1-2. a) Énis a té kimoun é poukisa sa té difisil pou i anprann so pitit konnèt Jéova ké Jézi ? b) Di sa to ka wè asou zimaj-a anlè prémyé paj-a.

 MENM SI Labib-a pa ka rakonté sa ki pasé lò Timoté batizé, nou pouvé imajiné kouman so manman té divèt kontan sa jou-a (Prov. 23:25). Nou pouvé imajiné sa : Gadé kouman so wéy ka kléré fòrs i fyèr toupannan Timoté dibout annan dlo-a ki ka rivé jik annan so ren. Énis ka souri. Loyis, gran manman Timoté, dibout òbò li. Énis ka rèspiré dousman, épi i ka tchenbé so souf lò Timoté ka désann anba dlo-a. Timoté ka roumonté di dlo-a lanmenm ké roun gran sourir anlè so vizaj. É Énis ka koumansé pléré. Énis rivé anprann so timoun kontan Jéova ké so Pitit Jézi Kris. Mé ki problèm i jwenn ?

² Papa ké manman Timoté pa té annan menm rélijyon-an. So papa té Grèk é so manman ké so granmanman té Jwif (Actes 16:1). Timoté té divèt sa roun jennjan lò Énis ké Loyis divini krétyen. Mé so papa li menm pa divini krétyen. Kisa Timoté té ké fè ? Nou pouvé pansé ki i té asé gran pou pran so désizyon. Ès i té ké swiv so papa ? Ouben ès i té ké gardé tradisyon jwif-ya i té anprann dipi i té toupiti ? Ouben ès li menm osi té ké divini roun disip Jézi ?

3. Dapré Proverbes 1:8, 9, kouman Jéova ka wè travay manman-yan ka fè pou idé yé timoun divini so zanmi ?

³ Kou Énis, manman ki krétyen kontan yé fanmi. Sa yé  lé, a idé yé timoun divini zanmi ké Jéova. É Jéova kontan tout éfòr yé ka fè pou yé rivé fè sa (li Proverbes 1:8, 9). Gras a konsèy Jéova ka bay, roun patché manman rivé fè yé timoun kontan lavérité-a kou yé menm.

4. Poukisa bokou manman ki krétyen ka enkyété yé kò ?

⁴ Détan, manman ki krétyen ka doumandé yé kò si yé timoun ké chwazi sèrvi Jéova kou Timoté. É sa nòrmal. Kou tout manman ké papa ki krétyen, yé savé kouman monn Satan-an ka mété présyon asou yé timoun (1 Pierre 5:8). Anplis di sa, bokou manman ka lévé yé timoun yé rounso ouben ké roun mari ki pa Témwen. Parèkzanp, roun sò yé ka aplé Christine b ka di : « Mo mari té sa roun bon papa, i té kontan so fanmi, mé i té ka défann mo palé timoun-yan di lavérité. A pa ti pléré mo pléré pannan lontan : mo té ka di an mo tchò ki mo timoun pa té ké janmen pouvé divini Témwen Jéova. »

5. Kisa nou ké wè annan sa artik-a ?

⁵ Si to sa roun manman pitit, to menm osi to pouvé anprann to timoun kontan ké sèrvi Jéova menm fason Énis fè l’. Annan sa artik-a, nou ké wè kouman i rivé fè Timoté gen menm lafwa li menm té gen. Nou ké wè ki sa to ka di, mé osi sa to ka fè, enpòrtan. Épi nou ké wè kouman Jéova pouvé idé to.

6. Dapré 2 Timothée 3:14, 15, kouman Timoté divini krétyen ?

⁶ Lò Timoté té piti, so manman té fè tousa i té pouvé pou anprann li sa ki annan « liv sakré-ya », dapré fason Jwif-ya té ka konprann yé. Mé kou i pa té konnèt anyen asou Jézi Kris, nou pouvé di ki i pa té konnèt tout bagaj annan sa liv-ya. Mé sa i té anprann Timoté té asé pou i té pouvé asèpté divini roun krétyen. Kou i té sa roun jennjan aprézan, i té gen drwa désidé si i té lé divini roun krétyen ouben si i pa té lé. Kisa i fè ? I asèpté lavérité asou Jézi é a roun tibi gras a so manman (li 2 Timothée 3:14, 15). Énis té divèt byen kontan i té rivé anprann so timoun konnèt Jéova ké Jézi, menm si sa té rèd ! Sa Énis fè ka byen alé ké sa so non lé di. So non ka vini di roun mo ki lé di « ganyen ».

7. Kouman Énis té ké pouvé idé so timoun kontinyé fè progrè apré i batizé ?

⁷ Lò Timoté batizé, i fè roun bagaj ki té enpòrtan annan so lavi. Mé Énis patékò fin enkyété pou li. Ki kalité lavi so pitit té ké mennen ? Ès i té ké maché ké mové zanmi ki té ké détenn asou li ? Ès i té ké alé lékòl Atèn épi asèpté ansèyman filozòf-ya ki pa té ka adoré Bondjé ? Ès i té ké pédi tout so tan, so fòrs ké so jénès ka kouri dèyè soumaké ? Énis pa té pouvé pran pyès désizyon pou Timoté, mé i té pouvé idé li. Kouman i té pouvé fè sa ? I té pouvé kontinyé travay rèd pou idé l’ kontan Jéova ankò plis épi gen ankò plis rékonésans pou Jézi. A pa sèlman krétyen yé madanm ouben yé mouché pa ka sèrvi Jéova ki ka enkyété pou sa kalité bagaj-ya. Menm lò dé paran-yan annan lavérité, sa pouvé rèd pou yé touché tchò yé timoun épi idé yé adoré Jéova ké fidélité. Kisa èkzanp Énis pouvé anprann papa ké manman-yan ?

8. Kouman roun manman pouvé idé so mari ki Témwen ansényé yé timoun bagaj asou Jéova ?

 ⁸ Étidyé Labib-a ké to timoun. Si to sa roun manman é to mari annan lavérité-a, Jéova ka doumandé to idé to mari anprann zòt timoun bagaj asou li. Roun fason to pouvé fè sa, a lò to ka montré ki étid Labib-a ké to fanmi enpòrtan pou to. Di bon bagaj asou sa étid-a épi réfléchi asou sa to pouvé fè pou anbyans-a chwit. Anplis di sa, to pouvé idé to mari pou chwazi roun bagaj pou étidyé ouben roun bagaj pou fè. Épi si roun ran annan zòt timoun asé gran pou étidyé Labib-a ké liv Viv ké tchò kontan pou tout-tan !, to pouvé idé to mari pou timoun-yan pouvé gen yé léson.

9. Kisa ki pouvé idé roun manman ki divèt ansényé so timoun Labib-a li menm ?

⁹ Sèrten manman divèt étidyé Labib-a ké yé timoun, swa paské yé pa gen mari, swa paské yé mari pa Témwen. Si a to sitiasyon, a pa pou to enkyété tròp. Jéova ké idé to. Sèrvi zouti so òrganizasyon ka bay nou pou ansényé to timoun. Parèkzanp, to pouvé doumandé ròt papa ké manman ki gen èspéryans kouman yé ka sèrvi sa zouti-ya pou étidyé Labib-a ké yé fanmi c (Prov. 11:14). Jéova pouvé idé to osi pou to kozé ké to timoun. Doumandé li so lèspri pou to trouvé ki késyon ké pèrmèt to savé sa ki annan tchò to timoun (Prov. 20:5). Roun késyon tou senp kou : « Lò to lékòl, kisa ki pi rèd pou to ? » pouvé pèrmèt to kozé ké to timoun pou to anprann bokou bagaj.

10. Kisa roun manman pouvé fè ankò pou anprann so timoun konnèt Jéova ?

¹⁰ Chaché okazyon pou palé to timoun di Jéova. Fè yé wè ki kalité moun i sa é di yé tout bèl bagaj i fè pou to (Deut. 6:6, 7 ; Is. 63:7). Sa enpòrtan, èspésyalman si to pa pouvé étidyé souvan ké to timoun lakaz. Christine, nou ja palé anvan, ka di : « Tèlman mo pa té gen bokou okazyon di palé di lavérité-a ké mo timoun, mo té ka profité di tout ti moman nou té gen. Détan nou té k’alé pronmennen. Ouben nou té ka barké asou roun kannon, mo té ka pagayé é a la mo té ka palé di Jéova, di so kréyasyon ké di tout bèl bagaj ki té ké pouvé idé yé divini zanmi Jéova. Lò mo timoun té asé gran, mo ankourajé yé étidyé Labib-a yé rounso. » Anplis di sa, di bon bagaj asou òrganizasyon Jéova-a ké asou to frè ké sò-ya. Pa kritiké ansyen-yan. Sa to ka di asou ansyen-yan pouvé ankourajé to timoun alé wè yé lò yé ké gen problèm.

11. Dapré Jacques 3:18, poukisa sa enpòrtan pou roun manman fè sa i pouvé pou i gen roun bon ti anbyans lakaz ?

¹¹ Fè tousa to pouvé pou i gen lapè annan to kaz. Montré to mari ké to timoun ki to kontan yé. Lò to ka palé di to mari, a pou to fè l’ ké rèspè é a pou to di bon bagaj asou li, é anprann to timoun fè menm bagaj-a. Konsa i ké gen roun bèl ti anbyans annan kaz-a é sa ké pèrmèt to palé di Jéova pi fasilman ké to timoun (li Jacques 3:18). Annou palé di Jozsef ki pyonyé èspésyal an Roumani. Lò i té piti, so papa fè tousa i té pouvé pou anpéché yé, ni li ni so manman ni so frè ké so sò-ya, adoré Jéova. Jozsef ka di : « Mo manman té ka fè tousa i té pouvé  pou i gen lapè annan kaz-a. Pi mo papa té rèd, pi mo manman té janti. Lò i té ka rémarké ki sa té rèd pou nou rèspèkté ké obéyi mo papa, i té ka fè nou réfléchi asou Éphésiens 6:1-3. Épi i té ka fè nou sonjé bèl kalité i té gen é poukisa nou té divèt kontan li. A konsa i idé nou fanmi rété annan lapè. »

12. Dapré 2 Timothée 1:5, kouman èkzanp Énis aji asou Timoté ?

¹² (Li 2 Timothée 1:5.) Énis bay so pitit roun bèl èkzanp. I dèt montré li ki lò to vréman gen lafwa annan Bondjé, to ka montré l’ ké sa to ka fè (Jacq. 2:26). É Timoté divèt wè ki tousa so manman té ka fè, i té ka fè l’ paské i té kontan Jéova bokou. I dèt wè ki tchò so manman té kontan paské i té ka sèrvi Jéova. Kouman èkzanp Énis aji asou so pitit ? Pòl di ki lafwa Timoté té fò kou lafwa so manman. Mé sa pa fèt konsa. A pas i wè èkzanp so manman ki sa bay li anvi fè kou li. Jòdla ankò, bokou manman ka rivé touché tchò yé timoun « san yé pa bézwen di anyen » (1 Pierre 3:1, 2). To menm osi to pouvé fè menm bagaj-a. Kouman to pouvé fè sa ?

13. Poukisa roun manman divèt mété so lanmityé ké Jéova an prémyé annan so lavi ?

¹³ Mété to lanmityé ké Jéova an prémyé annan to lavi (Deut. 6:5, 6). Kou bokou manman, to ka fè roun patché sakrifis. Parèkzanp, pou to pouvé pran swen di to timoun, to pa ka gadé konmyen tan sa ka pran to, konmyen soumaké to ka dépansé, ni konmyen tan to pa ka dronmi. Mé pa janmen arété fè to lanmityé ké Jéova vin pi fò. Pran tan pou priyè souvan, pou étidyé Labib-a to rounso épi pou alé annan réinyon-yan. Si to ka fè sa, to ké fè to lanmityé ké Jéova vin pi fò é to ké bay to fanmi ké ròt-ya annan asanblé-a roun bèl èkzanp.

14-15. Kisa èkzanp Leanne, Maria ké João ka anprann nou ?

¹⁴ Annou wè èkzanp plizyèr jennjan ki anprann kontan Jéova é fè li konfyans gras a sa yé wè yé manman fè. Leanne, tifi Christine, ka di : « Lò nou té lakaz, nou té divèt séré pou étidyé Labib-a. Mé manman bay nou roun bèl èkzanp. I té détèrminé é i pa janmen manké rounsèl réinyon. Donk menm si nou pa té konnèt bokou bagaj asou Labib-a, lontan anvan nou alé annan réinyon-yan, nou té ja savé ki a té lavérité. »

¹⁵ Èkzanp manman Maria touché li osi. Détan, lò manman Maria ké so timoun té ka rouvin di lasal, so mari té ka malmennen yé. Men sa Maria ka di : « Mo manman sa roun fanm ki gen bokou kouraj menm. Lò mo té toupiti, détan mo pa té lé fè sèrten bagaj paské mo té pè sa ròt moun té ké di. Mé lò mo té ka wè kouman i té gen bokou kouraj é kouman i té ka mété Jéova an prémyé annan so lavi, mo arété pè moun. » Papa João té ka défann so fanmi palé di Jéova ouben di Labib-a lò yé té lakaz. Men sa João ka di : « Pitèt sa ki plis touché mo, a lò mo wè ki pou i té fè mo papa plézi, mo manman té paré pou lésé tout bagaj sòf so lanmou pou Jéova. »

16. Kouman èkzanp roun manman pouvé aji asou moun annan so asanblé ?

¹⁶ To bon konpòrtman pouvé idé moun annan to asanblé osi. Parèkzanp Pòl rémarké kouman Énis té ka aji. I ékri ki lafwa san anba anba ki Timoté té  gen, a menm lafwa ‘Énis té gen anvan li’ (2 Tim. 1:5). Kitan Pòl gen tan wè lafwa Énis ? Nou pouvé pansé ki a pannan so prémyé vwayaj misyonèr ki Pòl kontré ké li ké Loyis, annan vil Lis. É a pitèt menm li ki fè yé konnèt bon nouvèl-a épi a konsa yé divini krétyen (Actes 14:4-18). To ka randé to kò kont : lò Pòl ékri Timoté, apéprè kenz lannen té ja pasé, é pourtan i té ka sonjé lafwa Énis toujou é i té ka di ròt-ya pran èkzanp asou li. Dapré sa nou ka wè, konpòrtman Énis té marké apot-a ké roun patché ròt krétyen osi pannan lontan. Si to ka lévé to timoun to rounso ouben to mari pa Témwen, a pou to sir ki to lafwa ka ankourajé to frè ké sò-ya !

17. Kisa to divèt kontinyé fè menm si yé té ké di ki magré tousa to ka fè to timoun pa entérésé ?

¹⁷ É si yé té ké di ki magré tout éfòr to ka fè, to timoun pa entérésé ? A pou to sonjé ki lévé roun timoun ka pran tan. Kou nou ka wè l’ asou zimaj-a ki ka alé ké sa paragraf-a, lò nou ka sonmen roun grenn, nou pa savé si plant-a ké bay roun frwi roun jou. Sa pa ka dépann di nou. Mé nou ké rozé l’ souvan pou bay li sa i bézwen pou i pousé (Marc 4:26-29). Menm fason-an, pitèt détan to ka doumandé to kò si to ka rivé touché tchò to timoun. To pa pouvé désidé a yé plas si yé ké sèrvi Jéova ouben si yé pa ké fè l’. Mé si to ka kontinyé fè tousa to pouvé pou anprann yé prensip ki  annan Labib-a, to ké bay yé tousa yé bézwen pou yé divini zanmi ké Jéova (Prov. 22:6).

18. Kouman Jéova pouvé idé to timoun divini so zanmi ?

¹⁸ Dipi lépòk Labib-a, Jéova pran swen di roun patché jennjan ki divini so zanmi (Ps. 22:9, 10). Si a sa yé lé, i pouvé idé to timoun osi divini so zanmi (1 Cor. 3:6, 7). Menm si yé té ké di ki to timoun-yan ka lésé lavérité, a pou to sir ki Jéova ké kontinyé gadé pou yé (Ps. 11:4). Lò i ké wè menm roun ti bagaj chanjé annan yé tchò, i ké la pou yé (Actes 13:48 ; 2 Chron. 16:9). I pouvé bay to sajès pou to di bon bagaj-a o bon moman, sa lé di lò to timoun pi bézwen tandé sa bagaj-a (Prov. 15:23). Ouben i pouvé fè roun frè ouben roun sò gadé pou yé ké bokou lanmou. Menm lò yé vin gran, Jéova pouvé fè yé sonjé roun bagaj to anprann yé annan Labib-a (Jean 14:26). Si to ka kontinyé fòrmé to timoun, ki a ké sa to ka fè, ki a ké sa to ka di, to ké bay Jéova lokazyon béni to.

19. Poukisa to pouvé sir ki to ka fè Jéova plézi ?

¹⁹ Lanmou Jéova gen pou to pa ka dépann di sa to timoun ka désidé fè. I kontan to paské to menm to kontan l’. Si to ka lévé to timoun to rounso, Jéova ka promèt to ki i ké sa roun papa pou yé é ki i ké protéjé to (Ps. 68:5). To pa pouvé désidé pou to timoun si yé ké sèrvi Jéova ouben si yé pa ké fè l’. Mé tout tan to ké kontinyé konté asou Jéova épi fè tousa to pouvé, to ké fè l’ plézi.