (Sal. 68:5). Bʉara kʼawua jarabe ẽ bʉ wũãwũã Daizeze ode bʼaita mawũã ẽ bʉrʉ ba ẽãta, mamina bʉta zarea ora Jeowa ʉ̃rʉ jaradiaita, Jeowabara maʉ̃ kʼarea bʉra mejãcha kãgayi.