1-2. a) Enise aliri nde, na bibazo bihe alihurene yewe nka muzere? b) Fasiriya eby’obwene oku foto eli oku chiganda.

 CHIRO akaba okwe Biblia erharhubwirire oku bilolere obubatizo bwa Timoteo, chirhakabuza rhurhawaza oku mwishingo nyina, Enise, aligwerhe olola lusiku. (Mez. 23:25) Chapaga omu bwenge omulole gurhe y’anyinyula, eyi Timoteo naye ayimangire omu menji akala abatizwa. Ashagalukire, Loise naye, nakulu wa Timoteo ayumangire aha burhambi bwage. Enise amamira omuka oku bamayubiza Timoteo omu menji. Abantu bali bakubira bwenene n’obusime bamulola omu mesho, n’eju y’omwishingo gulugire, arhachigalire kugalula emiziga. Chiro akaba okw’ahurene ebibazo, Enise ayigirize omwana wage kuzigira Yehova n’Omugala Yesu Kristo. Bibazo bihe alihurene amango aliri ayigiriza omugala?

² Abazere ba Timoteo barhaliri mu dini liguma. Eshe aliri Mugiriki na nyina bombi nakulu baliri Bayahudi. (Mdo. 16:1) Nkabaga Timoteo alichili omu myaka y’olubiruko amango nyina Enise na nakulu Loise babaga Bakristu. Aliko eshe yewe arhazigaga aba Mukristu. Omulala gwabo gurhali heberwe haguma oku bilolere eby’edini. Lunda luhe Timoteo akajireko? Alikala akulire omu kuntu akachishoga yenyine. Akachishogere kukulikira eshe orhali Mukristu si? Akagendereze emigenzo y’Abayahudi ayigirizwaga kurhenga omu bwana? Changwa si, akayemerere kuba mwanafunzi wa Yesu Kristu?

3. Nk’oku Mezali 1:8, 9 ederhere, nka gurhe Yehova anabona akasi banyama banakola k’okurhabala abana babo babe bera bage?

³ Intyo kon’oko zene, banyama b’Abakristu nabo bazigiire emilala yabo. Echintu banachisezako bwenene, kuli kulonza  barhabale abana babo bagwarhe obwira bukomeere haguma na Yehova. Mungu werhu anasimiswa bwenene n’ogola mwete gwabo. (Osome Mezali 1:8, 9.) Yehova arhabere banyama banene bagale kuyigiriza abana babo yi bayemera okuli kwe Biblia.

4. Bibazo bihe banyama yibahurana zene?

⁴ Hali oku nyina w’abana akachibaza akaba kweri abana bage nji bachishoga kukolera Yehova nk’oku Timoteo ajiraga. Kweri abazere baba bayinji akahidiko abana babo bali bahurana mw’elila gulu lya Shetani. (1 Pe. 5:8) Kandi banyama banene bagwerhe echibazo ch’okulemba abana babo buzira b’eba, changwa eyi b’eba barhali bakozi ba Yehova. Omufano, mwali-werhu oyirikirwe Christine * aderhere: “Bani aliri mulume mwinja analiri ashishikala omulala, aliko arhaliri aziga chiro nayigiriza abana bani mpu babe bahamirizi ba Yehova. Namalire myaka minene eyi kulaka ndaka, nachibaza akaba kweri nji hanagera amango abana bani baharamya Yehova.”

5. Bichi rhwaganirako mu gunola mwazi?

⁵ Akaba oli mukazi w’Omukristu, wakagala kurhabala abana bawe bazigire Yehova banamukolere, nk’oku Enise naye arhabalaga owage. Mu gunola mwazi, rhwabona gurhe wakayiganya omufano gwage omu kuyigiriza abana bawe kugerera ebinwa n’ebijiro byawe. Rhwanabona gurhe Yehova akurhabala.

6. Nk’oku olwandiko lwa 2 Timoteo 3:14, 15 luderhere, gurhe Timoteo abaga Mukristu?

⁶ Amango Timoteo alichili mudorho, nyina alijirire okwage koshi y’amuyigiriza “amandiko machesibwa,” nk’oku Abayahudi banalimamenyere. Kweri obumenyi bwa Enise bwaligehere, bulala ntacho alimenyere chiro oku bilolere Yesu Kristu. Chiro akaba ntyo, ebi Timoteo ayigaga omu Mandiko byalimuhere eby’alikeneere kumenya y’aba Mukristu. Aliko si, akanazigire aba yewe? Yewe nka musole, aligwerhe obuhuru b’okuchishoga akab’abe Mukristu. Nta ngangane “Timoteo aliyemezezwe” okuli kugerera obushiru bwa nyina. (Osome 2 Timoteo 3:14, 15.) Enise akwanene kuba ey’aligwerhe busime bunene okubona ahima echibazo aliherhe amango aliri ayigiriza omugala oku bilolere Yehova. Kweri Enise alilamire nk’okw’ezino lyage linaderhere, lirhengere omuchinwa chiderhere “muhimanyi.”

7. Nka gurhe Enise alirhabere omugala ajire amaja-mbere enyuma y’obubatizo?

⁷ Okubatizwa, chili chintu ch’akamaro Timoteo ajiraga omu kalamo kage. Aliko Enise alichili achibaza akaba oyo mwana wage anajira amaja-mbere. Gurhe omugala akakoleseze akalamo kage kayorhere? Akachishogere abera babi si? Akajire oku masomo omu Atene n’okuyemera bamuyigirize efilozofi z’eyola munda z’echipagani si? Akahezeze ebisanzi byage, emisi, n’obusole bwage omu kulonza efuranga y’aba muchire si? Enise arhakachishogere ahali ha Timoteo, aliko akamurhabere achihebere h’emihigo minja. Nka gurhe? Akagenderere kujira okwage koshi kuhika amango omugala agwarha obuzigire bukomere ku Yehova n’Omugala. Abazere barhali mu dini liguma, arhali bonyine banahurana ebibazo omu kurhabala abana babo bazigire Yehova. Na chiro akaba oku bombi bali omu kuli, byakanachikomera okuhuma oku mirhima y’abana babo omu kuntu nabo babe bakozi bimana ba Yehova. Bichi si omufano gwa Enise gwakayigiriza Abazere?

8. Nka gurhe omukazi akarhabala eba kushishikala ehali y’ekiroho y’abana babo?

 ⁸ Oyige Ebiblia haguma n’abana bawe. Mwali-werhu, akaba balo naye ali Muhamirizi, Yehova alonzeze omurhabale kushishikala ehali y’ekiroho y’abana benyu. Njira nguma wakajiramo ntyo kuli kugenderera kurhabala omu mipango y’obuharamye b’omulala. Oderhe ebintu binja oku bilolere obuharamye bwenyu b’omulala, onawaze bichi wakaderha yi bugera omu hali ekwirire enasimisize. Akaba hali abana benyu bakala bafungukire obwenge omu kuntu bakayiga Ebiblia omu chitabu Siimira Akalamo Esiku n’Amango! nkabaga wakarhabala balo kuyigirizabo. Wakamurhabala kupanga myazi milebe muhigirire kuyiga omu funzo lyenyu lye Biblia.

9. Ngahe omukazi ogwerhe omulume orhali Muhamirizi akakula oburhabale?

⁹ Hali banyama baguma, kuba eyi babakwanene kuyigiriza abana babo Ebiblia bula beba barhachiliho changwa barhali Bahamirizi. Akaba ntyo ku bili omu mwawe, orhajanjabalaga. Yehova akurhabala. Okolese ebikoleso by’okuyigirizizamo arhuhere kugerera olubaga lwage y’oyiga haguma n’abana bawe. Orhabwene oku kwaba kwinja obaze abandi bazere bamenyere binene okuntu wakakolesa ebyola bikoleso omu buharanye bwenyu b’omulala? * (Mez. 11:14) Kandi Yehova akakurhabala oganire bwinja n’abana bawe. Obwire Yehova akurhabale y’omenya ebili oku mirhima yabo. (Mez. 20:5) Okubazabo konyine ebibazo biyorohere, nka: ‘chibazo chihe munahurana oku masomo?’ kwakarhuma mwagwarha enganiro yalerha amalehe menja.

10. Yindi njira nchi wakarhabala mw’abana bawe bayige oku bilolere Yehova?

¹⁰ Olonze ebisanzi wakayigiririza mw’abana bawe oku bilolere Yehova. Oganire oku bilolere Yehova n’ebintu byoshi binja akujirire. (Kum. 6:6, 7; Isa. 63:7) Okujira ntyo kuli kw’akamaro ahanene akaba orhazigana kuyiga n’abana bawe ahambuga. Christine rhwaganiragako burhanzi, aderhere: “Ntaliri nazigana kubona gurhe nabwira abana oku bilolere Yehova ahambuga. Naliri nakolesa akasanzi koshi-koshi kakachilerhere, rhwaliri rhwaja kuchilambagiza n’okushona orhusozi n’orhubanda eyi rhunali rhwaganira ku Yehova n’okubintu binja alemere, rhwanaganira na ku binene by’ekiroho. Abana bani babere bakula, nahirabo omurhima bagende bajira efunzo lyabo-lyabo lye Biblia.” Oku bwindi, oderhe bwinja olubaga lwa Yehova na bene-benyu na bali-benyu. Orhaderhaga abashamuka kubi. Eby’oli waderha oku bibalolere nji byakarhuma abana bawe babayegera amango nji baba bakeneere oburhabale.

11. Nk’oku olwandiko lwa Yakobo 3:18 luderhere, bulagurhe bili by’akamaro okujira omurhula ahambuga?

¹¹ Ojire omurhula ahambuga. Buli mango, oyinje wayereka balo ok’omuzigiire ozigiire n’abana bawe. Oganire na balo oku bwirhonzi n’oku bukenge, onayigirize abana bawe gurhe nabo bakajira ntyo. Omu kujira ntyo, walerha omurhula gwakarhuma byabayorohera kuyiga oku bilolere Yehova. (Osome Yakobo 3:18.) Waza oku mufano gwa Jozsef, oli painiya ominuzize omu Rumani. Amango aliri akula, eshe alirhumire byamukomerera ku kolera Yehova, yewe, nyina, n’abana babo. Jozsef aderhere: “Nyama aliri achihangana bwenene y’omurhula guba omu mwerhu. Darha aliri wakuderha ehonyole, nyama naye aliri mwirhonzi. Amango aliri abona oku byarhukomerere  kukenga darha, aliri arhuyereka olwandiko lwa Waefeso 6:1-3. Naho anaja aganira oku ngeso zinja za darha n’okurhurhabala rhurhegeere bulagurhe rhukwanene kumukenga. Echola chaliri charhabala omulala gwerhu gube m’omurhula.”

12. Nk’oku olwandiko lwa 2 Ti 1:5 luderhere, gurhe omufano gwa Enise gwalirhabere ku Timoteo?

¹² Osome 2 Timoteo 1:5. Enise alilekere Timoteo omufano gwinja. Akwanene kuba ey’alimuyigirize ok’obwemere b’okuli bubonekana kugerera ebijiro. (Yak. 2:26) Nta ngangane, Timoteo aliri abona okw’ebijiro bya nyina byalishunikirwe n’obuzigire bukomere aliherhe ku Yehova. Kweri alichibwenere ok’okukolera Yehova kwalilerhere nyina obusime. Timoteo aliyungukire n’omufano gwa Enise si? Entumwa Paulo aliderhe oku, Timoteo aligwerhe obwemere bukomere kuguma na nyina. Obola bwemere burhafaga chakuyinja ntya-ntya. Alibwene obwemere bwa nyina, anabuyiganya. Intyo kon’oko zene, banyama banene barhabere emilala yabo ekolere Yehova “buzira chinwa.” (1 Pe. 3:1, 2) Nawe wakagala kujira ntyo. Nka gurhe?

13. Bulagurhe banyama bakwanene kujira obuzigire bwabo haguma na Yehova b’obubage bw’engenzi ku byoshi?

¹³ Obone ok’obwira bwawe haguma na Yehova b’obw’akamaro ku byoshi. (Kum. 6:5, 6) Nawe oli wachihangana bwenene kuguma na banyama banene. Yiwamala ebisanzi byawe, efuranga, ero n’ebindi, y’ohereza abana bawe ebintu by’omubiri bakeneere. Aliko orhakwanene kuva wagwarha binene by’okujira mp’ove wabula akasanzi k’okukomeza obwira bwawe haguma na Yehova. Buli mango oyinje warhola akasanzi k’okuja wasalira wenyine, okujira efunzo lyawe-lyawe lye Biblia, n’okuja oku mbuganano z’echibaga. Omu kujira ntyo, wachikomeza ekiroho n’okuyereka omulala gwawe olwiganyo lwinja chiro n’oku bandi.

14-15. Bichi omufano gwa Leanne, Maria, na João gwakuyigirize?

¹⁴ Yunva emifano migeke ya misole miguma yayigire kuzigira Yehova n’okumulangalira omu kulolera ku banyina: Leanne, mwali wa Christine aderhere: “Rhurhakayigire Ebiblia na darha ali ahambuga. Aliko nyama arhaliri agosa embuganano chiro. Chiro akaba oku rhurhalimenyere binene oku bilolere Ebiblia, ebijiro byage byalirhurhabere rhugwarhe obwemere bukomere. Rhwamenyaga okw’Abahamirizi ba Yehova banayigiriza okuli eyi rhurhanasaga j’oku mbuganano chiro.”

¹⁵ Maria, ey’eshe mango maguma aliri alibuza omulala gwabo eju y’okuja oku mbuganano, aderhere ntya: “Nyama ali muguma omu bali-berhu b’obushiru bwenene imenyere. Amango nalinchiri mwana, hali ebinaliri nalahira kukola mango maguna eju y’okuyubaha okuntu abandi baderha. Aliko okubona kangana gurhe aliherhe obushiru, gurhe aliri aheba Yehova embere buli mango omu kalamo kage, byalintabere mpime echibazo ch’okuyubaha abantu.” João, ey’eshe aliri abuza omulala gwabo kuganira eby’ekiroho ahambuga, ashambere mpu: “Nakaderha okw’echampumaga oku murhima bwenene, kuli kubona oku nyama aliri tayari kuleka buli choshi y’asimisa darha; olekere obuzigire bwage ku Yehova.”

16. Bichi omufanao gwa nyina w’abana gwakarhabala mw’abandi?

¹⁶ Banyama, muyibuke okw’abandi bakalolera oku mufano gwenyu. Nka gurhe? Waza gurhe omufano gwa Enise gwalirhabere entumwa Paulo. Aliyandikire ok’obwemere bwa  Timoteo burhali mu bulyalya “bwalirhangire kuba buli mu . . . Enise.” (2 Ti. 1:5) Mangochi Paulo arhegeeraga burhanzi obwemere bwa Enise? Nkabaga amango m’olugenzi lwage lurhanzi l’obumisiyonere y’abuganaga Loise na Enise omu Listra, anarhabalabo babe Bakristu. (Mdo. 14:4-18) Wazaga lero: Amango Paulo ayandikira Timoteo, enyuma wa myaka 15 ntya, alichiyibukire ebijiro by’obwemere bya Enise, anaderha ok’omufano gwage gukwanene guyiganywe! Kweri, omufano gwage gwalihirire Paulo omurhima bwenene, gwanalirhabere abandi Bakristu balilamire mw’echola chihe. Akaba oli walemba abana wenyine, nkabaga balo arhachiliho changwa arhali Muhamirizi; ochizere oku omufano gwawe g’obwemere gwarhabala gunakomeze abalamire hofi nawe.

17. Bichi wakajira akaba oli wabona nk’omwana wawe arhali akolesa eby’oli wamuyigiriza

¹⁷ Gurhe si akaba oli wabona nk’omwana wawe arhali akolesa eby’omubwirire chiro akaba ok’oli wajira okwawe koshi? Oyibuke ok’okuyigiriza omwana kuhemere ebisanzi. Nk’okw’eyila foto eyerekene, amango wamarhwera emburho, hali oku wakachibaza akaba nji yanakula n’okuhana amalehe. Chiro akaba ok’orhakamenya gurhe byaba buzinda, wagenderera kuyimimira y’ekula. (Mk. 4:26-29) Konakuguma, hali amango nyina wabana akachibaza akaba kweri y’anarhabala abana bage bazigire Yehova. Orhakamenya gurhe byaba omusezi. Aliko wakagenderera kujira okwawe koshi obayigirize, ahola ey’oli wabayereka enjira yakabarhabala babe bera ba Mungu.​—Mez. 22:6.

18. Gurhe Yehova akarhabala abana bawe babe bera bage?

¹⁸ Kurhenga mira, Yehova arhabere basole banene babe bera bage. (Zb. 22:9, 10) Akanarhabala abana bawe nabo bakule ekiroho akaba balonzeze. (1 Ko. 3:6, 7) Chiro akaba oku bishushire nk’abana bawe barhali bakolera Yehova n’omurhima goshi, yewe agenderera kuzigirabo. (Zb. 11:4) Bakajira “ebiyerekene oku balonzeze kusimisa Yehova,” ahola anarhabalabo babe bera bage. (Mdo. 13:48; 2 Ny. 16:9) Akakurhabala oderhe echintu chinja omu kasanzi abana bawe balikeneere kuchiyunva. (Mez. 15:23) Akashunika mwene-werhu changwa mwali-werhu mwinja omu chibaga ayerekebo olwiganyo lwinja. Chiro n’amango abana bawe bamakula, Yehova akashuba yibusabo echintu wabayigirizaga mira. (Yoh. 14:26) Okagenderera kuyigiriza abana bawe kugerera ebinwa n’ebijiro byawe, Yehova akugisha.

19. Bulagurhe wakachizera oku Yehova akuyemerere?

¹⁹ Eby’abana bawe bachishoga kujira, arhali by’ebyarhuma Yehova akuzigira changwa nanga. Akuzigiire bulala nawe omuzigiire. Akaba oli walemba abana wenyine, Yehova akulaganyize okw’aba Eshe w’abana bawe na Mulanzi wawe. (Zb. 68:5) Orhakamenya akaba abana bawe bachishoga kukolera yehova changwa nanga. Aliko okagenderera kulangalira oburhabale bwage n’okujira ebinja nk’oku obuhashe bwawe bunali, akuyemera.