1-2. (a) Sinni si Eunice, anna anni i nappasan na bilang yena? (b) Komentuan i picture ta vungun.

 ARI tam nga mabibbig ta Biblia i istoria nu kunnasi nga na-baptize si Timoteo. Ngem maimajittam tu kitessaya i yena na nga si Eunice turi ta nesimmu yatun. (Prov. 23:25) Imajinammu si Eunice nga proud na proud turi ta egga ngana ta danum si Timoteo. Agga-ngizzi yayya kunne na gapa i kako ni Timoteo nga si Loida nga egga laman ta biko na. Ta sobra nga ka-excited ni Eunice, maggi gaggaddan na i maginango turi ta nelammag si Timoteo ta danum. Tapus, napparassi i danum anna nasingan na si Timoteo nga agga-ngizzi. Ta sobra nga ayayya ni Eunice, mamegafu ngana nga manuru i lua ta mata na. Nawayya na nga ituddu kani Timoteo nga ayatan si Jehova anna i Ana na nga si Jesu-Cristo. Anni tamma ira nga ziga i nappasan ni Eunice tapenu laman metuddu yatun ta ana na?

² Madduma i relihion na magana ni Timoteo. Griego i yama na tapus Judio gapa i yena anna i kako na. (King. 16:1) Posible nga tinedyer si Timoteo turi ta nabbalin tu Cristiano da Eunice anna Loida. Ngem ari nga nabbalin tu Cristiano i yama na. Anni gafu nga relihion i pilian ni Timoteo? Makapaddesision ngana lagapa yayya para ta baggi na ta egga ngana yayya ta fustu nga edad. Pilian na kari i relihion na yama na? Tuttulan na kari i tradision ira na Judio nga netuddu nisa ta kabbinna? Onu mabbalin yayya tu disipulo ni Jesu-Cristo?

3. Segun ta Proverbio 1:8, 9, anni i pagimamma ni Jehova ta pangikaguman na yena ira nga uffunan i ána da nga mabbalin tu kokkofun na?

³ Iddukan gapa na yena ira nga Cristiano i giffamiliadda. Kakayà da nga uffunan i ána da nga mabbalin tu madukko nga kofun ni Jehova. Kuruga tagibaloran na Dios tam danatun nga pangikagumadda. (Bibbigan i Proverbio 1:8, 9.) Aru ngana  nga yena i noffunan ni Jehova tapenu tudduan i ána da nga ayatan anna passerbian yayya.

4. Anni ira i pappasa-pasan na yena ira sangawe?

⁴ Normal laman nu mittan nga mavurung i tadday nga yena nu pilian kari noka na ana na nga masserbi kani Jehova kagitta na kingngua ni Timoteo. Ammu gare na magana ira nga masikan i influwensia na mundo ni Satanas ta ána da. (1 Ped. 5:8) Aru gapa nga yena i marigatan ta pamadakal ta ána da megafu ta single mother ira onu ari nga masserbi kani Jehova i atawa da. Angngarigan na, kunnaw i kagian ni Sister Christine b: “Responsable nga yama i atawà anna iddukan na i familia mi. Ngem talaga manaki na nga mabbalin tu Saksi ni Jehova i ána mi. Piga dagun nga nitatangi ku yatun megafu ta mavurung ngà nu duttal kari noka i tiempo nga masserbi gapa kani Jehova i ána ku.”

5. Anni i magigiammu taw nga artikulo?

⁵ Nu tadday ka nga yena nga Saksi, moffunammu gapa i ána mu nga ayatan anna passerbian si Jehova kagitta na nakua ni Eunice. Magigiammu taw nga artikulo nu kunnasim maparigan i ehemplo na anna nu kunnasim matudduan i ána mu gukaban na kakkagian anna kukukuammu. Ammuattam gapa nu kunnasi naka nga uffunan ni Jehova.

6. Base ta 2 Timoteo 3:14, 15, kunnasi nga nabbalin tu Cristiano si Timoteo?

⁶ Ta kabbing ni Timoteo, kingngua na yena na i ngamin nga mawayya na tapenu ituddu ta nisa “i Masanto ira nga Tura,” segun ta pakalippawa na Judio ira. Ngem baddi laman i pakannammu ni Eunice megafu ta awan vuluvuga tu ammu na meyannung kani Jesu-Cristo. Ngem makalanno ngana i netuddu kani Timoteo maggafu ta Katurakan tapenu alawatan na i Cristianismo. Ngem talaga kari nga nabbalin tu Cristiano si Timoteo? Megafu ta bagitolay ngana yayya, egga ngana i kepangngattan na nga mappili nu mabbalin yayya tu tadday nga Cristiano. Siguradu nga dakal i neyuffun na pangikaguman ira na yena na tapenu ‘kurugan na ta napafutu’ i kinakurug meyannung kani Jesus. (Bibbigan i 2 Timoteo 3:14, 15.) Kuruga magayayya si Eunice ta maski nu anni ziga na, netuddu na ta ana na i meyannung kani Jehova. I ngagan ni Eunice ay naggafu ta tadday nga uvovug nga i kayà na kagian ay “affutan.” Kurug tu nangaffu yayya megafu ta nalampasan na i ziga ira tapenu moffunan si Timoteo nga ayatan anna passerbian si Jehova.

7. Kunnasi nga inuffunan ni Eunice i ana na tapenu mapprogreso kabalin na ma-baptize?

⁷ Turi ta na-baptize ngana si Timoteo, nadde na i tadday nga importante nga goal ta pattolena. Ngem mavurung lagapa si Eunice ta ana na. Anni tamma i pangusan ni Timoteo ta pattolena? Makikkofun kari saw yayya ta marake ira nga kakavulu? Magiskuela kari saw yayya ta Atenas tapus kurugan na i tuddu ira na pagano nga pilosopo tari? Mappa-aripan kari saw yayya ta kinariku tapus ufutan na i tiempo anna sikan na bilang kabataan? Ari tu si Eunice i maddesision para kani Timoteo. Ngem moffunan na i ana na tapenu makangngua tu masirib ira nga desision. Kunnasi? Nitulu-tuloy na nga nikaguman nga tudduan si Timoteo nga kuruga ayatan anna mappabalo kani Jehova anna kani Jesus. Ari laman tu danuri mappagana nga ari tu Saksi i atawa da i marigatan nga padakallan i ána da tapenu ayatan si Jehova. Maski nu parehu nga Saksi i magana, awayya na nga marigatan lagapa ira nga addetan i futu na abbarabbing tapenu mapaguyu ira nga mabbalin tu matalo nga aripan ni Jehova. Anni gafu i magigiammu na mappagana ira kani Eunice?

8. Kunnasi nga moffunan na tadday nga yena i Saksi nga atawa na tapenu meyawa i espiritual ira nga pakawagan na ána da?

 ⁸ Gigiammuan i Biblia kavulu i ána mu. Nu Saksi i atawam, kayà ni Jehova nga uffunammu yayya tapenu meyawa i espiritual ira nga pakawagan na ána nu. Makuam yatun nu kanayummu nga suportan i unnug na family worship. Makasta nakuan i kakkagiammu meyannung ta family worship anna mannono ka gapa nu anni ira i awayyam nga makua tapenu makapagayayya anna ma-enjoy yatun na ána nu. Puedem gapa nga uffunan i atawam nga mannono tu tadday nga study project nu. Fuera paga tatun, nu puede ngana nga me-Bible study i karuan ta ána nu, usan nu i libru nga Magayayya nga Mattolay tu Mannanayun! Makka-uffukkamu na atawam tapenu makua nu yatun.

9. Anni ira i makoffun ta tadday nga yena nga ari tu Saksi i atawa na?

⁹ I karuan nga yena i mangi-Bible study ta ána da megafu ta awayya na tu single mother ira onu ari nga Saksi i atawa da. Nu kunnatun i situasion ta familia nu, ari ka nakuan kuruga mavurung. Uffunan naka ni Jehova. Usammu i efektibo ira nga rimienta ta pangituddu nga niyawa na gukaban na organisasion na tapenu i-Bible study i ána mu. Puede ka nga makkiavu ta tanakuan nga ekspiriensadu nga magana nu kunnasi da nga usu-usan danatun nga rimienta para ta family worship. c (Prov. 11:14) Puede ka gapa nga mappoffun kani Jehova ta pakimallo. Ikiddom ta nisa nga makanono ka nakuan tu mepangngo ira nga pakkiavu tapenu mammuammu nu anni talaga i nononopan anna mataga-tageno na ána mu. (Prov. 20:5) Awayyam iyavu ta ana mu, ‘Okay ka laman onu egga i problemam ta eskuela?’ Maka-istoriam i ana mu nu kuammu yatun.

10. Anni paga i makuam tapenu moffunan i ána mu nga magigiammu i meyannung kani Jehova?

¹⁰ Magaleg ka tu chansa tapenu metuddum ta ána mu i meyannung kani Jehova. Ikagim ta nira i meyannung kani Jehova anna i aru nga makasta nga gannug nga kingngua na para ta nikaw. (Deut. 6:6, 7; Isa. 63:7) Importante yatun jebi nu ari mu nga regular nga me-Bible study i ána mu ta balenu. Kunnaw i kagian ni Christine nga nakagi ta gafu: “Baddi laman i chansà nga ipakiyuvovug i espiritual ira nga gannug ta ána ku. Yayya nga nu egga i chansà, approbetchakku yatun. Lumaka-lakag kami onu mabbarangay kami tapus tarì nga ipakibbida i meyannung ta makakkasta ira nga pinaratu ni Jehova anna ta aru paga nga espiritual nga gannug. Turi ta ziminakal ngana i ána ku, pinagaram ku ira nga gigiammuadda ngana lagapa i Biblia.” Fuera paga tatun, positibo nakuan i kakkagiammu ta nira meyannung ta organisasion ni Jehova anna ta wawwaragi. Ariammu nga kritikan i elder ira tapenu ari saw nga magalangan i ána mu nga mappoffun ta nira nu kawagadda.

11. Segun ta Santiago 3:18, ngatta importante nga egga i imammo ta balay?

¹¹ Kuammu i partem tapenu memammo ta balenu. Kanayummu nga ikagi i pangiddu mu ta atawam anna ta ána mu. Makasta nakuan i kakkagiammu meyannung ta atawam anna marespeto ka nakuan. Sanayammu i ána mu nga kunnatun gapa i kuadda. Nu kuammu yatun ira, mabbalin tu memammo ta balenu anna mas mabi para ta ána nu nga magigiammu i meyannung kani Jehova. (Bibbigan i Santiago 3:18.) Nonopan i ekspiriensa ni Jozsef nga special pioneer ta Romania. Ta kabbinna, marigatan ira na yena na kunne na gapa i wawwaragi na nga masserbi kani Jehova megafu ta yama  na. Istorian ni Jozsef: “Kingngua na yenà i ngamin nga mawayya na tapenu memammo ta balemi. Kada mas mapporay si Papa, mas massissippo gapa si Mama. Nu mapansin ni Mama nga marigatakkami nga irespeto anna tuppalan i yama mi, ipakibbida na ta nikami i Efeso 6:1-3. Tapus kagian na gapa i makasta ira nga ugali ni Papa anna ipalippawa na nu ngatta mawag tu iddukammi i yama mi. Megafu tatun, memammo i familia mi.”

12. Base ta 2 Timoteo 1:5, anni i efekto kani Timoteo na ehemplo ni Eunice?

¹² Bibbigan i 2 Timoteo 1:5. Makasta nga ehemplo si Eunice para kani Timoteo. Siguradu nga nituddu na kani Timoteo nga masingan ta kukukuattam nu napasikkal i pangurug tam. (Sant. 2:26) Magga nasingan ni Timoteo ta kukukuan ira na yena na nga dakal i pangaya na para kani Jehova. Siguradu gapa nga nasingan ni Timoteo nga namagayayya ta yena na i passerbi kani Jehova. Anni i efekto kani Timoteo na ehemplo ni Eunice? Kinagi ni apostol Pablo nga naparigan ni Timoteo i maladda nga pangurug na yena na. Ari nga nekanna laman yatun. Naobserba mismu ni Timoteo i ehemplo ni Eunice yari tu napaguyu yayya nga parigan yatun. Kunnatun gapa i nakua na aru nga yena sangawe. Noffunadda i kafamilia da ira tapenu masserbi kani Jehova “gafu ta mapia nga pangnga-pangngua.” (1 Ped. 3:1, 2) Kunnasim gapa nga makua yatun?

13. Ngatta pinaka-importante nakuan ta tadday nga yena i relasion na kani Jehova?

¹³ Pinaka-importante nakuan ta nikaw i relasiommu kani Jehova. (Deut. 6:5, 6) Bilang yena, aru nga sakrifisio i kukukuammu. Isassakrifisiom i oras mu, i kuartum, anna i tanakuan paga ira nga gannug tapenu meyawa i pisikal ira nga kawagan na ána mu. Mapuyat ka paga lagu nu karuan. Ngem maski nu sobra karu na mawag tu tangngawammu, ariammu pagurayan i relasiommu kani Jehova. Kanayun nakuan nga egga lagapa i tiempom tapenu makimallo, mappersonal study, anna magatende ta study ira. Nu kuammu danatun, massikan i espiritualidad mu anna mabbalikka tu mapia nga ehemplo para ta familiam anna ta tanakuan.

14-15. Anni i magigiammum ta ekspiriensa da Leanne, Maria, anna João?

¹⁴ Ikonsidera i ekspiriensa na kabataan ira nga nagigiammu da nga ayatan anna pattalakkan si Jehova megafu ta ehemplo na yena da. Kunnaw i istorian na ana ni Christine nga si Leanne: “Ari kami makapab-Bible study ta balemi nu egga si Papa. Ngem kanayun nga makistudy si Mama. Maski nu baddi laman i ammu mi ta Biblia, nakoffun i kukukuan ira ni Mama tapenu mapeggakkami tu masikan nga pangurug. Ammu mi nga yaw i kinakurug maski turi ta ari mi paga napurueban i makistudy.”

¹⁵ Kunnaw gapa i ekspiriensa ni Maria. Nu mittan, kastigowan na yama na i familia da ta pakistudy da. Istorian na: “Para nio, si Mama i tadday ta pinakamagutu nga sister. Ta kabbikku, manaki ku nga kuan i karuan nga gannug megafu ta ikassikku nu anni i kagian na tanakuan. Ngem nawawan i assikku ta tolay megafu ta nasingakku nga magutu-gutu si Mama anna kanayun na nga pagolluan si Jehova ta pattolena.” Igamma gapa na yama ni João nga pabbiridan ta baleda i meyannung kani Jehova anna ta Biblia. Istorian na: “Okay laman kani Mama nga isakrifisio i ngamin tapenu mapagayayya si Papa, fuera laman i pangaya na kani Jehova. Yatun i pinakanakoffun ta nio.”

16. Anni i awayya na tu efekto ta tanakuan na kukukuan na tadday nga yena?

¹⁶ Sikamu nga yena, daddamman nu nga makafekto ta tanakuan i kukukuan nu. Kunnasi?  Nonopan i efekto kani apostol Pablo na ehemplo ni Eunice. Nitura na nga naparigan ni Timoteo i ‘napasikkal nga pangurug ni Eunice.’ (2 Tim. 1:5) Kanni nga ollu nga nasingan ni Pablo i pangurug ni Eunice? Posible nga nammammu na da Loida anna Eunice ta Listra durante na ollu nga pabbiahe na bilang misionero. Awayya na nga yayya i nanguffun ta nira tapenu mabbalin ira tu Cristiano. (King. 14:4-18) Nappasa i 15 nga dagun, ta tura ni Pablo kani Timoteo, meraddamman na lagapa i kingngua ira ni Eunice nga mangipasingan nga masikan i pangurug na. Inusa na paga si Eunice bilang tadday nga ehemplo nga makasta nga apparigan! Ari gafu vuluvuga nakattaman na apostol anna na tanakuan paga ira nga Cristiano ta ollu nga siglo i ehemplo ni Eunice. Nu single mother ka onu madduma kamu tu relihion na atawam, makasiguradu ka nga mapagaram gapa i tanakuan ta matalo nga ehemplom.

17. Anni i kuammu nu gitta na ari paga mapaguyu i ana mu ta passanay mu?

¹⁷ Kunnasi nu gitta na ari paga mapaguyu i ana mu maski nu kukukuammu mabba i ngamin nga mawayyam? Daddamman nga aru nga oras i kawagan tapenu sanayan i tadday nga abbing. Gitta na masingan ta picture, nu mammula ka tu vukal, awayya na tu nononopammu nu mattalovu kari saw yatun, dumakal, tapus mavvunga. Ari mu nga kontroladu i pabbalinan natun. Ngem awayyam lagapa nga tulu-tuloy nga bayatan yatun tapenu mas egga i chansa na nga dumakal. (Mar. 4:26-29) Kunnatun gapa ta pamadakal mu ta ána mu. Awayya na tu nononopammu nu mittan nu talaga kari nga egga saw i efekto na ta ána mu na kukukuammu  ira. Ari mu nga kontroladu i pabbalinadda. Ngem nu itulu-tuloy mu lagapa nga kuan i ngamin nga mawayyam tapenu sanayan ira, mas dakal i chansa da nga mapprogreso ta espiritual.​—Prov. 22:6.

18. Kunnasim nga moffunan i ána mu nga mapprogreso ta espiritual?

¹⁸ Namegafu paga ta tiempo na Biblia, aru ngana nga kabataan i inuffunan ni Jehova nga mabbalin tu kokkofun na. (Sal. 22:9, 10) Moffunan na gapa i ána mu nga mapprogreso ta espiritual nu yatun i kayà da. (1 Cor. 3:6, 7) Maski nu gitta na ari paga napafutuan i passerbi na ána mu kani Jehova, iddukan na lagapa ira. (Sal. 11:4) Oras tu mangipasingan ira tu maski baddi laman nga seniales nga kayà da gapa nga pagayayyatan si Jehova, uffunan na ira tatun nga tiempo tapenu mabbalin tu kokkofun na. (King. 13:48; 2 Cro. 16:9) Awayya na nga uffunan naka nga ikagi i fustu nga gannug ta ána mu ta eksakto nga tiempo nga pinakakawagadda nga maginna yatun. (Prov. 15:23) Awayya na gapa nga paguyuan i tadday nga minangngikavurung nga brother onu sister ta kongregasion tapenu mangipasingan tu personal nga interes ta nira. Maski sonu mabbalin ngana tu adulto i ána mu, awayya ni Jehova nga ipanono uli ta nira i tadday nga gannug nga nituddum ta nira ta nappasa. (Juan 14:26) Nu tulu-tuloy nga sanayammu i ána mu gukaban na kakkagian anna kukukuammu, bendisionan naka ni Jehova.

19. Ngatta makasiguradu ka nga magayayya nikaw si Jehova?

¹⁹ Ari nga nakadepende ta desision ira nga kuan na ána mu i pangaya ni Jehova ta nikaw bilang yena. Iddu naka ni Jehova megafu ta iddukammu yayya. Nu single mother ka, ipromesa ni Jehova nga yayya i mabbalin tu Yama ta ána mu anna i mangiyegu ta nikaw. (Sal. 68:5) Ari mu nga kontroladu nu pilian saw na ána mu i masserbi kani Jehova onu ari. Ngem nu mappoffukka lagapa kani Jehova anna kuammu i adde na mawayyam, mapagayayya mu yayya.