17-زەرتتەۋ ماقالاسى
انالار، اۋنيكەنى ۇلگى ەتىڭىزدەر
«اناڭنىڭ تالىمىنەن دە باس تارتپا. ولار — باسىڭا كيەتىن ادەمى گۇلدەستە، موينىڭا تاعاتىن اسەم القا» (ناق. س. 1:8، 9).
137-ٵن ەحوباعا ادال ايەلدەر
اڭداتپا a
اجەسى لويدا مەن اناسى اۋنيكە تىموتەنىڭ شومىلدىرۋ راسىمىنەن وتكەنىنە قۋانىپ، كەۋدەلەرىن ماقتانىش كەرنەپ تۇر (1-ابزاستى قاراڭىز)
1، 2. ا) اۋنيكە دەگەن كىم بولعان جانە انا رەتىندە ول قانداي قيىندىققا كەزىكتى؟ ٵ) مۇقاباداعى سۋرەت تۋرالى نە ايتار ەدىڭىز؟
كيەلى كىتاپتا تىموتەنىڭ قالاي شومىلدىرۋ راسىمىنەن وتكەنى جايلى ەشتەڭە ايتىلماعان. دەسە دە سول كۇنى اناسى اۋنيكەنىڭ قۋانىشىندا شەك بولماعانى انىق (ناق. س. 23:25). سول جاعدايدى كوز الدىمىزعا كەلتىرىپ كورەيىك. بالاسىنىڭ سۋدا تۇرعانىن كورگەندە، اۋنيكەنىڭ كەۋدەسىن ماقتانىش كەرنەپ كەتتى! قاسىنا اناسى لويدا كەلىپ، ونىمەن بىرگە قۋانىپ تۇر. بالاسى سۋعا باتىرىلعاندا، اۋنيكە دەمىن ىشىنە تارتىپ، قاراپ تۇردى. ۇلىنىڭ ٴجۇزى جايناپ سۋدان شىققانىن كورگەندە، كوز جاسىن ۇستاي الماي، جىلاپ جىبەردى. ول ەڭبەگىنىڭ جەمىسىن كوردى. قانشاما قيىندىقتان وتسە دە، ول بالاسىنىڭ بويىنا ەحوباعا جانە يسا ماسىحكە دەگەن سۇيىسپەنشىلىك ۇيالاتا الدى. سوندا اۋنيكە باسىنان قانداي قيىندىقتاردى وتكىزدى؟
2 تىموتەنىڭ وتباسىنداعى ادامدار ٴبىر ٴدىندى ۇستانباعان. ونىڭ اكەسى گرەك، ال اناسى مەن اجەسى ياھۋدي بولعان (ەل. ٸس. 16:1). اۋنيكە مەن لويدا باسقا ٴدىندى قابىلداپ، ٴماسىحشى بولعان كەزدە، تىموتە جاسوسپىرىم شاقتا بولسا كەرەك. ٴبىراق اكەسى بۇل ٴدىندى قابىلدامادى. تىموتە ەندى قاي ٴدىندى تاڭدار ەكەن؟ ول كەزدە تىموتە ٶزى تاڭداۋ جاساي الاتىن جاستا بولعان كورىنەدى. ول اكەسىنىڭ ٴدىنىن تاڭداي ما، الدە تيتتەيىنەن بويىنا ٴسىڭىرىپ وسكەن ياھۋدي داستۇرلەرىن ۇستانىپ ٶمىر سۇرە مە؟ يا بولماسا ٴماسىحتىڭ ٸزباسارى بولۋدى شەشە مە؟
3. ناقىل سوزدەر 1:8، 9 عا ساي، ەحوبا بالالارىن ونىمەن دوستاسۋعا ۇيرەتىپ جۇرگەن انالارعا قالاي قارايدى؟
3 بۇگىندە ٴماسىحشى انالار دا ٶز وتباسىلارىن سۇيەدى. ولاردىڭ بار ارمان-تىلەگى — بالالارىنىڭ ەحوبامەن جاقىن دوس بولعانى. بۇل ٷشىن ولار بارىن سالادى. ەحوبا دا ولاردىڭ ەڭبەكتەرىن ەرەكشە باعالايدى (ناقىل سوزدەر 1:8، 9 وقىڭىز). ول وسىعان دەيىن سانسىز كوپ اناعا بالالارىن شىندىق جولىندا تاربيەلەۋگە كومەكتەسكەن.
4. بۇگىندە انالاردىڭ قانداي قيىندىقتارى بار؟
4 البەتتە، ٵربىر ٴماسىحشى انا بالالارىن تىموتە سياقتى، ەحوبانىڭ جولىن تاڭداي ما ەكەن دەپ ۋايىمدايدى. بۇل تۇسىنىكتى دە، ويتكەنى ولار مىنا شايتاننىڭ دۇنيەسى بالالارىنا قانداي قىسىم جاسايتىنىن كورىپ ٴجۇر (پەت. 1-ح. 5:8). سونداي-اق بالالارىن جالعىز ٶسىرىپ جاتقان نە كۇيەۋلەرى شىندىقتا ەمەس انالار دا كوپ. مىسالى، كريستين b دەگەن انا بىلاي دەيدى: «مەنىڭ كۇيەۋىم — قامقور اكە، ول وتباسىن جانىنداي جاقسى كورەدى. ٴبىراق بالالارىمدى شىندىق جولىندا تاربيەلەۋىمە ول قاتتى قارسى بولدى. بالالارىم تۇبىندە ەحوباعا قىزمەت ەتەر مە ەكەن دەپ ۋايىمداپ، كوپ كوز جاسىن توكتىم».
5. بۇل ماقالادا نە قاراستىرامىز؟
5 ٴماسىحشى انا بولساڭىز، ٴسىز دە اۋنيكە سياقتى، بالالارىڭىزدى شىندىقتا تاربيەلەۋ ٷشىن توككەن ەڭبەگىڭىزدىڭ جەمىسىن كورە الاسىز. بۇل ماقالادا ٴسىز اۋنيكەنى ۇلگى تۇتىپ، بالالارىڭىزعا قالاي سوزىڭىزبەن جانە ىسىڭىزبەن ٴتالىم-تاربيە بەرە الاتىنىڭىزدى بىلەسىز. سونىمەن قاتار، ەحوبا سىزگە قالاي كومەكتەسەتىنىن قاراستىرامىز.
بالاڭىزعا سوزىڭىزبەن ٴتالىم بەرىڭىز
6. تىموتەگە 2-حات 3:14، 15 كە ساي، تىموتە قالاي ٴماسىحشى بولدى؟
6 تىموتە كىشكەنتاي بولعاندا، اۋنيكە وعان كيەلى جازبالاردى قولىنان كەلگەنشە ۇيرەتتى. ارينە، ونىڭ بالاسىنا جازبالاردان ۇيرەتكەندەرى سول زامانداعى ياھۋديلەردىڭ تۇسىنىگىنە ساي بولعان. اۋنيكە يسانىڭ ٴماسىح ەكەنىن بىلمەگەن، سوندىقتان ونىڭ ٴبىلىمى شەكتەۋلى بولدى. ايتسە دە وسى بىلىمىنىڭ ٶزى تىموتەنىڭ ماسىحشىلىكتى قابىلداۋىنا جاقسى نەگىز بولدى. ٴبىراق، قانشا دەگەنمەن، ٴماسىحشى بولۋ-بولماۋدى شەشەتىن تىموتەنىڭ ٶزى ەدى. يسا تۋرالى بىلگەندەرىنىڭ شىندىق ەكەنىنە ونىڭ كوزى جەتتى. بۇل جەردە اناسىنىڭ دا ۇلەس قوسقانى داۋسىز (تىموتەگە 2-حات 3:14، 15 وقىڭىز). اۋنيكە قانشاما قيىندىقتاردى جەڭىپ، تىموتەگە ەحوبا تۋرالى شىندىقتى ۇيرەتە العانىنا قاتتى قۋانعان شىعار! وسىلاي ول «جەڭىپ شىعۋ» دەگەن ماعىنانى بىلدىرەتىن اتىنا ساي ارەكەت ەتتى.
7. تىموتە شومىلدىرۋ راسىمىنەن وتكەننەن كەيىن دە اناسى وعان قالاي كومەكتەسە الاتىن؟
7 تىموتە شومىلدىرۋ راسىمىنەن ٶتىپ، ومىرىندەگى ەڭ ماڭىزدى قادامدى جاسادى. ٴبىراق سودان كەيىن دە اناسى ونى ويلاپ ۋايىمدادى. ەندى ول ٵرى قاراي نە ىستەيدى؟ جامان ورتامەن ارالاسىپ كەتپەس پە ەكەن؟ افيناداعى وقۋ ورنىنا ٴتۇسىپ، ٴپالساپاشىلاردىڭ ىلىمىنە ەرىپ جۇرمەي مە؟ بايلىققا قىزىعىپ، ۋاقىتىن، كۇشىن، جاستىق شاعىن سوعان سارپ ەتپەي مە؟ اۋنيكە تىموتە ٷشىن شەشىم قابىلداي الماسا دا، وعان كومەكتەسە الاتىن. ول ٵرى قاراي دا ۇلىنا ەحوبانى جاقسى كورۋدى ۇيرەتىپ، يسا ماسىحكە دەگەن ريزاشىلىعىن وسىرە الاتىن. ارينە، بۇنداي قيىندىقتار جالعىز اناسى نە اكەسى عانا كۋاگەر وتباسىلارىندا عانا بولمايدى. ٴتىپتى اتا-اناسىنىڭ ەكەۋى دە كۋاگەر بولسا دا، بالالارىنىڭ جۇرەگىنە جول تاۋىپ، ەحوبانىڭ ادال قىزمەتشىسى ەتىپ تاربيەلەۋ قيىنعا سوعىپ جاتادى. وسى ورايدا اتا-انالار اۋنيكەدەن قانداي ۇلگى السا بولادى؟
8. اناسى كۇيەۋىنە بالالارىنىڭ رۋحاني كۇيىن ويلاۋعا قالاي كومەكتەسە الادى؟
8 بالالارىڭىزبەن كيەلى كىتاپتى زەرتتەڭىز. قىمباتتى انالار، كۇيەۋلەرىڭىز شىندىقتا بولسا، بالالاردىڭ رۋحاني كۇيىن ويلاۋ سولارعا جۇكتەلگەن. دەسە دە ەحوبا سىزدەردىڭ ولارعا قولعابىس ەتكەندەرىڭىزدى قالايدى. سونىڭ ٴبىر جولى — وتباسىلىق عيباداتتىڭ وتكىزىلۋىنە ۇنەمى قولداۋ كورسەتۋ. وتباسىلىق عيبادات تۋرالى جاعىمدى سويلەڭىز، ونىڭ جىلۋلىق سيلايتىنداي ٵر قىزىقتى وتۋىنە قالاي ۇلەس قوسا الامىن دەپ ويلانىڭىز. كۇيەۋىڭىز وتباسىلىق عيباداتقا ارنايى ٴبىر جوبا ۇيىمداستىرىپ جاتسا، وعان كومەكتەسىڭىز. ال ەگەر بالاڭىز اكەسىمەن «ماڭگى باقي ٶمىردىڭ راقاتىن كورىڭىز!» كىتابى بويىنشا زەرتتەۋ ساباعىن ٶتىپ جۇرسە، كۇيەۋىڭىزگە قولعابىس ەتىڭىز.
9. جالعىزباستى نە كۇيەۋى كۋاگەر ەمەس انالارعا قانداي كومەك بار؟
9 ال جالعىزباستى نەمەسە كۇيەۋلەرى كۋاگەر ەمەس انالارعا كيەلى كىتاپتى بالالارىمەن وزدەرى زەرتتەۋگە تۋرا كەلەدى. سوندىقتان ولار بالالارىممەن قالاي زەرتتەسەم بولادى دەپ ۋايىمداۋى مۇمكىن. ٴبىراق ەحوبا كومەكسىز قالدىرمايدى. ول سىزگە ۇيىمى ارقىلى ٴتالىم بەرۋگە ارنالعان كوپتەگەن قۇرالدار بەرىپ وتىر. وتباسىلىق عيباداتتا ولاردى قالاي پايدالاناتىنىڭىزدى بىلمەي جاتساڭىز، قاۋىمداعى تاجىريبەلى اتا-انالارمەن اقىلداسىپ كورىڭىز c. ولار سىزگە جاڭا ٴبىر يدەيا ايتاتىن شىعار (ناق. س. 11:14). ەحوبا سىزگە بالالارىڭىزبەن اشىق پىكىرلەسىپ، سويلەسۋگە دە كومەكتەسە الادى. سوندىقتان وعان «بالالارىمنىڭ ىشىندە نە جاتقانىن بىلۋگە كومەكتەسشى» دەپ دۇعا ەتىڭىز (ناق. س. 20:5). مىسالى، «مەكتەپتە سەن ٷشىن نە نارسە قيىن؟» دەگەن قاراپايىم سۇراقتىڭ ٶزى جاقسى اڭگىمەگە ۇلاسۋى مۇمكىن.
10. بالالارىڭىزعا ەحوبا جايلى ۇيرەتۋدىڭ تاعى قانداي امالدارى بار؟
10 بالالارىڭىزعا ەحوبا جايلى ۇيرەتۋدىڭ امالدارىن تابىڭىز. ولارعا ەحوبا جايلى، ونىڭ سىزگە جاساعان جاقسىلىقتارى جايلى ايتىپ وتىرىڭىز (مۇس. 5-ج. 6:6، 7؛ يشايا 63:7). بۇل بالالارمەن كيەلى كىتاپتى جۇيەلى تۇردە زەرتتەۋگە مۇمكىندىك بولماعاندا اسىرەسە ماڭىزدى. جوعارىدا ايتىلعان كريستين بىلاي دەپ وي بولىسەدى: «ۇيدە بالالارىممەن ەحوبا تۋرالى كوپ سويلەسە المايتىندىقتان، مەن ورايى كەلگەن ٵربىر ٴساتتى پايدالانىپ قالاتىنمىن. ٴبىز دالادا سەرۋەندەگەندە نەمەسە قايىقپەن ٴجۇزىپ جۇرگەندە، ەحوبانىڭ جاراتىلىستارى جايلى سويلەسىپ، رۋحاني تاقىرىپتاردا اڭگىمە قوزعايتىنبىز. ال بالالارىم ەسەيە باستاعاندا، ولاردى كيەلى كىتاپتى ٶز بەتتەرىنشە وقۋعا تالپىندىردىم». بالالارىڭىزعا ەحوبانىڭ ۇيىمى مەن باۋىرلاستار جايلى جاقسى سوزدەر ايتىڭىز. اقساقالداردى سىناپ-مىنەپ، جامانداماڭىز، سوندا بالالارىڭىز قاجەت كەزدە ولاردىڭ كومەگىنە قۋانا-قۋانا جۇگىنەتىن بولادى.
11. جاقىپ 3:18 گە ساي، ٷي ىشىندە تاتۋلىق ورناتۋ نەلىكتەن ماڭىزدى؟
11 ٷي ىشىندەگى ىنتىماق پەن بىرلىكتىڭ ۇيىتقىسى بولىڭىز. كۇيەۋىڭىز بەن بالالارىڭىزدى جاقسى كورەتىنىڭىزدى كورسەتىپ وتىرىڭىز. بالالارىڭىزعا اكەلەرى جايلى جاقسى سوزدەر ايتىپ، ول تۋرالى قۇرمەتپەن سويلەڭىز جانە بالالارىڭىزدى دا وسىعان ۇيرەتىڭىز. سونىڭ ارقاسىندا ۇيدە بالالارىڭىزعا ەحوبا جايلى ۇيرەتەتىن قولايلى جاعداي جاسايسىز (جاقىپ 3:18 وقىڭىز). رۋمىنيادا ارنايى ٸزاشار بولىپ قىزمەت ەتەتىن يودجەفتىڭ مىسالىن الايىق. بالالىق شاعىندا اكەسى وعان، اناسى مەن باۋىرلارىنا ەحوباعا قىزمەت ەتۋگە كوپ كەدەرگى جاساعان ەكەن. ول بىلاي دەيدى: «اناشىم وتباسىمىزدا بەرەكە-بىرلىك ورناتۋ ٷشىن بارىن سالاتىن. اكەمنىڭ قاباعى قانشا قاتۋلانسا، شەشەم وعان سونشا مەيىرىمىن توگە تۇسەتىن. ول اكەمىزدى سيلاماي، ٴتىلىن الماي جاتقانىمىزدى بايقاسا، ەفەستىكتەرگە 6:1—3 تارماقتاردى بىزبەن تالقىلايتىن. سوسىن اكەمىزدىڭ جاقسى قاسيەتتەرىن ايتىپ، ونى نە ٷشىن قادىرلەۋىمىز كەرەكتىگىن تۇسىندىرەتىن. وسىلاي انامىز قيىن جاعدايلاردى ۋشىقتىرماي، تىنىشتىق ورناتاتىن».
بالاڭىزعا ىسىڭىزبەن ٴتالىم بەرىڭىز
12. اۋنيكەنىڭ ۇلگىسى تىموتەگە قالاي اسەر ەتتى؟ (تىموتەگە 2-حات 1:5)
12 تىموتەگە 2-حات 1:5 وقىڭىز. اۋنيكە بالاسى تىموتەگە جاقسى ۇلگى بولدى. ول ۇلىنا شىنايى سەنىم ٸس-ارەكەتپەن دالەلدەنەتىنىن ۇيرەتكەنىندە ٴسوز جوق (جاق. 2:26). تىموتە اناسىنىڭ وسىنداي ٸس-ارەكەتتەرىن كورگەن، ٵرى اناسى نە ىستەسە دە، ەحوبانى جاقسى كورگەندىكتەن ىستەيتىنىن بايقاعان. ول ەحوباعا قىزمەت ەتۋ اناسىنا باقىت اكەلەتىنىن دە كورگەن. اناسىنىڭ ۇلگىسى وعان قالاي اسەر ەتتى؟ ەلشى پاۋىل ايتىپ كەتكەندەي، تىموتەنىڭ دە سەنىمى اناسىنىكىندەي مىقتى بولعان. ارينە، مۇنداي سەنىم اناسىنىڭ ۇلگىسىن كورىپ، سوعان ەلىكتەگەنىنىڭ ارقاسىندا پايدا بولدى. سول سەكىلدى، كوپتەگەن انالار بۇگىندە «سوزدەرى ارقىلى ەمەس، ٴجۇرىس-تۇرىستارى ارقىلى» وتباسى مۇشەلەرىنىڭ جۇرەگىنە جول تاۋىپ جاتىر (پەت. 1-ح. 3:1، 2). بۇل ٴسىزدىڭ دە قولىڭىزدان كەلەدى. ول ٷشىن نە ىستەسەڭىز بولادى؟
13. انالار نەگە ەحوبامەن دوستىعىن باستى ورىنعا قويۋ كەرەك؟
13 ەحوبامەن دوستىعىڭىزدى باستى ورىنعا قويىڭىز (مۇس. 5-ج. 6:5، 6). كوپ انالار ىسپەتتى ٴسىز دە بالالارىڭىز ٷشىن قۇرباندىقتارعا باراسىز. مىسالى، ولاردىڭ قامى ٷشىن ۋاقىتىڭىزدى، اقشاڭىزدى ايامايسىز، ٴتىپتى ٴتۇن ۇيقىڭىزدى ٴتورت بولۋگە دايىنسىز. ٴبىراق بالالاردىڭ تاندىك قاجەتتىلىگىن ويلايمىن دەپ ٴجۇرىپ، ەحوبامەن دوستىعىڭىز شەت قالىپ قويماسىن. سوندىقتان ۇنەمى ۋاقىت ٴبولىپ دۇعا ەتىڭىز، كيەلى كىتاپتى جەكە زەرتتەڭىز جانە قاۋىم كەزدەسۋلەرىن قالدىرماڭىز. سوندا رۋحاني كۇيىڭىز مىقتى بولادى، وتباسىڭىزعا دا، وزگەلەرگە دە جاقسى ۇلگى كورسەتەسىز.
14، 15. لياننىڭ، ماريا مەن دجواننىڭ ايتقان سوزدەرىنەن نە ٴتۇيدىڭىز؟
14 انالارىنىڭ ۇلگى-ونەگەسىنە قاراپ، ەحوباعا دەگەن سۇيىسپەنشىلىگى مەن سەنىمدەرىن قاتايتقان جاستاردىڭ پىكىرلەرىن بىلەيىكشى. كريستيننىڭ قىزى ليان بىلاي دەيدى: «ٴبىز اكەمىزدىڭ كوزىنشە كيەلى كىتاپتى زەرتتەي المايتىنبىز. ٴبىراق انامىز قاۋىم كەزدەسۋلەرىنە قايتسە دە قالماي باراتىن. كيەلى كىتاپتى ونشا بىلمەسەك تە، انامىزدىڭ ۇلگىسى مەن نىق سەنىمىن كورىپ، بىزدە دە مىقتى سەنىم پايدا بولدى. ٴبىز قاۋىمعا بارماي تۇرىپ-اق، وقىپ جاتقانىمىزدىڭ شىندىق ەكەنىن بىلدىك».
15 ماريانىڭ ٷي-ىشىندەگىلەر قاۋىمعا بارعانى ٷشىن كەيدە اكەلەرىنەن ۇرىس ەستىپ، تاياق جەيتىن. ماريا بىلاي دەيدى: «مەن ٷشىن انامنان اسقان قايسار ادام جوق شىعار. كىشكەنتاي كەزىمدە باسقالار نە دەيدى دەپ قورقىپ، كەيبىر نارسەلەردى ىستەمەي قوياتىنمىن. ٴبىراق انامنىڭ باتىلدىعىن جانە ەحوبانى بارىنەن جوعارى قوياتىنىن كورگەندە، مەن دە ادامداردان قورىقپايتىن بولدىم». ال دجوان دەگەن باۋىرلاستىڭ اكەسى ۇيدە رۋحاني اڭگىمەلەر ايتۋعا تيىم سالعان. «ماعان ۇلكەن اسەر قالدىرعان نارسە — انام اكەمنىڭ كوڭىلىنەن شىعۋ ٷشىن ٴبارىن جاساسا دا، ەحوباعا دەگەن سۇيىسپەنشىلىگىن ەشقاشان قۇربان ەتپەيتىن»،— دەيدى ول.
16. ٴماسىحشى انالاردىڭ ۇلگىسى باسقالارعا قالاي اسەر ەتەدى؟
16 ارداقتى انالار، سىزدەردىڭ ۇلگىلەرىڭىز باسقالارعا اسەر ەتپەي قويمايدى. نەگە بۇلاي دەيمىز؟ كەزىندە اۋنيكەنىڭ ۇلگىسى مەن سەنىمى پاۋىلعا قاتتى اسەر ەتكەن. پاۋىل اۋنيكە مەن لويدانى العاشقى ميسسيونەرلىك ساپارىندا، ليستراعا بارعان كەزىندە، كەزدەستىرگەن كورىنەدى. ولارعا ٴماسىحشى بولۋعا پاۋىلدىڭ ٶزى كومەكتەسكەن شىعار (ەل. ٸس. 14:4—18). ارادا 15 جىلداي وتكەننەن كەيىن ول تىموتەگە: «شىنايى سەنىمىڭ... الدىمەن... اناڭ اۋنيكەدە بولاتىن»،— دەپ جازعان (ٴتىم. 2-ح. 1:5). دەمەك، ارادا سونشا جىل وتسە دە، پاۋىل اۋنيكەنىڭ ىستەرى مەن سەنىمىن ۇمىتپاي، ونى باسقالارعا ۇلگى ەتكەن. اۋنيكە ەلشى پاۋىلعا عانا ەمەس، I عاسىرداعى باسقا كوپ ماسىحشىلەرگە دە وشپەس اسەر قالدىرسا كەرەك. ەگەر ٴسىز بالالارىڭىزدى جالعىز ٶزىڭىز نەمەسە ٴبىر ٴدىندى ۇستانبايتىن وتباسىندا تاربيەلەپ جاتساڭىز، ٴسىزدىڭ ادال ۇلگىڭىز جان-جاعىڭىزداعىلارعا قانات ٴبىتىرىپ، نىعايتاتىنىنا سەنىمدى بولىڭىز.
بالاعا رۋحاني وسۋگە كومەكتەسۋ ٴبىراز ۋاقىتتى تالاپ ەتەدى. سوندىقتان ەش بەرىلمەڭىز! (17-ابزاستى قاراڭىز)
17. بالاڭىز ەحوباعا قىزمەت ەتكىسى كەلمەيتىندەي كورىنسە، نە ىستەسەڭىز بولادى؟
17 كەيدە قانشا كۇش سالىپ جاتساڭىز دا، بالاڭىز ەحوباعا قىزمەت ەتكىسى كەلمەيتىندەي كورىنەر. ٶزىڭىز بىلەتىندەي، بالاعا ٴتالىم-تاربيە بەرۋ كوپ ۋاقىتتى تالاپ ەتەدى. مىسالى، ٴبىز تۇقىم ەكسەك، كەيىن ول ٶسىپ، جەمىس بەرەر مە ەكەن دەپ ويلايمىز. وسى بەتتەگى سۋرەتتەن كورىنەتىندەي، ٴبىز تۇقىمنىڭ جەمىس بەرەتىن-بەرمەيتىنىن ناقتى بىلمەسەك تە، ونى ٵرى قاراي دا سۋارىپ، كۇتىپ-باپتاي بەرەمىز، سولاي ەمەس پە؟! (مار. 4:26—29). سول سەكىلدى ٴسىز دە شىندىقتى بالامنىڭ جۇرەگىنە جەتكىزىپ جاتىرمىن با دەپ ۋايىمدايتىن شىعارسىز. ارينە، ٴسىز بالاڭىزدىڭ تۇبىندە قانداي شەشىم قابىلدايتىنىن ناقتى بىلمەيسىز. ٴبىراق سوندا دا بالاڭىزعا بارىنشا ٴتالىم-تاربيە بەرە بەرسەڭىز، ونىڭ رۋحاني وسۋىنە قولايلى جاعداي جاسايسىز (ناق. س. 22:6).
ەحوبانىڭ كومەگىنە سۇيەنىڭىز
18. بالالارىڭىزدىڭ رۋحاني وسۋىنە ەحوبا قالاي كومەكتەسەدى؟
18 كيەلى كىتاپ زامانىنان بەرى ەحوبا كوپتەگەن جاستارعا وزىمەن دوس بولۋعا كومەكتەسىپ كەلەدى (ٴزاب. 22:9، 10). بالالارىڭىزدىڭ ىقىلاسى بولسا، ەحوبا ولارعا رۋحاني وسۋگە جاردەم بەرەدى (قور. 1-ح. 3:6، 7). ٴتىپتى بالالارىڭىز شىندىق جولىنان اۋىتقىپ بارا جاتقانداي كورىنسە دە، ەحوبا ولارعا ٵرى قاراي دا كوز قىرىن سالىپ جۇرەدى (ٴزاب. 11:4). ەگەر ولار ەحوباعا ۇنامدى بولۋ ٷشىن تيتتەي دە بولسا «ىڭعاي تانىتسا»، ەحوبا ولارعا كومەكتەسۋگە ٵرقاشان دايىن (ەل. ٸس. 13:48؛ شەج. 2-ج. 16:9). مىسالى، ول سىزگە بالاڭىزعا كەرەك سوزدەردى دەر كەزىندە ايتۋعا كومەكتەسۋى مۇمكىن (ناق. س. 15:23). نەمەسە قاۋىمداعى ٴبىر باۋىرلاستى بالاڭىزعا ارنايى كوڭىل بولۋگە تالپىندىراتىن شىعار. بالالارىڭىز ەسەيىپ كەتسە دە، كەزىندە ٴسىزدىڭ ۇيرەتكەندەرىڭىزدى ەحوبا ەستەرىنە سالۋى مۇمكىن (جوح. 14:26). ەڭ باستىسى، ٵرى قاراي دا سوزىڭىزبەن جانە ىسىڭىزبەن بالالارىڭىزدى ۇيرەتە بەرىڭىز، سوندا ەحوبانىڭ باتاسىنا كەنەلەسىز.
19. ەحوبا سىزگە ريزا ەكەنىنە نەگە سەنىمدى بولا الاسىز؟
19 بالالارىڭىز قانداي شەشىم قابىلداماسىن، ەحوبا ٴسىزدى جاقسى كورەدى، ويتكەنى ٴسىز ونى جاقسى كورەسىز. ەگەر ٴسىز بالالارىڭىزدى جالعىز تاربيەلەپ وتىرعان انا بولساڭىز، ەحوبا بالالارىڭىزعا اكە، ال وزىڭىزگە قورعاۋشى بولامىن دەيدى (ٴزاب. 68:5). ارينە، بالالارىڭىز ەحوباعا قىزمەت ەتە مە، جوق پا — ونى وزدەرى شەشەدى. بۇل ٴسىزدىڭ قولىڭىزدا ەمەس. ٴبىراق ٵرى قاراي دا ەحوبانىڭ كومەگىنە جۇگىنىپ، قولىڭىزدان كەلگەننىڭ ٴبارىن ىستەي بەرسەڭىز، ەحوبانىڭ ىستىق ىقىلاسىنا بولەنەسىز.
134-ٵن بالالار — قۇدايدىڭ اماناتى
a بۇل ماقالادا ٴماسىحشى انالار تىموتەنىڭ اناسى اۋنيكەدەن قانداي ۇلگى الاتىنى قاراستىرىلادى. سونداي-اق ولار بالالارىنا ەحوبانى تانىپ-ٴبىلىپ، ونى جاقسى كورۋدى قالاي ۇيرەتە الاتىنى دا تالقىلانادى.
b كەيبىر ەسىمدەر وزگەرتىلگەن.
c مىسالى، «ماڭگى باقي ٶمىردىڭ راقاتىن كورىڭىز!» كىتابىنىڭ 50-ساباعىن جانە 2011-جىلدىڭ 15-تامىزىنداعى «كۇزەت مۇناراسىنىڭ» «وتباسىلىق عيبادات پەن جەكە زەرتتەۋگە ارنالعان ۇسىنىستار» (6، 7-ب.) دەگەن ماقالاسىن قاراڭىز.
