1-2. (a) Sama a be Eunise? Saide a be musu taanga gi en fu yeepi Timotiyesi fu dini Yehofa? (b) San a fowtow a fesise fu A Wakititolen e leli i?

 BEIBEL nai taki fu a dei di Timotiyesi dopu, ma u sabi taki ná pikin poolo en mma Eunise be musu poolo a dei de (Odo 23:25). Pakisei fa a be sa e fii di a si Timotiyesi taampu aini a wataa. En anga Lowis, a gaanmma fu Timotiyesi taampu na a wan peesi. Eunise e holi kalaki te a si fa den e saka Timotiyesi go aini a wataa. Te den opo Timotiyesi puu aini a wataa, ai lafu. En mma e poolo te neen wataa e lon neen ain, bika winsi fa a be taanga gi en, toku a be poi yeepi a boi fi en fu lobi Yehofa anga en Manpikin Yesesi. Sowtu sani be sa meke a taanga gi a mma ya fu kiya a boi fi en a waaleiti?

² Timotiyesi dda á be e dini Yehofa. En dda a be fu Giikikondee, ma en mma anga en gaanmma a be Dyu (Toli 16:1). A pisiten di Eunise anga Lowis be teke a Kelesten biibi, kande Timotiyesi be abi wan sani fu 13 te go miti 19 yali. Ma en dda á be teke a biibi ya. San Timotiyesi be o du? A be bigi kaba, neen meke enseefi be sa luku san a be wani du. A be o teke a biibi fi en dda? A be o du den sani di a be leli fu a Dyu biibi senten di a be nyoni? Efuso a be o toon wan bakaman fu Yesesi?

3. Enke fa Odo 1:8, 9 e soi, da fa Yehofa e fii te ai si fa den mma e meke moiti fu yeepi den pikin fu den fu dini en?

 ³ Leti enke Eunise, Kelesten mma aini a ten ya lobi den osufamii. Neen meke den wani yeepi den pikin fu den fu toon Yehofa mati. Yehofa e piisii anga a moiti di den e meke. (Leisi Odo 1:8, 9.) Ai yeepi mma aini a ten ya fu kiya den pikin fu den enke fa a wani tu. A omen mma a yeepi kaba fu du a sani ya.

4. Saide ai taanga gi son mma aini a ten ya fu leli den pikin fu den sani fu Yehofa?

⁴ Son yuu den mma e akisi denseefi efu den pikin fu den o dini Yehofa leti enke Timotiyesi te den kon bigi. Mma anga dda sabi taki a goontapu fu Saatan e meke a taanga gi den pikin fu dini Yehofa enke fa a wani (1 Peit. 5:8). Boiti dati, son dda gwe fika den osufamii. Taawan nai dini Yehofa. Neen meke son leisi a den mma wawan mu kiya den pikin a waaleiti. Wan sisa den e kai Christine b taki: ‘A man fu mi a be wan bun dda di be lobi en osufamii. Ma a á be wani mi leli den pikin sani fu Yehofa. A omen leisi mi kee fu a sani ya, bika mi be e akisi miseefi efu den pikin fu mi o dini Yehofa te den kon bigi.’

5. San wi o luku aini a artikel ya?

⁵ Efi yu a wan mma di e dini Yehofa, da leti enke Eunise i poi yeepi den pikin fi i fu lobi Yehofa. Aini a artikel ya, wi o luku fa mma sa waka a Eunise baka. Wi o luku fa den sani di den e taki, anga den sani di den e du sa yeepi den pikin fu den. Wi o si tu fa Yehofa e yeepi den.

6. Enke fa 2 Timotiyesi 3:14, 15 e soi, da san yeepi Timotiyesi fu toon wan Kelesten?

⁶ Di Timotiyesi be nyoni, en mma be e meke moiti fu leli en den sani di sikiifi aini ‘den santa buku’. Eunise á be sabi sani fu Yesesi, neen meke a san a be leli aini a Dyu biibi a be e leli Timotiyesi. A den sani ya be o yeepi Timotiyesi fu toon wan Kelesten bakaten. San Timotiyesi be o du? Neenseefi be mu luku efu a be wani toon wan Kelesten. Ma a moiti di en mma be meke á be de fu soso, bika Timotiyesi toon wan Kelesten bakaten. (Leisi 2 Timotiyesi 3:14, 15.) Eunise be musu poolo di Timotiyesi teke den sani di a be leli en. A nen fu Eunise wani taki ‘mi wini en’. A du san a nen fi en wani taki. A ‘wini’ den tesi di be e meke a taanga gi en fu yeepi Timotiyesi fu dini Yehofa.

7. Fa Eunise be mu yeepi Timotiyesi baka di a dopu?

⁷ A wan pelensipali sani Timotiyesi du di a dopu. Ma toku Eunise be e booko en ede ete san Timotiyesi be o du anga en libi. A be o paa anga sama di be o meke a gwe fika Yehofa? A be o koboloiki en ten anga en kaakiti fu feti a gudu baka? A be o go a hei-sikoo na Ateine? Den sani di a be o leli anda, be sa meke a bigin biibi den sani di den koniman fu a ten de be e taki. Eunise á be poi taigi Timotiyesi san a mu du, ma toku a be sa yeepi en. Fa a be sa du a sani ya? A te a be o tan yeepi en fu lobi Yehofa anga en hii ati. A be mu tan  leli en fu teke den sani di Yehofa anga Yesesi be du gi den fu bigi. A ná den sama di toowpaa á de a waaleiti wawan ai taanga gi fu yeepi den pikin fu den fu dini Yehofa. Mma anga dda di e dini Yehofa seefi a sani ya e taanga gi. San den sa leli fu Eunise?

8. Fa wan mma sa yeepi en man fu kiya den pikin fu den anga den leli fu Yehofa?

⁸ Sutudeli Beibel anga den pikin fi i. Efu a man fi yu e dini Yehofa, Yehofa wani i yeepi en fu kiya den pikin anga den leli fu Beibel. Wan fasi fa i sa du a sani ya, a te yu e meke moiti fu e holibaka gi a Osufamii Anbegi. I mu e taki bun fu a Osufamii Anbegi tu. Luku san i sa du fu meke ala sama piisii te wi e sutudeli makandaa. Kande i sa yeepi i man fu seeka wan sani di den pikin o lobi. Efi i si taki wan fu den pikin bigi sai fu sutudeli en wawan, kande wan fu u sa sutudeli anga en aini a ‘I sa piisii fu teego’ buku.

9. San sa yeepi wan mma fu kiya den pikin fi en anga den leli fu Yehofa winsi en man á de a waaleiti?

⁹ Son yuu na a mma mu sutudeli anga den pikin fi en, bika neen wawan de, efuso kande en man nai dini Yehofa. Efu wan fu den sani ya e miti i, yu á mu booko yu ede tumisi. Yehofa o yeepi i. Wooko anga den sani di a olikanisâsi fi en gi u fu sutudeli anga den pikin fi i. I sa akisi mma anga dda di abi ondoofeni fa den e wooko anga den sani ya na a Osufamii Anbegi c (Odo 11:14). Begi Yehofa, da yu akisi en fu a yeepi i fu sabi fa i mu taki anga den pikin fi i fu sabi san den e denki anga fa den e fii (Odo 20:5). I sa akisi a pikin fi i taki: ‘San a den sani di e miti yu a sikoo?’ A sani ya sa meke a pikin taigi i san ai fii anga fa ai denki.

10. San a wantu taa fasi fa i sa leli den pikin fi i sani fu Yehofa?

¹⁰ Suku okasi fu leli den pikin fi i sani fu Yehofa. Na ala yuu i mu e taki fu Yehofa te yu e gi toli anga den pikin fi i. I mu e taigi den fa ai yeepi i, moomoo efi yu á poi sutudeli anga den pikin fi yu a osu (Deit. 6:6, 7; Yes. 63:7). Christine, a sisa di u be taki fi en na a bigin taki: ‘A ná ala yuu mi be e poi leli den pikin fu mi sani fu Yehofa. Neen meke mi be e koboloiki ala okasi di mi fende fu taki fu Yehofa. Mi be e taki anga den te u be e go koi. Son leisi te u be teke paliboto fu go luku den sani di Yehofa meke, mi be e koboloiki a okasi ya fu leli den sani di o yeepi den fu toon Yehofa mati. Di den pikin fu mi be kon moo bigi, mi be e gi den taanga-sikin fu sutudeli anga denseefi.’ Boiti taki yu e du den sani ya, i mu e taki bun fu a olikanisâsi anga den baala anga sisa tu. Yu á mu e kuutu den owluman. A fasi fa yu e taki fu den, sa yeepi den pikin fi i fu go taki anga den te den abi yeepi fanowdu.

11. Enke fa Yakowbesi 3:18 e soi, da saide den mma mu meke moiti fu sani go bun aini a osufamii?

¹¹ Yeepi yu osufamii fu libi na a wan. I mu e taigi i man anga den pikin fi yu ala yuu taki i lobi den. I mu e taki switi anga i man, i mu e soi taki yu e lesipeki  en. Yeepi den pikin fi i fu du a sani ya tu. Efi yu e du a sani ya, sani o go bun aini a osufamii. A sani ya o meke a moo makiliki gi i fu leli den pikin sani fu Yehofa. (Leisi Yakowbesi 3:18.) Luku a toli fu wan baala den e kai Jozsef. A baala ya a wan spesuutu pionili aini Romeiniya. Di a be yonkuu, en dda be e du sani fu tapu den fu dini Yehofa. Jozsef taki: ‘Mma be e meke moiti fu sani go bun aini a osufamii. Te nda be e taki goofu anga en, a be e taki switi anga en. Te a be si taki ai taanga gi u fu lesipeki nda, a be e leisi Efeisesama 6:1-3 anga u. Baka dati a be e taigi u den bun manii fu nda. A sani ya be e meke sani go bun aini a osufamii.’

12. Enke fa 2 Timotiyesi 1:5 e soi, da fa den sani di Eunise be e du be yeepi Timotiyesi?

¹² Leisi 2 Timotiyesi 1:5. Timotiyesi be sa waka a Eunise baka. Eunise be musu leli Timotiyesi taki a den sani di yu e du e soi efi yu abi biibi tuutuu (Yak. 2:26). Timotiyesi be musu e si den sani di en mma be e du fu di a be lobi Yehofa. A be e si tu taki den sani ya be e meke en mma piisii. Fa den sani di Eunise be e du be yeepi Timotiyesi? Apostel Pawlesi be taki Timotiyesi biibi be taanga enke en mma. A ná sosokaali Timotiyesi biibi be taanga so, a be e si den sani di en mma be e du. Neen meke a be waka neen baka. A letiso omen mma aini a ten ya yeepi den osufamii fu kon dini Yehofa ‘sondee fu den taigi den wan sani’ (1 Peit. 3:1, 2). Fa iseefi sa du a sani ya?

13. Saide wan mma mu e meke moiti fi en anga Yehofa toon moo bun mati?

¹³ Soi taki ai bigi gi i taki yu anga Yehofa a mati (Deit. 6:5, 6). Te yu abi pikin, a omen sani i nai poi du gi iseefi. Son yuu yu e lasi ten, siibi, anga moni fu solugu den pikin fi i. Ma den sani ya á mu pelensipali gi i te, da i nai du den sani di i mu du fi yu anga Yehofa toon moo bun mati. I mu e teke ten fu begi, fu sutudeli anga iseefi, anga fu go a den komakandaa. Te yu e du den sani ya, yu anga Yehofa o toon moo bun mati. Boiti dati, den pikin fi yu o poi waka ai baka tu.

14-15. San a toli fu Leanne, Maria, anga João leli i?

¹⁴ Luku a toli fu wantu yonkuuwan di kon dini Yehofa fu di den waka a den mma baka. Leanne, a meisyo fu Christine taki: ‘Wi á be e poi sutudeli te nda be de a osu, ma noiti mma be e misi komakandaa. Winsi fa wi á be sabi omen sani fu Beibel, toku a fasi fa mma be e tyai enseefi be yeepi u fu u biibi kon taanga. U be sabi taki a den Yehofa Kotoigi abi a tuu biibi, winsi wi á be e go a komakandaa.’

¹⁵ Son yuu Maria dda be e sitaafu den te den be go a komakandaa. Maria taki: ‘Ná pikin deki-ati mma abi. Di mi be nyoni mi be e feele fu du son sani, bika mi be e booko mi ede anga san sama o taki. Ma di mi si fa mma be abi deki-ati anga fa a be e poti Yehofa a fesi aini en libi, a sani ya yeepi mi fu mi á feele sama moo.’ João dda á be wani den taki fu Yehofa efuso fu Beibel a osu. A taki: ‘A sani di moo yeepi mi, a di mi  si taki mma be de kabakaba fu du ala sani fu meke nda piisii, solanga a ná be wan sani di be sa poli en anga Yehofa.’

16. Fa a fasi fa wan mma e tyai enseefi sa gi taawan taanga-sikin?

¹⁶ Den mma, gaantangi holi a pakisei taki taawan e luku san wi e du. Saide u sa taki a sani ya? Pakisei fa den sani di Eunise be e du be abi kaakiti a Pawlesi tapu. A be fusutan taki a Eunise be yeepi Timotiyesi fi en biibi taanga, bika neen fosi be soi a biibi de (2 Tim. 1:5). On ten Pawlesi be si taki Eunise biibi be taanga? A gei enke a di a be go enke zendeling a Listra fu a fosi leisi. Na ape a miti Lowis anga Eunise, neen a yeepi den fu toon Kelesten (Toli 14:4-18). Pakisei a sani ya. Di Pawlesi be sikiifi wan biifi gi Timotiyesi wan sani fu 15 yali baka dati, a be sabi ete fa Eunise biibi be taanga. A be taigi Timotiyesi taki a be mu waka neen mma baka. A fasi fa Eunise be e tyai enseefi be gi Pawlesi anga den taa Kelesten fu a ten de taanga-sikin. Efu a yu wawan mu kiya den pikin fi yu a waaleiti, holi a pakisei taki den sani di yu e du sa gi taa sama taanga-sikin.

17. San i mu du efi i si taki i pikin á wani dini Yehofa winsi fa yu e meke moiti fu yeepi en?

¹⁷ San i mu du efi i si taki i pikin nai wooko anga den sani di yu e leli en? Holi a pakisei taki ai teke ten fu leli wan pikin. Enke fa yu e si na a fowtow, da te  i paandi wan sii, son yuu yu e akisi iseefi efu a sii ya o goo. Yu e akisi iseefi efu a o meke nyanyan bakaten tu. Winsi fa yu á sabi efu a sii o goo, toku yu e nati en ala yuu (Malik. 4:26-29). A letiso a de anga wan mma di e leli wan pikin. Son yuu a mma e akisi enseefi efu a pikin o dini Yehofa te a kon bigi. A mma á poi teke a bosoloiti ya gi en, na a pikin seefi mu luku san a o du. Ma efu a mma e meke moiti ala yuu fu leli en, ai gi en a okasi fu kon toon Yehofa mati.​—Odo 22:6.

18. Fa Yehofa sa yeepi den pikin fi i fu toon en mati?

¹⁸ Aini a ten di pasa, a omen yonkuuwan Yehofa yeepi kaba fu kon dini en (Ps. 22:9, 10). Efu den pikin fi i wani dini en, a sa yeepi den tu (1 Kor. 3:6, 7). Winsi den pikin fi yu á wani dini Yehofa nownow, toku a o tan lobi den (Ps. 11:4). Efu den bigin du sani di e soi taki ‘den ati bun’, Yehofa de kabakaba fu yeepi den fu toon en mati (Toli 13:48; 2 Kolon. 16:9). A poi yeepi i fu taki sani di o doo den pikin fi yu ati tu (Odo 15:23). A sa meke wan baala efuso wan sisa aini a kemeente poti pakisei na a pikin fi i fu yeepi en. Winsi den pikin fi i nai dini Yehofa te den kon bigi, a sa meke den membee den sani di i be leli den di den be nyoni (Yoh. 14:26). Te yu e du efuso taki sani di sa yeepi den pikin fi i fu dini Yehofa, a o belesi i.

19. Saide i sa biibi taki Yehofa e piisii anga i?

¹⁹ Winsi den pikin fi yu o dini Yehofa efu den ná o dini en, toku Yehofa o lobi yu ete. A lobi i fu di i lobi en. Efu a yu wawan de, Yehofa e paamisi i taki a o de wan Dda gi den pikin fi i. A paamisi i taki a o kibii i tu (Ps. 68:5). Yu á poi dwengi den pikin fi i fu dini Yehofa. Ma efu yu e fitoow en, da yu e du san i poi fu yeepi den pikin fi i, Yehofa o piisii anga i.