1-2. (a) Uni gaw kadai rai kun? Kanu langai hku nna shi gara mayak mahkak ni hkrum wa ai kun? (b) Makawp sumla hte seng nna mahtai jaw u. 

 TIMOHTI hkalup hkam ai lam hpe Chyum Laika hta n ka da tim, dai shani hta kanu Uni kade daram kabu nga na hpe shingran yu mai ai. (Gsh 23:25) Hka kata tsap nga ai Timohti hpe yu nna arawng la nga na re. Timohti a kawoi dwi Lui mung makau hta mani sumsai hte tsap nga na re. Timohti hka de lup mat ai shaloi, Uni nsa angwi ngwi sa dat ai. Hka kaw na Timohti bai pru wa ai aten hta, Uni myiprwi ni hkrat wa ai. Yehowa hte Kasha Yesu hpe tsawra wa hkra, kasha hpe bau maka lu wa sai. Dai masa de du wa hkra sharin achyin na matu, gara mayak mahkak ni hpe tawt lai wa ai kun?

² Makam masham n bung ai kanu kawa ni a npu hta, Timohti nga kaba wa ai. Kawa gaw Grik masha rai nna, kanu hte kawoi dwi gaw Yuda re. (Kas 16:1) Uni yan Lui Hkristan byin wa ai shaloi, Timohti gaw asak shi ning jan rai na masa nga ai. Kawa gaw Hkristan n byin wa ai. Timohti gaw tinang nan dawdan lu ai asak rai sai majaw, gara maga hkan na kun? N kamsham ai kawa maga hkan na kun? Ma aten kaw na sharin hkam la wa ai Yuda htung sha hkan na kun? Yesu a sape galaw na kun?

3. Ga Shagawp 1:8, 9 hku nga yang, Yehowa hte hku hkau wa hkra kasha ni hpe karum ya wa ai kanu ni hpe Karai Kasang gara hku mu mada ai kun?

³ Dai ni aten na Hkristan kanu ni mung, dinghku hpe tsawra ai. Yehowa hte hku hkau ai lam nga na matu, kasha ni hpe dang lu ai daram karum ya mayu ai. Shanhte a shakut shaja ai lam  hpe Karai Kasang grai manu shadan ai. (Ga Shagawp 1:8, 9 hpe hti u.) Tengman ai tara hpe hkap la wa hkra, kasha ni hpe sharin achyin ya na matu, kanu law law hpe Yehowa karum ya ai.

4. Ya aten na kanu ni gara mayak mahkak ni hkrum nga ai kun?

⁴ Tinang a kasha ni gaw, Timohti zawn Yehowa hpe nawku na matu lata na kun? ngu ai hpe kanu ni myit tsang chye ai. Satan mungkan hta, kasha ni shadut hkrum ai lam law law nga ai hpe kanu kawa ni chye ai. (1 Pe 5:8) Dai sha n-ga, kanu law law gaw, ningrum ningtau n nga ai (sh) madu wa gaw Yehowa hpe n nawku ai lapran, kasha ni hpe wenyi lam hta bau maka ra nga ai. Ga shadawn, nauna Hkristin b ndai hku tsun ai: “Nye madu wa gaw, kaja ai dinghku la rai nna, dinghku hpe mung grai tsawra chye ai. Raitim, kasha ni hpe Yehowa Sakse byin hkra sharin ya ai hpe tsep kawp n ra ai. Kasha ni Yehowa hpe nawku wa na kun? ngu myit tsang let shaning law law ngai chyahkring hkring hkrap wa ai.”

5. Ndai sumhpa hta hpa lam bawngban na kun?

⁵ Nang gaw Hkristan kanu rai yang, Uni zawn awng dang lu ai. Tinang a tsun shaga ai lam, arawn alai hte kasha ni hpe sharin ai hta, Uni hpe gara hku kasi la mai ai lam, Yehowa gara hku karum ya na lam ni hpe ndai sumhpa hta bawngban na re.

6. 2 Timohti 3:14, 15 hku nga yang, Timohti gaw Hkristan gara hku byin wa ai kun?

⁶ Ma prat hta, Timohti hpe kanu Uni gaw, “chyoi pra ai Chyum laika” a lam dang lu ai daram sharin ya wa ai. Yesu Hkristu a lam hpa mung n chye shi ai majaw, Uni hta machye machyang loi mi sha nga na re. Raitim, Timohti sharin la wa ai Chyum Laika machye machyang gaw, Hkristan makam masham hpe hkap la na matu, karum ya wa ai. Timohti hkap la na kun? Ramma langai hku nna Hkristan prat hkrun lam hpe hkan na kun? N hkan na kun? ngu ai hpe lata na ahkang nga ai. Yesu hte seng ai tengman lam hpe Timohti “kam sham” wa ai gaw, kanu a shakut shaja ai lam a majaw re. (2 Timohti 3:14, 15 hpe hti u.) Yak ai lam ni nga tim, kasha hpe Yehowa a lam atsawm lu sharin ya wa ai majaw, Uni grai kabu na re. Uni ngu ai amying a lachyum gaw, “awng dang ai wa” re. Mayak mahkak ni a lapran, Timohti hpe sharin ya ai hta, awng dang wa ai.

7. Hkalup hkam ngut ai hpang matut rawt jat na matu, kasha hpe Uni gara hku karum ya lu ai kun?

⁷ Timohti hkalup hkam ai aten hta, prat a ahkyak ai bandung hpe dep lu wa ai. Raitim, Uni myit tsang nga ding yang re. Ngam ai prat ting hpe kasha gara hku akyu jashawn na kun? N kaja ai manang ni hte kanawn hkrup na kun? Ahten mare hta, jawng sa lung nna, shut shai ai myit mang ai lam ni shang wa na kun? Lusu na matu shakut let, aten, n-gun atsam hte ramma prat ni htum mat na kun? Timohti a malai dawdan lam ni hpe Uni n jahkrat ya lu tim, karum ya lu ai. Gara hku nna kun? Yehowa hpe myit masin mahkra hte tsawra na matu, Yesu hpe chyeju dum myit nga na matu, matut karum ya ai. Makam masham n bung ai dinghku hta, mayak mahkak ni gaw nga na re. Kanu kawa lahkawng yan, Yehowa hpe nawku nga yang pyi, kasha ni hpe sadi dung ai mayam byin wa hkra sharin ya na matu yak chye ai. Uni a kasi kaw na kanu kawa ni hpa sharin la lu ai kun?

8. Kanu ni gaw kasha ni hpe Yehowa a lam sharin ya ai hta, makam masham bung ai madu wa hpe gara hku madi shadaw ya lu ai kun?

 ⁸ Kasha ni hte rau Chyum Laika hkaja u. Nauna ni e, nanhte a madu wa gaw Yehowa Sakse rai yang, kasha ni hpe Karai a lam sharin ya ai hta, madu wa hpe karum ya na matu, Yehowa ra sharawng ai. Dai zawn karum ya lu ai lam langai gaw, Dinghku Nawku lamang hpe ayan madi shadaw ya ai hku nna re. Dinghku nawku lamang hpe kaja ai ningmu hte tsun u. Myit lawm hpa, pyaw hpa byin hkra gara hku lajang ya mai ai hpe myit u. Chyum Laika lam langai ngai hpe laksan hkaja na matu lajang ai hta, madu wa hpe karum ya lu ai. Dai sha n-ga, asak ram sai kasha ni akyu lu na matu, Htani Htana Ngwi Pyaw Ai Prat! laika buk hte hkaja lamang galaw ai shaloi, madu wa hpe karum ya mai ai.

9. N kamsham ai madu wa nga ai kanu ni gaw, gara kaw na karum shingtau lu mai ai kun?

⁹ Kanu nkau gaw, ningrum ningtau n nga ai (sh) madu wa gaw n kamsham ai wa re ai majaw, ma ni hpe tinang hkrai sha Chyum Laika sharin ya ra chye ai. Nang dai zawn sharin taw ai nga yang, hkum tsang. Yehowa karum ya na re. Kasha ni hte hkaja na matu, uhpung kaw na lajang da ya ai sharin achyin hkingrai ni hpe lang u. Dinghku nawku hta, dai hkingrai ni hpe gara hku lang ra na ngu ai hpe, mahkrum madup nga ai kanu kawa ni hpe san yu u. c (Gsh 11:14) Kasha ni hte tsun shaga chye hkra, Yehowa karum ya na re. Shanhte a myit hta nga ai lam ni hpe chye lu hkra karum ya na matu, Yehowa kaw akyu hpyi u. (Gsh 20:5) ‘Jawng hta, yak dik htum gaw hpa rai kun?’ ngu ai zawn re ai ga san ni san nna ga shaga hpang mai ai.

10. Yehowa a lam chye wa hkra ma ni hpe gara lam hku nna naw karum ya mai ai kun?

¹⁰ Kasha ni hpe Yehowa a lam sharin ya na matu ahkaw ahkang tam u. Yehowa a lam, na matu Karai Kasang galaw ya ai lam ni tsun dan u. (Trj 6:6, 7; Esa 63:7) Nta kaw, kasha ni hte rau ayan n hkaja lu ai masa hta, dai zawn tsun dan na matu grai ahkyak ai. Nnan hta tsun wa ai Hkristin ndai hku tsun ai: “Wenyi lam tsun dan na matu ahkaw ahkang nau n lu ai majaw, aten lu ai shaloi ahkaw ahkang tam nna tsun dan ai. Lam hkawm chyai ai shaloi, hkali jawn chyai ai shaloi, Yehowa a mauhpa hpan da ai lam hte kaga wenyi lam ni tsun dan ai. Ma ni kaba wa ai shaloi, tinang hkrai Chyum Laika hkaja na matu n-gun jaw ai.” Yehowa a uhpung hte hpunau nauna ni a lam hpe kaja ai ningmu hte tsun dan u. Myitsu salang ni a lam kaja ai hku tsun dan na nga yang, karum hpyi ra ai aten nga wa ai shaloi, ma ni gaw shanhte kaw karum hpyi gwi na re.

11. Yaku 3:18 hku nga yang, nta hta simsa ai masa byin hkra shakut na matu hpa majaw ahkyak ai kun?

¹¹ Nta hta simsa ai shara byin hkra shakut u. Madu wa hte ma ni hpe tsawra ai lam ayan tsun dan u. Madu wa a lam hpe tsawra hkungga ai hku tsun u. Ma ni hpe mung dai hku tsun chye hkra sharin ya u. Rai yang, nta hta simsa ai masa byin wa na re. Yehowa a lam sharin ya na matu, grau loi wa na re. (Yaku 3:18 hpe hti u.) Romeniya mung hta laksan ningshawng hku nna magam gun nga ai Rosep a lam hpe myit yu ga. Kaji ai shaloi, kanu hte ma ni Yehowa hpe n nawku lu hkra kawa pat shingdang wa ai. “Nta hta, simsa ai masa byin hkra, anu gaw dang lu ai daram shakut ai. Awa grau mazut magang, anu gaw tsawra myit grau madun magang re. Awa hpe anhte hkungga na matu yak nga ai hpe anu sadi hkrup ai shaloi,  Ehpesu 6:1-3 hpe hti dan ai. Awa a kaja ai atsam ningja ni hpe tsun dan nna, hpa majaw shi hpe tsawra hkungga ging ai lam chye na hkra karum ya ai. Dai lam hku nna nta hta simsa lam nga na matu karum ya ai.”

12. 2 Timohti 1:5 hku nga yang, Uni a kasi ningli gaw Timohti a ntsa gara hku akyu shabyin ya wa ai kun?

¹² 2 Timohti 1:5 hpe hti u. Uni gaw, Timohti a matu kaja ai kasi madun wa ai. Jet ai makam masham hta, magam bungli lawm ai lam, kasha hpe sharin ya wa na re. (Yak 2:26) Kanu a arawn alai ni gaw, Yehowa hpe tsawra ai majaw byin wa ai hpe Timohti mu na re. Yehowa hpe nawku ai majaw, kanu kade daram ngwi pyaw ai hpe mung mu na re. Uni a kasi ningli gaw, Timohti a ntsa gara hku akyu shabyin ya ai kun? Kanu a makam masham hpe Timohti hkap la wa ai ngu kasa Pawlu tsun ai. Dai gaw n myit mada ai sha byin wa ai n re. Kanu a kasi hpe yu la nna, hkan sa na matu Timohti dawdan wa ai. Dai ni aten hta mung, kanu law law gaw, “ga nlawm ti mung” nta masha ni Yehowa hpe nawku wa hkra karum ya nga ai. (1 Pe 3:1, 2) Nang mung dai hte maren karum ya lu ai. Gara hku nna kun?

13. Yehowa hte hku hkau lam hpe hpa majaw madung da ging ai kun?

¹³ Yehowa hte hku hkau lam hpe madung tawn u. (Trj 6:5, 6) Kanu law malawng zawn sha, nang mung grai nan sak jaw nga ai. Aten, ja gumhpraw shama hkam nna, n yup n sha dinghku a ra kadawn ai lam ni hpe madi shadaw ya nga ai. Raitim, Yehowa hte hku hkau lam hkra machyi ai du hkra, bungli grai law ai baw n byin ging ai. Tinang hkrai akyu hpyi na matu, Chyum Laika hkaja na matu, zuphpawng lung na matu aten masat da u. Rai yang, Yehowa hte hku hkau lam grau ngang kang wa na re. Dinghku a matu mung, kaga ni a matu mung, kasi kaja byin wa na re.

14-15. Lin, Mariya, Zwa-u ni a kasi ningli kaw na hpa chye lu ai kun?

¹⁴ Kanu a kasi ningli a majaw, Yehowa hpe grau tsawra kamsham wa ai ramma nkau mi a lam hpe yu yu ga. Nauna Hkristin a kasha makaw Lin ndai hku tsun ai: “Nta kaw awa nga ai aten hta Chyum Laika n lu hkaja ai. Raitim, anu gaw zuphpawng n sa ai sha n nga ai. Anhte hta Chyum Laika machye machyang nau n nga tim, anu a kasi ningli gaw makam masham ngang kang wa hkra karum ya ai. Zuphpawng ni n lung shi ai aten kaw na, dai gaw tengman lam re ai hpe anhte chye ai.”

¹⁵ Nauna Mariya a kawa gaw, zuphpawng lung ai nta masha ni hpe chyahkring hkring dam jaw ai. Shi ndai hku tsun ai: “Ngai chye ai nauna ni kaw na anu gaw nden marai nga dik htum re. Ngai ma aten hta, kaga ni gara hku tsun wa na kun? ngu ai hpe hkrit nna jaw ai hpe n galaw wa ai aten ni nga ai. Raitim, anu gaw grai nden marai nga ai. Prat hta Yehowa hpe ayan shawng tawn ai hpe mu nna, masha hpe hkrit ai myit hpe tawt lai lu wa ai.” Hpunau Zwa-u a kawa gaw, nta hta Yehowa a lam n tsun na matu hkum pat da ai. “Wenyi lam hta lai nna, ngam ai lam yawng hta awa myit ra ai hte maren anu sak jaw ai. Dai gaw nye a myit hpe hkra ya ai” ngu tsun ai.

16. Kanu langai a kasi gaw kaga ni a ntsa gara hku akyu shabyin ya lu ai kun?

¹⁶ Kanu ni e, na a kasi ningli gaw, kaga ni a ntsa akyu shabyin ya ai hpe dum u. Gara hku nna kun? Uni a kasi ningli gaw, kasa Pawlu a ntsa gara hku akyu shabyin ya ai hpe myit yu u. Timohti a hpyi n hpun ai makam masham gaw, ‘Uni hta shawng jung’ wa ai hpe Pawlu hkap la ai. (2 Tm 1:5) Uni a makam masham hpe Pawlu gara aten hta, shawng sadi hkrup  wa ai kun? Shawng nnan na sasana hkrun lam hta, Lustra mare kaw Lui hte Uni hpe Pawlu shawng mu nna, Hkristan byin wa hkra karum ya wa na masa nga ai. (Kas 14:4-18) 15 ning daram na ai hpang, Timohti hpang de Pawlu laika ka wa ai. Dai hta, Uni a makam masham hte seng nna galaw ai lam ni hpe dum nga dingyang rai nna, hkan sa ging ai kasi ningli hku nna madun dan wa ai. Shi a kasi ningli gaw, kasa Pawlu hpe mung, tsa ban 1 na kaga Hkristan ni hpe mung n-gun lu shangun wa na gaw teng sha re. Nang gaw ningrum ningtau n nga ai sha (sh) makam masham n bung ai dinghku hta, kasha ni hpe bau maka nga ra ai rai yang, na a sadi dung ai kasi ningli gaw, kaga ni hpe n-gun lu shangun ai, shadut ya lu ai hpe kam u.

17. Tinang a shaman shakyang ya ai lam hpe ma ni atsawm bai n htang ai ngu shadu nga yang hpa galaw ging ai kun?

¹⁷ Tinang a shakut shaja ai lam hpe ma ni atsawm bai n htang ai nga yang gaw gara hku kun? Ma langai hpe shaman ya na matu, aten ra ai hpe dum u. Sumla hta mu lu ai hte maren, nli gat ngut ai hpang, tu kaba wa na kun? Asi si wa na kun? ngu myit tsang chye ai. Lu wa na akyu hpe n hkang lu tim, ayan hka jaw na nga yang, tu kaba wa na matu, kaja htum ahkaw ahkang jaw nga ai re. (Mrk 4:26-29) Kanu ni mung, tinang a shakut shaja ai lam gaw, kasha ni a myit masin hpe shadut ya lu na kun? ngu myit tsang chye ai. Lu wa na akyu hpe nang n lu hkang ai. Raitim, dang lu ai daram matut shaman shakyang ya na nga yang, wenyi lam hta rawt jat galu kaba wa hkra, kaja htum ahkaw ahkang jaw nga ai re.​—Gsh 22:6.

18. Wenyi lam hta kasha ni rawt jat wa hkra Yehowa gara hku karum ya lu ai kun?

¹⁸ Chyum Laika prat kaw nna, ramma law law hpe tinang a jinghku byin wa hkra, Yehowa karum ya wa ai. (Shk 22:9, 10) Na a kasha ni mung, hkap la na nga yang, Shi hte hku hkau wa hkra, Karai Kasang karum ya lu ai. (1 Ko 3:6, 7) Na a kasha ni, lam shai nga ai ngu shadu nga yang pyi, Yehowa gaw shanhte hpe matut tsawra nga na re. (Shk 11:4) Shanhte hta “myit madung nga ai” lam loi mi madun ai hpe mu yang karum ya na re. (Kas 13:48, NWT; 2 Hl 16:9) Shanhte ra dik htum aten hta, htap htuk ai ga tsun na matu, nang hpe mung karum ya lu ai. (Gsh 15:23) Shanhte hpe myit lawm ai lam madun na matu, nawku hpung kaw na hpunau nauna langai ngai hpe Karai shadut ya lu ai. Shanhte asak ram sai nga yang, nang sharin ya wa ai lam ni hpe bai myit dum na matu Yehowa karum ya lu ai. (Yhn 14:26) Tinang tsun shaga ai ga, arawn alai hku nna kasha ni hpe matut shaman ya na nga yang, Yehowa shaman chyeju jaw na re.

19. Yehowa a myi man lu na ngu hpa majaw kam mai ai kun?

¹⁹ Na a ntsa Yehowa tawn ai tsawra myit gaw, kasha ni a lata ai lam hte n seng ai. Karai Kasang hpe nang tsawra ai majaw, nang hpe Shi tsawra ai re. Nang gaw, ningrum ningtau n nga ai kanu rai yang, Yehowa gaw, na kasha ni a kawa rai nna, nang hpe makawp maga ya ai wa rai na ngu ga sadi jaw da ai. (Shk 68:5) Kasha ni gara hku dawdan wa na ngu ai hpe nang n hkang lu ai. Raitim, Yehowa a karum shingtau lam hpe kamhpa nna, dang lu ai daram shakut na nga yang, Shi a myi man lu na re.