1-2. (a) Ken ki éra Eunisi, i ki dizafiu el pasa, pa el djuda se fidju ama Jeová i Jizus? (b) Splika dizenhu na kapa.

 BÍBLIA ka ta pâpia di batismu di Timótiu. Má di sertéza se mai staba uma kontenti kel dia. (Pro. 23:25) Imajina Eunisi djuntu ku Lóidi, ki éra avó di Timótiu, ta odja se fidju déntu di agu prontu pa batiza. El staba ku txeu orgulhu di se fidju. Dipôs ki Timótiu entra na agu i el sai kontenti, Eunisi kumesa ta txora di alegria. Sikrê foi difísil, Eunisi konsigi djuda se fidju ama Jeová i Jizus. Modi ki el konsigi djuda Timótiu faze prugrésu i batiza? I ki dizafius el pasa pa el?

² Pai ku mai di Timótiu ka tinha mésmu relijion. Se pai éra gregu i se mai ku se avó éra judeu. (Atos 16:1) Talvês Timótiu éra jóven inda kantu Eunisi ku Lóidi bira kriston. Má se pai ka bira kriston. Nton, ki relijion Timótiu ta ben skodjeba? Talvês na kel ténpu la, Timótiu dja tinha idadi di tomaba se própi disizon. El ta ben sigiba relijion di se pai? El ta kontinuaba ta sigi kes tradison di judeu ki el inxinadu désdi pikinoti? Ô el ta biraba un sigidor di Jizus?

3. Sima sta na Provérbios 1:8, 9, kuzê ki Jeová ta atxa di sforsu ki un mai ta faze pa djuda se fidju bira se amigu?

³ Oji tanbê, kes mai ki ta sirbi Jeová ta ama ses família. Es krê faze di tudu pa inxina ses fidju ten un  amizadi fórti ku Jeová. I Jeová ta da txeu valor pa sforsu ki es ta faze. (Lé Provérbios 1:8, 9.) Jeová dja djuda txeu mai inxina ses fidjus ama-l i sirbi-l.

4. Ki dizafius txeu mai ta pasa pa el oji?

⁴ Un mai ki ta sirbi Jeová sabe ma se fidjus ta pasa pa txeu tentason na mundu di Satanás. (1 Ped. 5:8) Pur isu, é normal el pergunta si se fidjus ta ben sirbi Jeová sima Timótiu. Tanbê, ten txeu mai ki ta kria ses fidjus es sô. I otus ten maridu ki ka ta sirbi Jeová. Pur izénplu, un irman ki txoma Kristina, b fla: “Nha maridu éra un bon pai i el ta amaba nos. Má, el ka kreba pa N inxinaba nos fidjus sobri Jeová, pur isu el faze-m txeu opozison. N txora txeu duránti tudu kes ténpu la i sénpri N ta perguntaba si un dia nhas fidju ta ben sirbiba Jeová.”

5. Kuzê ki nu sta ben odja na kel studu li?

⁵ Si bo é un mai ki ta sirbi Jeová, bu pode djuda bus fidju sirbi-l, sima Eunisi djuda Timótiu. Na kel studu li, nu sta ben odja modi ki bu pode inxina bus fidju pa kuzas ki bu ta fla i pa kuzas ki bu ta faze. Tanbê, nu ta ben odja modi ki Jeová pode djuda-u.

6. Sima sta na 2 Timóteo 3:14, 15, modi ki Timótiu bira sigidor di Jizus?

⁶ Kantu Timótiu éra mininu, se mai faze se midjór pa inxina-l kes kuza ki judeus ta ntendeba di ‘skrituras sagradu’. É klaru ki el tinha poku konhisimentu pamodi el ka sabia nada sobri Jizus Kristu. Má, el inxina Timótiu kes kuza prinsipal ki pode djudaba el biraba un kriston. Má, Timótiu ta ben sérba un sigidor di Jizus? Timótiu dja tinha idadi di skodjeba si el ta biraba un kriston. Di sertéza kel sforsu ki Eunisi faze pa inxina Timótiu djuda-l fika ‘konvensidu pa el kridita’ na kes verdadi sobri Jizus. (Lé 2 Timóteo 3:14, 15.) Tanbê, Eunisi fika kontenti di konsigi inxina se fidju sobri Jeová, sikrê foi difísil. Nómi di Eunisi ta ben di un palavra ki siginifika “vense”. I Eunisi vense difikuldadis pa el pode djuda Timótiu ama i sirbi Jeová.

7. Modi ki Eunisi podia djudaba Timótiu kontinua ta faze prugrésu dipôs ki el batiza?

⁷ Kantu Timótiu batiza, el da un pasu inportanti na se vida. Má simé, Eunisi ka para di preokupa ku el. Modi ki Timótiu ta ben uzaba se vida? El ta ben andaba ku maus koléga? El ta ba studaba na Atenas i setaba kes filozofia ki éra kóntra lei di Deus? El ta ben uzaba se ténpu, se forsa i se juventudi pa el biraba riku? Nbóra Eunisi ka podia disidiba kuzê ki Timótiu ta fazeba ku se vida, el pode djudaba el toma bons disizon. Modi ki el podia fazeba kel-li? El podia djudaba Timótiu ten un amor fórti pa Jeová i pa se Fidju, Jizus Kristu. É ka sô na situason sima di Eunisi ki é difísil djuda un fidju ama Jeová i sirbi-l. Kuzê ki pai ku mai pode prende ku izénplu di Eunisi?

8. Modi ki un mai pode djuda se maridu inxina ses fidjus sobri Jeová?

 ⁸ Studa Bíblia ku bus fidju. Irmans, si nhos maridu ta sirbi Jeová, el ta spéra ma nhos ta djuda nhos maridu inxina nhos fidjus sobri el. Un manera ki nhos pode faze kel-li é apoia Adorason na família tudu simana. Nhos pâpia kuzas dretu sobri Adorason na família i nhos pensa na kuzê ki nhos pode faze pa el fika más sábi. Talvês nhos pode djuda nhos maridu pripara un atividadi pa Adorason na família. Si nhos fidjus dja ten idadi pa studa na livru Vive filís pa tudu ténpu!, nhos pode djuda nhos maridu studa ku es.

9. Si un mai ten maridu ki ka ta sirbi Jeová, na undi ki el pode atxa ajuda pa inxina ses fidjus?

⁹ Alguns mai ten ki studa Bíblia ku ses fidjus pamodi es ka ten maridu ô ses maridu ka ta sirbi Jeová. Si kel-li é bu situason, ka bu fika preokupadu dimás pamodi Jeová ta djuda-u. Uza kes publikason ki organizason di Jeová ta da-nu, pa bu studa ku bus fidju. Bu pode pergunta otus pai ku mai modi ki es ta uza kes publikason na ses Adorason na família. c (Pro. 11:14) Jeová pode djuda-u pâpia ku bus fidju. Pidi-l pa el djuda-u faze-s perguntas ki ta djuda-u sabe kuzê ki es ta pensa i ki es ta xinti. (Pro. 20:5) Pur izénplu, bu pode pergunta-s: ‘Kal ki é situason más difísil ki bu ta pasa pa el na skóla?’ Un pergunta sinplis sima kel-li, pode djuda-u prende txeu kuza sobri bus fidju.

10. Kuzê más ki bu pode faze pa bu inxina bus fidju sobri Jeová?

¹⁰ Djobe maneras di inxina bus fidju sobri Jeová. Pâpia sobri Jeová i sobri kes kuza dretu ki dja el faze pa bo. (Deut. 6:6, 7; Isa. 63:7) Kel-li é inportanti, prinsipalmenti si é ka sénpri ki bu ta konsigi ten ténpu pa bu studa ku bus fidju. Kristina, ki dja nu papiaba di el antis, fla: “N ka tinha txeu oportunidadi pa N studaba ku nhas fidju. Pur isu, sénpri ki N atxaba un xansi, N ta papiaba ku es sobri Jeová. Pur izénplu, óras ki nu ta ba pasiaba, N ta papiaba ku es sobri kriason i otus kuza ki ta djudaba es biraba amigu di Jeová. I kantu es fika más grandi, N insentiva-s pa es studa Bíblia es sô.” Tanbê, bu debe pâpia kuzas dretu sobri organizason di Jeová i sobri irmons ku irmans. Ka bu kritika ansions. Kes kuza dretu ki bu ta fla sobri ansions ta poi bus fidju ta pâpia ku es óras ki es meste ajuda.

11. Sima sta na Tiago 3:18, pamodi ki é inportanti nu djuda pa ten pas na família?

¹¹ Djuda pa ten pas na bu kaza. Mostra bu maridu i bus fidju ma bu ta ama-s. Pâpia ku bondadi i ruspetu sobri bu maridu i inxina bus fidju faze mésmu kuza. Si bu faze kel-li, bu ta djuda ten pas na bu kaza i ta fika más fásil pa bus fidju prende sobri Jeová. (Lé Tiago 3:18.) Odja izénplu di Jozsef, ki é pioneru spesial na Ruménia. Kantu el éra mininu, se pai faze di tudu pa ka dexaba ael, se mai i  se irmons sirbiba Jeová. Jozsef fla: “Nha mai sforsa txeu pa nu tinha pas na kaza. Ka ta nporta modi ki nos pai trataba nos, nha mai sénpri ta trataba el dretu. Óras ki el odjaba ma nu ka sta ruspetaba i obiba ku nos pai, el ta papiaba ku nos sobri Efésios 6:1-3. Dipôs, el ta papiaba ku nos sobri kes bon kualidadi di nos pai i el ta djudaba nos ntende pamodi ki nu debe ruspetaba el. Kel-li djuda-nu ten pas na família.”

12. Sima sta na 2 Timóteo 1:5, modi ki izénplu di Eunisi djuda Timótiu?

¹² Lé 2 Timóteo 1:5. Eunisi da Timótiu un bon izénplu. El inxina-l ma nu ta mostra fé pa kuzas ki nu ta faze. (Tia. 2:26) Di sertéza Timótiu odja ma kes kuza ki se mai ta fazeba éra pamodi el tinha un amor fórti pa Jeová. Tanbê, el odja ma se mai éra filís pamodi el ta sirbiba Jeová. Modi ki izénplu di Eunisi djuda Timótiu? Sima apóstlu Polu fla, Timótiu tinha un fé fórti sima di se mai. Kel-li ka kontise atoa. Timótiu odja fé di se mai i el disidi imita-l. Di mésmu manera, oji txeu mai dja djuda ses fidjus sirbi Jeová sô ku ses izénplu. (1 Ped. 3:1, 2) Abo tanbê bu pode faze mésmu kuza. Di ki manera?

13. Pamodi ki un mai debe poi se amizadi ku Jeová na primeru lugar?

¹³ Poi bu amizadi ku Jeová na primeru lugar. (Deut. 6:5, 6) Sima kuazi tudu mai, bu ta faze txeu sakrifisiu pa kuida di nisisidadis di bus fidju. Pur izénplu, bu ka ta durmi dretu, bu ta uza bu ténpu, bu dinheru i otus kuza pa kuida di bus fidju. Má sikrê bu ta sta txeu okupadu, ka bu dexa di kuida di bu amizadi ku Jeová. Tra ténpu pa bu faze orason bo sô, pa bu faze bu studu pesoal i pa bu sisti runion. Si bu faze kes kuza li, bu ta bira bu amizadi ku Jeová más fórti i bu ta da un bon izénplu pa bus fidju i pa otus algen.

14-15. Kuzê ki bu prende ku izénplu di Leane, Maria i João?

¹⁴ Alguns jóven prende ama Jeová i kunfia na el pamodi izénplu di ses mai. Nu ben odja alguns izénplu. Leane, fidju di Kristina, fla: “Nu ka podia studaba Bíblia óras ki papá ta staba na kaza. Má, mamá sénpri ta sistiba runion. Nu ka sabia txeu kuza sobri Bíblia, má se izénplu djuda-nu ten un fé fórti. Nu da kónta ma Tistimunhas di Jeová ta inxinaba verdadi antis di nu kumesa ta sisti runion.”

¹⁵ Otu izénplu é di Maria. Alvês se pai ta kastigaba ses família óras ki es ta baba runion. El fla: “Nha mai é un di kes mudjer más korajoza ki N konxe. Kantu mi éra mininu, N ka ta krê fazeba alguns kuza pamodi medu di kuzê ki otus algen podia flaba. Má, kantu N odjaba koraji ki nha mai tinha i modi ki el ta poba Jeová na primeru lugar, kel-li djuda-m vense medu di ómi.” Pai di João proíbi se família di pâpia sobri Bíblia i Jeová na ses kaza. El fla: “N ta atxa ma un kuza ki más mexe ku mi é odja ma nha mai  ta fazeba kalker kuza pa agradaba nha pai. Má, úniku kuza ki el ka ta fazeba éra paraba di sirbi Jeová.”

16. Modi ki izénplu di un mai pode djuda otus algen?

¹⁶ Si bo é mai, lenbra ma bu izénplu ta djuda otus algen. Odja modi ki izénplu di Eunisi da apóstlu Polu koraji. El skrebe ma kel fé sen finjimentu ki Timótiu tinha, binha di Eunisi. (2 Tim. 1:5) Na ki ténpu ki apóstlu Polu odja ma Eunisi tinha un fé fórti? Talvês el odja kel-li kantu el konxe Eunisi ku Lóidi na Listra, na se primeru viaji misionáriu. I ta parse ma é el ki djuda-s bira kriston. (Atos 14:4-18) Pensa na kel-li: Kantu Polu skrebe pa Timótiu uns 15 anu dipôs, ti inda el staba ta lenbra di kel fé fórti ki Eunisi tinha. El fla ma Eunisi é un bon izénplu pa nu imita! Izénplu di Eunisi nkoraja apóstlu Polu i talvês txeu kriston ki ta viveba na kel ténpu. Si bu sta kria bus fidju bo sô, ô si bu ka ten un maridu ki ta sirbi Jeová, lenbra ma bu izénplu ta nkoraja txeu algen.

17. Kuzê ki bu pode faze si sta parse ma bus fidju ka krê sirbi Jeová, sikrê bu sta sforsa txeu pa djuda-s?

¹⁷ Má, i si bus fidju ka krê sirbi Jeová, sikrê bu sta faze txeu sforsu? Lenbra ma ta leba ténpu pa inxina un fidju. Sima kes dizenhu ta mostra, óras ki bu símia un simenti, bu ka ten sertéza  si ta nase un planta ki ta ben da fruta. Má simé, bu ta kontinua ta rega-l, sikrê bu ka sabe kal ki ta ser rezultadu. (Mar. 4:26-29) Di mésmu manera, alvês bu pode pergunta si sforsu ki bu sta faze sta ta djuda bus fidju ama Jeová. Bu ka sabe si bus fidju ta ben sirbi Jeová ô nau. Má, si bu faze bu midjór pa bu inxina-s sobri Jeová, bu pode djuda-s bira se amigu. — Pro. 22:6.

18. Modi ki Jeová pode djuda bus fidju bira se amigu?

¹⁸ Désdi kel ténpu ki Bíblia skrebedu, Jeová dja djuda txeu jóven bira se amigu. (Sal. 22:9, 10) Si bus fidju krê, Jeová tanbê pode djuda-s bira se amigu. (1 Cor. 3:6, 7) Sikrê ta parse ma bus fidju ka ten txeu amor pa verdadi, Jeová ka ta dexa di ama-s. (Sal. 11:4) Si es mostra kalker sinal ma es ten ‘bon inklinason’ pa sirbi Jeová, el ta sta prontu pa djuda-s. (Atos 13:48; 2 Cró. 16:9) Tanbê, Jeová pode djuda-u fla kuzas sértu na kel momentu ki bus fidju meste obi-l. (Pro. 15:23) Jeová tanbê pode uza un irmon ô un irman na kongregason pa djuda bus fidju. Sikrê dipôs ki bus fidju bira grandi, Jeová pode djuda-s lenbra di kes kuza ki bu inxina-s kantu es éra pikinoti. (João 14:26) Bu pode ten sertéza ma Jeová ta rekonpensa-u si bu kontinua ta inxina bus fidju pa kuzas ki bu ta fla i ki bu ta faze.

19. Pamodi ki bu pode ten sertéza ma Jeová sta kontenti ku bo?

¹⁹ Ka ta nporta si bus fidju disidi sirbi Jeová ô nau, Jeová ta kontinua ta ama-u pamodi bu ta ama-l. Si bo é un mai ki sta kria bus fidju bo sô, Jeová promete ma el ta bira Pai di bus fidju i ma el ta proteje-u. (Sal. 68:5) Bu ka ta pode disidi si bus fidju ta sirbi Jeová ô nau. Má, si bu kontinua ta kunfia na ajuda di Jeová i ta faze bu midjór, el ta fika kontenti ku bo.