1-2. (a) Sapa Eunis, lalu nama penanggul ke ditapi iya lebuh ngajar Timoti pasal Jehovah enggau Jesus? (b) Terangka utai ke nyadi ba gambar di mua majalah.

 TAJA PAN Bup Kudus nadai nerangka pasal maya Timoti dibaptisa, tang kitai ulih ngambarka pengaga ati Eunis sehari nya. (J-lam. 23 :25) Gambarka, Eunis benung meda Timoti bediri dalam ai. Naka meh pengaga ati Eunis meda Timoti deka dibaptisa. Iya tuchum ngagai Lois, ini Timoti, ke benung bediri berimbai enggau iya. Timoti lalu diselamka dalam ai. Udah nya, iya pansut ari ai sungai lalu tuchum. Eunis berengkah nyabak laban iya balat gaga ati. Taja pan tusah ba Eunis, tang iya udah mujur ngajar Timoti rinduka Jehovah sereta Jesus Kristus. Taja pia, nama penanggul ke ditapi Eunis lebuh iya deka ngajar Timoti?

² Timoti dibesaika apai indai ke enda sama pengarap. Apai iya orang Gerika, lalu indai sereta ini iya orang Judah. (SKR. 16:1) Engka Timoti agi nembiak lebuh Eunis enggau Lois nyadi orang Kristian. Tang apai iya enda nyadi orang Kristian. Nya alai, ni bagi pengarap ke deka dititihka Timoti? Iya udah chukup umur ulih ngaga pemutus kediri empu. Kati iya deka milih  pengarap ke dipegai apai iya? Kati iya deka nitihka adat orang Judah ke udah diajar ngagai iya kenyau ari mit? Tauka iya deka nyadi murid Jesus Kristus?

3. Nitihka Jaku Dalam 1:8, 9, nama runding Jehovah pasal bala indai ti bebendar nulung anak sida nyadi pangan Iya?

³ Bala indai kemayaharitu mega rinduka ruang bilik sida. Sida ngemeratka pengawa nulung anak sida bisi kaul ti rapat enggau Jehovah lebih agi ari utai bukai. Lalu, Jehovah amat beterima kasih ke pengawa sida ti bebendar nya. (Bacha Jaku Dalam 1:8, 9.) b Jehovah udah nulung bala indai ngajar anak sida ngambika rinduka Iya lalu nyembah Iya.

4. Nama penanggul ke ditapi bala indai kemayaharitu?

⁴ Bala indai kesuah iya tentu bisi berunding sekalika anak sida deka nyembah Jehovah baka Timoti. Apai indai nemu, dunya Sitan deka balat nekan anak sida. (1 Pet. 5:8) Nambahka nya, mayuh ari bala indai bisi napi penanggul lebuh ngemesaika anak sida laban nadai laki tauka laban laki sida enda nyembah Jehovah. Ambika chunto, menyadi Christine c madahka: “Laki aku seiku apai ti manah lalu ibuhka kami sebilik. Tang iya balat nagang aku ngemesaika anak kami nyadi Saksi Jehovah. Aku suah nyabak laban berunding sekalika anak aku deka nyembah Jehovah tauka enda.”

5. Nama deka dikerandauka kitai ba artikel tu?

⁵ Baka Eunis, kita ke indai mega ulih mujur ngajar anak kita ngambika rinduka Jehovah lalu milih deka nyembah Iya. Ba artikel tu, kitai deka berandauka baka ni bala indai ulih neladan Eunis ngajar anak nengah jaku sereta ulah. Kitai mega deka belajar baka ni Jehovah deka nulung bala indai.

6. Nitihka 2 Timoti 3:14, 15, baka ni Timoti nyadi orang Kristian?

⁶ Lebuh Timoti agi mit, indai iya bebendar ngajar iya “Bup Kudus.” Tu ketegal orang Judah meretika ajar Bup Kudus. Endang amat, penemu Eunis bisi tatak laban iya enda nemu pasal Jesus Kristus. Taja pia, utai ke dipelajarka Timoti ari Bup Kudus agi ulih nulung iya nyadi orang Kristian. Tang kati iya deka nyadi orang Kristian? Pemutus tu tepulai ngagai Timoti empu. Tang kitai nemu, Timoti majak arapka pemendar pasal Jesus laban Eunis udah ngajar iya. (Bacha 2 Timoti 3:14, 15.) Eunis amat gaga ati laban udah ngajar anak iya pasal Jehovah taja pan enda senang. Kebendar iya, nama Eunis mai reti “ngalahka.” Iya idup sejalai enggau reti nama iya. Eunis udah ngalahka tauka mutarka penanggul ngambika ulih nulung Timoti rinduka sereta nyembah Jehovah.

7. Baka ni Eunis nulung anak iya terus ngaga pemansang pengudah dibaptisa?

⁷ Lebuh Timoti udah dibaptisa, iya udah nyapai juluk ati ti amat penting ba pengidup iya. Tang Eunis agi irau taja pan Timoti udah dibaptisa. Ambika chunto, baka ni Timoti deka ngena pengidup iya? Kati iya deka begulai enggau orang ke enda manah? Kati iya deka ngagai sekula ba Atens lalu nerima ajar ti pelesu sereta penemu mensia ba dia? Kati iya deka angkunka pengaya ke ulih masau awak, pengering sereta umur iya ke agi biak? Eunis enda ulih ngaga pemutus ke Timoti. Tang iya agi ulih nulung Timoti ngaga pemutus enggau manah. Baka ni? Iya ulih terus nulung Timoti ngenalamka pengerindu ngagai Jehovah sereta asai ati beterima kasih ngagai semua utai ke udah digaga Jesus. Kemayaharitu, ukai semina sida ke bisi kaling pengidup ti enda sama pengarap napi penanggul nulung anak rinduka  Jehovah. Indah apai indai ke sama nyembah Jehovah mega enda senang deka nulung anak sida nyembah Jehovah. Nama ulih dipelajarka apai indai ari teladan Eunis?

8. Baka ni seiku indai ulih nulung laki iya ke Saksi lebuh ngajar anak sida pasal Jehovah?

⁸ Belajarka Bup Kudus enggau bala anak nuan. Kita ke indai, enti laki nuan dalam pemendar, Jehovah dekaka nuan nulung laki nuan ngajar bala anak pasal Iya. Siti chara nuan ulih ngereja nya enggau seruran nyukung pengawa Belajarka Bup Kudus enggau Diri Sebilik. Padahka utai ti manah pasal pengawa nya lalu perundingka utai ke ulih digaga nuan ngambika pengawa nya ngerinduka ati sereta ngagaka ati. Ambika chunto, engka nuan ulih nulung laki nuan ngaga pelan ti spesial pasal belajarka Bup Kudus. Nambahka nya, enti bala anak nuan ulih belajarka Bup Kudus kediri empu ngena bup Idup enggau Lantang Belama Iya!, nuan engka ulih besaup enggau laki nuan nulung bala anak ngereja pengawa nya.

9. Enti sema laki iya ukai Saksi, nama ulih nulung indai nya?

⁹ Sekeda indai patut ngiring ba pengawa belajarka Bup Kudus enggau bala anak sida. Sida ngereja tu ketegal sida indai tunggal, tauka ketegal laki sida ukai Saksi. Enti tu nyadi ba nuan, anang meh kelalu irau. Jehovah tentu deka nulung nuan. Kena meh perengka kena ngajar ke disediaka gerempung Jehovah ngambika ulih belajar enggau bala anak nuan. Nuan mega ulih nanya bala apai indai ti bepeneleba pasal chara sida ngena perengka kena ngajar lebuh sida Belajarka Bup Kudus enggau Diri Sebilik sida. d (J-lam. 11:14) Nuan mega ulih besampi minta Jehovah nulung nuan nemu chara berandau enggau anak nuan. Minta Iya nulung nuan ngambika ulih ngena tanya ti ngena ngambika ulih nemu utai ke diperundingka sereta diasaika bala anak nuan. (J-lam. 20:5) Nuan ulih ngena tanya ti mudah baka ‘Nama penanggul ti pemadu besai ke ditapi nuan ba sekula?’ Tanya tu ulih nulung nuan nemu pasal bala anak nuan enggau manah.

10. Nama chara bukai nuan ulih nulung bala anak belajar pasal Jehovah?

¹⁰ Giga meh peluang ngajar bala anak nuan pasal Jehovah. Berandau meh pasal Jehovah sereta padahka semua utai manah ke udah dikereja Iya ngagai nuan. (U-dat. 6:6, 7; Isa. 63:7) Pengawa tu amat penting, kelebih agi enti nuan enda ulih belajar enggau anak nuan ba rumah enggau tetap. Christine, ke disebut ba pun tadi, madahka: “Aku nadai mayuh peluang bejaku pasal Jehovah. Nyadi aku ngiga peluang ke bisi. Kekadang kami bejalai tauka ngayuhka perau ngagai tengah ai. Lebuh maya nya, kami bejaku pasal utai ke digaga Jehovah ti ngalitka ati sereta utai bukai ti ulih nulung sida nyadi pangan Jehovah. Lebuh bala anak aku nyau mansang besai, aku meransang sida belajarka Bup Kudus kediri empu.” Nambahka nya, nuan mega patut nyebut utai ti manah pasal gerempung Jehovah sereta bala menyadi Kristian. Anang bejaku jai pasal bala tuai gempuru ba mua anak nuan. Utai ke disebut nuan deka nentuka sekalika bala anak nuan deka ngiga bala tuai gempuru lebuh anak nuan begunaka bantu dudi hari ila.

11. Nitihka James 3:18, nama kebuah pemaik patut dikemansangka ba rumah?

¹¹ Ngemansangka pemaik ba rumah. Nuan patut seruran ngayanka pengerindu ngagai laki sereta bala anak nuan. Nuan mega patut bejaku enggau chara ti siru sereta bebasa ngagai laki nuan. Pia mega, latih meh anak nuan  ngereja utai ti sama. Lebuh nuan ngereja nya, tu ulih ngasuh bala anak nuan senang agi belajar pasal Jehovah. (Bacha James 3:18.) Peratika chunto seiku pengerintis spesial ba Romania ke benama Jozsef. Lebuh iya mansang besai, apai iya balat nagang iya, indai iya sereta bala menyadi iya ari nyembah Jehovah. Ku Jozsef: “Indai aku bebendar ngemansangka pemaik ba rumah. Majak apai aku kasar, majak agi indai aku ngayanka penyiru. Lebuh indai beratika kami tusah deka bebasaka sereta ngasika apai kami, iya berandauka Epesus 6:1-3 enggau kami. Udah nya, iya berandau enggau kami pasal pemanah apai, sereta nulung kami meretika kebuah kami patut sayauka iya. Enggau nya, indai udah nulung kami bisi kaul ti manah dalam ruang bilik.”

12. Nitihka 2 Timoti 1:5, baka ni teladan Eunis udah nulung Timoti?

¹² Bacha 2 Timoti 1:5. Eunis netapka teladan ti manah ngagai Timoti. Iya tentu udah ngajar Timoti pasal pengarap patut diayanka nengah ulah. (Jas. 2:26) Timoti nemu ulah ke diayanka indai iya diperansang ari pengerindu iya ti dalam ngagai Jehovah. Timoti nemu indai iya gaga ati laban nyembah Jehovah. Baka ni teladan Eunis nulung Timoti? Rasul Paul madahka Timoti bisi pengarap ti tegap baka indai iya. Pengarap Timoti enda mansang pia aja. Timoti beratika teladan indai iya lalu diperansang nunda iya. Sama mega kemayaharitu, mayuh indai udah nulung ruang bilik sida nyembah Jehovah, lalu tu nyadi ukai “ketegal jaku” sida. (1 Pet. 3:1, 2) Nya alai, baka ni nuan mega ulih ngereja utai ti sama?

13. Nama kebuah bala indai patut ngenuluka kaul enggau Jehovah?

¹³ Kenuluka kaul nuan enggau Jehovah. (U-dat. 6:5, 6) Baka indai ke bukai, nuan mega udah sanggup ngelengkaka mayuh utai. Nuan ngelengkaka awak, duit, enda chukup tinduk sereta utai bukai kena nyaga utai ke diguna bala anak nuan. Tang kingatka, nuan enda patut ngelakka semua pengawa nya ngachau jam nuan negapka kaul enggau Jehovah. Tetapka maya nuan ulih besampi kediri empu, belajarka Bup Kudus kediri empu sereta datai begempuru. Enggau ngereja nya, nuan deka majak semak agi enggau Jehovah lalu nyadi teladan ti manah ke ruang bilik nuan sereta orang bukai.

14-15. Nama ulih dipelajarka nuan ari teladan Leanne, Maria, and João?

¹⁴ Peratika sekeda teladan bala nembiak ke meda teladan indai sida lalu belajar rinduka Jehovah sereta arapka Iya. Anak indu Christine ti pemadu tuai, iya nya Leanne madahka: “Kami enda ulih belajarka Bup Kudus lebuh apai bisi ba rumah. Tang indai selalu datai begempuru. Taja pan kami enda nemu mayuh pasal Bup Kudus, tang teladan indai sereta pengarap iya udah nulung kami menyadi ngemansangka pengarap ngagai Jehovah. Kami nemu Saksi-Saksi Jehovah lama udah ngajar pemendar, indah sebedau kami datai begempuru.”

¹⁵ Maria, bisi apai ti kekadang ngukum sida sebilik ketegal datai begempuru. Iya madahka: “Indai aku seiku menyadi indu ke amat berani. Lebuh aku agi mit, aku kekadang enggai ngereja sekeda utai laban takut enggau jaku orang bukai. Tang aku udah meda pemerani indai aku. Lalu aku mega udah meda baka ni iya ngenuluka Jehovah ba pengidup iya. Tu nulung aku mutarka asai ati ti takut ngagai mensia.” João, bisi apai ti nagang sida bejaku pasal Jehovah tauka Bup Kudus ba rumah. Iya madahka: “Utai ke negu ati aku nya indai sanggup ngelengkaka semua utai. Tang iya enda  sekali-kali deka ngelengkaka pengerindu iya ke Jehovah ketegal deka ngelantangka ati apai.”

16. Baka ni teladan bala indai ulih nulung bala menyadi Kristian?

¹⁶ Baka ni teladan bala indai ulih nulung bala menyadi Kristian? Peratika baka ni teladan Eunis udah nulung Rasul Paul. Iya sedar pengarap Timoti terubah iya “idup dalam . . . Eunis.” (2 Tim. 1:5) Nama utai ke diperatika Paul pasal pengarap Eunis? Lebuh Paul keterubah kali ngereja pengawa pengerintis seberai tasik, iya betemu enggau Lois sereta Eunis ba Listra. Lalu ba dia, iya engka udah nulung seduai iya nyadi orang Kristian. (SKR. 14:4-18) Lebuh Paul nulis surat ngagai Timoti kira-kira 15 taun pengudah nya, Paul agi ingat pengarap Eunis sereta teladan iya ke ulih ditunda! Teladan Eunis udah mayuh meransang rasul Paul sereta bala menyadi Kristian maya abad keterubah. Nya alai, enti nuan ngemesaika anak taja pan nadai bantu ari laki, tauka laki ti enda sepengarap enggau nuan, pechaya meh teladan nuan ulih negapka sereta meransang menyadi Kristian.

17. Enti anak nuan enggai nyembah Jehovah taja pan nuan udah bebendar ngelatih iya, nama patut digaga nuan?

¹⁷ Baka ni enti anak nuan bedau deka nyembah Jehovah? Kingatka, ngelatih anak begunaka awak. Baka gambar ke ditunjukka, lebuh nuan nanam benih, kekadang nuan engka berunding sekalika nya deka tumbuh lalu mansutka buah. Taja pan nuan enda ulih nemu sekalika nya deka tumbuh tauka enda, nuan terus meri ai ngambika iya ulih tumbuh. (Mrk. 4:26-29) Sama mega, nuan engka kala  berunding sekalika pengawa nuan ti bebendar udah nulung bala anak rinduka Jehovah tauka enda. Nuan enda ulih ngubah pemutus ke udah digaga anak nuan. Tang enti nuan terus enggau naka ulih ngelatih anak nuan, nuan meri peluang ngagai sida nyadi pangan Jehovah.—J-lam. 22:6.

18. Baka ni Jehovah ulih nulung bala anak nuan nyadi pangan Iya?

¹⁸ Kenyau ari jeman Bup Kudus, Jehovah udah nulung mayuh bala nembiak nyadi pangan Iya. (Mas. 22:9, 10) Enti bala anak nuan bisi pengingin deka mansang tegap ba pengarap, Jehovah tentu deka nulung sida. (1 Kor. 3:6, 7) Taja pan bala anak nuan bedau nyembah Jehovah enggau pengabis ati sida, tang Jehovah tetap deka rinduka sida. (Mas. 11:4) Lebuh sida nunjukka diri bisi pengingin deka ngelantangka ati Jehovah, Iya deka seruran sedia nulung sida nyadi pangan Iya. (SKR. 13:48; 2 Ban. 16:9) Iya deka nulung nuan tetemuka leka jaku ba maya ti ngena, lebuh bala anak nuan amat begunaka nya. (J-lam. 15:23) Tauka Jehovah engka ngena seiku menyadi Kristian ba eklisia nunjukka pengibuh sereta nulung sida. Indah pengudah bala anak nuan nyau besai tuai, Jehovah agi ulih nulung sida ingatka semua utai ke udah diajar nuan ngagai sida. (Jhn. 14:26) Lebuh nuan terus ngelatih bala anak nuan nengah jaku sereta teladan, Jehovah deka merekatka nuan.

19. Nama kebuah nuan ulih andal Jehovah lantang ati enggau nuan?

¹⁹ Pengerindu Jehovah ke nuan enda bepanggai ba pemutus ke digaga bala anak nuan. Iya rinduka nuan ketegal nuan rinduka Iya. Enti nuan kediri aja ngemesaika bala anak, Jehovah besemaya deka nyadi Apai ke bala anak nuan sereta Penyaga nuan. (Mas. 68:5) Nuan enda ulih ngawal pemutus ke digaga bala anak nuan. Tang enti nuan terus bepanggai ba tulung ari Jehovah lalu nuan enggau naka ulih nulung sida, Jehovah tentu deka lantang ati enggau nuan.