1-2. (a) Ònye bụ Yunis, oleekwa ihe mere ka o siere ya ike ịkụziri nwa ya gbasara Jehova na Jizọs Kraịst? (b) Kọwaa ihe e sere n’ihu Ụlọ Nche a.

 Ọ BỤ eziokwu na Baịbụl ekwughị ihe ọ bụla banyere baptizim Timoti, ma ọ ga-abụrịrị na obi tọgburu nne ya bụ́ Yunis atọgbu n’ụbọchị ahụ o mere baptizim. (Ilu 23:25) Weregodị ya na ị na-ahụ nne Timoti n’oge a chọrọ ime Timoti baptizim. Ọ na-ele Timoti ka ọ banyere n’ime mmiri ahụ, ọchị eju ya ọnụ, ya na nne nne Timoti bụ́ Lọịs nọ nso. Mgbe e mikpuru Timoti n’ime mmiri ahụ, obi atọgbuo Yunis. Mgbe e si ná mmiri ahụ na-ekulite Timoti, mmiri ahụ emee mkpọtụ, ihu abụrụ ya ọchị ọchị ka o si ná mmiri ahụ na-apụta. Otú obi si tọọ Yunis ụtọ mere ka anya mmiri gbaa ya. N’agbanyeghị na ọ dịrịghị Yunis mfe, ọ gbalịrị ịkụziri Timoti ịhụ Jehova na Jizọs n’anya. Olee ihe ndị siiri ya ike ime ka ọ na-agba mbọ ịkụziri nwa ya gbasara Jehova?

² Nne na nna Timoti anaghị ekpe otu okpukpe. Nna ya bụ onye Grik. Nne ya na nne nne ya bụ ndị Juu. (Ọrụ 16:1) Ọ ga-abụ na Timoti ka bụ obere nwa mgbe nne ya Yunis na nne nne ya bụ́ Lọịs ghọrọ Ndị Kraịst. Ma, nna ya aghọghị Onye Kraịst. Olee ihe Timoti ga-eme ugbu a? Ọ ga-abụ na o toruola ikpebiri onwe ya ihe ọ ga-eme. Ọ̀ ga-ekpewe okpukpe nna ya, ka ọ̀ ga na-eme omenala ndị Juu a kụziiri ya kemgbe ọ dị obere, ka ọ̀ ga-eso nne ya na nne nne ya ghọọ ndị na-eso ụzọ Kraịst?

3. Dị ka e kwuru n’Ilu 1:​8, 9, olee otú Jehova si ewere ọrụ ndị nne na-arụ inyere ụmụ ha aka ka ha bụrụ enyi ya?

 ³ Ndị nne bụ́ Ndị Kraịst hụkwara ezinụlọ ha n’anya. Ihe kacha ha mkpa bụ ime ka ụmụ ha na Jehova dịrị n’ezigbo mma. Jehova jikwa mbọ ha na-agba ime ya kpọrọ ezigbo ihe. (Gụọ Ilu 1:​8, 9.) Jehova enyerela ọtụtụ ndị nne aka ịkụziri ụmụ ha ịhụ ya n’anya na ife ya.

4. Olee ihe na-esiri ndị nne ike taa?

⁴ O nwere ike ịna-echu ndị nne ụra mgbe ụfọdụ ma ụmụ ha hà ga-ekpebi ife Jehova otú ahụ Timoti kpebiri. Ihe kpatara ya bụ na ha ma na ụwa Ekwensu a na-akpa ụmụaka aka ọjọọ. (1 Pita 5:8) Ihe ọzọ nwere ike ime ka o siere ndị nne ike ịzụ ụmụ ha bụ ma ọ bụrụ na ha enweghịzi di ma ọ bụkwanụ na di ha anaghị efe Jehova. Dị ka ihe atụ, otu nwanna nwaanyị aha ya bụ Christine * sịrị: “Di m bụ ezigbo nna na ezigbo onyeisi ezinụlọ. Ma, ọ chọghị ka m zụọ ụmụ anyị ka ha ghọọ Ndịàmà Jehova. Ihe a mere ka m na-ebe ákwá ruo ọtụtụ afọ, mụ ana-eche ma ụmụ m hà ga-emechakwa fewe Jehova.”

5. Gịnị ka anyị ga-atụle n’isiokwu a?

⁵ Ọ bụrụ na ị bụ nne bụ́ Onye Kraịst, ị ga-enyeliri ụmụ gị aka ha ahụ Jehova n’anya ma na-efe ya otú ahụ Yunis mere. N’isiokwu a, anyị ga-eleba anya n’ihe i nwere ike ịmụta n’aka Yunis ga-enyere gị aka iji okwu ọnụ gị na omume gị na-akụziri ụmụ gị ihe. Anyị ga-atụlekwa otú Jehova ga-esi enyere gị aka.

6. Dị ka e kwuru na 2 Timoti 3:​14, 15, olee otú Timoti si ghọọ Onye Kraịst?

⁶ Mgbe Timoti bụ obere nwa, nne ya gbalịrị ike ya niile ịkụziri ya “ihe e dere n’Akwụkwọ Nsọ” otú ndị Juu si ghọta ya. Ma, e nwere ihe ndị ọ na-amaghị ebe ọ bụ na e nweghị ihe ọ bụla ọ ma gbasara Jizọs. N’agbanyeghị nke ahụ, ihe Timoti mụtara n’Akwụkwọ Nsọ ga-enyere ya aka ịghọ Onye Kraịst. Ma, ọ̀ ga-aghọ Onye Kraịst? Ebe ọ bụ na o tolitela, ọ bụ ya ga-ekpebi ma ọ̀ ga-abụ Onye Kraịst. O doro anya na ihe so mee ka Timoti kwere eziokwu gbasara Jizọs bụ ihe nne ya kụziiri ya. (Gụọ 2 Timoti 3:​14, 15.) Obi dị Yunis ezigbo ụtọ na ọ kụziiri nwa ya gbasara Jehova n’agbanyeghị na o siiri ya ike. Aha Yunis si n’okwu pụtara mmeri. O merikwara, nyere nwa ya aka ife Jehova na ịhụ ya n’anya n’agbanyeghị na ọ dịrịghị ya mfe.

7. Olee otú Yunis nwere ike isi nyere nwa ya aka ịna-emekwu nke ọma mgbe o mechara baptizim?

⁷ Timoti mechara mee baptizim. Ihe a bụ ihe dị ezigbo mkpa o mere ná ndụ ya. Ma, Yunis ka na-echegbukwa onwe ya gbasara Timoti mgbe o mechara baptizim. Olee ihe ndị ọ ga-eji ndụ ya eme? Ọ̀ ga-emecha sowe ndị ọjọọ? Ọ̀ ga-aga ụlọ akwụkwọ n’Atens ma kwere ihe ndị na-efe arụsị na-akụzi ebe ahụ? Ọ̀ ga-achọwa ịba ọgaranya, ya emee ka ọ na-eji ike ya niile na ume ya niile na-achụ akụnụba? Ọ bụghị Yunis ga-ekpebiri Timoti ihe ọ ga-eme. Ma, o nwere ike inyere ya aka. Olee otú ọ ga-esi eme ya? O nwere ike inyere nwa ya aka ịhụ Jehova n’anya, nyekwara ya aka inwe obi ụtọ maka ihe niile Jehova na Jizọs meere ha. Ọ bụghị naanị ndị di ha ma ọ bụ nwunye ha na-abụghị Ndị Kraịst ka ọ na-esiri ike ịzụlite ụmụ ha. Ọ bụrụgodị na nne na nna bụ Ndị Kraịst, o nwekwara ike isiri ha ike ịkụziri ụmụ ha ịhụ Jehova n’anya ma na-efe ya. Olee ihe ndị nne na nna nwere ike ịmụta n’aka Yunis?

8. Olee otú nwanna nwaanyị ga-esi enyere di ya bụ́ Onyeàmà Jehova aka ịna-akụziri ụmụ ha Okwu Chineke?

 ⁸ Na-akụziri ụmụ gị Baịbụl. Ụmụnna nwaanyị, ọ bụrụ na di unu nọ n’ọgbakọ, Jehova chọrọ ka unu na-enyere ha aka ịna-akụziri ụmụ unu ihe. Otu ụzọ unu ga-esi eme ya bụ ịna-akwado Ofufe Ezinụlọ unu. Na-ekwu okwu ọma gbasara Ofufe Ezinụlọ unu, na-echekwa gbasara ihe ndị unu nwere ike ime iji mee ka Ofufe Ezinụlọ unu na-atọ ụtọ. I nwere ike inyere di gị aka unu achọta ihe unu ga-amụ ma ọ bụ ihe unu ga-eme n’Ofufe Ezinụlọ unu. Unu nwekwara ike iji akwụkwọ Na-enwe Obi Ụtọ Ruo Mgbe Ebighị Ebi na-amụrụ ụmụ unu ndị nke toruru iji ya amụ ihe ihe.

9. Olee ihe nwere ike inyere nwanna nwaanyị di ya na-abụghị Onyeàmà Jehova aka ịzụ ụmụ ya?

⁹ O nwere ike ịbụ naanị nwanna nwaanyị na-amụrụ ụmụ ya ihe. Ihe nwere ike ịkpata ya bụ na o nweghịzi di ma ọ bụ na di ya abụghị Onyeàmà Jehova. Ọ bụrụ otú ahụ ka ọ dị n’ezinụlọ gị, echegbula onwe gị. Jehova ga-enyere gị aka. Jiri ihe ndị nzukọ Jehova nyere anyị na-amụrụ ụmụ gị ihe. Ha ga-enyere gị aka. I nwekwara ike ịgakwuru ndị nne na nna bụ́ aka ochie ka ha gosi gị otú ha si eji ihe ndị a enwe Ofufe Ezinụlọ. * (Ilu 11:14) I nwere ike ịrịọ Jehova ka o nyere gị aka ịchọta ajụjụ ndị ga-enyere gị aka ịmata ihe dị ụmụ gị n’obi. (Ilu 20:5) Ajụjụ dị ka ‘Olee ihe na-akacha esiri gị ike n’ụlọ akwụkwọ?’ nwere ike inyere gị aka ịchọpụta ihe ya na nwa gị na-alụ.

10. Olee ihe ọzọ i nwere ike ime iji nyere ụmụ gị aka ịmụta gbasara Jehova?

¹⁰ Chọta ụzọ ndị ị ga-esi kụziere ụmụ gị gbasara Jehova. Na-agwa ha gbasara Jehova nakwa ọtụtụ ihe ọma ndị o meere gị. (Diut. 6:​6, 7; Aịza. 63:7) Ihe a dị ezigbo mkpa ma ọ bụrụ na ị naghị enweli ike ịmụrụ ụmụ gị ihe mgbe niile n’ụlọ. Nwanna Nwaanyị Christine anyị kwuburu okwu ya sịrị: “Ọ naghị adịchara m mfe ịkụziri ụmụ m Baịbụl mgbe niile. N’ihi ya, m na-eji ohere ọ bụla mụ na ha nọ na-akụziri ha ya. Anyị na-apụ gagharịa ma ọ bụ baa n’ụgbọ mmiri kwọrọ ya baa n’osimiri ka anyị nwee ike ikwu gbasara ihe ndị dị ịtụnanya Jehova kere nakwa ihe ndị ọzọ ga-enyere ha aka ka ha bụrụ enyi Jehova. Mgbe ụmụ m tolitere, m gbara ha ume ka ha na-amụ Baịbụl n’onwe ha.” Ihe ọzọ ị ga-eme bụ ịna-ekwu okwu ọma gbasara nzukọ Jehova nakwa gbasara ụmụnna anyị. Akatọla ndị okenye. Ihe ị na-agwa ụmụ gị gbasara ndị okenye nwere ike ime ka ha gakwuru ha ma ha nọrọ ná nsogbu.

11. Dị ka e kwuru na Jems 3:​18, gịnị mere o ji dị mkpa ime ka udo dịrị n’ezinụlọ?

¹¹ Mee ka udo dịrị n’ụlọ unu. Na-agwa di gị na ụmụ gị mgbe ọ bụla na ị hụrụ ha n’anya. I kwuwe gbasara di gị, na-ekwu okwu gosiri na ị na-akwanyere ya ùgwù, kụziekwara ụmụ gị ịna-eme otú ahụ. Ọ bụrụ na ị na-eme otú ahụ, ị na-eme ka udo dịrị n’ezinụlọ unu, ya enyekwara ụmụ gị aka ịmụta gbasara Jehova. (Gụọ Jems 3:18.) Legodị ihe mere otu nwanna aha ya bụ Jozsef. Ọ bụ ọsụ ụzọ pụrụ iche na Romenia. Mgbe ọ na-eto, papa ya mere ka o siere yanwa, mama ya, na ụmụnne ya ike ife Jehova. Ọ sịrị: “Mama m gbara ezigbo mbọ mee ka udo dịrị n’ezinụlọ anyị. Papa m na-eme ka ihe na-esikwuru anyị ike, mama m ana-egosikwu ya obiọma. Mama m chọpụta na ọ na-esiri anyị ike irubere papa m  isi na ịna-akwanyere ya ùgwù, ọ na-agụrụ anyị Ndị Efesọs 6:​1-3. Ọ na-agwazi anyị gbasara àgwà ọma ndị papa anyị nwere, nyekwara anyị aka ịghọta ihe mere anyị ji kwesị iji ya akpọrọ ihe ma na-akwanyere ya ùgwù. Ọ na-esi otú a eme ka anyị dịrị n’udo.”

12. Dị ka e kwuru na 2 Timoti 1:​5, olee uru àgwà Yunis baara Timoti?

¹² Gụọ 2 Timoti 1:5. Yunis kpara àgwà Timoti ga-amụta ihe na ya. Ọ ga-abụrịrị na ọ kụziiri ya na ọ bụ àgwà anyị ka anyị ga-eji egosi na anyị nwere ezigbo okwukwe. (Jems 2:26) O doro anya na Timoti hụrụ na ihe mere mama ya ji eme ihe ndị ọ na-eme bụ n’ihi na ọ hụrụ Jehova n’anya nke ukwuu. Timoti hụkwara na ife Jehova mere ka mama ya na-enwe obi ụtọ. Olee uru àgwà Yunis baara Timoti? Dị ka Pọl onyeozi kwuru, Timoti nwere ezigbo okwukwe ka nne ya. Ihe a emeghị ná ndaba. Timoti hụrụ àgwà ọma nne ya ma mụta ya. Taakwa, ọtụtụ ndị nne enyerela ndị ezinụlọ ha aka ife Jehova ‘n’ezighị ha ozi ọma.’ (1 Pita 3:​1, 2) I nwekwara ike ime otú ahụ. Olee otú ị ga-esi eme ya?

13. Gịnị mere ndị nne kwesịrị iji mee ka adịm ná mma ha na Jehova bụrụ ihe kacha ha mkpa ná ndụ?

¹³ Mee ka adịm ná mma gị na Jehova bụrụ ihe kacha mkpa ná ndụ gị. (Diut. 6:​5, 6) Dịkwa ka ọtụtụ ndị nne, e nwere ọtụtụ ihe dị gị mkpa ị na-ahapụ. Ọ na-ewe gị oge na ego na ihe ndị ọzọ iji lekọta ụmụ gị. Mgbe ụfọdụ, o nwekwara ike ime ka ị ghara ihi ụra. Ma, i kwesịghị ikwe ka ọrụ ndị i ji n’aka mee ka ị ghara inwe oge ị ga-eji eme ka gị na Jehova dịrị ná mma. Na-ewepụta oge mgbe ọ bụla na-ekpe ekpere, na-amụ Baịbụl, ma na-aga ọmụmụ ihe. I mee otú ahụ, gị na Jehova ga-adịkwu ná mma, ya emeekwa ka ndị ezinụlọ gị na ndị ọzọ na-eme otú ahụ.

14-15. Gịnị ka ị mụtara n’aka Leanne, Maria, na João?

¹⁴ Ka anyị kọọ gbasara ndị na-eto eto mụtara ịhụ Jehova n’anya ma na-atụkwasị ya obi n’aka nne ha. Leanne bụ́ nwa Nwanna Nwaanyị Christine kwuru, sị: “Anyị na nne anyị enweghị ike ịmụ ihe mgbe papa anyị nọ ya. Ma, mama m na-agachi ọmụmụ ihe anya. Otú o si akpa àgwà nyeere anyị aka okwukwe anyị esikwuo ezigbo ike. Tupu anyị amalitedị ịga ọmụmụ ihe, anyị ma na ọ bụ Ndịàmà Jehova na-akụzi eziokwu.”

¹⁵ E nwere otu nwanna nwaanyị aha ya bụ Maria. Papa ya na-ata ndị ezinụlọ ya ahụhụ mgbe ụfọdụ ma ha gaa ọmụmụ ihe. Ọ sịrị: “Mama m bụ otu n’ime ụmụnna nwaanyị kacha nwee obi ike m ma. Mgbe m ka na-eto eto, ọ na-esiri m ike mgbe ụfọdụ ime ihe ụfọdụ n’ihi ihe ndị mmadụ ga-ekwu. Ma, otú mama m si atụkwasị Jehova obi mgbe niile nyeere m aka ịkwụsị ịtụ ụjọ mmadụ.” E nwere otu nwanna aha ya bụ João. Papa ya machiri ha ikwu gbasara Baịbụl n’ụlọ ha. Ọ sịrị: “O nwere ike ịbụ na ihe kacha nyere m aka bụ otú mama m si agbalị ike ya niile ime papa m obi ụtọ. Ma, ọ naghị achọ imejọ Jehova iji mee ya obi ụtọ.”

16. Olee otú àgwà ọma nne nwere ike isi baara ndị ọzọ uru?

¹⁶ Ndị nne, chetanụ na otú unu si akpa àgwà nwere ike ịbara ndị ọzọ uru. Olee otú ọ bụ? Chegodị otú àgwà ọma Yunis si baara Pọl onyeozi uru. Pọl kwuru na Timoti nwere ezigbo okwukwe nakwa na ọ bụ nne ya “bụ́ Yunis bu ụzọ nwee ụdị okwukwe a.”  (2 Tim. 1:5) Olee mgbe mbụ Pọl chọpụtara na Yunis nwere okwukwe? O nwere ike ịbụ oge ọ na-aga ozi ala ọzọ nke mbụ ya ka ọ hụrụ Lọịs na Yunis mgbe ọ gara Listra. Ọ ga-abụkwa na o nyeere ha aka ha aghọọ Ndị Kraịst. (Ọrụ 14:​4-18) Chegodị echiche. Mgbe Pọl degaara Timoti akwụkwọ ozi mgbe ihe dị ka afọ iri na ise gachara, Pọl chetara otú Yunis si nwee okwukwe, kwuokwa na e kwesịrị ịna-eme ka ya. O doro anya na otú o si kpaa àgwà gbara Pọl ume nke ukwuu, o nwekwara ike ịbụ na ọ gbara ọtụtụ Ndị Kraịst ndị ọzọ nọ n’oge ahụ ume. Ọ bụrụ na ọ bụ naanị gị na-azụ ụmụ gị ma ọ bụkwanụ na di gị abụghị Onye Kraịst, obi sie gị ike na okwukwe gị na-agba ndị ọzọ ume.

17. Gịnị ka ị ga-eme ma ọ bụrụ na o yie ka ụmụ gị achọghị ife Jehova n’agbanyeghị mbọ ị na-agba inyere ha aka?

¹⁷ Ọ bụrụkwanụ na o yie ka mbọ ị na-agba ịzụ nwa gị na-akụ afọ n’ala? Cheta na ịzụ nwa na-ewe oge. Dị ka e gosiri na foto e ji kọwaa paragraf a, ọ bụrụ na ị kụọ mkpụrụ, i nwere ike ịna-eche mgbe ụfọdụ ma ọ̀ ga-etokwa mịa mkpụrụ. Ọ bụ eziokwu na ọ bụghị gịnwa ga-ekpebi ma ọ̀ ga-emecha too na-amị mkpụrụ, ị ka ga na-agba ya mmiri iji nyere ya aka ka o too. (Mak 4:​26-29) I nwere ike ịna-eche mgbe ụfọdụ ma mbọ ị na-agba inyere ụmụ gị aka ịhụ Jehova n’anya ọ̀ bakwara uru. Ọ bụ eziokwu na ọ bụghị gịnwa ga-ekpebiri ụmụ gị ihe ha ga-eme, ma ọ bụrụ na ị na-eme ihe niile  i nwere ike ime iji na-azụ ha, ọ pụtara na ị na-enyere ha aka ịbụ ndị enyi Chineke.​—Ilu 22:6.

18. Olee otú Jehova nwere ike isi nyere ụmụ gị aka ka ha bụrụ ndị enyi ya?

¹⁸ Kemgbe oge Baịbụl, Jehova enyerela ọtụtụ ndị na-eto eto aka ịghọ ndị enyi ya. (Ọma 22:​9, 10) O nwekwara ike inyere ụmụ gị aka ịbụ ndị enyi ya ma ọ bụrụ na ha chọrọ. (1 Kọr. 3:​6, 7) Ọ bụrụgodị na o yie ka ụmụ gị achọghị ife Jehova, Jehova agaghị akwụsị ịhụ ha n’anya. (Ọma 11:4) Ọ bụrụ na ha emee ihe ọ bụla gosiri na ha “nwere ezi obi,” ọ ga-adị njikere inyere ha aka ka ha bụrụ ndị enyi ya. (Ọrụ 13:48; 2 Ihe 16:9) O nwere ike inyere gị aka ikwu ihe kwesịrị ekwesị n’oge i kwesịrị ikwu ya ya eruo ụmụ gị n’obi. (Ilu 15:23) O nwekwara ike ime ka nwanna nọ n’ọgbakọ unu anya ruru ala meta ha enyi. Mgbe ụmụ gị tolitechakwara, Jehova nwere ike inyere ha aka icheta ihe ị kụziiri ha n’oge gara aga. (Jọn 14:26) Ọ bụrụ na ị na-eji okwu ọnụ gị na omume gị na-azụ ụmụ gị, Jehova ga-agọzi gị.

19. Gịnị ka ị ga-eme ka ihe gị masị Jehova?

¹⁹ Ihe ga-eme ka Jehova hụ gị n’anya abụghị ihe ụmụ gị kpebiri ime. Ọ hụrụ gị n’anya n’ihi na gịnwa hụrụ ya n’anya. Ọ bụrụ na ọ bụ naanị gị na-azụ ụmụ gị, Jehova kwere nkwa ịbụrụ ụmụ gị Nna, bụrụkwa Onye na-echebe gị. (Ọma 68:5) Ọ bụghị gị ga-ekpebi ma ụmụ gị hà ga-efe Jehova ma ọ bụ na ha agaghị efe ya. Ma, ọ bụrụ na ị tụkwasị Jehova obi na ọ ga-enyere gị aka, meekwa ihe niile i nwere ike ime iji nyere ụmụ gị aka, ihe gị ga-amasị Jehova.