1-2. (a) Eunike konn asli, ani aplea putak Jehova ani Jezu vixim xikounk tika kiteak kotthin zalem astolem? (b) Masikachea fuddlea panar aslolea chitrant kitem ghoddtta tem sangat.

 TIMOTACHEA bautizma vixim Bible-ant kainch sangonk na. Punn tannem bautizm ghetlo tednam tachi avoi, Eunike kitli khuxal zali astoli tea vixim ami chintunk zata. (Mho. 23:25) Tea ghoddnne vixim chintat. Timot bautizm gheunk udkant ubo asa. Tache mukhar tachi avoi, Eunike, ani tiche kuxik tachi aji, Lois tika dhorun ubi asa. Ani tim khuxalkaien taka polloitat. Timotak udkant buddoun bhair kaddlea uprant tachea tonddar hanso polloun Eunike khuxalkaien roddonk lagta. Ani tika aplea putacho khub gorv bhogta. Karonn itlim vorsam oddchonneo ason pasun, ti Timotak Jehovacho ani Jezucho mog korunk xikounk pavli. Tor tika koslea oddchonneancho fuddo korcho poddlo?

² Timotacho bapui ek Grek aslo. Punn tachi avoi ani aji Judev aslim. (Itihas 16:1) Uprant, chodd korun Timot tornnatto aslo tednam tachi avoi ani aji Kristanv zalim. Punn tachea bapain to dhorm apnnaunk na. Tor Timot aplea bapaicho dhorm apnnaitolo, vo apleak bhurgeponna thaun xikoilʼli xikounn pallttolo, vo Jezucho pattlav kortolo, tea vixim tannem nirnnoi korunk zai aslo.

3. Mhonnʼnneo 1:8, 9-a pormonnem, avoi-o aplea bhurgeank Jehovache ixtt zaunk modot kortat tednam Jehovak koxem dista?

³ Eunike bhaxen aiz Kristi avoi-o aplea familicho khub mog kortat, ani aplea bhurgeank Jehova sangata ixttagot zoddunk modot korunk sodhtat. Ani hea pasot, Jehova tanchea vavracho khub valor korta. (Mhonnʼnneo 1:8, 9 vachat.) Ani tanchea bhurgeank aplo mog korunk ani apli seva  korunk xikounk Jehovan zaitea avoi-ank modot kelea.

4. Aiz avoi-ank koslea oddchonneancho fuddo korcho poddtta?

⁴ Punn Soitanacho sonvsar bhurgeancher khub dobhav ghalta. (1 Ped. 5:8) Toxench, thoddea avoi-ank aplea bhurgeank ekttinch vaddounk poddtta vo tancho ghov Jehovachi seva korina. Tea pasot, Timota bhaxen aplim bhurgim kednam-i tori Jehovachi seva kortolim kai, mhunn ek avoi thodde pavtti chintunk puro. Hea vixim, Christine b nanvachi ek Kristi avoi oxem sangta: “Mhozo ghov ek boro bapui aslo ani to aplea familicho khub mog kortalo. Punn amchim bhurgim Jehovachim Sakxi zalʼlim taka naka aslem. Tor amchim bhurgim kednam-i tori Jehovachi seva kortolim kai mhunn chintun hanv zaite pavtti roddttali.”

5. Hea lekhant ami kitem polloitolim?

⁵ Eunike bhaxen aiz Kristi avoi-amnim aplea bhurgeank Jehovacho mog ani seva korunk modot korunk zata. Tor tannim aplea utramnim ani kornneamnim Eunikechi dekh gheun tanchea bhurgeank koxem xikounk zata, ani oxem korunk Jehova tankam koxi modot kortolo tem ami hea lekhant polloitolim.

6. 2 Timotak 3:14, 15 pormonnem, Timot ek Kristanv kiteak zaunk pavlo?

⁶ Timot ek lhan bhurgo aslo tednam tache avoin taka ‘povitr pustok’ xikounk apleachean zata tem soglem kelem. Tea vellar tika Jezu Krista vixim kainch khobor nasli. Punn Judev aslolean, tika jem kitem khobor aslem, tem soglem tinnem Timotak xikoilem. Hea vorvim, Kristanv zaunk Timotan jem kitem zannam zaunchi goroz asli tem to Povitr Pustokantlean xikonk pavlo. Tor atam Timot vaddlolo, ani to Kristanv zatolo kai na tem tannem apunn zaun tharaunk zai aslem. Tor Timot koslo tharav gheunk pavlo? Jezuch Mesias mhunn Timot ‘manun gheunk’ pavlo. Ani hachem ek karonn mhunnttlear, tache avoin taka xikounk kelʼlo vavr. (2 Timotak 3:14, 15 vachat.) Eunikechem nanv jea utrantlean ghetlam, tacho orth “zoit vhorop” oso zata. Tor tichea nanvachea ortha pormonnem ti jieli. Tika oddchonneo aslear pasun ti Timotak Jehovacho mog korunk ani tachi seva korunk xikounk pavli. Ani hem polloun ti kitli khuxal zali astoli!

7. Bautizm ghetlea uprant pasun, Eunike Timotak koxi modot korunk xoktali?

⁷ Timotan bautizm gheun ek ekdom boro nirnnoi ghetlo. Punn hacho orth, atam Timota vixim Eunikeche sogle uske kabar zale, oxem kai? Na. Karonn Eunikek aplea puta vixim zaito usko zalo astolo. Zoxem, Timot fuddarak aplea jivitant kitem kortolo? To vaitt sangati vinchun kaddttolo kai? Aten xarant aslolea iskolamnim xikon to tancheo khotteo xikounneo apnnaitolo kai? Aplo vell, takot ani tornnattponn girest zaunk to ibadd kortolo kai? Hea vixim Eunike Timota pasot nirnnoi gheunk xokonasli tem khorem. Punn bore nirnnoi gheunk, ti Timotak modot korunk xoktali. Koxi? Tinnem Timotak kallzantlean Jehovacho mog korunk xikounk zatalo. Toxench, Jehovan ani Jezun tanchea familik lagon jem kitem kelʼlem tea pasot tankam upkariponn dakhounk ti Timotak modot korunk xoktali. Punn bhurgeank ekttinch sotant vaddounk poddtta teach avoik vo bapaik oddchonneancho fuddo korunk poddtta oxem nhoi. Karonn avoi-bapui dogaim sotant asat zalear pasun, aplea bhurgeank Jehovacho mog ani seva korunk xikounk tankam kotthin zaunk xokta. Tor avoi-bapaimnim Eunikechea udharonnantlean kitem xikonk zata?

8. Aplea bhurgeank Jehova vixim xikoitana ek bailen aplea ghovak koxi modot korunk zata?

⁸ Tumchea bhurgeam sangata Bible-acho obheas korat. Bhoinnimno, tumcho ghov sotant asa zalear, tumchea bhurgeank Jehova vixim xikounk tumi tumchea ghovak modot keloli Jehovak zai mhunn ugddas dovrat. Oxem  korunk ek vatt mhunnttlear, tumi dor sumanak Kuttumbik Bhokti korunk tumchea ghovak tenko diunk zata. Kuttumbik Bhokti korop kiteak gorjechem tem tumchea bhurgeank sangat. Ani tem tumchea bhurgeank avoddtta toxem korunk tumi kitem korunk zata tea vixim chintat. Tumi ghoddie tumchea ghovak adim fuddench Bible-achea eka vixoi-acher ek project toiar korunk modot korunk zata. Toxench, tumchim bhurgim vaddlolim asat, ani Sasnak Khuxalkaien Jieiat!, hea pustokantlean obheas kelear tankam faideak poddttolem oxem tumkam dista zalear, tumchea ghova sangata tumchea bhurgeancho obheas gheunk tumi taka modot korunk zata.

9. Bhurgeank sotant ekttinch vaddounchim poddttat tednam eke avoik khoim modot mellonk xokta?

⁹ Punn thodde pavtti, eke bhoinnicho ghov sotant na dekhun vo her koslea-i karonnank lagon, tika aplea bhurgeank ekttinch vaddounk poddot. Tumchi poristhiti oxich asa zalear uskeum nakat. Karonn Jehova tumkam modot kortolo. Tache songottnnen tumchea bhurgeam sangata obheas korunk zaitim sadhonam toiar keleant. Tim sadhonam tumi uzar korunk zatat vo tim anik bore toren koxim uzar korchim tem tumi onubhov aslolea avoi-bapaim lagim vicharunk zata. c (Mho. 11:14) Toxench, tumchea bhurgeanchea kallzant kitem asa tem zannam zaunk, sarke prosn uzar korunk tumkam modot kor mhunn tumi Jehova lagim magonk zata. (Mho. 20:5) Oslo ek prosn mhunnttlear, ‘Iskolant tuka fuddo korunk chodd kotthin zata tosli oddchonn khoinchi?’ Osle prosn uzar kelolean tumchea bhurgeam sangata ulovop suru korunk ani tanchea vixim zannam zaunk tumkam modot zaunk xokta.

10. Avoi-amnim aplea bhurgeank Jehova vixim xikounk anik kitem korunk zata?

¹⁰ Jehova vixim tumchea bhurgeank xikounk veg-veglleo sondhi uzar korat. Jehova vixim ani tannem tumchea pasot kelʼlea borea vostum vixim tumchea bhurgeank sangat. (D.S. 6:6, 7; Iz. 63:7) Khas korun, tanchea sangata ghora obheas korunk mellona tednam hem korop chodd gorjechem. Ami poilim uloilʼlim ti Christine nanvachi avoi oxem sangta: “Mhaka choddxe pavtti mhojea bhurgeam lagim Jehovah vixim ulounk mellonaslem. Tea pasot, mhaka mellttali ti dor ek sondhi hanv uzar kortalem. Ami pasoiek voitalim tednam vo boat-in bhonvonk voitalim tednam Jehovache rochnne vixim, ani mhojea bhurgeank Jehovache ixtt zaunk modot kortoleo tea vostum vixim hanv tanche lagim uloitalem. Ani tim vaddlim toxim, hanvem tankam svota zaun Bible-acho obheas korunk urba dili.” Toxench, avoi-amnim aplea bhurgeam lagim Jehovache songottnne vixim ani bhav-bhoinnam vixim boreo vostu ulounk zai. Tea bhair, tanchea bhurgeam mukhar vhoddilancheo khoddi kaddina zaunk tannim chotrai dovrunk zai. Karonn oxem kelolean tanchea bhurgeank modotichi goroz asa tednam tim vhoddilam lagim modot magonk fatti sorchimnant.

11. Jakob 3:18 pormonnem, familint xanti samballop kiteak gorjechem?

¹¹ Tumchea familint xanti samballunk vavr korat. Tumi tumchea ghovacho ani bhurgeancho mog kortat mhunn sodanch dakhoiat. Tumchea ghova vixim uloitana, doiall toren ani taka man diun uloiat. Ani tumchea bhurgeank pasun toxench korunk xikoiat. Tumi oxem kortat tednam tumchea familint tumi xanti samballunk pavtolim ani tumchea bhurgeank Jehova vixim xikounk tumkam sompem zatolem. (Jakob 3:18 vachat.) Hea vixim Romania-nt khas pioneer mhunn seva korpi Jozsef-achem udharonn polloum-ia. To vaddlo toso tachea bapain tankam khub virodh kelo dekhun Jehovachi seva korunk tankam kotthin zalem. Jozsef sangta: “Amchea familint xanti samballunk mhoji avoi khub vavr kortali. Mhozo bapui jitle khor toren  vagtalo, titlech doiall toren mhoji avoi vagtali. Toxench, amchea bapaik man diunk ani to amkam sangta tem korunk amkam kotthin zata mhunn ti polloitali tednam ti amchea sangata Efezkarank 6:1-3 vachun, tea vixim uloitali. Uprant, ti amkam amchea bapaichea borea gunnam vixim sangtali, ani ami tacho mog kiteak korunk zai tem somzaitali. Oxem kelolean amchea familint xanti samballunk modot zatali.”

12. 2 Timotak 1:5-ant sanglolea pormonnem, Eunikechea borea udharonnak lagon Timotacher koslo porinnam zalo?

¹² 2 Timotak 1:5 vachat. Euniken Timotak ek bori dekh dovorli. Amkam ghott bhavarth asa zalear ami to kornneamnim dakhounk zai mhunn tinnem taka xikoilem astolem. (Jak. 2:26) Ani khorench, aplea avoichea kornneam vorvim tika Jehovacho kitlo mog asa ani tachi seva korunk tika kitli khuxalkai melltta tem Timotan polloilem astolem. Hacho Timotacher koslo porinnam zalo? Apostl Paulun sanglem toxem, Timotak tachea avoi bhaxen ghott bhavarth aslo. Punn ho bhavarth taka apxinch mellʼllo kai? Na. Timotan aplea avoichi dekh ghetli. Teach bhaxen, aiz zaitea avoi-amnim “utram vinnem” aplea familik Jehovachi seva korunk modot kelea. (1 Ped. 3:1, 2) Tumi hem koxem korunk zata?

13. Avoi-amnim Jehova sangata aslole aple ixttagotik sogleam-von chodd mhotv kiteak diunk zai?

¹³ Jehova sangata aslolea tumchea ixttagotik sogleam-von chodd mhotv diat. (D.S. 6:5, 6) Choddxea avoi-am bhaxen, tumi pasun tumchea bhurgeank gorjecheo vostu diunk zaite teag kortat. Zoxem, tumi tumcho vell, poixe, nhid ani her vostu teag korunk puro. Punn hem korunk tumi itlim bizi zaunk zainant ki uprant Jehova sangata tumchi ixttagot ghott korunk tumkam velluch mellona. Oxem zaina zaunk, chukoinastana magnnem korunk, svotacho Bible obheas korunk ani mittingek hajir zaunk vell kaddat. Oxem kelolean, tumi Jehova sangata tumchi ixttagot ghott korunk pavtolim ani tumchea familik ani herank pasun ek bori dekh dovrunk pavtolim.

14-15. Leanne, Maria, ani João-achea udharonnantlean tumi kitem xiklim?

¹⁴ Aplea avoichea borea udharonnak lagon Jehovacho mog korunk pavlim ani tacher visvas dovrunk pavlim, toslea thoddea tornnatteanchim udharonnam atam ami polloum-ia. Christine-achi dhuv, Leanne sangta: “Amcho daddy ghora aslo tednam ami Bible-acho obheas korunk xokonaslim. Punn mummy-n mittingek hajir zavop kednanch chukounk na. Amkam Bible-a vixim chodd kaim khobor naslem. Punn mummy-chea borea kornneank lagon amcho bhavarth ghott korunk amkam modot zali. Ani mittingek hajir zaunchea khub temp poilinch thaun, Jehovachech Sakxi sot xikoitat mhunn amkam khatri zali.”

¹⁵ Toxench Maria, zacho bapui tim mittingek voitat mhunn kednam-kednam tankam gallio martalo vo boddoitalo, tem oxem sangta: “Hanv lhan aslem tednam dusrim kitem mhunnttolim mhunn hanv bhietalem dekhun hanv thoddeo vostu korunk fatti sortalem. Punn mhoji mummy sodanch aplea jivitant Jehovak poilo zago dita ani ti kitli dhirvont asa tem polloun, mhaka asloli munxachi bhirant pois korunk mhaka modot zali. Khorench, ti ekdom dhirvont asli!” Tea bhair João, zacho bapui tankam ghorant Jehova vixim vo Bible-a vixim ulounk dinaslo, to oxem sangta: “Mhojea daddy-k manvota tem korunk mhoji mummy kitem-i korunk toiar asli. Punn Jehova pasot aplo mog soddun diunk ti toiar nasli. Tor tichea udharonnantlean mhaka-i urba mellʼlli.”

16. Avoi-o bori dekh dovortat tednam dusreancher koslo porinnam zata?

¹⁶ Avoi-amno, tumi bori dekh dovortat tednam dusreancher tacho boro porinnam zata mhunn ugddas dovrat. Euniken bori dekh dovorli  mhunn apostl Paulucher tacho boro porinnam koso zalo tea vixim chintat. Paulu ghoddie aple poile mixinori bhonvdde vellar Eunikek ani Loisak Listrant mellʼllo astolo. Ani tea vellar tannem tankam Kristanv zaunk modot keli astoli. Tor tednam Eunikek kitlo bhavarth aslo tem apostl Paulun polloilʼlem astolem. (Itihas 14:4-18) Ani hea pasot, sumar 15 vorsam uprant pasun, Eunikechea bhavartha vixim to ugddas korunk pavlo. Tichea borea udharonna vixim tannem Timotak oxem boroilem: ‘Tujea adim . . . Eunike tuje avoik ddhong naslolo bhavarth aslo.’ (2 Tim. 1:5) Tor Eunikechea borea udharonnacho porinnam fokot Paulucheruch nhoi, punn poilea xekddeantlea Kristanvancher pasun poddlo astolo. Tor tumi pasun tumchea bhurgeank ekttinch sotant vaddoitat vo tumcho ghov sotant na zalear tumchea borea udharonna thaun dusreank urba melltta mhunn tumi khatri dovrunk zata.

17. Tumi tumchea bhurgeank ek bori dekh dovrun pasun, tim Jehovachi seva korunk fuddem soronant zalear tumi kitem korunk zata?

¹⁷ Punn chintat ki tumi tumchea bhurgeank bori dekh dovrun pasun tim Jehovachi seva korunk fuddem soronant. Tednam tumi kitem korunk zata? Eka bhurgeak proxikxonn diunk vell lagta mhunn tumi ugddas dovrunk zata. Chitrant dakhoilam toxem, ami ek bim roitat tednam, tem zhadd vaddon taka follam zatolinch mhunn ami khatren sangonk xokonant. Tori astana, taka udok ghalit ravon tem zhadd bore toren vaddonk ami zata titlo vavr kortat. (Marku 4:26-29) Teach bhaxen, aplim bhurgim Jehovachi seva kortolinch mhunn ek avoi khatren sangonk xokona. Ani aplea bhurgeam pasot ti nirnnoi  gheunk xokona. Tori astana, tankam proxikxonn diunk ti apleachean zata titlo vavr korta tednam Jehovacho mog korunk ani tache ixtt zaunk ti tankam modot korunk xokta.—Mho. 22:6.

18. Tumchea bhurgeank aple ixtt zaunk Jehova koso modot korunk xokta?

¹⁸ Adlea kallar thaun tem aiz pasun, Jehovan zaitea tornnatteank aple ixtt zaunk modot kelea. (St. 22:9, 10) Tor tumchim bhurgim tache ixtt zaunk sodhtat zalear to tankam-i modot kortolo. (1 Kor. 3:6, 7) Tim azun porian purnn kallzan Jehovachi seva korinant zalear pasun to mogan tancher nodor dovortolo. (St. 11:4) Ani tim khoreaninch taka manvota tem korunk sodhtat mhunn Jehovak kollon ieta tednam to rokddoch tankam modot korunk toiar astolo. (Itihas 13:48, NW; 2 It. 16:9) Tankam goroz ti modot korunk to ghoddie tumkam vo sobhentlea eka bhavak vo bhoinnik uzar korunk xokta. (Mho. 15:23) Tea bhair, tumchim bhurgim vaddlea uprant pasun, tim lhan astana kitem xiklolim tem porot ugddas korunk Jehova tankam modot korunk xokta. (Juanv 14:26) Tea mhunnosor, tumchea utramnim ani kornneamnim ek bori dekh dovrun tumchea bhurgeank proxikxonn di-it ravat. Oxem kelolean Jehova tumkam zaitim besanvam ditolo.

19. Tumkam Jehovachi maniotai mellttoli mhunn tumi kiteak khatri dovrunk zata?

¹⁹ Tor tumchim bhurgim Jehovachi seva korum vo na, tumi Jehovacho mog kortat dekhun to tumcho mog korta mhunn ugddas dovrat. Ani tumi ekttinch tumchea bhurgeank sotant vaddoitat zalear Jehova Dev tumchea bhurgeank ek Bapui zatolo ani tumchi rakhonn kortolo mhunn bhas dita. (St. 68:5) Tor tumchim bhurgim Jehovachi seva kortolim vo na ho nirnnoi tumi gheunk xokonant tem khorem. Punn tumi Jehovachi modot gheit ravtat ani tumchea bhurgeank Jehova lagim ixttagot zoddunk tumchean zata tem soglem kortat tednam tumkam Jehovachi maniotai mellttoli mhunn tumi khatri dovrunk zata.