1-2. (a) En­niki kinaava, aamma anaanatut sunik unam­miniagaqarsimava? (b) Saq­qaani assiliaq oqaaseqarfigiuk.

 TIMUUTIUSIP imermut morsutsin­neqar­nera Biibilimi allaatigineqan­ngik­kaluar­toq takorlooruminar­poq anaanaata, Ennikip, qanoq misigisimanera. (Uss 23:25) Takorlooruk ernini Timuutiusi morsutsin­neqangajalersoq tul­luusimaarluni isigigaa. Qungujulal­luni Timuutiusip aanaava, Luuisi, nikorfaqatigaa. Timuutiusi morsutsin­neqareerluni imermiit tul­luusimaaqaluni nuim­mat Enniki kil­litsil­luni qul­lilivoq. Ennikip ernermi Jehovamik Jiisusimillu asan­nin­nis­saanik ilin­niar­titsisimanera imaan­naan­ngik­kaluar­toq iluatsip­poq. Suut unam­miniagarisimavai?

² Timuutiusi inoqutigiinni assigiim­mik upperisaqarfiun­ngitsumi peroriar­tor­poq. Ataataa grækeriuvoq, anaanaali aanaavalu juutiup­put. (ApS 16:1) Enniki Luuisilu kristumiun­ngormata Timuutiusi inuusut­tuaraagunar­poq. Ataataali kristumiun­ngun­ngilaq. Timuutiusip upperisaq sorlermita aalajangiutis­savaa? Ilimanar­poq nam­mineq aalajangiisin­naas­suseqalereersimasoq. Ataatami kristumiuun­ngitsup upperisaa aalajangiutis­savaa? Juutit ileq­qulersuutaat meeraanerminiit ilin­niagarisimasani aalajangiutis­savai? Imaluun­niit Kristusimik malin­nit­tun­ngus­sava?

3. Ussatit 1:8, 9-lu naaper­torlugit Jehovap anaanaasut meeq­qamin­nik Biibilimik ilin­niar­titsinerminni ilungersor­nerat qanoq isigaa?

³ Nalitsinni kristumiut anaanaasut Enniki assigalugu ilaqut­tatik asavaat. Pingaar­ner­paamik meeq­qatik Jehovamut qanimut  ikin­ngutaaler­nis­saan­nut ikiorusup­paat. Guutit­talu taak­kua ilungersor­nerat naleqar­tingaar­paa. (Ussatit 1:8, 9 atuakkit). Anaanaasut amerlasuut Jehovamit siulersor­neqarlutik meeq­qatik upper­tun­ngor­nis­saan­nut ikiorsimavaat.

4. Anaanaasut qanoq unam­miniagaqarsin­naap­pat?

⁴ Anaanaasut meeq­qatik Timuutiusitut Jehovamut kif­far­tor­tun­ngus­sanersut eqqarsaatigisar­pas­suk pis­susis­samisoor­poq. Angajoq­qaammi nalun­ngilaat meeq­qatik Saatanip silarsuaani qanoq misiligar­neqar­tar­tigisut. (Pet 1. 5:8) Tamatuma saniatigut anaanaasut amerlasuut kisimiil­lutik imaluun­niit Jehovamut kif­far­tor­tuun­ngitsumik ueqarlutik meeq­qatik perorsar­tariaqar­tar­paat. Assersuutigalugu qatan­ngut Christinemik b atilik ima oqar­poq: “Uiga ataataal­luarlunilu ilaqut­taminik isumagin­nil­luar­tuuvoq, kisianni meeq­qatta Nalunaajaasun­ngor­nis­saan­nik uanga perorsaanera assut akerlilersor­tar­paa. Meeq­qama Jehovamut kif­far­toruman­ngin­nis­saat isumakuluutigisarakku ukiut ingerlaneranni qiasaqaanga.”

5. Allaaserisami matumani suut sam­mis­savagut?

⁵ Kristumiuuguit anaanaasoq Ennikitut iluatsit­tumik perorsaasin­naavutit. Allaaserisami matumani sam­mis­savar­put illit Enniki ilaarlugu oqaatsitigut iliuutsitigullu meeq­qatit qanoq ilin­niar­til­luarsin­naagitit. Aamma sam­mis­savar­put Jehovap qanoq ikiorsin­naagaatit.

6. Timuutiusimut allak­kat aap­paat 3:14, 15-imilu ersersin­neqar­tutut Timuutiusip kristumiun­ngor­nis­saminut suna iluaqutigaa?

⁶ Timuutiusi nukap­piaraasoq anaanaata juutit paasin­nit­taasiat naaper­torlugu ‘Allak­kanik Iller­nar­tunik’ sapin­ngisaminik ilin­niar­tip­paa. Soorunami Timuutiusip Jiisusi Kristusi pil­lugu ilisimasai kil­leqar­put. Allak­kanili Iller­nar­tuni ilik­kak­kani kristumiun­ngor­nis­saminut iluaqutigisimasin­naavai. Kristumiun­ngus­savali? Timuutiusip tamanna nam­mineq aalajanger­tus­saavaa. Anaanaminilli ilin­niar­tin­neqarami Jiisusi pil­lugu eqqor­toq ‘qulariun­naarsimas­savaa’. (Timuutiusimut 2. 3:14, 15 atuakkit). Ennikip Jehova pil­lugu ernerminik ilin­niar­titsil­luarsimanini, naak unam­miniar­narsimagaluar­toq, nuan­naarutigisimas­savaa. Ateq Enniki oqaatsimik “ajugaavoq”-mik isumaqar­tumik naggueqar­poq. Timuutiusilu Jehovamik asan­nin­nini kajumis­sis­sutigalugu kif­fan­ngormat Enniki ajugaavoq.

7. Ennikip ernini kristumiutut ineriar­tor­tuar­nis­saanut qanoq ikiorsin­naasimavaa?

⁷ Timuutiusip imermut morsutsin­neqar­nermigut anguniak­kani pingaarutilik anguaa. Taamaak­kaluar­toq Enniki suli isumakulut­tarsimas­saaq. Timuutiusi qanoq inooriaaseqas­sava? Ileq­qorlut­tunik ikin­nguteqas­sava? Athenimut ilin­niarias­sava, tas­sanilu isumaliutersor­tar­tut Guutimik upperin­nin­ngitsut ilin­niar­titsis­sutaat upperilis­savai? Pisuun­ngor­nis­sani ilungersuutigalugu inuusun­nermini pif­fis­sani nukinilu atulus­sin­nas­savai? Ennikip ernini aalajangiis­sus­sin­naan­ngik­kaluarlugu silatusaar­tumik aalajangiinis­saanut ikiorsin­naavaa. Qanoq? Jehovamik asan­nin­nis­saanut aamma Jehovap Jiisusillu iliuuserisimasaat pil­lugit qujamasun­nis­saanut ilungersorluni ilin­niar­titsiuar­nermigut. Nalunaajaasuun­ngitsunik aap­pal­lit kisimik taamatut unam­miniagaqan­ngil­lat. Allaat angajoq­qaat Nalunaajaasuugaluarlutik meeq­qamik Jehovamut kif­far­tor­tun­ngor­nis­saan­nik ikior­niar­nerat suli ajor­nakusoor­tis­sin­naavaat.  Angajoq­qaat Enniki qanoq ilin­niarfigisin­naavaat?

8. Anaanaasup uini uppeqatigisani meeq­qamin­nik anersaak­kut ittunik ilin­niar­titsisoq qanoq tapersersorsin­naavaa?

⁸ Meeqqasi Biibilimik misis­sueqatigisar­sigit. Anaanaasutit, Jehovap piumasaraa uiit upperisaqaqatigigukku meeq­qassi anersaak­kut pisariaqar­titaan­nik matus­susiinerani tapersersus­sagit. Taamaaliorsin­naavutit ilaqutariit­tut atuaq­qis­saaqatigiin­nermi peqataajuar­nik­kut tamatumalu ajun­ngitsumik eqqar­tor­tar­neratigut. Eqqarsaatigiullu tamatumin­nga qanoq nuan­nersuutitseqataasin­naal­lutit. Immaqa uiit sam­misas­sas­sin­nik pilersaarusioqatigisin­naavat. Imaas­sin­naavoq aamma meeq­qassi annerit ilaasa atuagaq Naassaanngitsumik pilluarsinnaavutit! sam­mis­sal­lugu iluaqutigis­sagaat. Taamaap­pat tamatumin­nga misis­sueqateqar­nias­sam­mata uiit ikiorsin­naavat.

9. Anaanaasoq Nalunaajaasuun­ngitsumik uilik kik­kun­nut ikior­tis­sarsiorsin­naava?

⁹ Anaanaasut ilaat immaqa kisimiit­tuugamik Nalunaajaasuun­ngitsumil­luun­niit ueqaramik meeq­qanik Biibilimik misis­sueqateqar­nis­samik akisus­saaf­feqar­put. Illit taamatut atugaqaruit ernumaqinak, Jehovammi ikius­savaatit. Ilin­niar­titsinermi atorsin­naasut sun­niuteqarluar­tut peqatigiis­sor­tatsin­neersut meeq­qatit ilin­niar­tin­nialeraangak­kit ator­tak­kit. Ilaqutariit­tut atuaq­qis­saaqatigiin­nermi tamak­kua qanoq ator­nis­saat nalor­nis­sutigigukku angajoq­qaat misilit­tagaqarluar­tut isumasiorsin­naavatit. c (Uss 11:14) Aamma meeq­qavit uum­mam­miui eqqarsaataalu paasiumal­lugit tul­luar­tumik aperisar­nis­saan­nut Jehovamut ikioq­qusin­naavutit. (Uss 20:5) Apeq­qut oqaloqatigiin­nis­samut aal­lar­niisuul­luar­toq unaasin­naavoq: ‘Atuarfinni suna saper­nar­tin­ner­paaviuk?’

10. Meeq­qatit Jehova pil­lugu ilin­niar­tik­kumal­lugit qanoq allatut iliorsin­naavit?

¹⁰ Meeqqavit Jehova pillugu ilin­niartin­nis­saan­nut periarfis­sar­siortarit. Jehova eqqar­tor­taruk, aamma taas­suma ilin­nut ajun­ngitsuliar­pas­sui eqqar­tor­tak­kit. (Mos 5. 6:6, 7; Es 63:7) Angerlarsimatil­lusi akulikitsumik Biibilimik misis­sueqatigiit­tar­nis­sas­sin­nut periarfis­saqan­ngik­kaangassi tamanna pingaaruteqangaar­poq. Christine, eqqaaneqareersoq, ima oqar­poq: “Jehovap eqqar­tor­tar­nis­saanut periarfis­saqar­pal­laar­neq ajorama periarfis­satuakka ator­tar­pakka. Pisut­tuaraangatta umiaasariaraangat­talu Jehovap pin­ngor­titarsua anersaak­kullu ittut eqqar­tor­tar­pagut. Meeq­qagut peror­nerulermata Biibilimik nam­mineq misis­suisaq­qul­lugit kajumis­saar­taler­pakka.” Tamatuma saniatigut Jehovap peqatigiis­sor­tai qatan­ngutillu ajun­ngitsumik eqqar­tor­tak­kit. Utoq­qaaner­tat isor­nar­torsior­taqinagit, taak­kumi ajun­ngitsumik eqqar­tor­taruk­kit meeq­qavit pisariaqar­titsileraangamik saaf­figis­sal­lugit ajor­nan­ngin­nerutis­savaat.

11. Jaaku 3:18 naaper­torlugu angerlarsimaf­fimmi eqqis­seqatigiin­nerulersitsinis­saq sooq pingaaruteqar­pa?

¹¹ Angerlarsimaf­fimmi eqqis­seqatigiin­neruler­sitsigit. Uiit meeq­qatillu akut­tun­ngitsumik asanerar­tak­kit. Uiit asan­nip­palut­tumik ataq­qin­nip­palut­tumillu eqqar­tor­taruk, aamma meeq­qatit taamaalior­nis­saan­nik ilin­niar­tik­kit. Tamanna toq­qis­sisimanerulersitsisar­poq. Taava meeq­qan­nik Jehova pil­lugu ilin­niar­titsinis­sat ajor­nan­ngin­nerus­saaq. (Jaaku 3:18 atuaruk). Jozsef Romaniami pioneriusoq eqqarsaatigiuk. Peroriar­tor­nermini anaanani qatan­ngutinilu ilagalugit Jehova kif­far­torfigaa,  ataataasorli akerlilersuisimavoq. Jozsef ima oqar­poq: “Anaanatta eqqis­sisimasumik angerlarsimaf­feqar­nis­sar­put ilungersuutigaa. Ataatar­put soq­qusaan­neruleraangat anaana asan­nit­tulior­neruler­tar­poq. Anaanatta maluginiaraangamiuk ataatatta ataq­qinis­saa naalan­nis­saalu ajor­nakusoor­tik­kip­put Efesos­simiut 6:1-3 tun­ngavigalugit eqqar­tueqatigisar­paatigut. Taava ataatatta pis­susii ajun­ngitsut eqqar­tor­tar­pai paasitit­tarlutalu asas­sagip­put. Taamaalil­luni ajor­nar­torsiutit pin­ngitsoor­tit­tar­pai.”

12. Timuutiusimut allak­kat aap­paat 1:5 naaper­torlugu Ennikip maligas­siaa Timuutiusimut qanoq sun­niuteqar­pa?

¹² Timuutiusimut 2. 1:5 atuaruk. Enniki Timuutiusimut maligas­siuil­luar­poq. Ernini ilin­niar­tis­simas­savaa upper­neq iliuuseqar­titsisar­toq. (Jaak 2:26) Timuutiusip qular­nan­ngitsumik takusin­naavaa anaanani Jehovamik qaman­nga pisumik asan­nin­nini kajumis­sis­sutigalugu iliuuseqar­tar­toq. Anaanamilu Jehovamut kif­far­tor­nini pil­luas­sutigigaa maluginiar­paa. Ennikip maligas­siaa Timuutiusimut qanoq sun­niuteqar­pa? Apustilip Paulusip eqqaavaa Timuutiusi anaanamisut upperluar­tuusoq. Taman­nalu nalaatsor­nerin­naan­ngilaq. Maligas­siaa maluginiar­paa aalajangerlunilu ilaar­niarlugu. Taamatut­taaq nalitsinni anaanaasor­pas­suit ‘oqaaseqan­ngik­kaluarlutik’ ilaqut­tamik uum­mataat kil­lis­simavaat. (Pet 1. 3:1, 2) Aamma illit taamaaliorsin­naavutit. Qanoq?

13. Sooq anaanaasup Jehovamut attaveqar­nini pingaar­tis­savaa?

¹³ Jehovamut attaveqar­nerit pingaar­tiguk. (Mos 5. 6:5, 6) Anaanar­pas­suit assigalugit pil­liuteqar­tariaqarsimavutit. Meeq­qavit timik­kut pisariaqar­titaat matus­suserumal­lugit pif­fis­sat, aningaasaatitit allallu pil­liutigisar­patit ilaan­nik­kullu sinip­piar­tar­nak. Imali ulapitsigis­san­ngilatit Jehovamut attaveqar­nivit nukit­torsar­nis­saanut pif­fis­saqar­nak. Qinunermut Biibilimillu misis­sueq­qis­saar­nis­samut pif­fis­samik immik­koor­titsisarit, ilagiillu ataatsimiin­nerini najuut­tar­nis­samut pif­fis­saqar­tarit. Taamaalior­nik­kut anersaak­kut nukit­torsas­saatit aamma ilaqut­tan­nut allanullu ajun­ngitsumik maligas­siuil­lutit.

14-15. Leanne, Maria Joãolu qanoq ilin­niarfigaagit?

¹⁴ Jehovamik asan­nin­nis­samut tatigin­nin­nis­samullu inuusut­tut ilaasa anaanaasut maligas­siaat qanoq ilin­niarfigisimagaat eqqarsaatigik­kit. Christinep pania Leanne ima oqar­poq: “Ataata angerlarsimagaangat Biibilimik atuaq­qis­saarsin­naaneq ajor­pugut. Anaanali ataatsimiin­nerni najuut­tuaan­nar­poq. Biibili ilisimasaqarfigival­laan­ngik­kaluarlugu iliuusii upperluar­tuunis­satsin­nut iluaqutigaagut. Ataatsimiin­nerni suli najuut­taler­nata paasivar­put Jehovap Nalunaajaasuisa ilumoor­toq Biibilimeersoq ilin­niar­titsis­sutigigaat.”

¹⁵ Mariap ataataa ilaqut­tani ataatsimiis­simagaangata ilaan­nik­kut pil­laasar­poq. Maria ima oqalut­tuar­poq: “Anaanaga anersaak­kut qatan­ngutinni sapiin­nersaasut ilagaat. Meeraal­lunga iliuuserisas­sat iliuusererusun­neq ajor­pakka allat qanoq oqas­sanersut annilaangagisarakku. Anaanama inun­nik qunugisaqar­nani sapiil­luni Jehovamik sal­liutitsisar­nera inun­nik qunugisaqar­nermik qaangiinis­san­nut iluaqutigaara. João, angerlarsimaf­fim­minni anersaak­kut eqqar­tueqateqar­nis­samik iner­teq­quteqar­tumik ataatalik, ima oqalut­tuar­poq: “Anaanaga ataata pil­lugu sumil­luun­niit pil­liuteqariaan­naasar­poq. Jehovamulli attaveqar­nini sal­liut­tuar­paa, taman­nalu kil­lin­neqaatiginer­paasama ilagaat.”

16. Anaanaasup maligas­siuinera allanut qanoq sun­niuteqarsin­naava?

 ¹⁶ Eqqaamajuk maligas­siuinerit allanut sun­niuteqarsin­naam­mat. Qanoq? Eqqarsaatigiuk Ennikip maligas­siaa apustilimut Paulusimut qanoq sun­niuteqar­toq. Allap­poq Timuutiusip ‘ilumoor­tuusaar­nani upper­nera siul­lermik anaanaaniit­toq’. (Tim 2. 1:5) Ennikip upper­nera Paulusip qanga maluginiar­paa? Oqaluus­sisar­tutut aal­lar­titaaq­qaarami Luuisi Ennikilu naapis­simas­savai, aamma kristumiun­ngor­nis­saan­nik ikiorsimagunar­pai. (ApS 14:4-18) Una eqqarsaatigiuk: Ukiut 15-it mis­saat qaangium­mata Paulusip Timuutiusi allaf­figigamiuk Ennikip aalajaal­luni iliuusii maligas­siuil­luar­neralu suli eqqaamavai! Maligas­siuinera apustilimut Paulusimut kristumiunullu allanut qiim­mas­saataasimas­saaq. Kisimiit­tuul­lutit Nalunaajaasuun­ngitsumil­luun­niit ueqarlutit meeq­qan­nik perorsaaguit ilimagisin­naavat aalajaal­lutit maligas­siuinerit allanut nakus­satsis­sutaas­sasoq kajumis­saataas­sasorlu.

17. Meeq­qat ilin­niar­titsinin­nut qisuariar­pasin­ngip­pat qanoq ilius­savit?

¹⁷ Taavami meeq­qat ilungersorlutit iliuuserisan­nut qisuariar­pasin­ngip­pat? Eqqaamajuk meeq­qamik ilin­niar­titsineq sivisusarmat. Assilis­sami takutin­neqar­tutut inerit­tus­sanik ikkus­suiguit immaqa eqqarsaatigivat naasoq inerititaqarsin­naanersoq. Inerititaqar­nis­saa aqus­sin­naan­ngik­kaluarlugu naajar­tor­nias­sam­mat  imer­ter­tuar­pat. (Mak 4:26-29) Taamatut­taaq anaanatut meeq­qavit uum­mataat iluatsit­tumik kil­lis­simanerlugu eqqarsaatigisin­naavat. Qanoq kinguneqar­nis­saa aqus­sin­naan­ngilat. Sapin­ngisan­nilli ilin­niar­tit­tuaruk­kit anersaak­kut ineriar­tor­nis­saan­nik periarfis­sil­luas­savatit. – Uss 22:6.

18. Meeq­qatit anersaak­kut siumukaq­qul­lugit Jehovap qanoq ikiorsin­naavai?

¹⁸ Itsarli Jehovap inuusut­tor­pas­suit imminut qanil­leq­qul­lugit ikior­tarsimavai. (Tuss 22:10, 11) Aamma meeq­qatit piumap­pata anersaak­kut inersimal­luar­tun­ngoq­qul­lugit ikiorsin­naavai. (Kor 1. 3:6, 7) Allaat meeq­qatit allamut saaq­qajaalis­sagaluar­pata Jehovap asan­nil­luni eqqumaf­figiuas­savai. (Tuss 11:4) ‘Eqqor­tumillu pis­sutiginiagaqar­neran­nut’ ersiutaasoqaliin­nar­toq Jehovap ingerlaan­naq ikiorusus­savai. (ApS 13:48; Nal 2. 16:9) Pif­fis­saq eqqorlugu meeq­qavit pisariaqar­titaan­nik oqaaseqar­nis­san­nut ikiorsin­naavaatit. (Uss 15:23) Imaluun­niit qatan­ngutit asan­nit­tut ilagiin­niit­tut ilaat meeq­qan­nut immik­kut soqutigin­nin­nermik ersersitseq­qul­lugit kil­lis­sin­naavai. Meeq­qatit inersimasun­ngoreeraluar­tut ilin­niar­titsis­sutigisimasan­nik Jehovap eqqaasis­sin­naavai. (Joh 14:26) Meeq­qatit oqaatsitigut maligas­siuinik­kullu ilin­niar­tit­tuaruk­kit Jehovap ajun­ngisaarfigiumaar­paatit.

19. Sooq qularin­ngis­sin­naaviuk Jehovamit iluarisaal­lutit?

¹⁹ Jehovap ilin­nik asan­nin­nera meeq­qavit toq­qagaan­nik tun­ngaveqan­ngilaq. Asaganni asavaatit. Angajoq­qaatut kisimiit­tuuguit Jehova meeq­qan­nut Ataataarusup­poq ilin­nillu Illersuisoorusul­luni. (Tuss 68:6) Meeq­qatit Jehovamut kif­far­tor­tun­ngus­sanersut aalajangersin­naan­ngilat. Jehovalli tatigiuarunni sapin­ngisan­nillu iliuuseqar­tuaruit iluaris­savaatit.