1-2. (a) Ɔnyɛ wɛ u Iyunis a, ɔdi kē ya nōó tɔɔtɛ lɛ ɔ ō nwu ɔyi nu nɔnyilɔ lɛyikwu Ujehofa mɛmla Ujisɔsi ŋ ma? (b) Kɛla lɛykikwu ifoto nōo yɔ iyɔbu ku Ɔda Ō Gbaajɛ nyā a.

 EKO nɛ Utimoti ya ubatisim a, naana nɛ Ubáyíbu i da alɔ ɔdā duuma lɛyikwu ŋ ma, gbɛla lɛyikwu ɛdɔ eeye nōo géē wɛ omuumu ɔtu ku ɛ́nɛ́ nu Iyunis ɛ̄cī ɔɔma a. (Aíit. 23:25) Gbɛla lɛyikwu ɛgɛ nɛ ɔtu gē yɔ i he ɔ lɛyikwu Utimoti abɔ ó má ɔ hayi ipu eŋkpɔ a. Ɛhɛ géē kwu ɔ okonu, Ulɔyisi nōo wɛ ɛ́nɛ́ ɔnyakwɔcɛ ku Utimoti kē hayi pi ɔ klla yɔ i bi ɔ bla iyē. Iyunis gē yɔ i fu owu wɛɛcɛ ɛmɛɛma, ó klla géē fu owu ta ipu klla bi ɔ eko néē lɛ Utimoti wu ɛhaajɛ ku eŋkpɔ a. Abɔ é gē yɔ i bi ɔ wɛɛcɛ ŋma ipu eŋkpɔ a nɛ eŋkpɔ a gē yɔ i ya uya a, ɛhɛ nɛhi géē kwu ɔ eyī, cɛɛ ɛ́nɛ́ nu géē gbɔɔ ō jikwu ohigbu ɔtu nōo yɔ i he ɔ nɛhi a. Naana nōó tɔɔtɛ lɛ Iyunis ŋ ma, ó nwu ɔyinɔnyilɔ ku nu kóō yihɔtu ku Ujehofa mla Ɔyi nu Ujisɔsi Ukraist kpɔ. Unwalu ɛyɛɛyɛyi nyá nɛ ó má abɔ ó yɔ i ceyitikwu kóō nwu ɔyinɔnyilɔ ku nu ɛlā a?

² Ɛ́nɛ́ mla adā ku Utimoti i lɛ ɔwɛ ō gba ɛ̄gbā ekponu ŋ. Adā nu wɛ ɔcɛ Ugriisi, ɛ́nɛ́ nu mla ɛ́nɛ́ nu nɔnyakwɔcɛ kē wɛ ācɛ Ujiyu. (Ācot. 16:1) Ó lɔfu wɛ ka Utimoti wɛ ɔyipɛ kpɔ eko nɛ u Iyunis mla Ulɔyisi gáā je piya Ācɛ O Yɛce Ukraist a. Amáŋ, adā nu i je piya Ɔcɛ O Yɛce Ukraist ŋ. Ɔwɛ ku ɛ̄gbā ō gba nyá nɛ Utimoti gáā je mɛɛ a? Ó lɔfu wɛ ka ó le jɛ ō miya ɔdā nōó géē ya abɔyi nu gla ɛ. Ó géē yɛce ɔwɛ ku ɛ̄gbā ō gba ku adā nu nɛɛ? Ó géē yɛce uculo ku ācɛ Ujiyu néē nwu ɔ eko nɛ ó wɛ ɔyipɛ a? Kɛɛ ka ó géē je piya Ɔcɛ O Yɛce Ukraist?

3. Oŋma ɛlā nōo yɔ ipu ɔkpá ku Aíita 1:8, 9 a, ɛgɛnyá nɛ Ujehofa gē má uklɔ nɛ aɛ́nɛ́ gē ya ō je otabɔ lɛ ayipɛ ɔlɛ uwa kē wa i je piya ɔya ku nu a?

³ Aɛ́nɛ́ nōo wɛ Ācɛ O Yɛce Ukraist a yihɔtu ku ācɛ apɔlɛ ku uwa nɛhi icɛ duu. Ɔdā néē dɔka ō ya fiyɛ duu a, wɛ ō ta ayipɛ ɔlɛ uwa abɔ kéē wa i lɛ ɛma olɔhi mɛmla Ujehofa. O ceyitikwu ku uwa kē jɛ Ɔwɔico ku alɔ eyī nɛɛnɛhi. (Jé Aíita 1:8, 9.) Ujehofa  ta ayinɛ alɛwa abɔ ɛ o ya ɛɛ kéē lɔfu nwu ayipɛ ɔlɛ uwa kéē wa i yihɔtu nu klla gba ɔ ɛ̄gbā.

4. Ɛdɔ unwalu nyá nɛ aɛ́nɛ́ gē má icɛ a?

⁴ Ekoohi, ó wɛ ɔdā olamu ku ɛ́nɛ́ ka ó yɔ i gbɛla ɔdaŋ ku ayipɛ ɔlɛ nu géē gba Ujehofa ɛ̄gbā ɛgɛ nɛ Utimoti ya a. Da ma, ɛ́nɛ́ mɛmla adā jé ɛgɛ nɛ ɛcɛ ku Ebilii nyā gē kwu ayipɛ ɔlɛ uwa kéē nyɔ i ya ɔdobɔbi lɛ a. (1 Upít. 5:8) Ɔdā ɔhá kpɔ kē wɛ kahinii, ó gē tɔɔtɛ lɛ aɛ́nɛ́ alɛwa kéē bi ayi uwa jɛ ŋ, ohigbu ka ɔba uwa i yɔ gɛ ŋ, amāŋ ohigbu ka ɔba uwa i gē gba Ujehofa ɛ̄gbā ŋ. Ocabɔ mafu, ɔyinɛ alɔ nɔnya éyi nōo lé ka u Christine * a kahinii: “Ɔba um wɛ ɛnɛɛnɛ adā, ó klla yihɔtu apɔlɛ ku alɔ, amáŋ ó dɔka ku um bi ayi alɔ jɛ kéē wa Ācɛ Ocijali ku Ujehofa ŋ. N jikwu igbalɛwa ipu ihayi alɛwa nōo gáā yɛ ɛ ma, yɔ i gbɛla ɔdaŋ ku ayipɛ ɔlɛ um géē cɛ ō wa i gba Ujehofa ɛ̄gbā.”

5. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

⁵ Ɔdaŋ ku a wɛ ɛ́nɛ́ nōo wɛ Ɔcɛ O Yɛce Ukraist, a lɔfu ta ayipɛ ɔlɛ uwɔ abɔ kéē yihɔtu klla gba Ujehofa ɛ̄gbā ɛgɛ nɛ u Iyunis ya a. Ipu ikpɛyi ɛlā nyā, alɔ géē kɛla lɛyikwu ɛgɛ nɛ a géē lɔfu gbla ocabɔ ku nu ya, klla nwu ayipɛ ɔlɛ uwɔ ɛlā oŋma lɛ ɔdā nɛ a gē ka mla ɔdā nɛ a gē ya a. Alɔ klla géē má ɛgɛ nɛ Ujehofa géē ta uwɔ abɔ lɛ a.

6. Ɛgɛ néē ma ɔ fu ipu ɔkpá ku 2 Utímōti 3:14, 15 a, ɛgɛnyá nɛ Utimoti je piya Ɔcɛ O Yɛce Ukraist a?

⁶ Eko nɛ Utimoti wɛ ɔyipɛ kpɔ ɛ ma, ɛ́nɛ́ nu ceyitikwu kóō nwu ɔ “ɛlɔ̄ɔwɔicō otīīhɔ,” ɛgɛ nɛ Ācɛ Ujiyu jɛyi nu lɛ a. Ó wɛ ɔkwɛyi, ka ɛ́nɛ́ nu i jé ɔdā alɛwa ŋ ohigbu ka ó jé ɔda alɛwa lɛyikwu Ujisɔsi ŋ. Naana kpɔ a, ɔdā nɛ Utimoti nwu ŋma ɔkpiihɔ a je otabɔ nōo cɛgbá a lɛ ɔ o ya ɛɛ kóō je piya Ɔcɛ O Yɛce Ukraist. Amáŋ ó géē cɛ ō je piya Ɔcɛ O Yɛce Ukraist? Abɔ ó wɛ ɔyipɛ oklobiya a, ó lɔfu miya abɔyi nu ɔdaŋ ka ó géē cɛ ō wɛ Ɔcɛ O Yɛce Ukraist. Ó lɛ aafu ŋ, o ceyitikwu ku ɛ́nɛ́ Utimoti wɛ ipu ɔdā nōo ta Utimoti abɔ kóō wa i “cɛ̄ɛ̄lā kú Ohɔ́nyɛtá Ujísɔ̄si” a. (Jé 2 Utímōti 3:14, 15.) Iyunis gweeye nɛɛnɛhi ka ó nwu ɔyi nu nɔnyilɔ lɛyikwu Ujehofa naana nōó tɔɔtɛ lɛ ɔ ŋ ma. Ɛyi ku iye ku Iyunis wɛ “ɔcɛ ō yale.” Ó kē yale ɔkwɔɔkwɛyi oŋma lɛ ɛgɛ nōó ya unwalu ɛyɛɛyɛyi lé, o ya ɛɛ kóō lɔfu ta Utimoti abɔ kóō yihɔtu klla gba Ujehofa ɛ̄gbā a.

7. Ɛgɛnyá nɛ Iyunis lɔfu ta ɔyinɔnyilɔ ku nu abɔ kóō gɔbu ō wɛ Ɔcɛ O Yɛce Ukraist olɔhi fiyɛ igbihi nōó lɛ ubatisim ya a?

⁷ Eko nɛ Utimoti gáā lɛ ubatisim ya a, ó lɛ ɔdā ō cɛgbá éyi nōó miya ō ya ipu oyeeyi ku nu a ya jila. Amáŋ igbihi nɛ Utimoti kóō lɛ ubatisim ya ɛ ma, Iyunis yɔ i gbɛla lɛyikwu ɔyi nu nyā kpɔ. Ɔdi nɛ ɔyinɔnyilɔ ku nu nyā gáā bi ɛjɛɛji oyeeyi ku nu le ya mɛɛ a? Ó géē je piya oklobiya ku ācɛ nōo géē nwu ɔ ɛlā ɔwɛ obɔbi a? Ó géē gā inɔkpa nɛhi ipu Atɛnsi klla gáā gbɔɔ ō kpɔtuce aɛlā nɛ ācɛ ō jé ɔkpá nɛhi gē nwu nōo wɛ aɛlā ku ācɛ nōó gē gba Ujehofa ŋ ma? Ó géē bi eko, ɔfu, mɛmla ɛpleeko ku ɔyipɛ oklobiya ku nu yɔ i yuklɔ lɔfu lɔfu o ya ɛɛ kóō je piya ɔcɛ ō gbagbenu? Iyunis i gáā lɔfu miya ɔdā nɛ Utimoti cika ō ya a lɛ ɔ ŋ, amáŋ ó lɔfu ta ɔ abɔ kóō ya ōmiya ɔwɛ ijeeyi. Ɛgɛnyá a? Ó lɔfu gɔbu yɔ i yuklɔ lɔfu lɔfu o ya ɛɛ kóō nwu ɔyinɔnyilɔ ku nu kóō yihɔtu ku Ujehofa nɛɛnɛhi, ku ɛjɛɛji ɔdā nɛ Ujehofa mla Ujisɔsi humayi ya lɛ apɔlɛ ku uwa a kóō yɔ i jɛ ɔ eyī. Ɛ́nɛ́ amāŋ adā nɛ obiye ku uwa éyi i gē gba Ujehofa ɛ̄gbā ŋ ma, i wɛ ācɛ nōó gē lɔnɔ tu uwa foofunu ō ta ayipɛ ɔlɛ uwa abɔ kéē wa i yihɔtu ku Ujehofa ŋ. Ɔdaŋ ku ɛ́nɛ́ mla adā ɔɔma kóō yɔ i gba Ujehofa ɛ̄gbā naana, ó lɔfu lɔnɔ tu uwa kpɔ ō ta ayipɛ ɔlɛ uwa abɔ kéē gba Ujehofa ɛ̄gbā. Ɔdi nɛ adā mla ɛ́nɛ́ lɔfu nwu ŋma ocabɔ ku Iyunis a?

8. Ɛgɛnyá nɛ ɛ́nɛ́ gáā ta ɔba nu nōo wɛ Ɔcɛ Ocijali ku Ujehofa abɔ eko duuma nōó yɔ i nwu ayipɛ a ɛlā lɛyikwu Ujehofa a?

 ⁸ Bēē klɔcɛ ku Ubáyíbu mla ayipɛ ɔlɛ uwɔ. Ayinɛ alɔ nɔnya, ɔdaŋ ka ɔba uwɔ wɛ Ɔcɛ Ocijali ku Ujehofa, Ujehofa dɔka ku a ta ɔba uwɔ abɔ ku a nwu ayipɛ ɔlɛ aa lɛyikwu ɔ. Ɔwɛ éyi nɛ a lɔfu ya ɛnyā a, wɛ ō tabɔ ipu ōmiya ku ɛ̄gbā ō gba ku apɔlɛ ku aa. Bēē ka ɔdā olɔhi lɛyikwu ɛ̄gbā ō gba ku apɔlɛ, ku a klla gbɛla lɛyikwu aɔdā nɛ a lɔfu ya o ya ɛɛ kóō yɔ i lɔɔnyɛ nɛ ɛjɛɛji aa géē jɔɔnyɛ nu. A kóō lɔfu ta ɔba uwɔ abɔ ku aa ya ōmiya lɛyikwu ɛnɛɛnɛ odee nɛ aa géē dɔka ō klɔcɛ lɛyikwu ɔ ŋma Ubáyíbu a. Ɔdā ɔhá kpɔ, ɔdaŋ ku ayipɛ ɔlɛ aa ōhī le jikoko néē géē lɛ itene ŋma oklɔcɛ ō ya abɔyi uwa mla ɔkpá ku Jɔɔnyɛ Oyeeyi Nōó Gáā Mɛ Gboogboo Ŋ! ma, a lɔfu ta ɔba uwɔ abɔ o ya ɛɛ cɛɛ ku ayipɛ ɔlɛ uwɔ kéē lɔfu bi ɔkpá ɔɔma le ya oklɔcɛ.

9. Imi nɛ aɛ́nɛ́ nɛ aɔba uwa i wɛ Ācɛ Ocijali ku Ujehofa ŋ ma lɔfu miyɛ otabɔ ŋma a?

⁹ Aɛ́nɛ́ ōhī géē cɛgbá ō klɔcɛ ku Ubáyíbu mla ayipɛ ɔlɛ uwa, á jé ŋ, ohigbu ka ɔba uwa i yɔ gɛ ŋ, amāŋ ohigbu ku ɔba uwa i wɛ Ācɛ Ocijali ku Ujehofa ŋ. Ɔdaŋ ka ó lɛ a ipu apɔlɛ ku uwɔ, á cika ō je unwalu lɛ iyi uwɔ fiyɛ ɔfu ŋ. Ujehofa géē ta uwɔ abɔ. Bi aɔdā ɛnɛɛnɛ ō bi le nwu ācɛ ɛlā nɛ Ujehofa ya o bu ipu ɔwa ku nu ɛ ma le klɔcɛ mla ayipɛ ɔlɛ uwɔ. A lɔfu da aɛ́nɛ́ mla adā ōhī nōo yɔ i ya lɔhi fiyɛ ɔwɛ nyā, lɛyikwu ɔwɛ ɛgɛ néē gē bi aɔdā ō bi le nwu ɛlā nyā le ya ɛ̄gbā ō gba ku apɔlɛ ku uwa lɛ a. * (Aíit. 11:14) Ujehofa klla lɔfu ta uwɔ abɔ, ku a lɔfu jé ɛgɛ nɛ a géē yɔ i kɔka mla ayipɛ ɔlɛ uwɔ lɛ a. Gbɔɔkɔ lɛ ɔ kóō ta uwɔ abɔ ku a jé ɔdā nōo yɔ ipu ɔtu ku uwa mla ɛgɛ nɛ ɔtu gē ya uwa lɛ a. (Aíit. 20:5) A lɔfu da uwa ɛdɔ ɔka ɛgɛnyā, ‘Unwalu nyá nɛ a gē má fiyɛ duu ipu inɔkpa a?’ Ō da uwa ɛdɔ ɔka ɛgɛnyā lɔfu ya ku a gbɔɔ ɔka ō ka nōo géē ta uwɔ abɔ ku a wa i jé ɔda alɛwa.

10. Ɔdā ɔhá nyá nɛ a lɔfu ya o ya ɛɛ ku a ta ayipɛ ɔlɛ uwɔ abɔ kéē gáā nwu ɛlā lɛyikwu Ujehofa a?

¹⁰ Dɔka ɔwɛ ɛyɛɛyɛyi nɛ a géē lɔfu nwu ayipɛ ɔlɛ uwɔ lɛyikwu Ujehofa. Bēē kɛla lɛyikwu Ujehofa mla aɔdā olɔhi alɛwa nɛ ó ya gā uwɔ ɛ ma. (Obla. 6:6, 7; Ayis. 63:7) Ó cɛgbá ku a bēē ya ɛnyā ofiyɛ duu, ɔdaŋ ku á gē klɔcɛ mla ayipɛ ɔlɛ uwɔ ɔlɛ eko doodu ŋ. Christine nɛ alɔ kɛla lɛyikwu ɔ gáā yɛ a kahinii: “Ɛga ligii foofunu nɛ um gē lɛ ō kɛla lɛyikwu Ujehofa a, ohigbu ɛnyā, ɛga duuma nɛ um le lɛ, n gē bi ɔ le yuklɔ lɔɔlɔhi. Eko duuma nɛ ami mɛmla ayi a gē yiyawu amāŋ nɛ alɔ yɔ ipu ɔkɔ, nɛ alɔ yɔ i pɛ ɔ ŋma okonu enkpɔ a yɔ i nyɔ a, n gē bi eko ɔɔma le da uwa lɛyikwu aɔdā oheyifuu nɛhi nɛ Ujehofa ya, mɛmla aɔdā alɛwa ɔhá nōo géē lɔfu ta uwa abɔ abɔ kéē je piya ɔya ku Ujehofa gla. Eko nɛ ayipɛ ɔlɛ um gáā kwu jɛ a, n gbɔɔ ō ta uwa ɔtu kwu ɔtu kéē klɔcɛ ku Ubáyíbu abɔyi uwa.” Ɔdā ɔhá kpɔ wɛ kahinii, bēē kɛla olɔhi lɛyikwu ɔwa ku Ujehofa mɛmla ayinɛ uwɔ nōo yɔ ipu ujɔ a. A hii bēē ŋmo anyakwɔcɛ ku ujɔ a okonu ŋ. Ɔdā nɛ a gē ka lɛyikwu uwa a, géē ta ayipɛ ɔlɛ uwɔ abɔ kéē lɔfu kɛla lɛ uwa gla eko duuma néē cɛgbá otabɔ.

11. Oŋma ɛlā nōo yɔ ipu ɔkpá ku Ujɛ́mīsi 3:18, ɔdiya nōó cɛgba ku alɔ yɔ i ya ku ɛbɔ kóō yɔ ɔlɛ a?

¹¹ Ya ku ɛbɔ kóō yɔ ɔlɛ. Bēē mafu lɛ ɔba uwɔ mɛmla ayipɛ ɔlɛ uwɔ eko doodu ku a yihɔtu uwa. Bēē kɛla lɛyikwu ɔba uwɔ ɔwɛ ogbonɛnɛ mla ɔwɛ nōo géē mafu ku a lɛ ojilima ce ɔ, ku a klla bēē nwu ayipɛ ɔlɛ uwɔ kéē bēē ya lɛ a duu. Ɔdaŋ ku a gē ya ɛnyā, ó géē ya ɔ tɔɔtɛ lɛ ayipɛ ɔlɛ uwɔ kéē nwu ɛlā lɛyikwu Ujehofa. (Jé Ujɛ́mīsi 3:18.) Leyi ya ocabɔ ku Jozsef, nōo yɔ i yuklɔ ku ɔcɛ ō gbɔbu ɔna ō ta ɛdɔ ɛyɛɛyi ipu ewo ku Romania a ɛ. Eko nɛ ó yɔ i jɛ a, adā nu ya ka āhɔ̄ kóō lɔnɔ lɛ anu, ɛ́nɛ́ nu mɛmla ayinɛ nu, o ya ɛɛ kéē lɔfu gba Ujehofa ɛ̄gbā  gla ŋ. Jozsef kahinii: “Umama ku um ceyitikwu ya ku ɛbɔ kóō yɔ ɔlɛ alɔ. Abɔ upapa ku um gē ya ɛlā ipu anya tōōtɔ̄ɔ̄ a, ɛgɔɔma nɛ umama ku um gē gbonɛnɛ lɛ ɔ tōōtɔ̄ɔ̄ a. Eko nɛ ó gáā le má ka ó gē lɔnɔ ta alɔ ō lɛ ojilima ce adā alɔ klla lɛyitaajɛ lɛ ɔ a, ó géē kɛla mla alɔ ŋma ɔkpá ku Ācɛ Ɛ́fēsɔsi 6:1-3. Oŋma ɔɔma, ó géē gbɔɔ ō da alɔ lɛyikwu auce olɔhi nɛ adā alɔ lɛ, klla ta alɔ abɔ jé ɔdā nōo ya nɛ alɔ cika ō yihɔtu nu a. Ɛnyā ta apɔlɛ ku alɔ abɔ ku alɔ yɔ ɛbɔ.”

12. Ɛgɛnyá nɛ ɔkpá ku 2 Utímōti 1:5 da alɔ ka ocabɔ ku Iyunis lɛ abɔ kwu Utimoti iyē lɛ a?

¹² Jé 2 Utímōti 1:5. Iyunis lɛ ocabɔ olɔhi taajɛ lɛ Utimoti. Ó lɛ aafu ŋ, ó lɔfu nwu ɔ ka ɔdaŋ ku ɔcɛ lɛ ɔtu okpoce ɔkwɛyi, ka ɔcɛ ɔɔma géē ma ɔ fu ipu uce ō ya ku nu. (Ujɛ́m. 2:26) Ó teyi peee ka Utimoti wa i má ka ɔdā nōo ya ɛɛ nɛ ɛ́nɛ́ nu gē ya lɛ a, wɛ ohigbu ihɔtu nɛhi nɛ ó lɛ lɛ Ujehofa a nɛ. Utimoti gáā le má ɔkwɔɔkwɛyi ka ō gba Ujehofa ɛ̄gbā gē cɛ lɛ ɛ́nɛ́ nu gweeye. Ɛgɛnyá nɛ ocabɔ ku Iyunis nyā lɛ abɔ kwu Utimoti iyē lɛ a? Upɔlu ka ku Utimoti lɛ ɔtu okpoce olɔfu bɛɛka ɛ́nɛ́ nu a. Ɔtu okpoce olɔfu ku Utimoti nyā i wa acigili ŋ. Ó lɛ aafu ŋ, Utimoti leyi yɛ ocabɔ ku ɛ́nɛ́ nu klla gáā lɛ ɔtu ya ekponu ka anuɔ géē gbla ɔ ya. Ɔwɛ ekponu ɔɔma icɛ, aɛ́nɛ́ alɛwa ta apɔlɛ ku uwa abɔ kéē wa i gba Ujehofa ɛ̄gbā ɛ, é kóō “cɛgbá kú [é] kɛ̄lā okónu lɛ uwá ŋ́.” (1 Upít. 3:1, 2) A lɔfu ya lɛ a duu. Ɛgɛnyá a?

13. Ɔdiya nɛ ɛ́nɛ́ ɔlɛ cika ō ya ku ɛma ku nu mla Ujehofa kóō wɛ ɔdā ocɛgbá lɛ ɔ fiyɛ duu a?

¹³ Ya ku ɛma ku uwɔ mla Ujehofa kóō wɛ ɔdā nōo cɛgbá gā uwɔ fiyɛ duu. (Obla. 6:5, 6) A yɔ i leyi gwu aɔdā alɛwa bonu ɛgɛ nɛ aɛ́nɛ́ alɛwa yɔ i ya a. A gē leyi gwu eko, ije, iyɔla nɛ a cika ō gbo mɛmla aɔdā ɔhá, o ya ɛɛ ku a lɔfu teyi tu ɛgbá ku ayipɛ ɔlɛ uwɔ lɔɔlɔhi. Amáŋ a cika ō bi ɛjɛɛji eko ku uwɔ yɔ i leyi kwu aɔdā nyā, jaa gbeeko nɛ á gáā le eko duuma ō ya ku ɛma ku uwɔ mla Ujehofa kóō yɔ i lɔfu gɛ ŋ. Bēē lɛ eko taajɛ eko doodu ku a bēē gbɔɔkɔ, bēē ya oklɔcɛ ku abɔyi uwɔ, mɛmla ō gā ōjila ku ujɔ. Ɔdaŋ ku a gē ya lɛ a, a géē tubla Ujehofa ajaajɛ, a klla géē lɛ ocabɔ olɔhi taajɛ lɛ apɔlɛ ku uwɔ mla ācɛ ɔhá duu.

14-15. Ɔdi nɛ a nwu ŋma ocabɔ ku Leanne, Maria, mɛmla João a?

¹⁴ Alɔ leyi yɛ ocabɔ ku aɛdrɔ ōhī nōo nwu ɛgɛ néē géē yihɔtu ku Ujehofa klla kpɔtuce ɔ, ŋma lɛ ō leyi yɛ ocabɔ ku ɛ́nɛ́ uwa a. Ɔyinɔnya ku Christine nōo le ku Leanne a kahinii: “Alɔ i gē lɔfu ya oklɔcɛ ku Ubáyíbu eko duuma nɛ adā alɔ yɔ ɔlɛ ŋ. Amáŋ ɛ́nɛ́ alɔ gē gā ōjila eko doodu. Naana nɛ alɔ i kóō jé ɔdā alɛwa lɛyikwu Ubáyíbu ŋ ma a, uce ō ya ku nu ta alɔ abɔ ku alɔ lɛ ɔtu okpoce olɔfu. Gbɔbu ɛɛ ku alɔ kóō gbɔɔ ō gā ōjila ku ujɔ a, alɔ le jé ŋma ajaajɛ ka Ācɛ Ocijali ku Ujehofa gē nwu ɛlā ɔkwɛyi a ɛ.”

¹⁵ Maria nɛ adā nu gē ya uwa itala ekoohi néē gā ōjila ku ujɔ a kahinii: “Umama ku um wɛ ɔyinɛ nɔnya nōo lɛ ɔtu fiyɛ duu nɛ um jé ɛ ma. Eko nɛ um wɛ ɔyipɛ a, ekoohi ń gē dɔka o ya aɔdā ōhī ŋ, ohigbu ku um yɔ i yuufi ɔdā nɛ ācɛ ɔhá géē ka a. Amáŋ ō má ɛgɛ nɛ umama ku um lɛ ɔtu lɛ, mla ɛgɛ nɛ ó gē je Ujehofa ta aflɛyi eko doodu ipu oyeeyi ku nu a, tu um abɔ ku um lɛ ufi ku ɔlɛɛcɛ nɛ um lɛ a yale.” João nɛ adā nu lɛ íne kwaaje ipu apɔlɛ ku nu ka ɔcɛ duuma kóō hii kɛla lɛyikwu Ujehofa amāŋ Ubáyíbu ɔlɛ ŋ ma kahinii: “Ɔdā nōo ta um abɔ fiyɛ duu a wɛ kahinii, umama ku um le tutu ō ya ɔdā duuma o ya ɛɛ ku ɔtu kóō he upapa ku um, ayika ihɔtu ku nu nɛ ó lɛ lɛ Ujehofa foofunu.”

16. Ɛgɛnyá nɛ ocabɔ ku ɛ́nɛ́ gē lɛ abɔ kwu ācɛ ɔhá iyē lɛ a?

¹⁶ Aɛ́nɛ́, aa bi ɔtu eko doodu ku ocabɔ ku uwɔ gē lɛ abɔ kwu ācɛ ɔhá. Ɛgɛnyá a? Gbɛla lɛyikwu ɛgɛ nɛ ocabɔ ku Iyunis lɛ abɔ kwu Upɔlu iyē  lɛ a. Upɔlu ta ɔkpá ka ɔtu okpocɛ nɛ Utimoti lɛ nōó leyi ɛpa ŋ ma, ‘yɔ ipu ɔtu ku Iyunis aflɛyi.’ (2 Utím. 1:5) Eko nyá nɛ Upɔlu má ɛdɔ ɔtu okpoce nɛ Iyunis lɛ aflɛyi a? Ó lɔfu wɛ ɛpleeko nɛ ó gā iyawu aflɛyi ku uklɔ ku ɔna ō ta ku nu, anu ó má Ulɔyisi mɛmla Iyunis ipu Ulistra a. Ó kē lɔfu wɛ ka ó ta uwa abɔ kéē je piya Ācɛ O Yɛce Ukraist. (Ācot. 14:4-18) Igbihaajɛ abɔ ihayi igwo ɛhɔ (15) gáā lɛ yɛ a, eko nɛ Upɔlu yɔ i ta ɔkpá fu Utimoti a, ó blakwu uce ō ya ku ɔtu okpoce nɛ Iyunis mafu a kpɔ, ó klla bi ɔ le ya ocabɔ ku ɔcɛ nɛ ācɛ ɔhá lɔfu gbla ya! Ó teyi peee ka ocabɔ ku nu ta Upɔlu nōo wɛ ɔyikpo ku Ujisɔsi a ɔtu kwu ɔtu nɛhi, ó klla wɛ ka ó ta Ācɛ O Yɛce Ukraist alɛwa ɔhá nōo lā ɛpleeko ɔɔma ɔtu kwu ɔtu duu. Ɔdaŋ ku awɔ foofu uwɔ yɔ i bi ayipɛ ɔlɛ uwɔ jɛ a, amāŋ a yɔ i bi uwa jɛ ipu apɔlɛ nɛ awɔ mla obiye ku uwɔ i yɔ ɔwɛ ku ɛ̄gbā ō gba ekponu ŋ, le jé kpɔcii ka ocabɔ ku ɔtu okpoce ku uwɔ gē lɛ ɔfu tu ācɛ ɔhá nōo yɔ pi uwɔ a iyē, ó klla gē lɛ abɔ kwu uwa ɔtu duu.

17. Ɔdi nɛ a cika ō ya ɔdaŋ ka ó lɛbɛɛka ɔyi uwɔ i dɔka ō wa i gba Ujehofa ɛ̄gbā ŋ, naana nɛ a kóō yuklɔ lɔfu lɔfu o ya ɛɛ ku a nwu ɔ ɛlā ɛ ma?

¹⁷ Ɔdaŋ ka ó lɛbɛɛka ɔyi uwɔ i gē yɛce ɔwɛ nɛ a gē ceyitikwu mafu lɛ ɔ ŋ bɛ? Bla ka ō bi ɔyi jɛ wɛ ɔdā nōo gē je eko. Ɛgɛ nɛ a yɔ i má ŋma ipu ifoto a, eko duuma nɛ a lɛ ikpo nyi, a géē lɔfu yɔ i gbɛla ekoohi ɔdaŋ ka ikpo ɔɔma géē jɛ klla gáā gbɔɔ ō gwa ikpo igbihaajɛ gla. Naana nɛ á kóō jé kpɔcii ɔdaŋ ka ɔdā ɔɔma nɛ a nyi a géē gwa ikpo ŋ ma, a géē gɔbu yɔ i wu eŋkpɔ tu ɔ, o ya ɛɛ ku a jɛga nōo lɔhi fiyɛ duu a lɛ ɔ kóō jɛ. (Umák. 4:26-29) Ɔwɛ ekponu ɔɔma, ɛ́nɛ́ lɔfu yɔ i gbɛla ekoohi ɔdaŋ ka ó ceyitikwu ku nu yɔ i ta ayipɛ ɔlɛ nu abɔ kéē wa i yihɔtu ku Ujehofa  ɔkwɔɔkwɛyi. A gáā lɔfu miya aɔdā nɛ ayipɛ ɔlɛ uwɔ géē ya a lɛ uwa gla ŋ. Amáŋ ɔdaŋ ku a gɔbu yɔ i ya ɔdā duuma nɛ a ya gla o ya ɛɛ ku a nwu uwa ɛlā, a géē yɔ i je ɛnɛɛnɛ ɛga nōo lɔhi fiyɛ duu a lɛ uwa, o ya ɛɛ kéē gáā je piya ɔya ku Ɔwɔico.—Aíit. 22:6.

18. Ɛgɛnyá nɛ Ujehofa lɔfu ta ayipɛ ɔlɛ uwɔ abɔ kéē wa i je piya ɔya ku nu a?

¹⁸ Ŋma eko ikee a, Ujehofa ta aɛdrɔ alɛwa abɔ ɛ, o ya ɛɛ kéē wa i je piya ɔya ku nu. (Aíjē 22:9, 10) Ó kē lɔfu ta ayipɛ ɔlɛ uwɔ abɔ kéē jɛ gɔbu ipu ɛ̄gbā ō gba ku nu gla, ɔdaŋ ka ɔdā nɛ a dɔka a yɔ abɔɔ a. (1 Ukɔ́r. 3:6, 7) Ɔdaŋ ku ayipɛ ɔlɛ uwɔ i kóō cɛ ō wa i gba Ujehofa ɛ̄gbā mla ɛjɛɛji ɔtu ku uwa ŋ naana, Ujehofa géē gɔbu yɔ i yihɔtu ku uwa kpɔ. (Aíjē 11:4) Igbihaajɛ, ɔdaŋ kē gáā gbɔɔ ō ya uce duuma nōo yɔ i mafu ka é dɔka ō ya ɔdā nōo he Ujehofa ɔtu, ó géē le tutu ō ta uwa abɔ kéē wa i je piya ɔya ku nu. (Ācot. 13:48; 2 Úklɔ́ 16:9) Ujehofa géē lɔfu ta uwɔ abɔ ku a kɛla okpaakpa, eko duuma nɛ ayipɛ ɔlɛ uwɔ cɛgbá ō po ɛlā ɔɔma fiyɛ a. (Aíit. 15:23) Amāŋ, ó lɔfu lɛ abɔ kwu ɔtu ku ɔyinɛ éyi ipu ujɔ, o ya ɛɛ kóō gbɔɔ ō lɛ ɛnɛɛnɛ ɛlá wu uwa. Ɔdaŋ ku igbihaajɛ ayipɛ ɔlɛ uwɔ kóō kwu piya ācɛ ō jikoko ɛ, Ujehofa lɔfu ya ka é wa i gbɔɔ ō blakwu aɔdā nɛ a nwu uwa eko néē yɔ i jɛ a. (Ujɔ́n. 14:26) Ɔdaŋ ku a gɔbu yɔ i nwu ayipɛ ɔlɛ uwɔ ɛlā oŋma lɛ ɛlā nɛ a gē ka mla ocabɔ ku uwɔ, Ujehofa géē hɔhā ce uwɔ.

19. Ɔdi cɛ lɛ uwɔ jé kpɔcii ku a géē miyɛ ɔhā ku Ujehofa a?

¹⁹ Ihɔtu nɛ Ujehofa lɛ gā uwɔ a i gbolo ce ɛdɔ ōmiya nɛ ayipɛ ɔlɛ uwɔ gē ya a ŋ. Ó yihɔtu uwɔ ohigbu ku a yihɔtu nu. Ɔdaŋ ku a wɛ ɔcɛ nōo gē bi ayipɛ ɔlɛ uwɔ jɛ foofu uwɔ, Ujehofa lɛ okonu ce ka anuɔ géē wɛ adā lɛ ayipɛ ɔlɛ uwɔ klla géē wɛ ɔcɛ nōo géē yɔ i gbo uwɔ. (Aíjē 68:5) Ó yɔ ipu abɔ ku uwɔ ō ya ōmiya lɛ ayipɛ ɔlɛ uwɔ kéē wa i gba Ujehofa ɛ̄gbā amāŋ kéē hii gba ɔ ɛ̄gbā ŋ. Amáŋ ɔdaŋ ku a gɔbu yɔ i gbolo ce Ujehofa kóō yɔ i ta uwɔ abɔ, nɛ a klla yɔ i ceyitikwu ya ɔdā duuma nɛ a ya gla, a géē miyɛ ɔhā ku nu.