1-2. (a) Woana nye Eunice, na dɛ nã no, ebɛn nsɛndzendzen na ohyiae? (b) Kã mfonyin a ɔwɔ Ɔweɔn-Aban yi enyim no ho asɛm.

 BIBLE no nnkã Timothy n’enuma ho asɛm dze, naaso mbrɛ ne maame Eunice n’enyi sii gyee dɛm da no, yebotum etwa ho mfonyin wɔ hɛn adwen mu. (Mbɛ. 23:25) Ɔwodze, hwɛ enyigye ara a nna ahyɛ Eunice n’akoma mu mã ber a Timothy kegyinaa nsu no mu no. Timothy ne nana Lois esuo Eunice no mu na wɔreserew. Wɔdze Timothy enu nsu no mu na Eunice egu ahom. Afei dze, Timothy epue efi nsu no mu na n’enyim ayɛ sereserew. Ne maame Eunice so, n’enyi agye araa ma orusu. Ɔwɔ mu dɛ nna ɔnnda famu dɛ Eunice bɛkyerɛkyerɛ ne ba Timothy ma ɔaabɔdɔ Jehovah na Jesus Christ dze, naaso oetum aboa no ma ɔayɛ dɛm. Ebɛn nsɛndzendzen na ɔhyiae ana orutum aboa ne ba no?

² Ebusua a wɔtsetsee Timothy wɔ mu no, nna hɔn nyina nnyi ɔsom kor mu. Nna ne papa yɛ Greeknyi na ne maame nye ne nana so yɛ Jewfo. (Andw. 16:1) Ekyir yi, Eunice na Lois bɛyɛɛ Christianfo. Obotum aba dɛ dɛm aber no nna Timothy yɛ aberantsɛba. Naaso, ne papa ammbɛyɛ Christiannyi. Ntsi, nna ebɛn ɔsom na Timothy so bɛpaw? Obotum aba dɛ dɛm aber no nna oenyin kakra ma ɔno ntsi nankasa botum esi ne gyinae. Ana ɔnye ne papa bɔsom? Ana ɔbɔkɔ do ara edzi Jewfo nkyerɛkyerɛ a wɔdze kyerɛkyerɛɛ no wɔ no mbofrase no ekyir? Anaadɛ ɔbɛba abɛyɛ Christiannyi?

3. Dɛ mbrɛ Mbɛbusɛm 1:8, 9 kyerɛ no, Jehovah bu mbɔdzen a nanom bɔ dɛ wɔbɛtsetse hɔn mba ma wɔaabɛyɛ n’anyɛnkofo no dɛn?

³ Christianfo nanom a wɔwɔ hɔ ndɛ so dɔ hɔn mbusua. Dza ohia hɔn paa nye dɛ wɔbɔboa hɔn mba ma wɔnye Jehovah  eenya ebusuabɔ a no mu yɛ dzen. Na Nyankopɔn n’enyi sɔ hɔn mbɔdzembɔ no. (Kenkan Mbɛbusɛm 1:8, 9.) Jehovah aboa nanom pii ma woetum atsetse hɔn mba ma wɔabɛgye nokwar no.

4. Ebɛn nsɛndzendzen na nanom hyia no ndɛ?

⁴ Mpɛn pii no, nã bi botum adwendwen ho dɛ ana ne ba bɛba abɔsom Jehovah dɛ mbrɛ Timothy yɛe no. Iyi nnyɛ hɛn nwanwa, osiandɛ awofo nyim ɔhaw ahorow a hɔn mba hyia wɔ Satan no wiadze bɔn yi mu. (1 Pet. 5:8) Ɔhaw fofor so nye dɛ, nanom pii wɔ hɔ a, wɔyɛ baatankor anaa hɔn kunnom nnsom Jehovah ntsi hɔnankasa na ɔsɛ dɛ wɔkyerɛkyerɛ hɔn mba no. Dɛ nhwɛdo no, hɛn akyerɛbaa bi a wɔfrɛ no Christine * kãa dɛ: “Mo kun dze, ɔyɛ egya pa, na onndzi n’ebusua ho agor koraa. Naaso, nna ɔmmpɛ koraa dɛ mebɛtsetse hɛn mba no ma wɔaabɛyɛ Jehovah Adasefo. Iyi maa musuu mfe pii. Nna munnhu mbrɛ ɔbɛyɛ a me mba no botum abɔsom Jehovah.”

5. Ebɛnadze na yebosusu ho wɔ adzesua yi mu?

⁵ Sɛ eyɛ Christiannyi ɔbaa a eretsetse mba a, dɛ mbrɛ Eunice tumii boaa Timothy ma ɔbɔsoom Jehovah no, woara so botum ayɛ dɛm. Wɔ adzesua yi mu no, yɛbɔhwɛ kwan a ibotum afa do esũasua Eunice na eetum dze wo kasaa nye wo ndzeyɛɛ ayɛ nhwɛdo aber a erekyerɛkyerɛ wo mba no. Afei so, yɛbɔhwɛ dza Jehovah bɛyɛ dze aboa wo aber a ereyɛ dɛm no.

6. Dɛ mbrɛ 2 Timothy 3:14, 15 kyerɛ no, ebɛnadze na ɔboaa Timothy ma ɔbɛyɛɛ Christiannyi?

⁶ Aber a nna Timothy yɛ abofra no, ne maame yɛɛ dza obotum biara dɛ ɔdze “kyerɛw krɔnkrɔn no” no mu nsɛm a nna wɔdze akyerɛkyerɛ hɔn wɔ Jewfo som mu no bɛkyerɛkyerɛ no. Nokwasɛm nye dɛ, nna Eunice nnyi Christiansom ho nyimdzee pii, osiandɛ nna onnyim Jesus Christ ho hwee. Naaso nna dza Timothy esũa efi Kyerɛwnsɛm no mu no botum aboa no ma ɔaabɛyɛ Christiannyi. Ana ɔbɛba abɛyɛ Christiannyi anaa? Dɛ aberantsɛ no, nna Timothy wɔ ho kwan dɛ osi gyinae dɛ ɔbɛba abɛyɛ Christiannyi anaa ɔrennyɛ. Ɔda edzi kofee dɛ, Timothy ne maame no mboa ka ho paa na Timothy bɛgyee nokwasɛm a ɔfa Jesus ho no too mu. (Kenkan 2 Timothy 3:14, 15.) Ɔwɔ mu dɛ nna ɔyɛ dzen dɛ Eunice bɛkyerɛkyerɛ ne ba no Jehovah ho adze dze, naaso aber a otumii yɛɛ dɛm no, n’enyi gyee paa! Eunice ne dzin no fi kasafua bi a ɔkyerɛ “konyimdzi” mu. Nokwasɛm nye dɛ, dza Eunice yɛe no kyerɛ dɛ ne dzin no fata no.

7. Nna ebɛnadze na Eunice botum ayɛ dze aboa Timothy wɔ n’enuma ekyir?

⁷ Enuma ho hia paa, ntsi aber a wonumaa Timothy no, nna ɔkyerɛ dɛ oesi gyinae tsitsir paa wɔ n’asetsena mu. Naaso, nna Eunice ne haw no tun nntwae. Bi a nna ɔrodwen ho dɛ: Ebɛnadze na Timothy dze n’asetsena bɛyɛ? Ana ɔdze noho bɔbɔ anyɛnkofo a hɔn suban nnyɛ? Ana ɔbɔkɔ skuul wɔ Athens na akyerɛkyerɛfo a wɔkyerɛkyerɛ nyimpa atsetsesɛm wɔ hɔ no, ɔaagye hɔn nkyerɛkyerɛ ato mu? Ana ɔdze ne mbabun ber nye n’ahoɔdzen bɛyɛ edwuma, mbrɛ ɔbɛyɛ a obedzi yie wɔ asetsena mu? Ɔwɔ mu dɛ nna Eunice nnkotum esisi gyinae ama Timothy dze, naaso nna obotum aboa no ma oeesisi gyinae pa. Nna ɔbɛyɛ no dɛn? Nna ɔsɛ dɛ ɔkɔ do ara boa Timothy ma onya ɔdɔ kɛse ama Jehovah. Afei so, nna ɔsɛ dɛ ɔboa no ma onya enyisɔ kɛse ma dza Jehovah na Jesus ayɛ no. Ɔnnyɛ awofo a hɔn ahokafo nnsom Jehovah no nkotsee na ɔyɛ dzen ma hɔn dɛ wɔbɛtsetse hɔn mba ma wɔaabɔsom Jehovah. Sɛ awofo beenu no nyina yɛ Jehovah n’asomfo mpo a, ɔtɔfabi a, otum yɛ dzen ma hɔn dɛ wɔbɛkyerɛkyerɛ  hɔn mba no ma wɔaabɛyɛ Jehovah n’asomfo anokwafo. Ebɛnadze na awofo botum esũa efi Eunice no nhwɛdo no mu?

8. Nanom besi dɛn aboa hɔn kunnom a wɔyɛ Christianfo no ma wɔaakyerɛkyerɛ hɔn mba Jehovah ho adze?

⁸ Enye wo mba nsũa Bible no. Enuanom mbaa, sɛ hom kunnom wɔ nokwar no mu mpo a, Jehovah hwɛ kwan dɛ hom bɔboa hɔn ma wɔaakyerɛkyerɛ hom mba no Jehovah ho adze. Kwan kor a hom botum afa do ayɛ dɛm nye dɛ hom bedzi hom Ebusua Som ho nhyehyɛɛ no do dabaa. Ɔsɛ dɛ hom kã mfaso a ɔwɔ Ebusua Som mu no ho asɛm kyerɛ hom mba. Afei so, hom nhwehwɛ akwan ahorow a hom botum afa do aboa ma Ebusua Som no aayɛ enyigye na aahyɛ nkuran. Bi a hom botum aboa hom kunnom ma wɔaapaw Bible mu dwumadzi ahorow bi a hom botum dze ayɛ Ebusua som. Nkyii so, sɛ mbofra no mu binom enyin a hom botum nye hɔn esũa Ibotum Enya Enyigye Daa! buukuu no a, hom botum aboa hom kunnom ma wɔnye hɔn esũa.

9. Nã a no kun nnyɛ Ɔdasefo no, henfa na obotum enya mboa?

⁹ Nanom no bi a wɔ hɔ a, osiandɛ wɔyɛ baatankor anaa hɔn kunnom nnyɛ Adasefo ntsi, hɔn na wɔnye hɔn mba no sũa Bible no. Sɛ dɛm na ɔtse wɔ w’afamu a, mma w’akoma nntu koraa. Jehovah bɔboa wo. Fa edwindadze ahorow a Jehovah nam n’ahyehyɛdze no do dze ama hɛn no dzi dwuma fa boa wo mba. Ibotum ebisa awofo binom a hɔnho akokwaa no ma wɔaaboa wo ma eehu akwan a ibotum afa do dze dɛm edwindadze ahorow no edzi wɔ w’ebusua som ase. * (Mbɛ. 11:14) Afei so, ibotum abɔ Jehovah mpaa na aserɛ no dɛ ɔmboa wo ma fa nsɛmbisa a ɔfata dzi dwuma ama eehu wo mba no hɔn nsusui nye hɔn akoma mu nsɛm. (Mbɛ. 20:5) Ibotum ebisa wo ba no asɛm bi dɛ, ‘Ebɛn ɔhaw kɛse na ihyia no wɔ skuul?’ Asɛmbisa a ɔtse dɛm no botum ebue kwan ma enye no aabɔ nkɔmbɔ akɔ ekyir.

10. Ebɛnadze bio na ibotum ayɛ dze akyerɛkyerɛ wo mba Jehovah ho adze?

¹⁰ Hwehwɛ akwan ahorow a ibotum afa do akyerɛkyerɛ wo mba Jehovah ho adze. Kã Jehovah ho asɛm kyerɛ wo mba. Afei ndzɛmba pa a ɔayɛ ama wo no so, kã ho asɛm kyerɛ hɔn. (Deut. 6:6, 7; Isa. 63:7) Iyi ho hia papaapa, tsitsir aber a ɔyɛ dzen ma wo dɛ ibenya mber nye wo mba no esũa adze dabaa no. Christine a yeedzi kan akã noho asɛm no kãa dɛ: “Nna ɔtɔfabi a, ɔyɛ dzen dɛ mibenya mber nye me mba no esũa adze. Ntsi nna ho kwan biara a mibenya no, medze kã Jehovah ho asɛm kyerɛ hɔn. Nna ɔyɛ a yetu mpasar anaa yɛdze hɛmba kɛfa nsu do. Yɛrokɔ nyina nna yɛrekã Bible mu asɛm nye Jehovah n’abɔdze a ɔyɛ nwanwa no ho asɛm. Aber a me mba no nyinii no, mehyɛɛ hɔn nkuran dɛ wɔmbɔ mbɔdzen dɛ hɔnankasa bosũa adze.” Dza ɔka ho bio so nye dɛ ebɛkã Jehovah n’ahyehyɛdze nye enuanom ho nsɛmpa. Ɔyɛ a mma nnkasa nntsia asafo mu mpanyimfo no so. Sɛ ekã hɔnho nsɛmbɔn a, ɔbɛyɛ dzen ama wo mba no dɛ wɔbɔkɔ hɔn hɔ akɔhwehwɛ mboa. Naaso sɛ ekã hɔnho nsɛmpa a, wo mba no enyi bɛgye ho mpo dɛ wɔbɔkɔ hɔn nkyɛn ber a wohia mboa no.

11. Dɛ mbrɛ James 3:18 kyerɛ no, ebɛnadze ntsi na ɔsɛ dɛ yɛma asomdwee kɔ do tsena hɛn fie?

¹¹ Ma asomdwee nkɔ do ntsena wo fie. Aber nyina, ma wo kun na wo mba nhu dɛ edɔ hɔn. Enye wo kun nkasa wɔ obu mu, na boa wo mba so ma wɔnyɛ dɛmara. Sɛ eyɛ dɛm a, ɔbɛma etum akyerɛkyerɛ wo mba no Jehovah ho adze, na ɔrennyɛ dzen mma hɔn so dɛ wobetsie wo. (Kenkan James 3:18.) Jozsef yɛ  ɔkwampaaefo tsitsir wɔ Romania. Ma yensusu n’asɛm no ho nhwɛ. Osuar no, nna ne papa mmpɛ koraa dɛ ɔno na ne maame nye no nuanom no bɔsom Jehovah. Iyi ntsi ɔmaa asetsena mu yɛɛ dzen maa hɔn. Jozsef kãa dɛ: “Nna me maame bɔ mbɔdzen dɛ ɔbɛma asomdwee akɔ do atsena hɛn fie. Aber biara a nna me papa bɛyɛ hɛn heihei no, nna me maame bɔ mbɔdzen nye no kasa bɔkɔɔ. Sɛ nna ohu dɛ yɛreyɛ ndzɛmba bi a ɔkyerɛ dɛ yemmbu hɛn papa a, nna ɔnye hɛn susu Ephesusfo 6:1-3 no ho. Owie a, nna ɔakã suban pa a hɛn papa wɔ no ho asɛm kyerɛ hɛn na ɔama yehu siantsir a ɔwɔ dɛ yebu no. Nna dɛm a ɔyɛ no ma asomdwee kɔ do ara tsena hɛn fie.”

12. Dɛ mbrɛ 2 Timothy 1:5 ma yehu no, ebɛn kwan do na Eunice dze ne ndzeyɛɛ yɛɛ nhwɛdo maa Timothy?

¹² Kenkan 2 Timothy 1:5. Eunice dze ne ndzeyɛɛ yɛɛ nhwɛdo pa maa Timothy. Ɔbɛyɛ dɛ ɔboaa Timothy ma ohun dɛ ɔsɛ dɛ ɔdze ne ndzeyɛɛ kyerɛ dɛ ɔwɔ gyedzi mapa. (Jas. 2:26) Ekyingye biara nnyi ho dɛ Timothy hun dɛ ne maame ne ndzeyɛɛ ma ɔda edzi dɛ ɔdɔ Jehovah paa. Ɔsomafo Paul kãa dɛ nna gyedzi a Timothy wɔ no tse dɛ ne maame dze no, na iyi nnyɛ nwanwa. Timothy hwɛɛ ne maame no nhwɛdo no na osũae. Dɛmara na ndɛ so nanom pii etum dze hɔn ndzeyɛɛ aboa hɔn ebusuafo binom ma wɔabɔsom Jehovah. (1 Pet. 3:1, 2) Sɛ eyɛ nã a, woara so botum dze wo ndzeyɛɛ ayɛ nhwɛdo ama wo mba. Ebɛn kwan do?

13. Ebɛnadze ntsi na ɔsɛ dɛ nãnom ma ebusuabɔ a wɔnye Jehovah wɔ no yɛ adze tsitsir wɔ hɔn asetsena mu?

¹³ Ma ebusuabɔ a enye Jehovah wɔ no nyɛ adze tsitsir wɔ w’asetsena mu. (Deut. 6:5, 6) Sɛ eyɛ nã a, edze ndzɛmba pii bɔ afɔr dɛ mbrɛ nanom pii yɛ no. Edze wo mber, wo sika, wo nda nye ndzɛmba afofor bɔ afɔr ama eetum dze wo mba hɔn ehiadze ama hɔn. Naaso, ɔnnsɛ dɛ ema dɛm ndzɛmba yi gye w’adwen araa ma igyaa dɛ ebɛyɛ ndzɛmba a ɔbɛma enye Jehovah ntamu ebusuabɔ ayɛ dzen no. Yi mber si hɔ bɔ mpaa, sũa Bible no dabaa na kɔ asafo nhyiamu. Sɛ eyɛ dɛm a, ebɛhyɛ enye Jehovah ntamu ebusuabɔ no mu dzen na ebɛyɛ nhwɛdo pa ama w’ebusua nye afofor.

14-15. Ebɛnadze na isũa fi dza Leanne, Maria, na João kãe no mu?

¹⁴ Yɛwɔ mbabun pii a hɔn nanom hɔn nhwɛdo boaa hɔn ma wɔbɔdɔɔ Jehovah na wonyaa no mu ahotodo. Ma yɛnhwɛ nsɛm a hɔn mu bi kãe. Christine ne ba basia Leanne kãa dɛ: “Sɛ nna me papa wɔ fie a, nna ɔyɛ dzen dɛ yebosũa adze. Naaso me maame dze, nna aber biara ɔkɔ asafo nhyiamu. Ɔwɔ mu dɛ nna yennyi Bible mu nyimdzee pii dze, naaso me maame no nhwɛdo no boaa hɛn ma yebenyaa gyedzi kɛse. Ntsi aber a yɛnnhyɛɛ ase dɛ yɛrokɔ asafo nhyiamu mpo no, nna yenyim dɛ nokwar no ara nye yi.”

¹⁵ Maria so, sɛ nna ɔnye no nuanom na ne maame kɔ asafo nhyiamu a, ɔyɛ a nna ne papa hyehyɛ hɔn ahorba na ɔbor hɔn so. Maria kãa dɛ: “Sɛ merekã enuanom mbaa a wɔwɔ akokodur paa no ho asɛm a, merennkã nngya me maame. Aber a nna meyɛ abofra no, nna ɔyɛ a musuro dɛ mebɛyɛ ndzɛmba bi, osiandɛ nna musuro dɛ nkorɔfo bɛkasa etsia me. Naaso akokodur a nna me maame wɔ, nye mbrɛ nna aber biara ɔdze Jehovah dzi kan wɔ n’asetsena mu no boaa me ma mutumii dzii nyimpa ho suro do.” Wɔ onua João n’afamu so, nna ne papa mma kwan koraa ma wɔnnkã Jehovah ho asɛm anaa wommbue Bible mpo wɔ fie. Ɔkãa dɛ: “Nna me maame yɛ ndzɛmba pii mbrɛ ɔbɛyɛ a ɔbɔsɔ me papa n’enyi. Naaso nna ommbu Jehovah ne mbra do nnyɛ biribi a ɔbɔsɔ me papa n’enyi.”

16. Ebɛn kwan do na nanom hɔn nhwɛdo botum aka afofor?

 ¹⁶ Nanom, hom mma ɔntsena hom adwen mu dɛ hom nhwɛdo botum aka afofor. Ebɛn kwan do? Hom mma yɛnhwɛ mbrɛ nhwɛdo a Eunice yɛe no sii kaa ɔsomafo Paul. Ohun dɛ gyedzi a nyaatwem nnyi mu a nna Timothy wɔ no, ne maame Eunice na “odzii kan” daa no edzi. (2 Tim. 1:5) Ebɛn aber na Paul hun dɛ Eunice wɔ gyedzi? Paul hyiaa Lois na Eunice wɔ Lystra wɔ n’asɛmpatserɛw akwantu a odzi kan no mu. Obotum aba dɛ dɛm aber no na Paul hun dɛ Eunice wɔ gyedzi, na bi a Paul boaa ɔno na Lois ma wɔbɛyɛɛ Christianfo. (Andw. 14:4-18) Ɔwodze, dwen ho hwɛ, mfe 15 ekyir aber a Paul kyerɛɛw krataa kɛmaa Timothy no, nna ɔda ho ara kaa Eunice no nokwardzi na ɔkãa dɛ ɔfata dɛ wosũasua no nhwɛdo no! Ɔda edzi dɛ, no nhwɛdo no hyɛɛ ɔsomafo no nkuran paa na obotum aba dɛ dɛmara na ɔhyɛɛ Christianfo a nna wɔwɔ hɔ dɛm aber no so nkuran. Sɛ eyɛ baatankor a eretsetse mba anaa wo kun nnyi asafo no mu, ntsi woara na ɔwɔ dɛ ekyerɛkyerɛ wo mba Jehovah ho adze a, nya awerɛhyɛmu dɛ wo nokwardzi no hyɛ hɔn a wɔbɛn wo no nkuran paa.

17. Wo mbɔdzembɔ nyina ekyir no, sɛ ɔtse dɛ mbrɛ wo ba innya nkɔenyim a, ebɛnadze na ebɛyɛ?

¹⁷ Wo mbɔdzembɔ nyina ekyir no, sɛ ɔtse dɛ mbrɛ wo ba innya nkɔenyim a, ebɛnadze na ebɛyɛ? Kaa dɛ mbatsetse gye mber. Dɛ mbrɛ yehunii wɔ mfonyin no mu no, sɛ idua aba bi a, bi a ibenya adwen dɛ ebɛn aber mpo na obenyin na wɔaasow aba. Ɔwɔ mu dɛ irunntum  nnhyɛ eduadzewa no ma onnyin dze, naaso ɔsɛ dɛ ekɔ do ara gugu do nsu na eyɛ w’afamu dze biara mbrɛ ɔbɛyɛ a obotum enyin. (Mark 4:26-29) Dɛmara so na sɛ eyɛ nã a, bi a ebɔdwendwen ho dɛ ana ereyɛ w’afamu dze mbrɛ ɔbɛyɛ a wo mba bɔsom Jehovah. Ɔwɔ mu dɛ irunntum nnhyɛ wo mba no ma wɔmmbɔsom Jehovah dze, naaso sɛ ekɔ do yɛ dza ibotum biara tsetse hɔn a, ibotum aboa hɔn ma woeenyin abɛyɛ Jehovah n’anyɛnkofo.​—Mbɛ. 22:6.

18. Ebɛnadze na Jehovah botum ayɛ dze aboa wo mba no ma wɔnye no eenya ebusuabɔ?

¹⁸ Ofi tsetse besi ndɛ, Jehovah aboa mbofra pii ma wɔabɛyɛ n’anyɛnkofo. (Ndw. 22:9, 10) Sɛ wo mba no wɔ ɔpɛ nkotsee dze a, Jehovah bɔboa hɔn so ma wɔnye no eenya ebusuabɔ. (1 Cor. 3:6, 7) Sɛ ɔtse dɛ mbrɛ wo mba no mmpɛ dɛ wɔsom Jehovah mpo a, Jehovah dze ɔdɔ hɔn na ɔbɔkɔ do ara dze n’enyi edzi hɔn ekyir. (Ndw. 11:4) Sɛ wɔyɛ biribi kakraabi dze kyerɛ dɛ wɔpɛ dɛ wɔsom Jehovah a, ɔno so bɔboa hɔn ma wɔaabɛyɛ n’anyɛnkofo. (Andw. 13:48; 2 Mber. 16:9) Jehovah botum aboa wo ma aakã asɛm bi a ɔbɔboa wo mba no. Ebɔhwɛ no, nna ber a ekãa dɛm asɛm no yɛ ber a ɔfata paa. (Mbɛ. 15:23) Anaa obotum aka onua anaa akyerɛbaa bi a ɔdwen afofor ho n’akoma ma ɔaafa wo mba no nyɛnko na ɔaaboa hɔn. Sɛ wo mba no yɛ mpanyimfo mpo a, Jehovah botum aboa hɔn ma wɔaakaa biribi a edze kyerɛkyerɛɛ hɔn aber a nna wɔyɛ mbofra no. (John 14:26) Sɛ ekɔ do dze wo kasaa nye wo ndzeyɛɛ yɛ nhwɛdo ma wo mba a, Jehovah so behyira wo mbɔdzembɔ no do.

19. Ebɛnadze ntsi na ibotum enya awerɛhyɛmu dɛ ewɔ Jehovah n’enyimpa?

¹⁹ Nnyɛ gyinae a wo mba no besisi no na ɔbɛkyerɛ dɛ Jehovah dɔ wo anaa ɔnndɔ wo. Osiandɛ edɔ no ntsi noara so dɔ wo. Sɛ eyɛ baatankor a, Jehovah abɔ anohoba dɛ ɔbɛyɛ wo mba no hɔn Egya na ɔbɔbɔ hɔnho ban so. (Ndw. 68:5) Irunntum nnhyɛ wo mba no ma wɔmmbɔsom Jehovah. Naaso, sɛ ekɔ do dze woho to mboa a Jehovah dze ma wo no do na eyɛ dza ibotum biara a, ibenya n’enyimpa.