អត្ថបទសិក្សា ១៧
ម្ដាយទាំងឡាយ ចូររៀនពីគំរូរបស់អឺនីស
«កុំបោះបង់ចោលដំបូន្មានរបស់ម្ដាយកូនឡើយ . . . នោះជាកម្រងផ្កាដ៏ស្រស់ស្អាតនៅលើក្បាលកូន និងជាគ្រឿងលម្អដ៏ប្រណីតនៅកកូន»។—សុភ. ១:៨, ៩
ចម្រៀងលេខ១៣៧ ស្ត្រីគ្រិស្តសាសនិកស្មោះត្រង់
សេចក្ដីសង្ខេប *
អឺនីសដែលជាម្ដាយរបស់ធីម៉ូថេ និងឡូអ៊ីសដែលជាជីដូនគាត់ អរសប្បាយនិងមានមោទនភាពពេលធីម៉ូថេទទួលការជ្រមុជទឹក (សូមមើលវគ្គ១)
១-២. (ក) តើអឺនីសជាអ្នកណា ហើយតើគាត់មានការពិបាកអ្វី? (ខ) សូមរៀបរាប់អំពីរូបភាពនៅក្រប។
ទោះជាគម្ពីរមិនរៀបរាប់អំពីការជ្រមុជទឹករបស់ធីម៉ូថេក្ដី យើងអាចស្រមៃឃើញថាអឺនីសដែលជាម្ដាយគាត់មានអំណរជាខ្លាំងនៅថ្ងៃនោះ។ (សុភ. ២៣:២៥) សូមស្រមៃគិតថាគាត់មានមោទនភាពយ៉ាងណាទៅ កាលដែលគាត់សម្លឹងមើលទៅធីម៉ូថេដែលកំពុងឈរក្នុងទឹក។ គាត់ញញឹមកាលដែលឡូអ៊ីសដែលជាជីដូនរបស់ធីម៉ូថេឱបស្មាគាត់។ អឺនីសរំជួលចិត្តកាលដែលធីម៉ូថេបានត្រូវពន្លិចក្នុងទឹក។ ទឹកក៏បាចសាចពេលធីម៉ូថេងើបពីទឹកឡើងវិញទាំងទឹកមុខញញឹម ហើយអឺនីសរំភើបចិត្តរហូតដល់ទប់ទឹកភ្នែកមិនបាន។ ទោះជាមានការពិបាកក្ដី អឺនីសបានបង្រៀនកូនប្រុសគាត់ឲ្យស្រឡាញ់ព្រះយេហូវ៉ានិងលោកយេស៊ូគ្រិស្តដែលជាបុត្រលោក។ តើអឺនីសត្រូវយកឈ្នះការពិបាកអ្វីខ្លះពេលដែលគាត់ព្យាយាមបង្រៀនកូន?
២ ឪពុកម្ដាយរបស់ធីម៉ូថេមិនកាន់សាសនាដូចគ្នាទេ។ ឪពុកគាត់ជាជនជាតិក្រិច ហើយម្ដាយនិងយាយគាត់ជាជនជាតិយូដា។ (សកម្ម. ១៦:១) ធីម៉ូថេទំនងជានៅវ័យជំទង់ ពេលដែលអឺនីសនិងឡូអ៊ីសបានទៅជាគ្រិស្តសាសនិក។ ប៉ុន្តែឪពុកគាត់មិនបានទៅជាគ្រិស្តសាសនិកទេ។ តើធីម៉ូថេនឹងជ្រើសរើសយកសាសនាមួយណា? នៅពេលនោះ គាត់ទំនងជាមានអាយុច្រើនល្មមដើម្បីធ្វើការសម្រេចចិត្តផ្ទាល់ខ្លួនអំពីរឿងនេះ។ តើគាត់នឹងជ្រើសរើសយកសាសនារបស់ឪពុកគាត់ឬទេ? តើគាត់នឹងបន្តធ្វើតាមទំនៀមទម្លាប់ជនជាតិយូដាដែលគាត់បានរៀនតាំងពីនៅក្មេងឬ? ឬតើគាត់នឹងទៅជាអ្នកកាន់តាមលោកយេស៊ូគ្រិស្ត?
៣. យោងទៅតាមសុភាសិត ១:៨, ៩ តើព្រះយេហូវ៉ាមានទស្សនៈយ៉ាងណាចំពោះការខំប្រឹងរបស់ម្ដាយដើម្បីជួយកូនឲ្យទៅជាមិត្តសម្លាញ់របស់លោក?
៣ ស្រដៀងគ្នាដែរនៅសព្វថ្ងៃនេះ ម្ដាយគ្រិស្តសាសនិកស្រឡាញ់ក្រុមគ្រួសាររបស់ពួកគេ។ ជាងអ្វីណាទាំងអស់ ពួកគេចង់ជួយកូនរបស់ពួកគេឲ្យមានចំណងមិត្តភាពជិតស្និទ្ធជាមួយព្រះយេហូវ៉ា ហើយលោកឲ្យតម្លៃយ៉ាងខ្លាំងចំពោះការខំប្រឹងរបស់ពួកគេ។ (សូមអាន សុភាសិត ១:៨, ៩) ព្រះយេហូវ៉ាបានជួយម្ដាយជាច្រើននាក់ឲ្យបង្រៀនកូនរបស់ពួកគេឲ្យស្រឡាញ់និងបម្រើលោក។
៤. តើម្ដាយនៅសព្វថ្ងៃនេះមានការពិបាកអ្វី?
៤ ជាការធម្មតាដែលពេលខ្លះម្ដាយឆ្ងល់ថា តើកូនរបស់គាត់នឹងសម្រេចចិត្តបម្រើព្រះយេហូវ៉ាដូចធីម៉ូថេឬក៏យ៉ាងណា។ ឪពុកម្ដាយដឹងថា ក្នុងពិភពលោករបស់សាថាន កូនរបស់ពួកគេជួបនឹងការបង្ខិតបង្ខំជាច្រើន។ (១ពេ. ៥:៨) មិនត្រឹមតែប៉ុណ្ណោះ ម្ដាយជាច្រើននាក់មានការពិបាកក្នុងការចិញ្ចឹមអប់រំកូន ដោយសារពួកគេគ្មានប្ដី ឬដោយសារប្ដីរបស់ពួកគេមិនមែនជាអ្នកគោរពប្រណិប័តន៍ព្រះយេហូវ៉ា។ ជាឧទាហរណ៍ បងស្រីម្នាក់ឈ្មោះគ្រីស្ទីន *និយាយថា៖ «ប្ដីរបស់ខ្ញុំគឺជាឪពុកល្អម្នាក់និងស្រឡាញ់ក្រុមគ្រួសារ។ ប៉ុន្តែគាត់ជំទាស់យ៉ាងខ្លាំង មិនឲ្យខ្ញុំជួយកូនរបស់យើងទៅជាសាក្សីព្រះយេហូវ៉ាទេ។ អស់ជាច្រើនឆ្នាំ ខ្ញុំយំជាច្រើនលើកច្រើនសារ ដោយសារខ្ញុំបារម្ភថាតើកូនរបស់ខ្ញុំនឹងទៅជាអ្នកគោរពប្រណិប័តន៍ព្រះយេហូវ៉ាឬក៏យ៉ាងណា»។
៥. តើយើងនឹងពិចារណាអ្វីក្នុងអត្ថបទនេះ?
៥ បើអ្នកជាម្ដាយគ្រិស្តសាសនិក អ្នកអាចជួយកូនរបស់អ្នកឲ្យស្រឡាញ់និងបម្រើព្រះយេហូវ៉ា ដូចអឺនីសបានធ្វើ។ ក្នុងអត្ថបទនេះ យើងនឹងពិចារណាអំពីរបៀបដែលអ្នកអាចធ្វើតាមគំរូរបស់គាត់ក្នុងការបង្រៀនកូនរបស់អ្នកតាមរយៈអ្វីដែលអ្នកនិយាយ និងអ្វីដែលអ្នកធ្វើ។ យើងក៏នឹងឃើញរបៀបដែលព្រះយេហូវ៉ានឹងជួយអ្នកដែរ។
ចូរបង្រៀនកូនតាមរយៈអ្វីដែលអ្នកនិយាយ
៦. ដូចបង្ហាញនៅធីម៉ូថេទី២ ៣:១៤, ១៥ តើធីម៉ូថេបានទៅជាគ្រិស្តសាសនិកម្នាក់យ៉ាងដូចម្ដេច?
៦ ពេលធីម៉ូថេនៅតូច ម្ដាយរបស់គាត់បានព្យាយាមអស់ពីសមត្ថភាពដើម្បីបង្រៀនគាត់អំពី«ឯកសារបរិសុទ្ធនានា» តាមការយល់ដឹងរបស់ជនជាតិយូដា។ ពិតមែនថាចំណេះដឹងរបស់អឺនីសមានកម្រិត ដោយសារគាត់មិនស្គាល់សេចក្ដីពិតអំពីលោកយេស៊ូទេ។ ប៉ុន្តែ ធីម៉ូថេបានទទួលសេចក្ដីបង្រៀនពីបទគម្ពីរដែលគាត់ត្រូវការដើម្បីជួយគាត់ឲ្យទៅជាគ្រិស្តសាសនិក។ ដូច្នេះ តើគាត់នឹងសម្រេចចិត្តធ្វើជាគ្រិស្តសាសនិកឬទេ? ដោយសារធីម៉ូថេធំពេញវ័យ គាត់អាចសម្រេចចិត្តដោយខ្លួនឯងថា គាត់នឹងធ្វើជាគ្រិស្តសាសនិកឬក៏យ៉ាងណា។ ធីម៉ូថេច្បាស់ជា«បានត្រូវនាំឲ្យជឿជាក់»លើសេចក្ដីពិតអំពីលោកយេស៊ូ ដោយព្រោះមូលហេតុមួយ គឺការខំប្រឹងព្យាយាមរបស់ម្ដាយគាត់។ (សូមអាន ធីម៉ូថេទី២ ៣:១៤, ១៥) អឺនីសប្រាកដជាសប្បាយចិត្តណាស់ដែលគាត់បានបង្ហាត់បង្រៀនធីម៉ូថេអំពីព្រះយេហូវ៉ា ទោះជាមានការពិបាកផ្សេងៗក្ដី។ អឺនីសបានរស់នៅស្របតាមឈ្មោះរបស់គាត់ដែលមានអត្ថន័យជាគោលថា«យកឈ្នះ»។
៧. តើអឺនីសអាចជួយកូនឲ្យរីកចម្រើនយ៉ាងដូចម្ដេចក្រោយពីកូនទទួលការជ្រមុជទឹក?
៧ ការជ្រមុជទឹកគឺជាជំហានដ៏សំខាន់មួយក្នុងជីវិតធីម៉ូថេ ប៉ុន្តែអឺនីសនៅតែបារម្ភអំពីកូនគាត់។ តើកូនរបស់គាត់នឹងប្រើជីវិតទាំងមូលយ៉ាងដូចម្ដេច? តើធីម៉ូថេនឹងសេពគប់មនុស្សអាក្រក់ឬទេ? តើគាត់នឹងទៅរៀននៅសាលានាក្រុងអាថែន ហើយទទួលយកសេចក្ដីបង្រៀនរបស់ទស្សនវិទូដែលមិនកាន់គ្រិស្តសាសនាឬ? តើគាត់នឹងខ្ជះខ្ជាយពេលវេលា កម្លាំង និងភាពយុវវ័យរបស់គាត់ ដោយខំប្រឹងធ្វើការឲ្យទៅជាអ្នកមានឬ? ពិតមែនថាអឺនីសមិនអាចសម្រេចចិត្តជំនួសធីម៉ូថេទេ ប៉ុន្តែគាត់អាចជួយធីម៉ូថេឲ្យធ្វើការសម្រេចចិត្តដ៏ឈ្លាសវៃ។ តើតាមរបៀបណា? អឺនីសអាចបន្តខំប្រឹងបង្រៀនកូនប្រុសគាត់ឲ្យស្រឡាញ់ព្រះយេហូវ៉ាយ៉ាងខ្លាំង និងមានចិត្តកតញ្ញូចំពោះអ្វីទាំងអស់ដែលលោកនិងបុត្រ របស់លោកបានធ្វើចំពោះក្រុមគ្រួសារគាត់។ មិនមែនតែឪពុកម្ដាយដែលមានគូមិនបម្រើព្រះយេហូវ៉ាដែលមានការពិបាកប៉ុណ្ណោះទេ។ សូម្បីតែឪពុកម្ដាយដែលបម្រើព្រះយេហូវ៉ាទាំងពីរនាក់ ក៏ប្រហែលជាពិបាកជួយកូនរបស់ពួកគេឲ្យបម្រើលោកដែរ។ ដូច្នេះ តើឪពុកម្ដាយអាចរៀនអ្វីពីគំរូរបស់អឺនីស?
៨. តើម្ដាយអាចជួយប្ដីដែលជាសាក្សីឲ្យបង្រៀនកូនរបស់ពួកគេអំពីព្រះយេហូវ៉ាយ៉ាងដូចម្ដេច?
៨ ចូរសិក្សាគម្ពីរជាមួយកូនរបស់អ្នក។ បើប្ដីរបស់អ្នកនៅក្នុងសេចក្ដីពិតដែរ ព្រះយេហូវ៉ាចង់ឲ្យអ្នកជួយគាត់បង្រៀនកូនអំពីលោក។ របៀបមួយដែលអ្នកអាចធ្វើដូច្នេះ គឺដោយគាំទ្រការគោរពប្រណិប័តន៍ជាក្រុមគ្រួសារជាទៀងទាត់។ សូមនិយាយអ្វីល្អៗអំពីការរៀបចំនោះ ហើយសូមគិតអំពីរបៀបដែលអ្នកអាចបង្កើតបរិយាកាសកក់ក្ដៅនិងអរសប្បាយ។ អ្នកប្រហែលជាអាចជួយប្ដីរៀបចំប្រធានបទណាមួយសម្រាប់សិក្សាស្រាវជ្រាវក្នុងអំឡុងពេលគោរពប្រណិប័តន៍ជាក្រុមគ្រួសារ។ ម្យ៉ាងទៀត បើកូនខ្លះរបស់អ្នកមានអាយុច្រើនល្មមអាចរៀនសៀវភៅសប្បាយនឹងជីវិតដែលគ្មានទីបញ្ចប់! ប្រហែលអ្នកអាចសហការជាមួយប្ដីរបស់អ្នកដើម្បីកូនអាចសិក្សាបាន។
៩. តើម្ដាយដែលមានប្ដីមិនមែនជាសាក្សីអាចរកឃើញជំនួយនៅឯណា?
៩ ម្ដាយខ្លះត្រូវនាំមុខក្នុងការបង្រៀនគម្ពីរដល់កូន ដោយសារពួកគេជាស្ត្រីមេម៉ាយ ឬដោយសារប្ដីរបស់ពួកគេមិនមែនជាអ្នកជឿ។ បើក្រុមគ្រួសាររបស់អ្នកមានស្ថានភាពបែបនេះ សូមកុំបារម្ភហួសហេតុពេកឡើយ។ ព្រះយេហូវ៉ានឹងជួយអ្នក។ សូមប្រើសៀវភៅផ្សេងៗដ៏មានប្រសិទ្ធភាពដែលលោកផ្ដល់ឲ្យតាមរយៈអង្គការរបស់លោក ដើម្បីសិក្សាជាមួយកូនៗ។ អ្នកអាចសុំយោបល់ពីឪពុកម្ដាយដែលមានបទពិសោធន៍ អំពីរបៀបដែលពួកគេប្រើឧបករណ៍ទាំងនេះ ដើម្បីគោរពប្រណិប័តន៍ជាក្រុមគ្រួសារ។ * (សុភ ១១:១៤) អ្នកអាចអធិដ្ឋានសុំព្រះយេហូវ៉ាជួយអ្នកឲ្យចេះសួរសំណួរ ដើម្បីដឹងអំពីគំនិតនិងអារម្មណ៍របស់កូន។ (សុភ ២០:៥) ការសួរសំណួរដូចជា ‹តើកូនមានការពិបាកខ្លាំងបំផុតអ្វីនៅសាលា?›អាចនាំឲ្យមានការសន្ទនា។
១០. តើអ្នកអាចធ្វើអ្វីទៀតដើម្បីជួយកូនឲ្យរៀនអំពីព្រះយេហូវ៉ា?
១០ សូមបង្កើតឱកាសដើម្បីបង្រៀនកូនរបស់អ្នកអំពីព្រះយេហូវ៉ា។ សូមនិយាយអំពីព្រះយេហូវ៉ានិងអ្វីល្អជាច្រើនដែលលោកបានធ្វើសម្រាប់អ្នក។ (បច ៦:៦, ៧; អេ ៦៣:៧) នេះរឹតតែសំខាន់ បើប្ដីរបស់អ្នកឃាត់អ្នកមិនឲ្យបង្រៀនគម្ពីរដល់កូនជាទៀងទាត់នៅផ្ទះ។ បងគ្រីស្ទីនដែលបានត្រូវរៀបរាប់នៅខាងលើនិយាយថា៖ «ខ្ញុំមិនសូវមានឱកាសនិយាយអំពីព្រះយេហូវ៉ាជាមួយកូនៗទេ តែខ្ញុំឆ្លៀតគ្រប់ឱកាសដើម្បីនិយាយជាមួយពួកគេអំពីលោក។ ដូច្នេះ យើងដើរជាមួយគ្នា ឬក៏ចុះទូកទៅឆ្ងាយពីច្រាំងដើម្បីនិយាយអំពីអ្វីៗដ៏អស្ចារ្យដែលព្រះបានបង្កើត និងអ្វីៗជាច្រើនទៀតអំពីលោក។ ពេលកូនខ្ញុំធំដឹងក្ដីល្មម ខ្ញុំលើកទឹកចិត្តពួកគេឲ្យសិក្សាគម្ពីរដោយខ្លួនឯង»។ បន្ថែមពីនេះ សូមនិយាយល្អៗអំពីអង្គការរបស់ព្រះយេហូវ៉ានិងបងប្អូនរួមជំនឿ។ សូមកុំរិះគន់ពួកអ្នកចាស់ទុំ។ ពាក្យសម្ដីរបស់អ្នកអាចមានឥទ្ធិពលទៅលើកូន។ អ្វីដែលអ្នកនិយាយអំពីពួកអ្នកចាស់ទុំអាចជួយកូនឲ្យទៅរកពួកគេពេលត្រូវការជំនួយ។
១១. យោងទៅតាមយ៉ាកុប ៣:១៨ ហេតុអ្វីការធ្វើឲ្យមានសន្តិភាពនៅផ្ទះគឺសំខាន់?
១១ ចូរធ្វើឲ្យមានសន្តិភាពនៅផ្ទះ។ សូមបង្ហាញសេចក្ដីស្រឡាញ់ចំពោះប្ដីនិងកូនរបស់អ្នកជារឿយៗ។ សូមនិយាយអំពីប្ដីរបស់អ្នកដោយបង្ហាញការគោរពនិងសេចក្ដីសប្បុរស ហើយបង្ហាត់បង្រៀនកូនឲ្យធ្វើដូចនេះដែរ។ ពេលអ្នកធ្វើដូច្នេះ កូនរបស់អ្នកអាចស្រួលរៀនអំពីព្រះយេហូវ៉ាជាង។ (សូមអាន យ៉ាកុប ៣:១៨) សូមគិតអំពីបទពិសោធន៍របស់បងប្រុសយ៉ូសេហ្វដែលបម្រើជាអ្នកត្រួសត្រាយពិសេសនៅប្រទេសរ៉ូម៉ានី។ ពេលគាត់នៅវ័យក្មេង ឪពុកគាត់បានធ្វើឲ្យគាត់ ម្ដាយគាត់ និងបងប្អូនគាត់ពិបាក បម្រើព្រះយេហូវ៉ាខ្លាំងណាស់។ បងយ៉ូសេហ្វនិយាយថា៖ «ម្ដាយខ្ញុំខំធ្វើឲ្យមានសន្តិភាពនៅផ្ទះ។ កាលដែលឪពុកខ្ញុំកាន់តែប្រព្រឹត្តដោយគ្មានមេត្តា ម្ដាយខ្ញុំកាន់តែប្រព្រឹត្តដោយសប្បុរស។ ពេលដែលម្ដាយខ្ញុំឃើញថាយើងពិបាកបង្ហាញការគោរពនិងមិនសូវស្ដាប់បង្គាប់ឪពុកយើង គាត់ពិគ្រោះអេភេសូរ ៦:១-៣ជាមួយយើង។ ក្រោយមក គាត់ប្រាប់យើងអំពីគុណសម្បត្តិរបស់ឪពុក ហើយជួយយើងឲ្យយល់អំពីមូលហេតុដែលយើងគួរតែឲ្យតម្លៃគាត់។ នេះបានជួយក្រុមគ្រួសារយើងឲ្យមានសន្តិភាព»។
ចូរបង្រៀនកូនតាមរយៈអ្វីដែលអ្នកធ្វើ
១២. តើធីម៉ូថេទី២ ១:៥បង្ហាញយ៉ាងណាថាគំរូរបស់អឺនីសបានជះឥទ្ធិពលទៅលើធីម៉ូថេ?
១២ សូមអាន ធីម៉ូថេទី២ ១:៥។ អឺនីសបានទុកគំរូល្អឲ្យធីម៉ូថេ។ គាត់ច្បាស់ជាបានបង្រៀនធីម៉ូថេថាជំនឿពិតប្រាកដសឲ្យឃើញតាមរយៈការប្រព្រឹត្ត។ (យ៉ា. ២:២៦) ធីម៉ូថេទំនងជាបានសង្កេតឃើញថា ការប្រព្រឹត្តរបស់ម្ដាយគាត់គឺផុសចេញពីសេចក្ដីស្រឡាញ់ដ៏ជ្រាលជ្រៅចំពោះព្រះយេហូវ៉ា។ គាត់ក៏ប្រាកដជាបានឃើញថា ម្ដាយរបស់គាត់មានអំណរពីការបម្រើព្រះយេហូវ៉ា។ តើនេះមានឥទ្ធិពលយ៉ាងណាលើធីម៉ូថេ? ដូចប៉ូលបានប្រាប់ ធីម៉ូថេមានជំនឿមាំមួនដូចម្ដាយគាត់។ នេះមិនមែនកើតឡើងដោយចៃដន្យទេ។ ធីម៉ូថេបានសង្កេតមើលគំរូរបស់ម្ដាយគាត់ ហើយសម្រេចចិត្តធ្វើតាម។ ស្រដៀងគ្នាដែរ ម្ដាយជាច្រើននាក់នៅសព្វថ្ងៃនេះបានជួយសមាជិកក្រុមគ្រួសារឲ្យបម្រើព្រះយេហូវ៉ា«ដោយមិនចាំបាច់ . . . បញ្ចេញពាក្យសម្ដីមួយម៉ាត់ឡើយ»។ (១ពេ. ៣:១, ២) អ្នកក៏អាចធ្វើដូច្នេះដែរ។ តើតាមរបៀបណា?
១៣. ហេតុអ្វីម្ដាយគួរចាត់ទុកចំណងមិត្តភាពរបស់គាត់ជាមួយព្រះយេហូវ៉ាថាសំខាន់បំផុត?
១៣ ចូរចាត់ទុកចំណងមិត្តភាពរបស់អ្នកជាមួយព្រះយេហូវ៉ាថាសំខាន់បំផុត។ (បច. ៦:៥, ៦) ដូចម្ដាយភាគច្រើន អ្នកធ្វើការលះបង់ជាច្រើនដូចជា ពេលវេលា លុយ ការដេក និងអ្វីៗផ្សេងទៀតដើម្បីបំពេញសេចក្ដីត្រូវការរបស់កូន។ ប៉ុន្តែ អ្នកមិនគួរជាប់រវល់ខ្លាំងពេកក្នុងការបំពេញសេចក្ដីត្រូវការទាំងនោះ រហូតដល់គ្មានពេលគ្រប់គ្រាន់ដើម្បីពង្រឹងចំណងមិត្តភាពរបស់អ្នកជាមួយព្រះយេហូវ៉ាឡើយ។ សូមលៃទុកពេលដើម្បីអធិដ្ឋានម្នាក់ឯង សិក្សាគម្ពីរផ្ទាល់ខ្លួន និងចូលរួមកិច្ចប្រជុំជាទៀងទាត់។ ដោយធ្វើដូច្នេះ អ្នកនឹងពង្រឹងចំណងមិត្តភាពរបស់អ្នកជាមួយព្រះយេហូវ៉ា ហើយទុកគំរូល្អឲ្យក្រុមគ្រួសារអ្នក ព្រមទាំងអ្នកឯទៀតផងដែរ។
១៤-១៥. តើអ្នករៀនអ្វីពីគំរូរបស់បងលីអាន បងម៉ារៀ និងបងជូវ៉ាវ?
១៤ សូមគិតអំពីបទពិសោធន៍របស់ប្អូនៗវ័យក្មេងខ្លះដែលបានរៀនឲ្យស្រឡាញ់ព្រះយេហូវ៉ានិងទុកចិត្តលោក ដោយសង្កេតមើលគំរូរបស់ម្ដាយពួកគេ។ បងស្រីលីអានដែលជាកូនរបស់បងគ្រីស្ទីននិយាយថា៖ «យើងមិនអាចសិក្សាគម្ពីរបានទេ ពេលដែលឪពុកយើងនៅផ្ទះ។ ប៉ុន្តែ ម្ដាយខ្ញុំតែងតែចូលរួមកិច្ចប្រជុំ។ ទោះជាយើងមិនសូវស្គាល់គម្ពីរក្ដី ការប្រព្រឹត្តរបស់គាត់បានជួយខ្ញុំនិងបងប្អូនខ្ញុំឲ្យមានជំនឿរឹងមាំ។ យើងដឹងថាសាក្សីព្រះយេហូវ៉ាបង្រៀនសេចក្ដីពិត មុនយើងចូលរួមកិច្ចប្រជុំទៅទៀត»។
១៥ ជួនកាល ឪពុករបស់បងស្រីម៉ារៀបានជេរប្រមាថនិងប្រើអំពើហិង្សាលើគាត់ បងប្អូនគាត់ និងម្ដាយគាត់ ដោយសារពួកគេចូលរួមកិច្ចប្រជុំ។ បងម៉ារៀនិយាយថា៖ «ម្ដាយខ្ញុំជាស្ត្រីម្នាក់ដែលមានចិត្តក្លាហានបំផុត។ ជួនកាលពេលខ្ញុំនៅក្មេង ខ្ញុំមិនព្រមធ្វើអ្វីណាមួយ ដោយសារខ្លាចថាគេនឹងនិយាយអ្វីអំពីខ្ញុំ។ ប៉ុន្តែ ពេលខ្ញុំឃើញម្ដាយខ្ញុំមានចិត្តក្លាហាន ហើយតែងតែចាត់ទុកព្រះយេហូវ៉ាថាសំខាន់បំផុតក្នុងជីវិត នោះបានជួយខ្ញុំឲ្យយកឈ្នះការភ័យខ្លាចមនុស្ស»។ ឪពុករបស់បងប្រុសជូវ៉ាវបានហាមក្រុមគ្រួសារមិនឲ្យនិយាយអំពីព្រះយេហូវ៉ា ឬគម្ពីរនៅផ្ទះ។ បងជូវ៉ាវនិយាយថា៖ «អ្វីដែលប្រហែលជាបានជួយខ្ញុំច្រើនបំផុតគឺម្ដាយខ្ញុំសុខចិត្តលះបង់អ្វីៗទាំងអស់ដើម្បីធ្វើឲ្យឪពុកខ្ញុំពេញចិត្ត លើកលែងតែសេចក្ដីស្រឡាញ់របស់គាត់ចំពោះព្រះយេហូវ៉ា»។
១៦. តើគំរូរបស់ម្ដាយអាចមានឥទ្ធិពលយ៉ាងណាទៅលើអ្នកឯទៀត?
១៦ ម្ដាយទាំងឡាយ សូមចាំថាគំរូរបស់អ្នកមានឥទ្ធិពលលើអ្នកឯទៀត។ តើតាមរបៀបណា? សូមគិតអំពីឥទ្ធិពលដែលគំរូរបស់អឺនីសមានទៅលើសាវ័កប៉ូល។ ប៉ូលបានកត់សម្គាល់ថាជំនឿដែលគ្មានពុតត្បុតរបស់ធីម៉ូថេ‹ជាជំនឿដែលអឺនីសមានមុន›។ (២ធី. ១:៥) តើប៉ូលបានកត់សម្គាល់ជាលើកដំបូងអំពីជំនឿរបស់អឺនីសនៅពេលណា? គឺទំនងជាក្នុងអំឡុងដំណើរលើកទី១ជាសាសនទូតរបស់ប៉ូលដែលគាត់បានជួបឡូអ៊ីសនិងអឺនីសនៅក្រុងលីស្ត្រា ហើយគាត់ប្រហែលជាបានជួយពួកគាត់ឲ្យទៅជាគ្រិស្តសាសនិក។ (សកម្ម. ១៤:៤-១៨) សូមគិត ប្រហែលជា១៥ឆ្នាំក្រោយមក ពេលប៉ូលសរសេរសំបុត្រទៅធីម៉ូថេ ប៉ូលនៅតែចាំការប្រព្រឹត្តដ៏ស្មោះត្រង់របស់អឺនីស ហើយបានយកគាត់ជាគំរូឲ្យអ្នកឯទៀតធ្វើតាម។ យើងអាចឃើញច្បាស់ថាគំរូរបស់អឺនីសមានឥទ្ធិពលយ៉ាងយូរទៅលើសាវ័កប៉ូល ហើយក៏ទំនងជាមានឥទ្ធិពលទៅលើគ្រិស្តសាសនិកជាច្រើនទៀតនៅសតវត្សរ៍ទី១ដែរ។ ដូច្នេះ បើអ្នកកំពុងចិញ្ចឹមអប់រំកូនដោយគ្មានគូ ឬក្នុងក្រុមគ្រួសារដែលមានជំនឿខុសគ្នា សូមដឹងថាគំរូរបស់អ្នកអាចពង្រឹងកម្លាំងចិត្តនិងជំរុញចិត្តបុគ្គលដែលនៅជុំវិញអ្នក។
ការជួយកូនឲ្យស្រឡាញ់ព្រះយេហូវ៉ាគឺត្រូវការពេល។ សូមកុំឈប់ព្យាយាម! (សូមមើលវគ្គ១៧)
១៧. តើអ្នកគួរធ្វើអ្វីបើការខំប្រឹងរបស់អ្នកដើម្បីបង្ហាត់បង្រៀនកូនមើលទៅមិនសូវបង្កើតផល?
១៧ ចុះយ៉ាងណាបើអ្នកខំប្រឹងព្យាយាមបង្ហាត់បង្រៀនកូនរបស់អ្នក ប៉ុន្តែមើលទៅមិនសូវកើតផល? សូមចាំថាការបង្ហាត់បង្រៀនកូនត្រូវការពេល។ ដូចបានបង្ហាញក្នុងរូបភាព ពេលដាំដំណាំ ជួនកាលអ្នកប្រហែលជាឆ្ងល់ថាតើដំណាំនោះនឹងដុះលូតលាស់ ហើយបង្កើតផលឬក៏យ៉ាងណា។ ទោះជាអ្នកមិនអាចកំណត់លទ្ធផលក្ដី អ្នកបន្ត ស្រោចទឹកដំណាំនោះដើម្បីទុកឱកាសកាន់តែច្រើនឲ្យវាដុះលូតលាស់។ (ម៉ាក. ៤:២៦-២៩) ស្រដៀងគ្នាដែរ ក្នុងនាមជាម្ដាយ ជួនកាលអ្នកប្រហែលជាឆ្ងល់ថាតើកូនរបស់អ្នកនឹងស្រឡាញ់ព្រះយេហូវ៉ាឬយ៉ាងណា។ អ្នកមិនអាចកំណត់លទ្ធផលបានទេ។ ប៉ុន្តែ បើអ្នកបន្តខំព្យាយាមអស់ពីសមត្ថភាពដើម្បីបង្ហាត់បង្រៀនកូន អ្នកកំពុងទុកឱកាសកាន់តែច្រើនឲ្យពួកគេទៅជាមិត្តសម្លាញ់របស់ព្រះយេហូវ៉ា។—សុភ. ២២:៦
ចូរពឹងជំនួយពីព្រះយេហូវ៉ា
១៨. តើព្រះយេហូវ៉ាអាចជួយកូនអ្នកឲ្យទៅជាមិត្តសម្លាញ់របស់លោកយ៉ាងដូចម្ដេច?
១៨ តាំងពីសម័យគម្ពីរ ព្រះយេហូវ៉ាបានជួយមនុស្សវ័យក្មេងរាប់មិនអស់ឲ្យទៅជាសម្លាញ់របស់លោក។ (ចសព. ២២:៩, ១០) លោកក៏អាចជួយកូនរបស់អ្នកឲ្យមានចំណងមិត្តភាពជាមួយលោកដែរ បើពួកគេចង់។ (១កូ. ៣:៦, ៧) ទោះជាមើលទៅកូនរបស់អ្នករសាត់ចេញពីព្រះយេហូវ៉ាក្ដី លោកនឹងបន្តស្រឡាញ់ពួកគេ។ (ចសព. ១១:៤) បើកូនរបស់អ្នកបង្ហាញ«ចិត្តគំនិតត្រឹមត្រូវ»សូម្បីតែបន្តិច ក៏លោកនឹងប្រុងប្រៀបជួយពួកគេឲ្យទៅជាសម្លាញ់របស់លោក។ (សកម្ម. ១៣:៤៨; ២ប្រ. ១៦:៩) លោកអាចជួយអ្នកឲ្យនិយាយអ្វីដែលត្រឹមត្រូវនិងចំពេល នៅពេលដែលកូនរបស់អ្នកត្រូវការបំផុត។ (សុភ. ១៥:២៣) ឬលោកប្រហែលជាជំរុញចិត្តបងប្អូនណាម្នាក់ក្នុងក្រុមជំនុំឲ្យយកចិត្តទុកដាក់ជាពិសេសចំពោះកូនរបស់អ្នក។ ទោះជាកូនរបស់អ្នកធំហើយក្ដី ព្រះយេហូវ៉ាអាចជួយពួកគេឲ្យនឹកឃើញអ្វីដែលអ្នកធ្លាប់បង្រៀនពួកគេកាលពីតូច។ (យ៉ូន. ១៤:២៦) ព្រះយេហូវ៉ានឹងផ្ដល់រង្វាន់ដល់អ្នក ពេលអ្នកបន្តព្យាយាមបង្ហាត់បង្រៀនកូនតាមរយៈពាក្យសម្ដីនិងគំរូ។
១៩. ហេតុអ្វីអ្នកអាចប្រាកដថាអ្នកទទួលការពេញចិត្តពីព្រះយេហូវ៉ា?
១៩ សេចក្ដីស្រឡាញ់របស់ព្រះយេហូវ៉ាចំពោះអ្នកមិនអាស្រ័យទៅលើការសម្រេចចិត្តរបស់កូនអ្នកទេ។ ព្រះយេហូវ៉ាស្រឡាញ់អ្នក ដោយសារអ្នកស្រឡាញ់លោក។ បើអ្នកជាស្ត្រីមេម៉ាយ ព្រះយេហូវ៉ាសន្យាថា លោកនឹងធ្វើជាឪពុកដល់កូនអ្នក ហើយជាអ្នកការពារអ្នក។ (ចសព. ៦៨:៥) អ្នកមិនអាចកំណត់ថាកូនរបស់អ្នកនឹងសម្រេចចិត្តបម្រើព្រះយេហូវ៉ាឬយ៉ាងណាទេ។ ប៉ុន្តែ បើអ្នកបន្តពឹងជំនួយពីលោកនិងខំអស់ពីសមត្ថភាព អ្នកនឹងទទួលការពេញចិត្តពីលោក។
ចម្រៀងលេខ១៣៤ កូនៗជាអំណោយមកពីព្រះ
^ វគ្គ 5 ក្នុងអត្ថបទនេះ យើងនឹងពិចារណាប្រយោជន៍ដែលម្ដាយគ្រិស្តសាសនិកអាចទទួលពីការរៀនអំពីគំរូរបស់អឺនីសដែលជាម្ដាយធីម៉ូថេ និងរបៀបដែលពួកគេអាចជួយកូនឲ្យស្គាល់និងស្រឡាញ់ព្រះយេហូវ៉ា។
^ វគ្គ 4 ឈ្មោះខ្លះបានត្រូវផ្លាស់ប្ដូរ។
^ វគ្គ 9 ជាឧទាហរណ៍ សូមមើលមេរៀនទី៥០ក្នុងសៀវភៅសប្បាយនឹងជីវិតដែលគ្មានទីបញ្ចប់! និងអត្ថបទដែលមានចំណងជើងថា«ជំនួយសម្រាប់ក្រុមគ្រួសារ»ក្នុងកិច្ចបម្រើព្រះ ខែមករា ឆ្នាំ២០១១ ទំព័រ៣-៦។