1-2. (1) Enikes yog leej twg thiab nws ho muaj kev nyuaj siab li cas? (2) Piav daim duab ntawm lub khaum.

 TXAWM phau Vajlugkub tsis piav txog Timautes ua kev cai raus dej li cas los yog peb ua tib zoo zaum tsaws xav tej zaum nws niam Enikes yuav zoo siab tshaj plaws li. (Pajlug 23:25) Enikes sawv nreg nroos ntawm ib sab ntsia ntsoov thaum Timautes mus rau hauv dej. Enikes niam sawv ntawm nws ib sab puag rawv nws xwb pwg. Ntshe Enikes twb pem pa tag li thaum nws pom nws tus me tub raus nrov plog ploj ntais rau hauv cov dej lawm. Ces tus me tub txawm tawm plaws hauv dej rov los thiab ua ntsej muag luag ntxhi, Enikes txawm tauv tsis taus nws lub kua muag. Zaum no Enikes pab tau nws tus me tub los ntseeg Yehauvas thiab paub Yexus lawm tiag tiag li. Enikes muaj kev nyuaj siab li cas thaum nws cob qhia nws tus me tub?

² Timautes niam thiab txiv nyias muaj nyias ib txoj kev ntseeg. Nws txiv yog neeg Kilis hos nws niam thiab niam tais yog neeg Yudais. (Tes Haujlwm 16:1) Thaum Enikes thiab nws niam nkawv pib los ntseeg, Timautes tab tom nto hluas plaws. Yog li ntawd, lawv tsev neeg nyias thiaj coj lawm nyias ib txoj kev ntseeg. Vim Timautes twb paub tab lawm, nws yuav xaiv nrog tus twg? Ua li nws puas yuav raws nws txiv es coj nws txiv tej dab qhuas? Los yog coj cov Yudais tej kev cai uas nws ib txwm paub? Los sis nws yuav hloov los ua Yexus ib tug thwj tim?

3. Raws li Pajlug 1:8, 9, Yehauvas saib cov niam uas txhawb ntshis lawv tej me nyuam kom los nrog nws sib raug zoo li cas?

³ Cov niam tsev ntseeg Yehauvas niaj hnub niam no los yeej pab lawv tsev neeg kawg nkaus li. Lawv muab siab rau ntua  txhawb kom lawv cov me nyuam kub siab lug teev tiam Yehauvas. Vajtswv Yehauvas saib lawv rau nqi kawg li. (Nyeem Pajlug 1:8, 9.) Yehauvas ua tib zoo qhia cov niam kom lawv txawj cob qhia lawv tej me tub me nyuam los ntseeg nws.

4. Niaj hnub niam no cov niam ntsib tej kev nyuaj siab twg?

⁴ Cov niam yeej ntshai rwg tsam lawv tej me tub me nyuam ho hloov siab tsis kam teev tiam Yehauvas. Lawv yeej paub ntsoov tias Xatas lub qab ntuj neeg no yeej haub ntxias lawv tej me tub me nyuam kawg li. (1 Petus 5:8) Muaj ib txhia yog ib txhais yim neeg hos ib txhia yog cov niam uas tus txiv tsis teev tiam Yehauvas ces lawv yuav tau cob qhia lawv tej me tub me nyuam kom ntseeg Yehauvas. Xws li muaj ib tug muam ntseeg npe hu ua Ntsuab. b Nws hais tias: “Kuv tus txiv yeej yog ib tug txiv tsev zoo kawg li tiam sis nws txwv tsis pub kuv cob qhia wb cov me nyuam txog Yehauvas. Ib xyoos tas ib xyoos tuaj, kuv lub kua muag yeej si laim tsis paub tu vim kuv tsis paub xyov tej kuv cov me nyuam puas yuav los paub Yehauvas.”

5. Nyob rau hauv zaj kawm no yuav piav txog dab tsi?

⁵ Cov niam tsis txhob rawm maj tag kev cia siab, nej yeej pab tau nej cov me nyuam ib yam li Enikes thiab. Nyob rau hauv zaj kawm no, nej yuav kawm seb Enikes tso tau tus yam ntxwv li cas rau nej xyaum xwv nej thiaj paub cob qhia nej tej me nyuam los ntawm tej nej hais thiab tej nej ua. Tsis tas li ntawd, seb Yehauvas ho pab tau nej li cas ntxiv.

6. Raws li 2 Timautes 3:14, 15, ua li cas Timautes ho ua tau Yexus ib tug thwj tim?

⁶ Thaum Timautes tseem yog ib tug me nyuam yaus, Enikes yeej ua npaum li nws ua tau los cob qhia nws tus me tub txog Vajtswv Txoj Lus raws li cov neeg Yudais nkag siab xwb. Lub caij no, Enikes paub hais tias tus Mexiyas yuav los tiam sis tsis paub tias Yexus yog tus Mexiyas. Txawm Timautes paub Vajtswv Txoj Lus los puas yuav pab tau nws los ua Yexus ib tug thwj tim? Nws yog ib tug tub hluas lawm ces nws yeej xaiv tau tias nws yuav ua lub neej zoo li cas. Vim Timautes niam sib sib zog pab nws, yog li ntawd nws “yeej paub” txog Yexus zoo heev. (Nyeem 2 Timautes 3:14, 15.) Enikes zoo siab kawg nkaus li uas nws tau qhia nws tus tub txog Yehauvas tab txawm yuav muaj kev nyuaj siab npaum li cas. Enikes lub npe txhais hais tias “kov yeej.” Yog li ntawd, nws kov yeej lawm tiag.

7. Enikes txhawb nws tus tub li cas tom qab ua kev cai raus dej tag?

⁷ Txawm Timautes ua kev cai raus dej tag lawm los Enikes haj tseem txhawj nws tus tub kawg li. Xws li Enikes tsis paub xyov Enikes tus tub lub neej yuav xaus li cas. Nws yuav mus nrog tej neeg zoo li cas? Ua li nws puas yuav mus kawm ntawv hauv lub nroog Athees thiab mloog tej xib hwb qhia lawv tej tswv yim? Nws puas yuav siv tag nrho nws lub zog thiab nws lub sij hawm mus khwv kom muaj txiag nplua nuj? Enikes xaiv tsis tau seb Timautes yuav ua li cas tiam sis nws haj tseem pab tau kom nws tus tub muaj kev sib raug zoo nrog Yehauvas thiab ris Yexus txiaj ntsig. Tsis yog cov niam txiv uas nyias coj nyias ib txoj kev ntseeg thiaj li txhawj nyob tsam pab tsis tau lawv cov me nyuam los ntseeg Yehauvas tab sis cov niam txiv uas ob leeg puav leej ntseeg Yehauvas los yeej txhawj tib yam nkaus. Enikes tso tau tus yam ntxwv li cas rau cov niam txiv tau xyaum?

8. Tus niam pab tau tus txiv cob qhia nkawv tej me nyuam li cas?

⁸ Nco ntsoov kawm Vajlugkub nrog nej cov me nyuam. Cov muam, yog nej tus txiv nrog nej  ntseeg Yehauvas ces Yehauvas xav kom nej nqis tes pab nej tus txiv cob qhia cov me nyuam. Ib txog ke uas nej pab tau tsis tseg tsis tu yog hnub nej tsev neeg teem kawm Vajlugkub ua ke. Nco ntsoov qhuas thiab hais txog qhov nej kawm Vajlugkub ua ke ntshuj ntshis. Tsis tas li ntawd, nrhiav txhua txoj hau kev los txhawb kom sawv daws kub siab lug kawm. Tej zaum nej kuj pab nej tus txiv npaj seb yuav kawm dab tsi rau dab tsi. Ntxiv ntawd, yog hais tias nej ib txhia me nyuam ho hlob me ntsis lawm ces nej kuj pab tau nej tus txiv siv phau ntawv Nyob Kaj Siab Lug Mus Ib Txhis los qhia rau ib tug zuj zus.

9. Cov niam tsis hais cov ib txhais yim neeg los sis cov tus txiv tsis nrog lawv ntseeg yuav mus nrhiav kev pab qhov twg?

⁹ Cov niam uas yog ib txhais yim neeg thiab cov uas lawv tus txiv ho tsis nrog lawv ntseeg Yehauvas yuav tau nkaus tes hlo los cob qhia lawv cov me nyuam kom paub Yehauvas. Yog tias nej tsev neeg muaj raws li tau hais los no, tsis txhob rawm maj tag kev cia siab. Yehauvas yeej yuav cev tes los pab nej. Siv tej uas Yehauvas lub koom haum tau luam tawm los pab nej cob qhia nej tej me nyuam. Nug lwm cov niam txiv seb lawv ho tau siv dab tsi los mus pab lawv tej me tub me nyuam thaum lawv kawm Vajlugkub ua ib tse neeg. c (Pajlug 11:14) Nej kuj thov tau Yehauvas kom pab nej txawj nrog nej cov me nyuam sib txuas lus xwv nej thiaj paub tej nyob nraim nkoos hauv nej tus me nyuam lub siab ntsws. (Pajlug 20:5) Nej nug tau li no kom nej tus me nyuam qhib siab rau nej, ‘Hnub no koj ua dab tsi lawm xwb?’

10. Nej ua tau li cas ntxiv los pab nej cov me nyuam kom lawv thiaj paub Yehauvas?

¹⁰ Nrhiav txhua txoj hau kev los cob qhia nej tej me nyuam kom paub Yehauvas. Qhia rau nej cov me nyuam txog tej yam Yehauvas tau pab nej yog hais tias nej tsis tshua muaj sij hawm cob qhia lawv hauv vaj hauv tsev. (2 Kevcai 6:6, 7; Yaxayas 63:7) Ntsuab tau hais li no tias: “Kuv tsis tshua muaj sij hawm qhia Yehauvas rau kuv cov me nyuam ces kuv siv txhua lub sij hawm kuv muaj nrog lawv los cob qhia xwb. Xws li thaum peb mus taug kev los sis caij nkoj ua ke, kuv thiaj qhia txog tej Yehauvas tau tsim rau lawv. Thaum kuv cov me nyuam loj zuj zus tuaj lawm, kuv txawm kom lawv kawm lawv Vajlugkub.” Nco ntsoov hais qhov zoo txog Yehauvas lub koom haum thiab cov kwv tij nkauj muam. Tsis txhob yws cov txwj laus. Tej yam nej hais txog cov txwj laus yuav cob qhia nej cov me nyuam kom lawv mus cuag los sis tsis mus cuag cov txwj laus thaum lawv tau chaw ti.

11. Raws li Yakaunpaus 3:18, vim li cas zoo rau txhua tus uas nyob hauv tsev neeg muaj kev sib haum xeeb?

¹¹ Nco ntsoov txhawb kom nej tsev neeg nyob sib haum xeeb. Cov niam, cia li hu nej tus txiv thiab nej cov me nyuam luag ntxhi. Txhob rhuav nej tus txiv rau ub rau no thiab cob qhia kom nej tej me nyuam txawj hwm lawv txiv. Yog nej xyaum coj li no yuav pab tau kom txhua tus hauv tsev neeg nyob sib haum xeeb thiab muaj siab kawm Yehauvas. (Nyeem Yakaunpaus 3:18.) Xws li muaj ib tug tho kev tshwj xeeb npe hu ua Txoov uas nyob hauv teb chaws Laumenias (Romania). Thaum nws tseem yau, nws txiv txwv tsis pub nws niam thiab lawv cov me nyuam kawm Yehauvas. Nws hais tias: “Kuv niam yeej txhawb kom peb tsev tib neeg nyob sib haum xeeb. Yog kuv txiv yim ua heev, kuv niam yim ua zoo rau nws. Thaum kuv niam pom hais tias peb tsis tshua hwm kuv txiv lawm ces kuv niam muab cov nqe Vajlugkub hauv Efexus 6:1-3 coj los nthuav nyeem rau peb mloog. Tom qab  ntawd, kuv niam piav txog tej yam zoo zoo uas kuv txiv tau ua rau peb tsev neeg thiab kom peb nco ntsoov ris kuv txiv txiaj ntsig. Nws ua li no yam li nws thau yav cav taws tawm hauv qhov cub.”

12. Raws li 2 Timautes 1:5, Enikes tus yam ntxwv txhawb tau Timautes li cas?

¹² Nyeem 2 Timautes 1:5. Enikes tso tau yam ntxwv zoo kawg li rau Timautes xyaum. Tej zaum nws cob qhia Timautes tias tsis yog lam ntseeg ntawm lub ncauj xwb, yus tes hauj lwm yuav tsum qhia tias yus muaj kev ntseeg. (Yakaunpaus 2:26) Timautes yeej pom hais tias nws niam yuav ua ib yam twg nws niam yeej xav txog Yehauvas ua ntej. Tsis tas li ntawd, nws niam nyob kaj siab lug teev tiam Yehauvas. Enikes tus yam ntxwv pab tau Timautes heev. Yog li ntawd, tus tub txib Paulus thiaj pom tias Timautes muaj kev ntseeg ib yam nkaus li nws niam ntag. Tsis yog Timautes lam tau lam muaj kev ntseeg tiam sis yog nws xyaum los ntawm nws niam. Niaj hnub niam no, muaj ntau leej niam kuj pab tau lawv tsev neeg los teev tiam Yehauvas tsis tas “yuav hais ib los li.” (1 Petus 3:1, 2) Cia peb mus saib seb peb yuav pab tau peb tsev neeg li cas.

13. Vim li cas txoj kev sib raug zoo nrog Yehauvas yuav tsum yog thawj yam ntawm leej niam lub neej?

¹³ Txoj kev sib raug zoo nrog Yehauvas yuav tsum yog thawj yam ntawm leej niam lub neej. (2 Kevcai 6:5, 6) Muaj ntau leej niam yeej khwv kawg nkaus li. Lawv tau sej sij hawm, siv nyiaj siv txiaj, tsis tau dab ntub, thiab ua ntau yam los pab lawv cov me nyuam kom noj qab haus huv. Txawm nej ua tej no los pab nej tsev neeg los nco ntsoov nrhiav sij hawm los tsav nej txoj kev sib raug zoo nrog Yehauvas. Lauj sij hawm los thov Yehauvas, kawm Vajlugkub, thiab mus txhua txoj kev sib txoos. Thaum nej ua li no lawd, nej txoj kev sib raug zoo nrog Yehauvas yuav hlob zuj zus thiab nej yuav tso tau ib tug yam ntxwv zoo rau nej tsev neeg thiab lwm tus tau xyaum.

14-15. Nej khaws tau Lug, Ntxoo thiab Choj lawv tej lus li cas?

¹⁴ Peb yuav mus piav txog ob peb tug hluas uas ntseeg Yehauvas vim lawv niam tso tau ib tug yam ntxwv zoo rau lawv xyaum. Lug uas yog Ntsuab tus ntxhais hais li no: “Thaum kuv txiv nyob hauv tsev mas peb kawm tsis tau Vajlugkub li. Txawm li ntawd los, kuv niam yeej mus txhua txhua txoj kev sib txoos tsis tu ncua. Txawm peb tsis paub Vajlugkub ntau pes tsawg los tej nws ua txhawb tau peb txoj kev ntseeg kawg li. Peb yeej paub hais tias Yehauvas Cov Tim Khawv yeej qhia qhov tseeb txog Vajtswv ua ntej peb tuaj koom kev sib txoos.”

¹⁵ Muaj ib tug muam ntseeg npe hu ua Ntxoo hais tias nws txiv cem thiab ntaus lawv heev kawg li thaum lawv mus kev sib txoos. Nws tau hais li no tias: “Kuv niam mas muaj siab tawv kawg li. Thaum kuv tseem yau, kuv tsis kam ua qho yam vim kuv txhawj nyob tsam raug luag thuam. Thaum kuv pom kuv niam muaj siab tawv qhawv teev tiam Yehauvas, pab tau kom kuv tsis txhob ntshai tib neeg.” Muaj ib tug kwv tij hu ua Choj hais tias nws txiv txwv tsis pub lawv tsev neeg piav ib los txog Yehauvas li. Nws tau li hais li no tias: “Qhov uas pab tau kuv tshaj plaws yog kuv niam tsis yeem tso Yehauvas tseg tab txawm nws twb tso txhua yam pov tseg kom haum kuv txiv siab.”

16. Qhov uas leej niam coj zoo yuav txhawb tau lwm tus li cas?

¹⁶ Cov niam, nco ntsoov hais tias lwm tus yuav ntsia ntsoov nej seb nej coj li cas. Enikes tus yam ntxwv mas txhawb tau Paulus kawg li. Paulus thiaj hais li no rau Timautes tias: “Koj  muab siab rau ntseeg ib yam li . . . koj niam Enikes.” (2 Timautes 1:5) Thaum Paulus mus ncig qhia txoj moo zoo thawj zaug hauv lub nroog Lixathas, nws tau ntsib Lau-is thiab Enikes nkawv thiab tau pab kom nkawv los ua Yexus ib tug thwj tim. (Tes Haujlwm 14:4-18) Tau 15 lub xyoos tom qab no, nws sau ntawv rau Timautes thiab haj tseem hais zoo zoo txog Enikes tias Enikes muaj kev ntseeg heev tsim nyog sawv daws xyaum. Enikes tsis yog txhawb tau Paulus xwb, nws haj tseem txhawb tau coob leej ntau tus ntseeg nyob rau thawj 100 xyoo thiab. Yog hais tias nej yog ib txhais yim neeg los yog nej tus txwj nkawm ho tsis nrog nej teev tiam Yehauvas, nco ntsoov tias nej yeej tso tau yam ntxwv zoo heev rau lwm cov tau xyaum.

17. Nej yuav ua li cas yog hais tias nej tus me nyuam ho tsis xav teev tiam Yehauvas?

¹⁷ Yog hais tias nej tus me nyuam ho tsis xav teev tiam Yehauvas los nco ntsoov tias tsis yog ib ntsais muag xwb txawm siv yuav cob qhia tau nej tej me nyuam. Xws li nyob rau hauv daim duab, thaum nej cog ib lub noob rau hauv cov av tej zaum nej yuav xav hais tias yuav tav twg mam li tau tej txiv los noj. Txawm tias nej ua tsis tau kom tawg paj txi txiv los nej yeej ywg dej thiab tu ntshis xav hais tias ib hnub twg yeej yuav hlob xwb xwb li. (Malakaus 4:26-29) Zoo ib yam li ntawd, ua ib leej niam mas yeej txhawj txhawj seb yus tej me nyuam puas yuav teev tiam Yehauvas los tsis teev tiam. Nej yeej yuam tsis tau nej cov me nyuam kom teev tiam Yehauvas. Tiam  sis yog nej ua npaum li nej ua tau los cob qhia lawv ces tej zaum ib hnub nram ntsis lawv yuav nrog nej teev tiam Yehauvas.​—Pajlug 22:6.

18. Yehauvas pab tau nej cov me nyuam txoj kev ntseeg li cas?

¹⁸ Txij puag thaum ub los, Yehauvas yeej pab tau ntau ntau tus me nyuam los nrog nws sib raug zoo. (Phau Ntawv Nkauj 22:9, 10) Nws yeej pab tau nej cov me nyuam tib yam nkaus yog hais tias lawv muaj lub siab xib nrhiav nws. (1 Kauleethaus 3:6, 7) Txawm hais tias nej cov me nyuam tsis tshua muab siab teev tiam Yehauvas los nws haj tseem hmov tshua lawv. (Phau Ntawv Nkauj 11:4) Yog lawv thov hu txog nws ces nws yeej cev tes loo mus pab lawv kiag. (Tes Haujlwm 13:48; 2 Xwmtxheej Vajntxwv 16:9) Tsis tas li ntawd, Yehauvas yuav pab kom nej hais tau qho lo lus los txhawb lawv rau thaum lawv xav tau kev txhawb zog. (Pajlug 15:23) Los sis nws kuj tshoov cov kwv tij nkauj muam hauv koom txoos lub siab lub ntsws kom lawv muaj siab xav pab nej cov me nyuam. Txawm nej cov me nyuam tiav niam tiav txiv lawm los Yehauvas kuj tshoov tau lawv lub siab lub ntsws kom lawv nco ntsoov tej uas puag thaum ub nej tau qhia rau lawv. (Yauhas 14:26) Yog li ntawd, nco ntsoov cob qhia nej cov me nyuam thiab ua yam ntxwv zoo rau lawv xyaum xwv Yehauvas thiaj pom qab pab lawv.

19. Vim li cas nej ho paub hais tias Yehauvas pom zoo tej uas nej ua?

¹⁹ Yehauvas txoj kev hlub tshua nej tsis yog nyob ntawm seb nej cov me nyuam yuav teev tiam nws los tsis teev tiam. Nws hmov tshua nej vim nej teev tiam nws. Yog hais tias nej yog ib txhais yim neeg, Yehauvas cog lus tias nws yuav ua nej cov me nyuam Txiv thiab tsom kwm nej. (Phau Ntawv Nkauj 68:5) Txawm nej yuam tsis tau nej cov me nyuam kom teev tiam Yehauvas los yog nej tso siab plhuav rau nws thiab ua npaum li nej ua tau los cob qhia lawv ces twb txaus Yehauvas siab lawm.